一個人對自己有沒有意思,當事人大概都能感受得到,所以李乘風自然亦感受到Jolina對自己是真的產生了感情,只是這感情的深淺去到那種程度,他卻沒法把握。始終對於她們這類人,你很難相信她們會真的改變全心全意去喜歡上一個人。
 
為了效果最大化,他決定為他們的最後一天花點時間和功夫。和Jolina在赤柱廣場吃了一頓醉人的燭光晚餐後,他又邀請她陪他到了附近的淺水灣海灘散心。
 
在星空下的海灘吹著海風漫步,李乘風主動拖著Jolina的手走了一段路,然後雙雙坐在沙灘上。
 
「我好耐無嚟過海灘喇… 夜晚吹住海風睇住星星真係好舒服…」李乘風望著夜空說道。
 
「我都好耐無嚟過,亦好耐無咁睇過星星喇,多謝你帶我嚟…」Jolina把頭依傍在李乘風的膊頭上說。
 


「我多謝你唔拍污漕陪我嚟就真~ 係喎,我有樣嘢想送比你呀~」說完李乘風從袋中拿出一個正方盒,打開是一條掛有一個漂亮新月形狀吊墜的頸鏈,李乘風為了報仇確實下了重本。
 
「嘩,好靚呀~可唔可以幫我戴起佢?」望著這條頸鏈,Jolina是真心喜歡。
 
「當然無問題~」說完李乘風便很細心地為Jolina戴上了那條項頸鏈。
 
「多謝你… 我好鍾意…」說完, Jolina竟突然哭起來。
 
「感動到喊咁誇張?」李乘風有點驚訝Jolina的眼淚。
 


「李乘風… 你有無聽過其實有時太完美反而係破綻?」
 
李乘風聽到後身體微微抖震了一下,沒有回應。
 
「其實我好有興趣知道你哩半年究竟發生過啲咩事… 就算你受咗打擊性情大變,唔再相信愛情成為咗player,都無理由可以變得咁快快學識咁多技巧同女人心理… 定係你身邊有高手教你?」Jolina問出心裏的疑惑。
 
李乘風仍然沒有回應。
 
「之前聽咗成年周紫盈講關於你嘅野,我大概都了解你係一個咩嘅人。如果你對我真係動咗真感情,你唔會係咁…而你千方百計用咁多技巧同心理戰去挑撥我想我對你動情,其實反而成為咗你嘅破綻, 所以之前我就已經知我賭輸咗,你嘅所作所為只係單純為咗報復我… 不過唔知點解,明知係咁,明知好危險,我仍然想深陷其中去同你玩哩場遊戲,或者奢想有日可以改變到你…」Jolina再說。
 


「因為...我們都寂寞…」李乘風終於回應了一句。
 
「有無興趣聽個故仔?」流著淚的Jolina笑了笑,然後問道。
 
「洗耳恭聽。」

「從前有個細路女,因為父母親年幼意外懷孕,所以一出生就生長係一個貧窮嘅家庭。不過雖然窮,但哩個家庭仍然充滿住溫暖,女孩嘅父母一直好恩愛亦好錫佢。到到中學,哩個女仔長大後遇上佢嘅初戀,係一個既靚仔又溫柔嘅男仔,嗰刻女孩覺得自己好幸福。
 
不過喺佢中三果年,佢嘅父親因為一場急病逝世,而因失去了經濟支柱加上之前為咗醫佢父親嘅醫藥費亦令哩個本身就唔富裕嘅家庭財政上更加拮据,陷入好大嘅困難。初初女仔嘅男朋友對佢仍然好好,好照顧佢,個女仔好感動終於喺一晚將自己寶貴嘅第一次交咗比佢。嗰陣佢好有信心只要個男仔繼續喺自己身邊,所有難關佢都一定可以捱過。
 
點知升上中四後,班上有個屋企好有錢嘅女仔同樣睇中咗個男仔並開始靠近佢,仲用好多著數去引誘哩個女仔身邊要好嘅同學暗地裏幫助自己,最後個男仔好快就唔要哩個女仔選擇咗同個有錢女一齊,就連本身個女仔啲同學都因為有錢女要求下一齊離棄咗佢...
 
個女仔痛不欲生,而係哩個時候,女仔母親亦因敵不過財政壓力,終於答應咗一直垂涎佢美色嘅上司求婚改嫁,自此,女仔屋企再無財政壓力甚至過上富裕的生活,但同時間女仔亦再無見過母親真正嘅笑容,反而只係喺佢身上見到越嚟越多嘅瘀痕。
 
為咗想搶返男朋友同埋朋友,女孩想問繼父攞錢,點知哩個繼父原來一直為母親嘅第一個男人唔係自己而耿耿於懷,結果藉此向自己個繼女提出咗一個禽獸嘅要求,嗰陣女仔心灰意冷又覺得反正自己已經唔係第一次,為咗報仇就暪住母親答應咗。點知繼父事後發現女兒原來都已經唔係第一次後就好嬲,最後狠狠虐待完個女仔之後只係肯比原定金額嘅三成佢。


 
女兒嘗試拎住啲錢去搵返男仔同朋友結果失敗,不過好快佢就發覺自己最大嘅武器原來並唔係錢,而係自己嘅身體。最後,佢主動色誘所有曾經背叛佢嘅女同學嘅男朋友,同佢地上晒床然後再拆散咗佢地。
 
自此,哩個女仔就好鍾意引誘人男朋友,實際上,佢亦越嚟越了解哩個世界上人性嘅醜陋,因為根本無一個男人可以真正拒絕自己,個個最多只係表面扮下嘢,但最後都係會忍住將佢推倒在床上,而每一次成功令其他男人背叛女朋友後哩個女仔都會得到一種精神上嘅滿足感。直至有一日,佢遇到一個大學roommate嘅男朋友。
 
哩個男朋友初初比個女仔嘅感覺其實好似佢個初戀男朋友,亦因而引起個女仔強烈嘅興趣。不過當女仔嘗試撩佢然後慘食閉門羹後,直覺話比女仔聽哩個男仔係與眾不同好難攪,所以女仔只可以靜待機會同埋向佢房友埋手。
 
不過或者個男仔真係太好,房友要求又好高,面對佢地嘅恩愛,女仔一直都苦無對策,但每次見到個房友講佢地點恩愛,佢男朋友點好,女仔都好妒忌,佢會諗點解當日佢個初戀男朋友唔係咁,點解自己要咁慘。佢接受唔到,佢要証明比自己睇哩個世界係無拆唔散嘅情侶。
 
不過愛情最大嘅敵人從來都係時間,而直到有日,佢亦終於見到佢房友對另一個異性產生咗些微嘅興趣,而哩個異性又碰巧曾經係佢成功引誘過嘅其中一個渣男,佢知自己苦等嘅機會終於嚟到,最後佢都終於成功令房友背叛咗佢男朋友。
 
不過就算係咁,對哩個女仔嚟講件事其實並唔完滿,因為最後雖然佢地係散咗,但並唔係因為男仔受唔住自己誘惑而只係個房友嘅問題,佢最後都係得唔到個男仔。而當佢見到個男仔當日對自己嘅恨意,佢亦知自己唔會再有機會。
 
點知半年後,竟然比個女仔再遇上哩個男仔,仲要發現個男仔已經變成咗另一個人成為咗玩家。一方面個女仔好開心終於得償所願,仲係佢身上搵到好多種久違已久嘅感覺,但另一方面佢又覺得佢已經再無機會見到同戰勝當日專一深情嗰個男仔…佢好想再見佢一面,挑戰多佢一次…
 


結果就係哩個越積越大嘅心魔,令佢最後一敗塗地。佢知自己對哩個男仔真係動咗感情,亦曾經奢望過個男仔真係明白自己可以成為自己嘅知音人,點知最後佢都係要接受,哩一切,都只係個男仔為咗報仇要傷害自己而設嘅佈局,而佢最終亦成功咗…」
 
李乘風聽完後百感交集,對Jolina的恨意亦好像全消失殆盡。每個人都有自己的故事,也許可恨的人真的都必定有其可憐之處吧。當然這不是說她情有可原值得原諒,而只是對大家都曾經是被傷害者的一種共鳴。
 
「咁你又想唔想聽下個女仔口中嗰個男仔嘅故事?」
 
「嗯!」Jolina確實很想知道。
 
「個男仔生長係一個單親家庭,因為佢老豆係一個到處留情周圍玩女人嘅人,男孩母親忍受不住,所以二人好早就已經離婚,個老豆無耐之後仲自殺死咗… 男孩同母親自少相依為命,見住母親日日鬱鬱寡歡嘅樣子,男仔因此同自己講過自己將來一定唔可以好似自己個老豆咁周圍害人,一定要做個專一嘅男人。
 
到到中四嗰年男孩母親因病過身,佢嘅人生就跌入咗孤獨嘅旋渦,直至一位女性嘅出現,佢地經歷咗好多野,男孩亦因緣際會下填補咗女性心入面嘅一個遺憾,二人承諾互相扶持下終於一齊,然後經歷咗好開心嘅一年。
 
點知一年後,男孩發現一切都變咗,某日佢發現那女性有咗第二個,仲同佢上咗床。當時男孩悲痛欲絕,但湊巧又有另一個女孩出現,一直喺男孩身邊陪住佢,幫佢捱過咗最難過嘅時光… 因為女孩嘅真心同付出,男孩願意繼續相信愛情,佢地之後亦都過咗好開心嘅兩年多時光,直至個女孩嘅大學roommate將一切都催毀晒…
 
自此,男仔明白哩個世界係無永恆不變嘅愛情,既然如此,佢問自己點解仲要相信佢同認真對佢? 佢突然明白或者佢老豆當日都唔係完全錯晒。不過就算係咁,佢覺得都要為自己同個女仔出返啖氣,特別係當佢見到個女孩因受傷已經完全唔同晒,自暴自棄,完全無咗昔日嘅光彩,個男仔真係好心痛而且發誓一定要為佢報仇…」


 
「你見過紫盈?」聽到這裏Jolina問道。
 
「嗯…」
 
「每個人都要為自己嘅決定負責,佢係,我依家都係…」聽完整個故事,她明白自己對李乘風做了甚麼傷害,亦明白為甚麼他堅持要報仇。
 
「既然目的已經達成,你亦已經為你嘅決定付出代價,我都唔應該再恨你…」事已至此,李乘風亦決定放下。
 
「多謝…」
 
「不過喺徹底放低前,我想比最後嘅一個安慰同懲罰你…」
 
 
這晚,李乘風和Jolina在酒店內由天黑激戰至天光,直至Jolina終於支撐不住睡著了,李乘風才靜靜地離開了房間。他給了她成為傳說以外第一人的滿足感,但同時間她為此亦付出了沉重的代價。


 
當Jolina醒來看見已經樓去人空,她知道她們的遊戲已經完結。他成功了,久違了的失戀感覺霎時湧上心頭。而她亦知道自己這一生,不論在生理和心理上,都永遠不會忘記得了對方。以後那怕她再和其他男人上床,他們都不可能給得了她這一晚的感覺。
 
 
這晚後,李乘風廢除了他對自己的約束,因為他自信自己已經能百毒不侵。 從此那充滿傳奇色彩的都市傳說亦漸漸消失。只是他沒有想過,這會是他惡夢的開始,而他更沒想過第一個讓他詛咒應驗的人,竟然會是Jolina。
 
任誰也沒想過Jolina會是傳說中的最後一人,更沒人想過除了破除了不會和傳說有第二個夜晚外,她還會意外地用另一個方式把另外半邊傳說都完全催毀。若將來有人告訴她這一晚是李乘風最後的顛峰之作,也許她會覺得這遺憾也不算太差,而在之後每天的痛苦中亦多少能得到一點點的安慰和滿足感。