春夏秋冬都是妳: 九

吃完飯，銘爺開著他的紅色跑車送我們回去。

「樂晴你上去先啦，我同銘爺傾幾句」
「哦，拜拜銘爺」
-
「點啊朗哥，睇你如沐春風又有青梅竹馬都應該無咩煩惱㗎啦」
「我想追樂晴」我直接說
「...」「咁咋？你日日都做緊呢個行為㗎啦」他笑著說
「你會支持我㗎呵？」
「梗係...一定支持」


「你係唔係仲掛住紫彤？」
「邊有可能咁快放低吖...可能我呢世都係一支公，直到我見返佢」
「試吓啦，呢個世界好大，如果佢仲記得妳都唔想見到你咁」
「知喇，你都係，好好珍惜樂晴」

珍惜樂晴，這句話纏繞我的腦海很久很久。
一直以來的寵愛，叫做珍惜嗎？

三個月時限，來吧！





*星期六，女人的快樂購物日。
難得樂晴一家都回了香港，兩家人自然十分高興，出手闊綽的程度也自然變得誇張。

「媽...妳今日第二個手袋喇喎，買咁多得唔得㗎」我關心著她的銀包
「今日開心吖嘛，係唔係啊沈太？」
「啱啊，妳睇吓呢件都好似幾靚」

我只好嘆氣，看看男人那邊會不會好一點。



「老豆你又買酒？！」我向著正津津樂道選著紅酒的父親說
「哎呀今日開心吖嘛，況且有人陪我飲」
「呃...」既然樂晴父親也想喝就不好罵他

且慢，樂晴也在買東西？？？

「喂喂喂，你又買唇膏？」我打斷了她
「咩喎，呢個色號新出㗎」她不忿地說

咪都係紅色 咪都係一 __ 樣。

「唉好啦好啦，我送俾妳喇」我說

是金錢跌落的聲音啊


也許對女生一定的寵愛是必須吧。

「點啊各位，下一站想去邊啊」祈求不再是商場
「銅鑼灣時代廣場！」全車人異口同聲地說

星期六的銅鑼灣，真的很恐怖。
塞隧道，出隧道後塞內街，塞完內街等停車場。
重點是，只有我等，其他人都下車了。
到即將有位子的時候，他們卻捧著一袋二袋戰利品回來了。

「點啊5位，滿意未」我沒好氣地說
「今日真係唔該晒朗仔你喇」樂晴母親說
「跟住我地去食飯啦」

終於可以離開駕駛座了，感覺人生的希望又歸來了。


腳麻的要死，還有今天的油錢。

吃飯究竟吃了什麼真的不太清楚，只記得一回到家我倒頭就睡。

第二天，只聽到乒乒乓乓的噪音，眼皮卻提不起來，直到身體感覺到有人跨坐在我身上......

「仲唔起身～？」
「啊啊啊啊啊啊！」我大叫
「做咩啊？」樂晴一臉不解地問
「妳坐住...妳坐住我...」我痛苦的面具終於令樂晴明白我的意思
「哦～，唔錯唔錯」她不懷好意地笑

為何昔日天真爛漫的小女孩會變得如此...

「食早餐啦～我親手整㗎」看著那焦黑的火腿我只好自求多福


「好好食喎～」我面容扭曲地說
「好食就食多啲啦，廚房仲有10片火腿」
「咁多精製肉你想我陽痿定英年早逝？」我不客氣地說
「只要一日有我，你都無可能陽痿！」樂晴叉著腰說
「希望係咁，啲長老呢？」我咀嚼著焦黑的火腿說
「佢地話去澳門兩日一夜喎，所以呢兩日得我同你咋」樂晴在廚房大叫著
「得我同妳...？」我問
「喂！你唔好咁變態喎，我將你變陽痿㗎」樂晴鼓起泡腮說

妳生氣的樣子很可愛。

「講笑咋，邊個對你有興趣，太～平～公～主～」
「你搞清楚，邊個對你有興趣啊，短到死」

唇槍舌劍，大概是情侶的相處之道吧。


一番糾纏後，我和樂晴都決定出外——家裡實在太悶了。

「喂去邊㗎」我問樂晴
「欸～不如去彩虹邨啦」她說
「吓，又影港女相...」我嘆氣
「你唔好理，有無帶腳架同相機？」
「有～同你出街唔夠膽唔帶...」我說

我們決定由土瓜灣步行去彩虹邨消磨時間，卻沒有意識到外面的太陽是多麼的熾熱。

「靚女，你認真㗎？今日好熱喎？」我痛苦地問
「多啲曬先可以吸收足夠維他命㗎，唔好咁懶啦，今日你係我跟班，淨係可以聽我話！」樂晴對著我說
「唉，都唔知妳男朋友第時點算」我說
「我男朋友都要係咁咯。不如咁啦，我今日同你特訓吓，宜家你係我男朋友，我係你女朋友，所有情侶要做嘅嘢我地都要做齊。夠唔夠膽玩先？」樂晴自信滿滿地說
「梗係夠膽，係驚你玩唔起咋」我不甘示弱
「黎吖，拖手先吖」樂晴毫不客氣地拖起我的手，讓我想起中學青蔥歲月的一件事……