《時光不能夠重新來一遍...》第二季: 八，眼中釘(下)

黑夜來臨已久，窗外月色在密佈的烏雲之間若隱若現。
我獨自一個人，靜靜的緊閉著眼睛，躺在床上。
床尾架設著的床板桌上，放了一個半小時前醫生巡房時護士放下的蘋果。

不一會，我聽到病房的門被輕力的推開後很快地再次關上、有腳步聲謹慎的出現在病床周圍。
看來有誰，一然不發的走進來了。
我仍然緊閉著雙眼，從外看來我就像保持昏迷的狀態般。
我一直聽著那腳步聲由原本輕輕的來回踱步，逐漸變得急速又混亂。
好一陣子，最後腳步完全停止下來，房間再次回復安靜。





忽然間，那個偷偷潛入的人以粗獷又怨恨的語氣喃著「我真係好憎你，我真係好憎你，我真係好憎你...」

我沒有作出任何反應，依舊裝睡。

「就係你 ! 」他愈講愈激動「搶走咗佢 ，重要害死佢 ! 」

我害死了誰 ?



「你根本唔知道 ! 我比起你更加幾咁鐘意佢 !」

該不會是在講她吧...

「配得上佢嘅人唔應該係你 ! 而係我 !」

他在講芷欣，沒錯。

「哈哈哈哈哈哈哈哈  ─ 」傳來好一陣子瘋狂的大笑聲。



「我... 而家終於有機會...」

「可以令你感受下我呢咁多年黎係活得幾咁難受 ! ! ! 」他聲嘶力揭的大喊。



此時，我瞪開雙眼，是時侯把「犯人」當場對質。

「所以，你應該就係踢我落樓梯果個人 ?  係唔係 ?」睜開雙眼的剎那我說道。

我凌厲的盯著面前這個偷偷闖進來的傢伙，並把他全身由頭到腳打量了一次。
這個心懷不軌的他，果然跟較早前踢我的傢伙相同的打扮。

「嗚哇 ? ! 你 ! ! ! 」他明顯的被我突如其來的「甦醒」嚇到後退幾步。



接著我從床上坐起來冷靜的問「你頭先講嘅說話，係唔係講緊陳芷欣 ? 」

「你... 點解會...」他仍然震驚的有點口齒不清。

「你想講我點解會聽到你講野 ? 因為我一早就醒咗，只係扮瞓等緊你呢個幕後黑手出現。」身穿病人服的我邊站起來邊跟他對峙著。

「...」聽狀他無言以對，非常緊張的緊握著拳頭。

「你到底係邊個 ? 」我問。

下一秒，他荒張得多後退幾步、接著反應很快的衝開房門向外逃走。
此刻我並沒有馬上追上去，而是從床邊拿起手機撥打了一則電話。

「佢應該衝緊出黎，跟住落黎靠哂你。」



-----------------------------------------------------------------------------

✽轉換雷俊宇視覺✽

「噢 ! 等我黎 ! 」另一邊廂，我掛掉電話，聚精會神的看著病房外空無一人的走廊盡頭。

從遠處昏暗的盡頭傳來愈漸大聲的腳步聲，直至有人影拔足狂跑，跑過坐在大堂的我面前。
我馬上放下手機到一旁椅子上，起身追著那傢伙。
一直不遺餘力的跑著，感覺快要伸手能捉到他的肩膀時，那傢伙一個勁力把我的手甩開、繼續往前狂跑。
他，愈跑愈快，還很幸運的一支箭跑進了升降機後馬上下樓離開。
就這樣那傢伙的身影眼白白在我面前消失掉。

我上氣不接下氣的呆站在升降機門前，苦惱著該不該跑樓梯去追截那傢伙。
此時，張同學從病房慢步走過來「Hey !」



我回過神來搖搖頭「追唔到 ... 」

「唔緊要，辛苦你。」他走到一旁汽水機買了一瓶冷冰冰的礦泉水並拋到我手上。

「Thank you ... 」我氣喘的接下那瓶水，馬上咕嚕咕嚕的喝起來。

不一會，喝好後我再開聲「無諗過俾你講中，真係有人今晚想黎整你。」

「呢啲... 算係直覺 ?  正如我之前講，做完壞事嘅人，內心一定忍唔住好想要即刻知道成果。令我入廠，當然要睇睇我死得未。」他冷笑。

「又係喎 ...」我很佩服他居然大膽的讓自己置於剛才一個人靜候在病房的險況，搞不好可能那個人是個瘋子會襲擊他呢。

「我大約，知道果個整我嘅人係邊個。」他臉上出現嚴肅的表情。

「係 ? 」我驚訝。



--------------------------------------------------------------------------------------------------
時間追溯到幾小時前。

「靠哂你啦雷俊宇。」張同學說。

「吓 ? 」

「既然你對呢件事咁自責，不如請你今晚留係醫院多幾粒鐘。」他問。

「欸 ? 可唔可以問你點解咁講 ? 」

「因為，當係陪下我 ? 唔知點解有種感覺件事無咁易完，好可能踢我落樓梯個條友一直監視緊我一舉一動。」

「咁你搵頭先詩瑤家姐陪你咪得囉 ?  搵女朋友陪唔係先係最正路咩 ?  」我很困惑的盯著坐在床上的張同學。

「其實佢唔係我女朋友，我同佢無野嘅。」他皺皺眉。

「但... 佢又黎接你放學又黎醫院探你，而且仲咁靚女 ! 點會唔係啊 ?」我續問。

張同學搖搖頭「總之，就係唔係啦。我同佢之間，有好多野需要傾下同要了解佢對我嘅諗法、畢竟你都知我係岩岩先由一個昏迷嘅人變翻做正常現實生活嘅人...  我對現實裡面嘅佢覺得好陌生。」

啊... 他之前告訴過我自己的故事呢。

「嗯，又提起咗你傷心事，唔好意思。」

「無事，唔緊要。」他平靜的回應。

「其實呢，介唔介意我問你個問題 ? 」接著我再追問。

「可以。」

「其實詩瑤家姐讀緊中幾 ? 同埋佢係邊間中學架 ? 」我好奇的問。

「慈雲山中學。」

「我地學校 ?! 點解我無見過佢係學校入面出現架 ? 」

「佢... 的確係讀我地學校，不過係幾年前嘅事。」

「你意思即係 ... 」

「咪就畢咗業，而家讀緊year 1囉傻仔。」張同學搔搔後腦，苦笑道。

「又係喎，哈哈...」我為自己的愚蠢感到尷尬。

張同學下一秒提起手機，打開手機相簿裡的一張照片說「佢，其實細我一年。原本今時今日嘅佢應該大學都就黎讀完...」

我看向手機中的照片，照片裡有兩張分別一男一女的熟悉但比較稚氣一點的臉孔，應該正是張同學與詩瑤的姐姐吧?
照片裡小時侯的張同學和詩瑤姐姐一同高舉著V字勝利手勢，臉上燦笑著的。

「好細個... 以前原來你個樣咁純真得意，點解而家成日板口板面 ?」 我問。

「呃 ... 」剎那間他沒能反應，不久後再說「呢個唔係重點，佢而家先開始year1嘅生活係因為我。」

「嗯，因為照顧昏迷咗係醫院嘅你 ?」我問。

張同學點頭「呢件事我都係最近問我爸媽先知，真係無諗過佢會因為我...搞到要延遲讀書。」

「聽你咁講，佢為咗你做得好徹底、如果換轉係我有個女仔咁樣對我... 我一定會盡自己努力去回報佢嘅心意。」我向他打個眼色，拍拍他肩膀。

真讓我羨慕。
我也沒有機會像張同學般遇到一個對自己死心塌地的女生，
反之以前至今每一段的感情都失敗收場。
總是遇到渣女，只有對我外表上心而忽視內在的...那些渣女。

聽狀，張同學懂我的意思然後愣住「哈，估唔到居然俾個細過自己咁多嘅人教翻我點做人...」

「無話要教訓你啲咩，只係講我自己嘅感受姐 ! 如果你明我意思就最好啦張同學，唔好辜負咗個好女仔 ! 加油啦。」我精神滿滿的道。

「我... 可能再要多啲時間。」張同學雙眼映照著一絲執念。




鏡頭一轉，隔天。
張同學入醫院的事件沒想到原來已經傳遍整個班房，許多同學都在竊竊私語討論著此事。
坐我身後的何欣彤亦不例外。

今天學校在早會時特別向同學們簡單交代了此事，並謊稱「有同學」不小心滾下樓梯、沒有指名道姓的公開事實的來龍去脈。
當然，因為張同學滾下樓梯的意外，事發經過只有我一個人知道、我並沒有向老師們通告。
張同學希望我暫時先把消息保密而且自己也會裝作不清楚意外原因，要我別打草驚蛇... 為了能找到那個踢他的卑鄙小人。

中午時，我的手機收到通知、領袖生總領事前所未有的突發通知所有領袖生一同在飯後時間開會。

「唔係嘛... 」此時的我一邊盯著手機，一邊在咀嚼飯盒中的小唐菜。

與我正在班房面對面共饍的Ayumi見狀好奇的問「做咩啊做咩啊 ? 有靚女睇 ?」

「我食完飯要即刻走，領袖生個邊要開緊急會議喎。」

「吓 ~ 咁突然 ? 」何欣彤正埋頭喝著手中的蜜瓜奶飲品說道。

我趕快的把面前飯盒吃清光，然後拿起紙巾邊抹著嘴巴邊衝出課室「轉頭再傾 ! 」

這個突如其來未知的會議，令我開始有點緊張。


待續...