【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 當兩小無猜遇上變態Miss
食完lunch返到課室，過多陣三位女士臨上堂前先啱啱好返到，唔知女子組佢哋謦咗啲乜喇，阿Wing佢好似重係唔多開心，其實我有啲想同佢調位，後面兩個坐埋一齊成個火藥庫咁，不過最尾兩堂係Miss Lam嘅Math堂，當然就唔敢亂咁嚟，俾佢強姦過一次重唔見過鬼怕黑咩。
計數…計數…計數。
林：「一鳴，你本數學書呢？」
鳴：「漏…咗喺屋企。」
林：「阿Wing，妳唔借畀佢睇？」
詠：「…唔借呀！」
我諗全班同學連埋Miss Lam佢都呆咗，從來都未見過有人夠膽喺Miss Lam前面用近乎發脾氣嘅語氣講嘢，大聲到班房出面都聽到，我諗佢兩個都兇多吉少。
Miss Lam佢好冷靜，左望望右望望然後行咗嚟我張枱前面，望一望詩敏反應就攞起咗我本數學書放咗喺一鳴張枱上面，詩敏佢瞬即褪咗佢本書去我哋枱中間。
林：「唔記得帶書就罰做數啦，成個Chapter 4嘅單數題目唔該，星期一交畀我。」
真係聽到都覺得恐怖，上次Chapter 3嘅三份一單數都做咗我一整日，成個Chapter 4真係可以用功德無量嚟形容。
鳴：「Miss！但…Chapter 4有一堆題目要畫圖…」
勇者竟然開口講數，不得不佩服佢嘅魄力。
林：「你認為我唔知要畫圖咩？你咁講即係話呢份功課有啲難啦？係咪呀？」
鳴：「真係有少少。」
林：「溝女咁難你又溝！」
今次到Miss Lam佢怒吼，比頭先Wing發脾氣更加震憾，句內容係幾好笑嘅，但全班無人敢笑。
林：「啱嘅，一鳴你計數都幾叻，罰你計數無乜意義，咁啦，你就同我抄咗成個Chapter 4，Quadratic Equation part two一次，由頭到尾，所有文字連註解連圖連公仔連bubble box，畀埋本單行簿你慢慢抄。」
鳴：「…」
林：「我理得你哋啲關係七國咁亂，但上堂唔好攪到我，只會攪返你自己，一鳴你放咗學就開始喺課室抄啦，我叫校工佢哋六點先鎖門。」
到咗落堂，Miss Lam個樣好正常，都無理過嗰兩位主角，而其他同學事不關己當然陸續離開，唔知係咪要去交換情報定謦花生喇。
一鳴攞住我本數學書，加本單行簿開始寫字，而阿Wing就望住佢有啲唔知點好，畢竟件事嘅原因都係佢。
鳴：「Wing妳返去先，唔使陪我喇，等我靜下。」
班房度終於剩返我同一鳴兩個。
鳴：「今次輪到我喇，慢慢笑我啦。」
我：「有乜好笑喎，你夠膽同Miss Lam討價還價真係好型。」
鳴：「型個屁，咪火上加油始速禍焉囉，你都唔使陪我喇，你星期五唔係要練波咩？」
我：「但我本書重喺你度喎。」
鳴：「妖，你練完我都未走得啦，到時畀返你囉，快啲去風流快活同你女神打波啦。」
我：「有幾快活呀？我同女仔就打波，你同女仔就打真軍，有得咁快活我抄晒成本數學書都得呀。」
鳴：「頂你個肺！走呀！信唔信我搵本數學書車你㗎！」重講得笑，未死得嘅。
跟住我就落禮堂練波，通常頭嗰一粒鐘都會正經同隊友練，最後先同詩敏佢打三四個字，始終唔可以太過份，就算我同佢嘅嘢通晒天都無謂鶻突，通常啲隊友都會好通氣抖下畀個time gap我同佢打。
今日同佢打咗十分鐘到佢就話攰。
敏：「過嚟幫我拉下後手筋吖。」
我：「吓，我？」
敏：「係呀，有乜問題？啲師妹又走晒。」
問題咪就係我要掂妳隻手囉，雖然日日同妳喺埋一齊，全世界都知我追妳，但我真係無乜掂過妳…不過後手筋係的確有人幫好啲嘅，咁我唔客氣。
敏：「你個friend佢哋搞乜呀？」
我：「我唔係好知㗎咋，Wing無同妳哋講咩？」
敏：「你唔好以為我哋女仔講人八卦可以雞啄唔斷咁，一講到自己嘢都係左避右避㗎咋，我哋又唔係識咗好耐，佢兩個係咪真係一齊緊㗎？」
我：「吓？佢哋咁嘅樣重唔係一齊緊？」
敏：「而家夠全世界以為我同你一齊咯。」
又幾有道理喎，如果唔係佢身邊啲仔點會消失。
我：「咁愛都做埋…點會唔係一齊…」
敏：「呀…原來快到咁…」
我：「係呀…都成兩個禮拜前。」
敏：「羨唔羨慕人哋呀？」
做愛，失身，有邊個唔想，但我而家追緊妳，咁樣問我即係質問我想唔想同妳扑嘢啫，重記得同妳表白嗰日放咗學妳講嘅嘢，叫我點答喎…加上睇到一鳴同Wing而家咁樣，我都有啲唔知點。
我：「我都唔知。」
敏：「哦。」
詩敏隻手腕真係又白又滑，但又未至於好似十指不沾陽春水嗰種，啱啱打完波手臂上面有少少汗珠，加啲短短哋嘅汗毛，係一種好自然嘅感覺；而隻手掌呢，由於成日攞住塊拍打波，女仔啲皮又比較簿，加上佢係一個好勤力嘅女仔經常揸筆寫字，所以就當然唔會係一種完美狀態，但係…我鍾意呀！至少我可以近距離咁觀察到佢隻手。
不過最不得了係佢個背脊，俾汗浸濕晒嘅PE衫透晒佢入面件sport top出嚟，一陣陣熱氣帶住女性荷爾蒙芳醇嘅郁香滲入我個鼻度。
敏：「好啦，到我幫返你拉啦。」
就係咁，我同佢調位，坐喺禮堂入面嘅木地板上喺佢前面俾佢拉，詩敏用佢隻手掌包住我嘅手腕，一股暖意隨即襲入我心…
我：「嘩！呀呀！呀…痛！做乜…」
敏：「你肯定喺度諗緊衰嘢！」
我：「邊…邊有喎…點會…嘩呀呀呀！」
敏：「重口硬！」
我：「我知錯喇！」
諗下妳隻玉手啫，有幾衰呀…
敏：「好喇，我都差唔多時間，走先喇。」
我：「哦…咁我送妳返去。」
敏：「唔使，快啲上去搵返你個friend啦。」
我：「送完妳再搵佢都唔遲吖。」
敏：「唔準有異性無人性呀！」
我：「好啦，咁我去睇下佢點先。」
敏：「重有呀，記得你份奬品，我期待緊㗎！」
既然佢講到咁斬釘截鐵，我當然會聽佢話啦，換返套校服上課室睇到佢埋頭苦幹緊，一面灰機，我諗佢都真係差唔多想喊。
我坐喺佢隔籬，佢見到我但粒聲唔出應該都無心情講嘢，其實抄啲字事少，啲圖案先係最麻煩，所以喺佢抄緊左邊頁嘅時候，我就多手咁幫佢畫下右邊頁。
我都唔知點幫佢，唯有做下樣啦。
林：「呀吓…」
時間嚟到五點九，Miss Lam喺門口經過，我即刻以瞬雷不及掩耳嘅速度縮返埋隻手，如果唔係佢要我抄多一份嘅話就真係…
一鳴佢望咗Miss一眼，然後又繼續專心抄嘢。
林：「好似都真係幾慘。」重嚟幸災樂禍？
鳴：「唔係正合妳意咩？」
一鳴係咪失身之後大個仔喇，竟然咁還拖？呢啲說話我真係無勇氣對住Miss講。
林：「慘得過俾自己條女發脾氣？」
一鳴無覆佢，過咗幾秒之後本單行簿多咗滴水。
林：「真係咁慘咪叫條女呵返你，我幫唔到你。」
果然心狠手辣，罰完人哋再挖苦人，我諗係佢先做得出，真係諗起都打冷震。
林：「志華你出一出嚟吖。」
吓，唔係呀化？唔通佢睇到我幫佢罰抄要燒埋嚟我度，唔好咁得唔得呀；我同Miss出咗課室之後佢喺走廊挨住條欄桿望住個操場。
林：「志華，麻煩你幫手睇住佢，等佢唔好咁激動呀。」原來佢係想搵我幫手，都好啲…
我：「但我都唔知點做喎，咪嚟陪下佢囉。」
林：「佢係你朋友仔嚟㗎嘛，你就有方法㗎啦…你同詩敏兩個諗下點樣可以令佢哋冷靜啲啦。」
你想佢哋冷靜，點解重要火上加油？我唔明。
我：「Miss你係咪唔想佢哋拍拖呀？」
林：「佢哋拍拖關我鬼事，我又唔係老一輩鍾意棒打鴛鴦嗰啲變態，但係如果佢哋keep住係咁，呢兩年校園生活會過得好辛苦，會考都分分鐘炒粉。」
我：「都係…我哋諗下點幫佢啦。」
林：「志華，你係咪追緊詩敏？」
嘩，搞乜鬼咁突然，而家先嚟問我，妳唔係未開學就知，重專登調到我同佢一齊坐嘅咩？
我：「算…係啦。」
林：「乜嘢叫算係啦？男仔一係就一，一係就零，係就係，唔係就唔係，無中間嘅。」
我：「但係…佢都好似唔想我追佢咁。」
林：「傻咗呀你？如果佢想你追佢嗰啲就唔叫追女，叫食女；追一個女仔係出自內心，問你自己做緊啲乜，而唔係睇女仔有乜反應，當然我唔係叫你就算個女仔好反感都死纏難打。」
我：「係！我追緊佢。」
林：「努力啦，詩敏係個好特別嘅女仔，好好珍惜你得來不易嘅機會同緣份。」
我：「我會努力，但係我未識點做。」
林：「Pratice make perfect，計多幾題數就識溝女㗎喇。」
我：「Miss妳講真㗎？」
林：「你唔係信呀？咁快啲去計數啦。」
我：「放心…數我就一定會計嘅。」
林：「喂！你幫佢畫下公仔好喇，你兩個啲筆跡唔同㗎，唔好迫我星期一罰你計數呀下。」
呢個Miss Lam真係好得意…我開始鍾意佢…