上到山咁啱有一節海洋劇場,當然一齊睇啦。
詩敏佢唔係好好機動遊戲,我同佢上咗轉觀景塔,玩咗次越礦飛車,同埋滑浪飛船,爽快嘅佢就咁上咗架船仔,我重讓佢坐船頭等佢玩得開心啲;當然就…哈哈…濕咗一半啦,真係好靚,濕咗嘅佢迷人到一個點,柔柔長髮閃閃生輝,白T入面嘅胸圍若隱若現,其實平時唔係無機會見嘅,打完比賽都會差唔多,但而家出嚟玩又係另一回事;唔知…我幾時可以儲夠四粒心心好感度約佢去游水呢?到時…我應該可以非禮下佢掛?
玩完刺激嘢我哋又去睇動物,海洋館,鯊魚館,水母館,詩敏佢開始攞部電話出嚟自拍,同我一齊影相,加埋啲傻仔水母做背景,真係越嚟越有情侶拍拖嘅感覺,我好有衝動直接攬住佢要求佢以後都做我嘅女朋友,但我唔敢破壞遊戲規則,如果搞到聽日連抽都無得抽我實後悔一世。
太陽落山之後終於嚟到今日嘅主菜,哈囉喂,搞清楚啲鬼屋位置之後我就即刻去網上面最多好評嘅一間排隊,係一間陰深嘅學校,傳聞話啲學生讀書壓力大得滯所以集體喺課室吊頸,到第二日個先生返嚟見到個慘況所以就撼頭埋牆一下就死咗…well,我都係第一次玩,唔知會點呢,不過揀學校先當然因為我同詩敏係同學,而且喺課室開始我哋嘅故事。
排下排下先發覺我哋真係好唔入世,個場開始越嚟越多人,有啲大姐姐大哥哥應該係大學生咁樣,一入場已經打扮到鬼五馬六,而且重有各式各樣嘅服裝,成班一入到嚟已經we哇鬼叫周圍嚇人,我諗佢哋唔使入鬼屋都已經夠晒興奮,當然有啲姐姐重著得好性感,打扮到成隻小魔女咁樣,大大條乳溝露晒出嚟…
敏:「喂!死人志華你喺度睇緊啲乜?」
我:「無呀…佢哋著啲衫…好有心機…」
敏:「扮嘢啦你,家陣我無咩!」
詩敏佢拉低咗件T恤嘅衫領,溝…佢當然有,雖然比較起上嚟係輸蝕少少,但可以喺面前睇到感覺梗係唔同啲;佢…係呷醋?都係同我拍一日拖啫,使唔使扮到咁真實。
我:「好正!放心!我以後淨係睇妳。」


敏:「無呀,死鹹濕仔,唔俾你睇,自己過去溝啲大姐姐慢慢睇個夠啦!哼哼哼!」
我:「點會呢,我心中就只有妳一個。」
排咗陣到我同佢入去,一入門已經有啲冷風吹落我哋塊面度,哦…係冷風機嚟啫;然後到咗一條課室出面嘅長長窄窄走廊,有啲煙喺側邊冒出嚟,哦…係乾冰嚟嘅啫。
敏:「我同你講,開咗課室門之後一定會有鬼出嚟嚇我哋㗎。」
我:「使鬼妳講咩,睇過異形同Bio Hazard都知啦,咁我哋都要入去㗎。」
敏:「嗱,你匿係側邊伸手推開道門,我喺另一邊跳入去嚇返佢哋。」
我心諗妳咁多諗頭應該一早嚟申請兼職做鬼嚇人啦,個個畀錢都係嚟俾鬼嚇,妳就嚟人嚇鬼。
當然,我好乖咁踎低喺度伸手推開道門,呢度咁黑入面隻鬼未必睇到我隻手,道門開咗但乜都無其實都幾恐怖;我將門推盡之後都係乜反應都無,詩敏佢等咗陣就跳入去。
敏:「嘩嘩嘩!」
我:「點呀,嚇死鬼未呀?」


敏:「乜到無喎,間課室空嘅…」
我起返身入埋去,真係乜都無,好多吉枱吉凳喺度,同埋天花板吊住好多繩圈,重有個吊扇噎噎聲咁轉緊。
敏:「你望下個窗口…」
我:「有乜特別呀?」
真係無特別喎,黑鼆鼆都睇唔到出面。
敏:「嘩呀呀!」
我:「嘩嘩嘩!…妳…搞乜呀…」
敏:「無鬼嚇你咪我做鬼囉…哇哇吖吖吖吖!」
我:「第二次無效㗎喇…」
敏:「你…你後面…」


我:「哇哇哇哇哇哇吖吖吖吖!」
屌,係一個爛面爆頭嘅女人…
敏:「哇哇哇!」我:「吖吖吖!」
張先生枱向我哋衝過嚟,然後有個細路仔頭跌咗落嚟我哋面前。
之後嘅我唔詳細講喇,如果去過玩嘅應該都明。
玩咗兩間鬼屋之後開始進入狀態,雖然佢真係無拖我攬我,但都有挨住我同捉住我隻手,時不時都會感受到佢心口壓咗落嚟我手臂上面,而我都有捉返住佢嘅手臂,對我嚟講咁已經好夠,我唔係一個貪心嘅人。
行行下發覺原來呢度都有啲booth賣啲扮鬼扮馬嘅嘢畀人,例如面具,魔鬼叉呢啲咁,重有啲化妝品例如唇膏,眉筆,色粉…
敏:「不如我哋買嚟畫下咯!」
我:「好呀,最緊要妳鍾意。」
真係估唔到平時正經嘅佢玩起上嚟重投入過我,攞起枝血紅色嘅唇膏話咁快就搽到成隻幽怨嘅女鬼咁,嘴角流緊血,女神妳真係太迷人,殺咗我啦!
敏:「哈哈!我幫返你吖!」
我:「吓?我搽唇膏?」
敏:「做乜?你怕醜呀?」
我:「咁又唔會。」
晏晝食飯先同佢交換完口水,估唔到咁快就會間接接吻,搽同一枝唇膏,其實我真係唔太鍾意呢啲古靈精怪整色整水嘅嘢,但可以同佢一齊玩,重…當然唔可以放過。


敏:「幫你加多兩隻牙,但唔好咬我呀下。」
我:「咁我都幫妳畫下條眉先。」
敏:「得唔得㗎你?」
我:「放心,包保妳嚇死人。」
我哋互相捉住對方塊面喺度畫,越哄就越埋,我覺得呢個動作有少少似喺度合卺交杯,點都無預計過我同佢第一日拍拖就可以咁浪漫又刺激。
畫完之後我哋又玩咗兩間鬼屋,之後抖一抖去一間有吸血鬼serve嘅snack room度坐下,呢度都有啲似一間酒嘅,不過就掛晒啲南瓜同蜘蛛網,啲燈喺度閃下閃下,加啲奇異鬼怪嘅音樂聲,一隻二隻吸血鬼有男有女揸住份menu喺度堅吸人血叫人買嘢食;由於我買嘅係最貴嘅一張飛,所以係包一杯free drink,我哋show完pass之後兩杯紅噹噹有煙出嘅嘢飲就遞到嚟我哋手上。
敏:「不如我哋影張相吖!」
我:「欸…好呀…」
敏:「嚟啦!Cheers!」
自拍完一張之後,我哋都發覺到自己有少少唔妥…
我個嘴血紅色問題不大,但下面兩隻唔係可以咬人吸血嘅尖牙,而係兩隻正方型嘅傻仔大板牙。
敏:「志華…死人頭…你喺我額頭寫乜呀!」
我:「我都係如實寫咋嘛…」
敏:「你!肯定係活得唔耐煩!」
我:「唔係呀,咁樣人哋咪知妳係邊個囉,所以啲女鬼同姐姐先唔嚟攪我咋…」


敏:「哼!算你講得通,唔怪之得頭先有幾個姐姐望住我笑啦…早知我就寫大淫蟲喺你個頭上面。」
寫咗乜,『女朋友♡』囉…好彩佢無發爛渣,而且重無抹走佢同我繼續一齊玩,至於嗰杯Bloody乜乜嘢飲,大家都明㗎啦,無謂提。
再玩多兩間鬼屋之後想玩嘅基本都已經玩晒,我哋兩個去咗精品店度睇下。
敏:「嘩!好大隻海豹呀!」
佢將隻成個身咁大嘅海豹抱咗喺個心口前面,好似抱BB咁。
我:「如果妳鍾意我送畀妳吖!」
敏:「傻咩!咁大隻邊有位放,而且都無用嘅。」
詩敏佢講得好啱,佢始終都係無變係一個好慳家嘅女仔唔會亂咁使錢,而我都心知肚明呢啲大公仔通常都係俾人放一排就會出現喺垃圾房,佢又唔係小朋友,係真係無理由買嘅。
我:「不如我送個南瓜仔畀妳掛喺書包裝飾下吖,我見妳書包乜都無空寥寥咁。」
敏:「都可以,不過呢,你要買多個。」
我:「吓,點解呀?」
敏:「因為一人一隻囉。」
聽完我就攞起兩隻南瓜擰轉身行去收銀處畀錢。
總算叫做有嘢帶得走。
買完嘢之後我哋去洗手間洗面,兜多兩下呢個難得夜晚都開嘅海洋公園散下步欣賞下景色,就慢慢離開咗呢笪歡樂嘅地方。


我哋搭巴士出返去中環,去到都十點幾,由晏晝玩到而家真係又攰又肚餓,好彩一落車就見到有間未閂鋪嘅雲吞麪,入去坐低我嗌咗碗雲吞麪,佢就水餃米,都係廿幾蚊,加多碟十蚊嘅菜芯,兩枝玻璃樽可口可樂,其實開心快樂真係可以好簡單。
我:「可唔可以send返啲相畀我?」
我咬住粒雲吞咁問佢。
敏:「咁就…梗係唔得啦!」
我:「吓…點解呀?」
敏:「呢啲相…你放上Facebook我重得了嘅?」
我:「點會喎,我唔係咁嘅人嚟。」
敏:「嗯,但都係唔得。」
我:「點解嘅?」
敏:「呢啲係我哋拍拖嘅回憶,你平時都唔係同我拍拖所以唔睇得,如果想睇就到你下次再有得同我拍拖嗰陣叫我畀你睇啦。」
好似毫無道理,但我又諗唔到佢呢個諗法有乜邏輯上嘅漏洞,算…畀心機快啲下次再抽中好過!
食完麪之後我同佢又搭返過海巴士返屋企,又坐返嗰個位,唔知詩敏佢係真攰定係純粹serve我,一坐低佢就撓住我隻手挨住我膊頭瞓著咗,一直到落車我先叫醒佢;呢個就係我嘅一日限定『女朋友』,真係好可愛,我好鍾意佢,雖然唔可以做啲乜,但我已經幸福到飄飄然,個心甜到漏蜜糖咁滯,連搭巴士都可以自己一個人傻笑。
去到佢樓下。
我:「詩敏…」我好多嘢想講,但欲言又止,千言萬語在心頭,吐不出來。
敏:「今日終於都完喇。」


我:「係呀…真係好唔捨得…」
敏:「男朋友,今日我玩得好開心,過得好幸福!多謝你!」
我:「嗯!咁就最好,我嘅女朋友。」
敏:「企定,唔好郁。」
同我一樣身高嘅詩敏抱咗埋嚟攬住我,係實一實嗰隻,然後啜咗我塊面一啖。
敏:「走喇,Bye bye!」
我摸住自己塊面,重有少少濕同暖,我好想大叫“阿媽!我得咗喇!”,但諗一諗又發覺都係唔可以,話明一日限定女友,就算今日做埋愛,聽日都會打回原形…而且,佢啱啱返入樓嗰陣同平時唔同,佢無講“聽日見”,即係話我唔知要等到幾時先可以再見到我呢個女朋友。
我打開電話望下個鐘,十二點正,灰先生係時候回歸現實離開城堡返屋企,千祈唔好漏低一隻鞋。
已有 0 人追稿