返到去屋企人已經瞓晒覺,我就去沖涼洗滌自己呢副同女神啱啱親近完嘅身體,我直頭有啲唔想洗自己塊面…但唔得,頭先玩到又油又粉,所以…唯有等下次抽中再嚟過!我已經下定決心,下次我一定要鼓起勇氣惜返落佢塊面度,到時佢係我女朋友嚟㗎嘛,一定無事嘅。
沖完涼我就第一時間將個南瓜仔扣落我書包度,呢隻嘢就係我同詩敏唯一拍過拖嘅證明同回憶,雖然無乜特別,但我一定會將你永遠掛喺我書包上面,就算殘到變晒色都唔會放落嚟。
上到床我就serach下今日同佢聽嗰首叫乜嘢歌,原來係林珊珊唱嘅戀愛預告,我喺電話開咗repeat嚟聽,望住窗口出面一片漆黑嘅夜空,搵唔到半朵白雲…
我喺度諗,雖然今日同佢過得好開心,但好大程度係因為今日真係好難得,我花咗咁多心機、時間、金錢去準備呢一日,唔開心就奇啦;如果真係同佢拍拖嘅話,一切就會變成日常,我無可能日日都同佢咁多姿多彩,唔知到時我同佢重相唔相處到呢?然後諗起一鳴同Wing姐嘅快速撻著,蜜月期都未過完就嗌架嗌到火紅火熱,不禁令我懷疑自己係咪真係有能力同女神拍拖,因為聽人講初戀都只會不停撞板,而眼前就有人版。
聽下聽下歌就瞓著咗。
到咗第二朝我好早就返到學校,重早過詩敏,因為我好想快啲見到佢,等咗一陣我就見佢孭住書包行入嚟,上面掛咗隻南瓜喺度。
敏:「嘩!搞乜鬼呀你?唔好用個咁嘔心嘅樣望住我得唔得?」
佢個樣彷彿見到思覺失調嘅病人咁訝異。
我:「詩敏…琴日…」
敏:「乜琴日呀?琴日乜都無發生過呀!唔好望住我喺度發姣,拍扁你㗎!」


我:「係…對唔住。」
果然係一日限定女友,完咗之後就乜都無,詩敏變面之快,重專業過京劇啲表演。
敏:「怕咗你,抽啦…」
佢畀咗部caltor我,又點會咁易中吖…
我真係想研究下有無可能喺部計數機上面做手腳提高我中奬嘅機率呢?應該計數機專家黃Sir都唔會幫得到我。
過咗陣一鳴同Wing先後都返到嚟,兩個人無乜講嘢,個樣奇奇怪怪,希望佢哋和好如初唔再鬧架啦,如果唔係我都幾麻煩,日日捉我去食大家樂我重使同詩敏佢食飯嘅…
之後到曉彤都返埋嚟。
彤:「嘩!詩敏,妳同志華一齊去玩呀?你兩個書包掛住隻一模一樣嘅南瓜仔嘅!」
曉彤都算係一個好觀察力又敏感嘅女仔,佢一講完嘢之後成間課室嘅人都望嚟我哋度,一來我哋係坐喺正中間,二來我哋呢幾個位早就成為咗課室事件嘅旋渦中心。
敏:「妳唔好講笑啦,有乜可能喎…條友自己去玩完之後買埋啲無聊嘢塞畀我咋嘛。」


我…聽到之後個心係揦住揦住咁痛,明明琴日嘅佢係…但我知道佢真係唔可以認,唔通剩係同人講我哋只係拍一日拖咩?無可能,無人會信,而且人哋會覺得佢係啲玩弄感情嘅女仔,所以我係明白…但個心都重係痛。
彤:「咁妳肯收都幾大方喎。」
敏:「啲兵咁有誠意,好難推嘅,咪等佢開心下囉。」
係咪似足畫劇表演呢?我諗其他同學都咁諗。
彤:「有無多隻呀?我又想要呀!」
我:「Sorry呀…無多一隻喇…」
玩咩!三個人掛同一隻公仔成何體統,想我哋三個俾全校熱烈討論咩?雖然而家都分別不大。
彤:「咁拆咗你嗰隻出嚟畀我啦,我想同詩敏佢掛同一隻公仔呀!」
我:「呢個嘛…咁樣呢…」
點得喎,明明係詩敏佢話要同我一人一隻㗎…詩敏,求下妳,千祈唔好同意佢。


敏:「哎呀,妳就唔好玩佢啦,佢為咗隻公仔J咗好耐㗎喇,如果妳想要不如拆我隻出嚟畀妳。」
彤:「啋!我先唔要同佢掛同一隻公仔呀,而且奇奇怪怪,掛隻南瓜喺書包都唔知點咁。」
敏:「係囉,都唔知佢諗乜,而且一年得一個月係萬聖節,同掛樖聖誕樹喺書包有乜分別喎…」
呢兩個女人…玩夠相聲未呀…我真係差唔多要嘔血喇,快啲嚟殺咗我算啦。
今日頭兩堂係數學堂,又要對住Miss Lam。
林:「喂,一鳴,你份功課呢?」
一鳴佢就死死氣出去交罰抄。
林:「好,各位同學,我要對罰抄,你哋自修住先,麻煩自己睇呢個intersection of quadratic curves and inequalities。」
真係佩服到五體投地,竟然有一個先生可以為咗對罰抄而唔講書,神奇嘅係大家都好聽話咁自修,睇嚟個個都怕咗佢又玩啲乜花樣;唔止咁呀,佢喺出面一路睇重一路笑到嘰嘰聲,睇怕係恥笑緊一鳴畫啲公仔樣衰。
就係咁過咗十五分鐘。
林:「好!對完,抄得唔錯呀下,咁呢本嘢我都無用喇…」佢一路講一路行嚟呢邊,經過詩敏…
林:「好啦…就畀妳攞嚟留念啦。」
佢放咗喺Wing嘅枱面,我哋全班都打咗個突,而Wing佢就喺度傻笑,跟住就講書喇。
接落嚟嘅日子都係我繼續當兵,詩敏同曉彤兩個惡搞我,抽又抽唔中,一鳴同Wing兩個都係忽冷忽熱,日日坐過山車咁,我哋都慣咗,食飯都唔會問佢哋出唔出現,總之自行決定啦,佢哋嘅事我哋又干涉唔到,不過嗰次之後佢哋EQ好似高咗,無再喺課室發過癲。
然後有一日返學等咗好耐都唔見詩敏,就連Miss Lam嚟到都未見佢出現,唔通佢病咗?


彤:「你女神叫我畀部計數機你喎。」
吓,因為無返學托佢畀我抽?使唔使呀?
雖然都係唔中…但曉彤佢知呢件事嘅咩?
或者,詩敏諗到如果我中咗自會有辦法叫曉彤做見證人掛,反正我唔會出貓只抽一次。
我:「詩敏佢係咪請咗病假呀?」
彤:「嗯…但無講乜事喎。」
以詩敏性格佢請得病假就一定係唔舒服,欸…我係咪應該關心下佢呢?佢唔會話我自以為是佢嘅邊個掛…作為一個坐佢隔籬嘅同學關心下佢都好正常啫,應該唔算多事嘅,不過又怕阻住佢休息。
我:『妳無乜事吖嘛?使唔使幫妳攞作業抄notes?』我睇咗兩次都覺得咁講無問題。
隔咗半個鐘收到回覆。
敏:『M痛咋…我一早搵咗曉彤幫手。』
我:『嗯,咁妳好好抖下。』
然後到咗lunch time,今日一鳴同Wing自己食,我心諗都唔知係為食飯定扑嘢,其實如果鬧架重會唔會扑嘢呢?定係因為鬧架所以先更加要扑嘢…
彤:「唉,今日無咗個飯腳添…」
我:「係囉…點算好…」
我哋兩個四目相投,有少少尷尬,詩敏唔喺度,我同佢食飯就變成名不正言不順;但如果咁樣就話唔同佢食飯嘅話,好似又唔係幾妥當,我同佢按道理都叫做朋友嘅,無理由要特別避佢,加上本來就成日同佢一齊食;只不過如果我開口邀請佢兩個人一齊食,係咪唔係咁好睇呢…


彤:「點呀,賞唔賞面同我一齊食?」
好彩佢開口先,咁就無咁尷尬。
我:「好呀,咁我哋行啦。」
一路行我就一路諗,詩敏唔喺度,其他學生見到我會點諗呢?話就話我嘅花生系數已經去到無可再高,但講還講,最好唔好太鶻突,因為我好怕啲閒言閒語傷害到詩敏或者曉彤,至於我就算啦,聽聞啲高form封咗我一個名,真田幸村…即係天下第一兵咁解。
我:「咦?唔係行呢邊咩?」
彤:「陪你食大家樂呀,見你平時無得食咁慘。」
我:「唔怕貴咩?」
彤:「無所謂啦,一日半日差幾蚊啫,難得唔使做電燈膽,可以食餐好啲嘅,嘻嘻。」
我:「唔好講笑啦,妳點會係做電燈膽啫,最多都係幫手閱下兵…」
原來佢咁有我心,竟然重記得我鍾意食大家樂…
已有 0 人追稿