我:「我都係食焗豬,妳呢?」
彤:「咁我食焗肉醬意啦,我去搵位先。」
當然,捧餐嘅責任就交晒畀我喇,返到埋位我正想用隻羹一嘢暴力分開塊扒嘅時候。
彤:「哎,不如我哋share食咯?」
對佢突如其來嘅發言我一時反應唔嚟,get唔到佢想表達啲乜,我呆咗咁望住佢。
彤:「我食唔晒一整份㗎,不如你兩盒都潷啲落隻碟度畀我,咁我哋咪可以食晒兩種囉。」
哦,係咪即係Econ所講嘅diversification,用重新分配規劃嚟增加我哋嘅總效益。
我:「好呀。」
靚女叫到,我當然唔可以繼續用隻鐵羹幫塊扒分屍啦,於是就搬咗塊扒上隻碟度用刀叉切咗三條長長嘅畀佢,再搬返塊骨肉相連嘅去返自己嗰兜,如果一鳴見到我咁樣實會恥笑我。
唓!我就唔信你對住Wing好似平時咁。




彤:「你鍾唔鍾意食蕃茄㗎?」
我:「講真麻麻哋。」
彤:「咁你畀埋我啦。」
於是我又搬咗啲蕃茄畀佢,再加少少飯,靚女唔會食咁多飯,同埋要避開兜底啲油,跟住到意粉…就係咁,我同曉彤share兩個餐嚟食;如果…詩敏睇到會唔會眼火爆呢?肯定唔會啦…係我自作多情,佢根本就唔會當我一回事,只會叫我自己一個人去食大家樂。
彤:「係呢,點解詩敏會要你㩒計數機嘅?」
吓…問我…點講得喎…穿咗煲我諗以後唔使再抽。
我:「無呀,玩下遊戲咋嘛。」
彤:「係點㗎?贏咗會點?輸咗又會點?」
我:「我諗…唔可以講妳知。」
妳同詩敏咁friend,如果佢想俾妳知就一早話咗畀妳聽啦,我真係唔會博。




彤:「唓,讕神秘,算數,懶得八你倆口子嘅秘密。」
我:「哈…妳唔好講笑啦…倆口子…」
彤:「其實你係咪真係未追到佢㗎?」
我:「吓?你睇唔到我哋而家點嘅咩?」
真係無諗過佢會問我,其他人以為我哋兩個一齊都好正常,但妳日日見住我同佢喎。
彤:「點知喎,可能佢想同你玩地下情,表面就扮到無乜嘢,但暗地裡打得火熱呢。」
我:「你唔好笑我啦…睇我個樣都知無可能;如果我哋兩個一齊佢點會唔同妳講。」
彤:「未必㗎,可能佢唔想有壓力呢…你睇下Wing佢兩個,就算唔鬧架都驚壓力爆煲啦。」
我:「咁又係,日日全世界望住真係好難頂。」
彤:「不過你就實頂得住嘅,你都派慣晒花生。」




我:「其實…詩敏對我係點,妳知唔知㗎?」
彤:「係點?佢無同我講過你啲嘢㗎喎,咪好似平時我哋睇到嘅咁囉…」
我:「平時睇到嘅即係點?」
彤:「當你係兵囉,重可以點?所以我先問你同佢係咪玩緊地下情咋嘛,估唔到你一直做兵都咁開心,真係抵讚呀下。」
做兵,我都知,表面點睇都係…但由表白嗰一日,到一齊打波,到抽奬,到第一次拍拖…呢啲你哋睇唔到嘅嘢其實一直發生緊,亦令到我無法自拔咁會一直死守喺佢身邊。
我:「做兵…咁如果佢無意思,點解唔拒絕我?」
其實我都好想聽下女仔嘅心底係點諗。
彤:「兵呢樣嘢,有啲女仔真係覺得多多益善㗎咋喎…不過詩敏佢又怪啲嘅,以前又唔收兵,只會請人食檸檬,最憎人叫佢女神;但自從你彈出嚟,佢又唔介意你煩住佢,而家重自稱做女神添。」
我:「咁係咪即係我會有機會?」
彤:「哈哈,我就唔多覺,可能佢見迫於無奈同你一班,又一齊校隊先由得你咁樣,費事大家面阻阻,勸你唔好抱太大希望。」
我:「但佢咁樣唔係會俾人講咩,都有壓力㗎。」
彤:「人哋女神嚟,點都有壓力㗎啦,唔係你係咁圍住佢轉,啲學生會長社長一早出手啦,中四嘅女仔咁搶手,分分鐘重煩過對住你。」
我好想駁佢話詩敏其實無覺得我煩,不過算啦…
彤:「你唔覺得你咁樣好傻咩?」
我:「點解咁講?」




彤:「我見你都幾有心機,大膽得嚟又厚面皮,做咗咁多嘢,又就得人,屋企環境唔差,如果你唔係要追女神,大把女仔肯同你一齊啦。」
我:「乜…真係咁嘅咩?」
彤:「你睇唔到㗎咩?一鳴佢一個月唔使就得手啦,你唔係咁無信心覺得自己贏唔到佢呀?」
講真佢係我老死,從來都無比較過啲乜。
我:「而家咁嘅時勢,妳都識講,學生會長都唔敢對詩敏出手,重邊會有女仔敢黐埋嚟我度吖…」
彤:「唓,你鳴金收兵,大家好快就唔記得啦。」
我:「咁唔係幾好嘅,實好多人話我始亂終棄,無毅力,為咗要女不擇手段。」
如果唔係我哋暗瓦底發生咗咁多事,可能真係早就投降撤退,但你問我如果唔追詩敏要追邊個,我真係無目標喎,唔係因為我身邊無女仔,而係我早就慣咗同詩敏用咁嘅形式相處,而且過得幾舒服;就算你同我講可以即刻有個女仔做我女朋友,上床都得,我都未必有興趣,雖然係好想試下做愛嘅…除咗佢…嗰個女廁嘅神秘女仔,我真係會有興趣,但佢都好耐無搵過我。
彤:「我哋呢個年紀,想拍下拖好正常啫,追唔到女神咪追第二個囉,唔使太執著,不過你搞到全校都識你又真係樣衰少少,如果有女仔肯同你一齊,都會凝住你追唔到女神先要佢。」
我:「其實我又會諗,可能無拖拍都幾好吖,我哋話咁快就要考會考,多啲時間溫書都唔錯,可能詩敏佢都係咁諗,先唔同我一齊啫。」
彤:「乜你真係有咁鍾意佢咩?聽聞你都係猜輸咗先同佢表白咋嘛。」
我:「哈哈,我都唔太知,可能一開始就停唔到掛,妳同詩敏咁friend,應該會覺得佢好好㗎。」
實情係一開始真係玩,但到咗而家,我肯定心入面只會有佢一個,可唔可以喺埋一齊已經其次。
彤:「如果我係男仔…我應該唔會追佢喇,我諗我無咁嘅魄力,不過我都祝你好運嘅。」
原來同曉彤兩個人食飯都幾開心喎,又可以食大家樂;雖然佢平時把口係有啲衰,成日笑我做兵無鬼用,但原來佢都係會關心我嘅,即係佢都當我係朋友嚟?




到咗放學。
彤:「喂!你唔係我隻兵喎,做乜跟住我行?」
我:「呀…行慣咗呢條路…一時改唔到。」
彤:「你睇下你吖,無得救㗎喇。」
我:「我知我無得救,由我啦,棄療喇。」
彤:「放心啦,一陣我喺女神前面幫你美言幾句,讚下你乖,無因為詩敏唔喺度就走去撩女仔。」
我:「呀…原來妳係喺度一直監視緊我…」
彤:「哈,你唔係以為我係你嗰邊嘅人呀?」
原來曉彤都係一個幾吸引嘅女仔,可惜我而家個心只有女神一個;唔知多唔多人追佢嘅呢?佢都幾靚女吖,又話我哋呢個年紀會想拍拖,點解佢自己又唔拍拖呢,真係奇怪。
已有 0 人追稿