詠:「哎呀…咁呢啲…都係順便嘅啫。」
Wing又真係得意,反正大家都知就索性直認不諱,係嘅,佢其實同詩敏都係好friend。
鳴:「曉彤,其實你唔使羨慕吖,妳隔籬呢隻兵想帶妳去邊都得啦;中三嗰陣同佢講過考完會考要去日本由沖繩玩到北海道,不過我而家陪唔到佢咯,呢個暑假佢實悶死都似。」
我:「咪玩啦,呢個環境重由沖繩玩到北海道,你係咪想俾屋企人鬧到飛起呀?」
鳴:「鬼唔知咩…我見恒指有返萬六點先夠膽問屋企攞錢去玩咋,都係窮遊去住青年旅舍。」
詠:「吖,我都係要你出張機票啫,唔係要你請晒㗎,使唔使牙痛咁樣?」
鳴:「最大問題係而家牙痛嗰個唔係我呢。」
彤:「你哋講啲嘢真係高端,好難理解呀。」
鳴:「考慮下囉,妳同佢去實有妳著數。」
彤:「我著數定佢著數呀,孤男寡女共處一室,女仔…唉,我都唔想講落去。」




詠:「未必嘅,你見佢圍住詩敏轉咗年幾女神都無任何損失,就知佢應該係正人君子,有返咁上下定力,或者妳當考驗一下佢囉。」
彤:「吓…咁如果佢fail咗我點算好,我無剩㗎喇喎,我唔似得詩敏佢咁fit可以反抗到。」
敏:「雖然妳講嘅係事實…但相信我啦,佢唔敢亂嚟嘅,如果唔係我幫妳手刃佢。」
彤:「亡羊補牢都死得啦…係喇,詩敏妳暑假有無乜節目呀?」
敏:「嗯,我諗首先要預習一下中六啲課程先,A level啲嘢真係深好多schedule又趕,或者去自修室間青年中心做下義工,學到嘢之餘對第時in大學都可能有幫助,重有想試下搵唔搵到幫啲初中生補習,幫補下家計。」
唉,聽到佢咁講就覺得暑假我哋顧住玩好唔應該…
詩敏一路講嘅時候瞄咗我一眼…雖然呢,我同佢就無緣喺埋一齊,只能喺心底入面相愛,但我同佢就好似多咗一種共通語言咁,只要對望一下就可以傳輸到大量訊息互相理解。
鳴:「雖然下個禮拜二考Bio,但連續chur咗幾日,都真係要抖下,送妳返屋企先啦,Wing。」
你哋chur咗幾日,我琴日英文作文亂寫咗百零字就收工,閱讀理解同今日listening都係填咗啱嘅十格八格務求有少少分就伏低瞓覺…至於嚟緊嘅oral就做I agree先生就夠F有餘。
詠:「唔使送我啦,你屋企就喺後面,快啲返去瞓啦。」




鳴:「就算唔送,咪又係得我自己一個行返去。」
我:「望住我做乜,我唔送男人返屋企㗎。」
一直以嚟發生咁多事,大家又忙會考忙到踢晒腳,就算我同曉彤點都好,暑假都真係要抽少少時間同一鳴佢玩下,畢竟佢同Wing都幫過我好多,尤其係佢兩個今日嘅自然出色表現,令我可以喺曉彤前面保持零破綻。
彤:「詩敏佢真係好認真又上進,可能佢真係完全唔想喺讀書時期談戀愛嗰啲人嚟。」
我:「或者啦…我好早就知道無希望,不過其實佢對我都幾好,我好滿足㗎喇;又係嘅,學生時代拍拖可能真係有啲無謂,浪費時間又影響學業。」
彤:「但我見一鳴同Wing兩個都無乜問題吖,成績都keep得住下,唔係幾開心咩?」
我:「你唔記得佢哋鬧架果時有幾僵喇咩?」
彤:「咁又係…其實我頭先講笑㗎咋,我都知你係乜嘢為人唔會對我亂嚟,我或者問下屋企人會唔會俾我同你去旅行啦,橫掂佢哋都見過你。」
我:「嗯,好呀,妳OK我就OK,妳想去邊都得。」
呀曉彤妹妹,其實如果妳咁問屋企佢哋又俾嘅話,即係擺到明認可咗我哋嘅關係㗎咋,妳有無諗過…雖然佢哋早就知道我本來就係同妳一齊。




兩日後嘅星期一,我同曉彤、詩敏又三個人一齊溫Bio,一切正常過正常,就好似我哋本該如是,我追厭咗詩敏就會自然同曉彤喺埋一齊。
我喺度諗,考完會考各自去玩,出年大家又唔同form,就算曉彤同詩敏可以keep返住做friend,我同詩敏見面嘅情況已經所剩無幾,放榜果日啦,以後唔知重會唔會一齊練嘅羽毛球啦,或者詩敏會嚟搵我哋食晏嘅。
而家嘅詩敏,既非女神,亦非女友,甚至唔係普通女同學;佢時不時會掃視我一眼,面上面會帶住微笑,呢種感覺好特別,無咗女神嘅傲氣同高高在上,唔係女朋友嘅嬌嗲嫵媚,初音嘅淫慾同玩味亦都收返埋晒;不過佢係世界上最清楚我嘅人,就好似個家姐咁係度睇住我。
到咗第二日考完Bio,Bio唔係我鍾意嘅科目,A level都唔會take,格就實合到嘅,可惜我重未可以同呢科講bye bye,下學年重要對多一年…
考完會考當然要約曉彤出嚟玩,雖然我係無乜太特別嘅感覺,就好似所有嘢都要重來一次而我亦都知下一步會點,要用乜方法,結果會點咁。
彤:「嘩!好開心呀!」
佢一見到我就攬實我,實到成個心口壓咗落嚟嗰種,而且佢今日係著咗嗰件我同詩敏訣別後去佢樓下搵佢再做完愛一齊去補習嗰件連個Bra都走埋出嚟嘅露肉低胸衫,睇嚟佢潛意識入面都係鍾意著住呢件衫嚟見我;至於同佢一個考場啲男考生真係多得佢唔少,成個腦海剩係得breast同nipple,重點識串esophagus同cochlea…
不過我係有啲不知所措,明明佢都未係我女朋友,按道理呢個時候係應該嚇一跳,唔自然咁硬晒軚企喺度,所以就好無辜咁舉起咗兩隻手。
我:「曉彤…妳無嘢吖嘛?」
彤:「有乜嘢呀?考完試你唔開心咩?」
我:「開心…見到妳梗係開心啦。」
彤:「咁你答我你而家望緊邊度?」
樣?頸?心口?乳溝?北半球?Lace Bra邊?
我:「咪…望緊妳隻眼囉。」
彤:「你講大話!」




我:「邊係喎…做乜咁熱情…我哋好似…」
彤:「開心咪派下兵糧囉!唔好咩?」
我:「好,當然好!非常好!」
曉彤,以後嘅嘢,妳點話點好啦。
講真,係正嘅,睇落點正就之前都已經講過,佢呢種帶有時代感讕係清純可愛得嚟又有少少曳嘅感覺係引死人,尤其係佢個髮型無之前咁做作,清新自然爽朗啲,係我鍾意嘅。
今日已經預咗同佢食飯行街直落,首先食晏,其實我就同佢食乜都得嘅,不過我就揀咗沙嗲王,因為比較符合返我哋學生嘅身份,食得自在坐得舒服啲,加上佢身體都好返晒可以食刺激少少。
食完就去行街,由於已經同佢拍過一次拖,陪佢行街嘅技巧已經非常嫻熟,喺佢睇衫嘅時候要點企講啲乜都一清二楚,千祈唔好走咗去睇自己嘢或者喺門口等佢;雖然我哋無拖手,但喺街上面都好多男男女女會望過嚟,因為曉彤個樣同打扮都好吸睛;我覺得平常心啦,無話有啲乜自豪。
彤:「嘩!好大隻熊Bear Bear呀!」
喺百貨公司經過精品部見到隻好大嘅Forever Friends熊,有佢心口咁大。
我:「好得意喎,送畀妳吖!」
曉彤曾經因為購物呢個原因同我鬧過架,佢唔明點解我屋企咁有錢但係使錢嘅時候都要左諗右諗,完全同我哋嘅家境唔成正比;其實我都唔明,父母佢哋見客一餐飯隨時三五千,但買盒一百幾十嘅模型都會再三問我係咪真心鍾意,係咪得閒砌,屋企重有無未開…等等嘅問題,總之對我嚟講已經成為一種習慣。
而且我覺得關係同感情甚至開心唔係單單用錢就可以買到,例如詩敏塊羽毛球拍上面每一條線,每一個交錯都係我嘅心血嚟,睇咗成個禮拜片同書再要問老細借機嚟玩我先學得識。
當然,我而家梗係好識做。
彤:「但係咁大隻實好貴㗎喎…」
我:「都OK嘅,妳屋企有無位放先?」




彤:「咁就有,搬屋之後我都無買過床頭公仔。」
我:「咁咪得囉,嘻嘻!」
話咁快就買咗畀佢,睇住佢抱住熊仔個樣真係開心到呢…成條街嘅女仔都望過嚟,然後捏一捏自己條仔…嗱,唔關我事㗎,咁多位大佬唔好打我。
彤:「志華…」
我:「點呀,曉彤。」
彤:「你都知…我屋企唔係有錢,但係…我都唔係話係嗰啲好鍾意使男仔錢嘅女仔嚟。」
Bio入面有個term叫negative feedback mechanism,正正就可以用喺呢個情況;當你對住個女仔依依哦哦想慳返筆,佢哋就會無啦啦發晒爛渣;但係如果你突然喺佢哋身上消費好多,又會清純節儉乖乖女上身…正所謂口是心非,萬試萬靈,從各種意義上嚟講都係。
我:「唔緊要,追得妳就要照顧埋妳㗎啦,只要妳唔係大花筒想食窮我就得。」
彤:「嘻嘻,點會喎,多謝你呀!」
我突然之間又諗返起嗰隻H-game,而家嘅我就好似睇住本攻略嚟追曉彤咁,其實追女要送嘢就傻嘅都知啦,問題係隻game入面啲錢好難賺。
行街就一個晏晝已經乜都攰晒,佢重要抱住隻咁大嘅公仔,咁我哋又未去到要去開房嘅階段(其實我都唔識開房),所以就去咗唱K喇。
已有 0 人追稿