原來出咗兩章長度,是但啦@@

敏:「點呀你?」詩敏走咗過嚟坐。
我:「同預期一樣囉。」我大方放喺枱面畀佢睇。
敏:「哈,發生咁多事都重可以考成咁,你都真係幾叻㗎喎,同屋企人講咗未呀?」
我:「未呀,佢哋係嗰啲扮到乜都唔理嗰啲,但我頭痛緊…係呢,咁妳成績OK吖嘛?」
敏:「嗯,唔需要擔心我。」
係嘅,女神成績向來保持穩定,一張背脊向天嘅成績單睇落好有份量,好想反轉佢嚟八但唔敢。
詠:「一鳴佢頭先落去個樣重OK嘛?」
我:「未死得嘅…今次我哋兩兄弟真係…叫做有個伴囉,放心,我會繼續陪住佢嘅。」




詠:「真係拜托晒你,我已經無眼睇佢。」
敏:「點呀?真係要分手嗱?」
詠:「又唔係同班,無謂再拖,我唔想阻住佢讀書。」聽到Wing決絕嘅一句,我個心都打咗個突。
我:「佢會考已經炒咗,妳重要同佢分手…咁樣好似好大打擊喎…會唔會唔係幾好。」
詠:「唔使你講,我都好心痛,好唔捨得,但畀啲打擊佢未必係一件壞事,佢做乜都求求祈祈咁先會落得呢個下場,而家係時候要等佢痛定思痛;人生要讀多一年書其實好閒,我都係過來人,但如果佢永遠都係咁吊兒郎當,係咁就一世。」
我:「Wing…都等佢抖返兩日先啦…」
一鳴係我朋友,呢句唔係為咗幫佢講好說話,只係我都唔想睇到佢太慘。
詠:「嗯…我知點做,唔會搞到佢自殺嘅…」
拜託,千祈唔好學我,我承受唔起咁多衝擊。
敏:「係呢,曉彤佢返嚟未呀?」




我:「差唔多喇…佢頭先message我已經出咗門口。」
詠:「咁等埋佢同一鳴一齊去食飯,好唔好?」
我:「嗯…係呢…我想問下…海洋組合做乜呀…」
頭先我一上返嚟已經見到海馬同章魚匿埋咗喺角落頭,旁若無人咁攬埋一嚿,章魚就喊到海馬件衫濕晒,好彩嗰啲唔係墨汁唔太顯眼,海馬就用兩隻手環抱住佢;我有生以嚟都從未預料過會喺一間中學大庭廣眾眾目睽睽之下睇到呢一幕,雖然都估到係乜事,但都想細細聲八下嘅。
敏:「佢哋…海馬有廿分升到中六…章魚就…我唔講幾分喇,但兩科數學都F咗…章魚報完成績之後佢屋企就話要送佢去英國讀書…」
我:「嘩…乜咁慘烈呀…」
敏:「係咩,對你嚟講好少事啫。」
詩敏…點解妳可以笑住咁同我講呢句嘢㗎…係咪妳已經堅強到可以用我哋嘅關係嚟開玩笑。
過咗陣,海馬拖住章魚走到嚟課室門口嘅位置…
馬:「唔好喊喇,妳屋企人喺樓下等緊妳…」




魚:「不如你同我一齊落去!求佢哋唔好送我去外國吖!」呢種聲嘶力竭,簡直令人聞者心傷。
馬:「點得呢…佢哋係為妳好㗎…」
魚:「我…我唔捨得你呀!嗚嗚嗚嗚…」
馬:「傻豬…我哋聽日咪可以見囉!」
魚:「嗚嗚嗚嗚嗚嗚嗚!」章魚淚崩出咗課室。
呢種場景…真係堪比羅蜜歐與朱麗葉。
馬:「哎…唔好意思…無嘈住你哋吖嘛…」
詠:「點會嘈呢,我哋睇情聖上演好戲咋嘛。」
馬:「估唔到,會有一日我唔係做睇戲嗰個…論情聖,我邊夠坐妳前面嗰個嚟喎。」
我:「講呢啲…時勢迫出嚟㗎咋。」
詠:「你兩個重有幾多日呀?」
馬:「我都唔知,十零日掛…」
詠:「真係唔搏一鋪?可能有得掹呢?」
馬:「點得呢…我唔可以咁自私,為咗一己私慾影響人哋個女嘅將來,但…我會喺度好好等佢。」
詠:「重話唔係情聖…」




敏:「你覺得係咪真係有得等?」
馬:「無話等唔等嘅…本身自己就無諗過會喺中學拍拖,咁我之後…都係做返原本嘅自己啫。」
詠:「咁你又覺得章魚會唔會等你?」
馬:「呢層…緣份嘅嘢無人知…如果,佢搵到個真正屬於佢嘅男仔我都會祝福佢嘅。」
敏:「我哋都會祝福你兩個嘅。」
馬:「多謝,我約咗屋企人飲茶要走喇,唉,考到好成績但係都咁唔開心,都唔知點解釋好。」
世事何曾是絕對,天意永恒愛弄人。
總覺得,女神同Wing姐兩個越嚟越成熟。
彤:「喂喂喂!」
曉彤一出現,詩敏就彈起咗,好似覺得張凳有釘咁,埋去攬住曉彤,再叫佢坐喺我隔籬。
彤:「係呢…你哋考成點呀?」
敏:「嗱,畀妳睇下…」
呢個時候我終於有機會䁽一眼,BBBBCCCD,好,的確無乜好睇,理論上都係多我一分啫…
詠:「我都OK,無乜特別。」
彤:「咁你又點呀?」




我:「嗱…妳自己睇啦…」我遞咗畀女朋友睇。
彤:「點解會咁㗎…係咪你嗰陣顧住嚟探我…所以溫唔夠書…但無理由㗎,我出咗院都未考英文,我見你溫Bio都唔溫英文…你做乜呀?」
我:「曉彤,唔關妳事…只係我真係好唔鍾意英文,以為是但寫啲嘢就可以合格,我而家知錯。」
彤:「咁而家點算呀?」
我:「睇怕我下年要繼續同妳做同學,呢一年我會好好讀返啲英文…」
彤:「嗯…好在其他科成績都考得唔差。」
佢個樣好似有啲開心但又唔敢表現出嚟。
彤:「係呢…點解唔見一鳴嘅?」
詠:「條友仔喺下面見緊Miss Lam,咪同佢一樣囉,failed咗中文,今次真係難兄難弟。」
彤:「不如我哋落去吖,我都要問Miss Lam攞Cert。」
落到去一鳴同Miss Lam兩個啱啱出嚟,睇得出佢大喊完一場嚟,唔知…Miss Lam同佢講咗啲乜呢?點都唔會係好似對我咁㗎喇,而且我同佢心情都可以話係天壤之別,其實我重為咗科估唔到嘅中文B而心中暗喜。
林:「曉彤!我好掛住妳呀!」
彤:「呀…Miss…做乜箍住我…」
雖然話佢兩個都係女人,但Miss Lam喺學校啲行為都可以用黐線嚟形容。
林:「妳掛死我喇,知唔知道我究竟有幾擔心妳!」佢唔止攬住曉彤,重要搖來搖去。




我就同詩敏兩個喺曉彤後面(目屈)住佢,警告佢唔好一時發花癲講咗啲唔應該講嘅嘢出嚟。
曉彤自殺呢件事就只有佢屋企,我同詩敏,一鳴同Wing,Miss Lam同校長知…本來係應該要轉介社工,但曉彤媽咪插手阻止咗校長咁做,好彩。
林:「嗱,妳張cert喺度,考得唔錯呀!」
吓?!得三科都可以有呢個結論,搞乜?
彤:「等我睇下先…」曉彤大方咁翻開成績單。
英文C,附加數E,生物B,中文U但oral係A…呢個女人把口真係唔得掂,同佢辯論未開波都輸咗九成,呢點我係好清楚,而佢考三科已經攞到八分,好過晒兩三成會考唔合格嘅考生。
我:「呀…曉彤…如果妳借到個英文成績畀我…」
彤:「無呀,我好辛苦考返嚟㗎!」
敏:「咁不如你犧牲埋個中文成績畀一鳴啦。」
鳴:「呢個時候,唔好講笑得唔得…」
詠:「喂!一切已成定局,下年再嚟過咪得囉,灰乜鬼啫。」如果一鳴知道埋Wing要離開佢…
林:「嗱,雖然你哋下年幾個唔再喺同一間課室,但要繼續相親相愛㗎,知唔知?」
攞晒成績,升班嘅升班,repeat嘅repeat,今日嘅任務已經完晒,我哋五個又一齊食大排檔;我同曉彤食雜扒餐,詩敏食車仔麪,Wing食常餐,一鳴嗌咗碗魚蛋粉,睇嚟真係so sad。
彤:「使唔使咁呀,你下年死鋤科中文都夠做啦,呢張枱有兩個人陪你repeat,我下年要考返晒所有科咁滯添呀,咁我係咪要喊埋出嚟呀?」
鳴:「唉…下年考得再好…」




詠:「你起碼要考返個廿分返嚟呀!」
Wing姐一路講一路拮咗粒魚蛋喂入佢口度。
其實我都feel到佢最唔開心唔係因為成積,對佢嚟講可能16同20分都無乜分別,而係升唔到班就無得同Wing做同班同學,咁兩個人嘅關係自然會危危乎…只不過Wing其實已經單方面下咗決定。
豪:「呀!太好喇,你哋果然喺度!」
我:「點呀…主席,唔係咁快嚟勒索我呀?」
點知佢理都唔理我,走咗去詩敏面前九十度鞠躬,你條友呀,分明打完齋唔要和尚。
豪:「女神萬歲!女神無敵!感謝女神仗義相助,計埋我哋已經肯定有廿個人去喇!志華!一鳴!重唔快啲感謝女神!」
我:「你又發乜神經呀!」
一鳴當然完全無心機理個黐線佬。
豪:「全靠女神你哋先唔使包底咋!」
敏:「唔好咁講啦,我都係班會幹事嚟,拉下客呢啲好閒啫,係我份內事嚟。」
豪:「係呢,女班長,阿嫂,我都重未問妳去唔去下個禮拜船P,請問…」
當我係契弟,曉彤嗌阿嫂,你又真係好嘢呀下…
彤:「欸…我唔係幾想去…有啲唔適應…」
豪:「乜事呀?係咪志華條PK仔蝦妳?」
彤:「唔係…頭先我返嚟學校撞到Cherry啱啱走,佢衝過嚟撓住我手問我點…發生乜事,個樣好親切…我好返之後好多嘢唔記得咗,剩係記得上年同佢食過兩次飯,唔知佢點解咁friend…呢種感覺好怪,唔太想見到其他人…」
豪:「原來係咁,無辦法啦…但我唔會俾志華唔去㗎喎,妳O唔OK先?」
彤:「無所謂呀,你哋玩得開心啲啦,幫我掉佢落海喂鯊魚就得。」
豪:「遵命!事成之後一定會send返張相畀妳。」
的確,曉彤都係唔去好啲,始終有風險。
食完飯我送咗曉彤返屋企,佢話就算得三科都想同屋企人慶祝下,所以我哋就無直落;而我最終都係要報result畀屋企人知…呢樣就真係無謂提喇,好彩我其他科成績都叫對板先無死得咁慘。
由於我要自己去玩嘅關係,事前我就打定底,隔日都陪曉彤去玩,等我嗰日可以放心啲消失;當然我哋都有做愛啦,曉彤而家已經變返之前咁主動,加埋我哋又無鬧架,都唔錯嘅。
到咗船P日,最後加埋Miss Lam係有33個人去嘅,甚至有兩條友喺嗰朝先突然出現,咁我就唔知係因為女神泳裝嘅號召力吖,定係因為我哋珍惜呢兩年嘅情誼喇。
已有 0 人追稿