27追釋出。

我:「喂!不如趁佢哋喺入面燒嘢食,我哋落水玩下先咯!」其實,我真係鍾意玩水。
鳴:「好呀…橫掂我都未有胃口住。」
於是乎我哋走去幫隻香蕉船打氣,然後就划咗出去,原來香蕉船真係好慢,非常之攰,同獨木舟係完全兩回事。
我:「係呢,同Wing去韓國玩得開唔開心?」
鳴:「咪又係陪佢睇衫,睇下明星嘢,買下CD咁囉,其他你都知㗎啦,咁你呢?」
我:「哈哈,咪同初戀女朋友去旅行咁囉。」
鳴:「唔知下年暑假可唔可以由沖繩搭新幹線去到北海道呢?」又記返起我哋小朋友嘅約定,其實中三真係唔係話好耐之前嘅事。
我:「其實沖繩同北海道無新幹線,要由九州開始到青森…」




鳴:「講錯咋嘛!咪由鹿兒島開始囉!」
我:「搭新幹線都唔平㗎。」
鳴:「遊客可以買pass㗎嘛,一程都已經回晒本,如果嫌唔夠整個來回,搭到佢蝕。」
當無女人喺度,我哋真係可以好小朋友,新幹線最南去最北要十個鐘,講真好無聊,但唔知點解講完又會好想試呢樣嘢。
我:「下年先算啦!如果你到時無女我一定陪你!」隔咗兩年都無乜變過。
鳴:「我同你講!今次我一定會專心讀書唔會再溝女,你下年洗定pat pat同我一齊坐新幹線坐到屁股痛啦,你唔好同我講曉彤唔放生你呀!到時我唔要做電燈膽。」
我心諗到時先算啦…最多同你玩完叫曉彤飛嚟搵我繼續啫,死唔去嘅;結果我就同佢圍住隻艇划下划下打圈,又落水游下咁,時不時會有隻好似鯊魚咁嘅Miss喺我哋身邊經過。
但…由於太陽實在太猛烈…玩咗半個鐘多啲我哋兩隻嘢都係要上返去,不過呢,活動完之後個人都係精神咗好多,非常好。
上到去班大滾友已經食得七七八八,而詩敏同Wing就重喺原位燒緊嘢食。
詠:「喂,你兩隻嘢去咗邊呀!快啲嚟食嘢啦,整好晒喇!」




擺喺我哋面前嘅係兩碟燒得好靚嘅雜扒全餐。
鳴:「到咗而家…妳重對我咁好…」
詠:「做乜喎,就算係朋友都可以燒畀你食啫。」
敏:「係囉,EX都可以燒畀你食嘅啫。」
詩敏…妳呢句係同佢講定同我講…佢哋重有兩個禮拜多啲先分手喎,即係,我算係妳嘅EX?
唔諗喇,真係好感動,有女人燒嘢畀我哋食,其他人恨都恨唔到,係乜關係呢啲好閒嘅啫。
敏:「你好嘢呀,個個都嚟搵我影相,係得你當我無到,家陣我好失禮你呀?」
我:「唔係呀…點會…咁我…」
老實講我真係語塞,就算呢度無乜外人…一鳴都唔係好清楚我同妳嘅嘢㗎咋。
呢個時候Tamama遊下遊下咁入返嚟船艙。




敏:「Tamama,嚟幫我哋影相吖!」
話時話,唔計班相,班活動一齊入鏡嘅相,呢張好似係我同詩敏嘅第一張合照…左起詩敏,我,一鳴,Wing,兩個女人好親密咁搭住我哋膊頭影,完全唔介意自己嘅胸部會同我哋有身體接觸…呢句廢話嚟…中間嘅我哋就唯有露出一個尷尬而不失禮貌嘅笑容;講埋Wing姐今日嘅打扮,係就咁bikini;無錯,的確係出面乜都唔著,一套白邊粉紅主色嘅bikini,左邊波波上面重有粒紅色嘅車厘子做點綴,今日嘅佢可以話開到行晒;只不過一鳴佢眼裡睇得越開心,內心就越係黯然神傷…
我:「係呢,班友做乜唔見晒人嘅?」
T:「啊,班女仔換晒泳裝上去曬太陽,咁班狗…班男仔咪上晒去趁熱鬧囉,重有啲去咗玩水。」
詠:「哈…乜呢度無女仔咩?真係搞笑!」
T:「點同喎…呢度嘅女仔,都係唔掂得嘅…」
魚:「嘻嘻,係呀,唔掂得㗎。」
同場嘅重有身處海上嘅海洋組合,兩個人黐到實一實,章魚佢兩隻腳就吊咗喺海馬大髀上面;章魚今日都係著bikini,淺藍碎花紋,不過就有啲波浪花邊做點綴,係嘅,佢比較瘦同細波,著呢啲款可以令個畫面豐富啲;我望咗一眼,條溝…嗯…或者唔可以叫乳溝,算係另一種骨感美掛,不過呢,佢條腿都係值好高分嘅。
俾著以前嘅章魚你係想像唔到會見到佢咁嘅,但…最後嘅青春光芒,絕對係應該不計成本咁燃燒殆盡嘅,呢點我好明白;呢度三對男女,一對就分隔重洋,一對就分手,最後一對…EX?
T:「唉…好想表白呀…」
我:「唔係掛?!又嚟玩呢啲嘢,今次係邊個呀!」
T:「唔係呀…未有對像…只係我覺得,兩年之後嘅自己都係無變過,好似一事無成咁。」
鳴:「點會喎,考好咗個會考升中六,已經係最大嘅交待。」以佢平時成績嚟講又真係。
敏:「Tamama,既然咁多嘅風波都係由你搞出嚟,就等我陪你練習下點表白啦!」
T:「吓…可以點練習喎…」




敏:「咁重使講,梗係同我表白啦,女神面前都夠膽表白,其他女仔就easy job!」
T:「咁點得喎…」
敏:「點解唔得呀?」
T:「我又唔係鍾意妳。」乜話!乜事呀?對住女神話唔鍾意妳?真係得佢先講得出口…
敏:「嗚嗚,Tamama請我食檸檬…」
呢個詩敏又真係七情上面咁陪佢玩…
T:「唔係呀…詩敏,妳係好靚女,身材又好,但係…鍾意一個人係講感覺㗎嘛,唔係咩?」
我真係由衷佩服Tamama,當年嘅自己同詩敏表白邊有咁高尚,只係俾女神嘅外在吸引。
詠:「咁我呢?會唔會有感覺呀?」
總覺得,如果呢兩個女人要出去玩仔,已經係近乎神級嘅境界…
T:「咁點得喎…」Tamama望一望身邊嘅一鳴。
詠:「叫你表白咋嘛,又唔係叫你搶人條女。」
T:「Wing姐,其實我好感謝妳,因為妳我先越嚟越大膽夠膽同女仔講嘢咋。」
係嘅,喺我同假初音打得火熱嘅時候,Wing就成日撩前面嘅Tamama講嘢。
魚:「係呀,大膽啲,傻下傻下咁就會有女朋友㗎喇。」章魚偎住海馬個心口,笑容甜到呢…




敏:「好嘞,你兩條友慢慢食,我哋出去玩下先,Tamama,跟埋我哋出去。」
T:「呀…做乜呀?」然後佢俾兩條女捉咗出去。
每次搞親班會活動,有肥豪喺度啲嘢食就有多無少,真係飽到呢…
我:「係呢…你哋,還好吖嘛?」
馬:「而家好囉…以後,都無辦法㗎。」
魚:「我都好想考多年會考呀…」
馬:「唔好咁講啦…我會等妳㗎,章魚。」
真好嘢,肥豪嘅惡作劇,變咗佢哋嗌對方嘅稱呼…
魚:「點等喎…都唔知去幾耐先會返嚟。」
其實,我覺得等唔到嗰個會係章魚先。
馬:「有乜所謂,唔拍拖又唔會死嘅。」
魚:「如果等唔到就識過個啦,但係…一定要靚過我㗎,知唔知!」
馬:「咁好難喎,我眼中嘅妳永遠都係最靚!」
熱戀期,又真係幾肉麻嘅嘢都講得出嘅…
魚:「好喇,我哋都出去玩下先。」




鳴:「嗯,你兩個都係落水玩會比較適合。」
馬:「做乜呀?閃親你呀?」
魚:「嘻嘻,真係報仇咁報呀。」
然後佢兩個就出咗去。
我:「下年,唔知會點呢…」
鳴:「下年,我會努力讀書囉。」
我:「唓,我夠會努力讀書咯。」
鳴:「你底分廿一分,讀唔讀都差唔多啦!」
呢個時候Miss Lam入嚟,重有少少滴住水,成熟嘅身材fit到漏油…
林:「啱喇,你兩個老婆奴,快啲燒嘢畀我食,我好肚餓喇!」
我哋都好清楚係無違抗命令呢個選擇。
林:「一鳴,repeat一年好閒㗎咋,好快就過。」
鳴:「Miss…我最灰唔係呢樣嘢…」
林:「咁,讀多年中五,識過啲新同學仔,可能可以溝到個師妹呢,玩完師姐玩師妹,幾型!」
重以為佢對住我先咁癲,原來對住一鳴都差唔幾…而且,佢都應該估計到Wing同一鳴會散。




鳴:「Miss妳唔好教壞我啦,雖然聽落真係好爽,不過就算係都等到中六先啦。」
林:「我都好灰,最灰唔係人生又要不停repeat教中四,而係好難再有一班會有好似你兩個咁出類拔萃嘅同學可以帶畀我歡樂。」
鳴:「乜我哋唔係帶畀妳麻煩咋咩…」
林:「點會,如果全班好乖無人俾我罰抄數學書實悶死我。」
鳴:「唔好咁對啲學生啦…好慘㗎。」
林:「如果諗到Wing會成世keep住你嘅親筆手稿,重覺得慘唔慘?其實…教書真係好鬼悶,我寧願做上堂嗰個,起碼可以喺櫃桶玩電話。」
呢一刻,我覺得Miss Lam已經唔再係我哋老師,而係我哋朋友;侍奉完Miss Lam進餐之後有幾個女仔入返嚟話想唱K,所以我同一鳴就出去睇下乜嘢景。
上去上層甲板望一望,四個女賭徒喺度打麻雀…
「食!多謝晒!混一色對對胡正花七翻128下!」
強:「屌!妳點會出沖㗎!」
「是但啦…罰你咋嘛…唔好咁多聲氣。」
豪:「啱喇!練定腰力準備溝女啦!」
跟手肥豪坐住傻強隻腳,傻強就做sit up…
強:「一,呼…二,呼…死肥仔…三,一陣三翻都…四,呼,夠輸死你!五…」
欸…好明顯呢度唔係俾我哋兩個小朋友玩嘅地方…
過咗陣,船家set好咗個瀡滑梯連彈床組合,班友顧住喺度賭我兩個就梗係先玩為敬,條滑梯都幾高㗎,不過我同一鳴細細個就跟住屋企人周圍去玩,呢啲濕濕碎啦,既然無人爭就玩完即刻爬返上去再瀡過,務求要彈到最靚一下先收手。
我:「咦,原來詩敏同Wing喺出面浮床晒緊太陽喎。」頭先出嚟已經唔見佢兩個喺船。
鳴:「啱喇,我哋彈過去flirt下女先!」
我:「吓?flirt自己條女?」
鳴:「妖,其他唔flirt得,有得揀咩?」
我:「但詩敏又唔係我…」
鳴:「玩下咋嘛,你以前都係咁啦,我唔會爆畀曉彤聽就得啦!」睇嚟一鳴佢已經回復元氣,好事。
於是兩隻馬騮就跳高跌落條滑涕再彈到遠一遠,向佢哋張浮床游過去;順帶一提詩敏同Wing係我哋班少數識游水嘅女仔之二。
鳴:「乜兩位靚女咁寂寞自己喺度曬太陽呀?無仔仔陪妳哋咩?」
詠:「你哋兩個喺度發乜神經呀?」
鳴:「見到靚女咪發神經囉,受唔受溝啫?」
詠:「你唔係諗住咁樣鳩噏幾句就溝到女呀?過主啦!」
我:「小姐,你咁好身材做乜唔著bikini呀?實在太暴殄天物喇!」
敏:「係咩?多謝喎!我膽心你精盡人亡吖嘛。」
就係咁,我哋兩個傻仔扶住張浮床跟住喺水面飄下飄下;詩敏,我可以咁樣同妳相處下,已經覺得好開心,我唔會貪心。
敏:「唔得閒理你哋呀,我哋有正經嘢要做,讓張浮床畀你兩隻嘢喇。」
原來佢哋運埋浮潛鏡出嚟,戴好之後就轆咗入水入面,換咗我哋兩個上浮床睇住佢哋載浮載沉。
敏:「唔好郁!」
我:「嘩!」佢掉咗隻海膽上我個肚上面。
敏:「佢叫奧斯卡!陪佢玩下啦。」
我:「吓!點解要改名?」
敏:「我鍾意呀!你理得我。」
詩敏,妳從來都係咁自把自為,而且真係好可愛。
我望住奧斯卡,佢好似因為離開咗水變得非常驚,啲針郁下郁下咁喺我個肚上面移動,好鬼死痕,我又驚佢會曬死,所以時不時撥啲水上肚。
敏:「喂!佢有朋友喇,呢隻係湯馬士。」
我個肚上面又多隻海膽…
我:「我想問,妳點知佢哋係男仔?會唔會…可以有隻女仔陪下佢哋?」
敏:「總之我知啦…唔使,佢哋係基㗎!」
乜話!兩隻基海膽…喺我個肚上面?死火,我好似分唔到邊隻打邊隻添…詩敏佢唔會認得㗎?過咗陣Wing都有收獲,掉咗隻海星喺一鳴塊面上面…
開心嘅時間過得特別快,玩下玩下就黃昏,而我哋幾個都上返船。
已有 0 人追稿