豪:「志華,詩敏喺上層,佢叫你上去喎。」
吓?啱啱先一齊玩完,搵我做乜?有嘢…同我講?係乜呢?點解唔頭先同我講埋…
我個心真係有啲緊張,不虞有詐…點知一上到去肥豪就喺後面捉住我隻腳,傻強同一鳴兩個捉住我手,詩敏真係喺度…但佢對住我奸笑。
我:「黐!黐線!你哋想點?」
豪:「對唔住!應承咗阿嫂,我哋都唔想!」
我:「喂喂喂!係都等我除返衫褲先!」
班人渣當然唔會理我,只係搖咗我褲袋入面嘅電話銀包出嚟,算係未人性泯滅…
豪:「Tamama!開Cam!」
T:「得…得…影緊喇!」
唔止佢,就連詩敏都用個電話鏡頭對住我。


我:「喂!喂!我要腳落!」
豪:「一!二!三!」
「噗通!」
唔係頭落,唔係腳落…係打橫轉住咁跌落去…痛得我,如果少啲肉真係骨折都有份。
詩敏,唔知妳今日玩得開唔開心呢?
敏:「重喺度hea!快啲游上嚟呀!開船唔等你!」
認真…條腰痛到吖…上返船重要俾人恥笑,就連船家同Miss Lam都唔放過我,我諗,一鳴全日最開心就係啱啱呢一下…
玩咗成日,除咗啲女賭徒外所有人都曬黑咗至少一個tone,個個都攰到傻甚至有啲人挨住埲牆就瞌著咗;架船泊咗岸正當大家都以為今日已經完結係時候準備盡興而歸之際…
林:「喂!咁多位同學仔趕唔趕住走呀?如果唔趕嘅話不如我哋去公園坐低謦下欬吖?」
估唔到呢個Miss又會而家先嚟咁熱血喎…我呢啲同佢咁熟嘅當然會留喺度啦,最後只係走咗六個人,剩返廿七個一齊走咗入公園入面圍圈坐,今次算係所有人都超級畀面,話晒都最後一個funtion吖嘛,係唔捨得啲嘅;呢個時候天色都已經黑晒,氣氛重正過啲乜濕鳩訓練營嘅分享會,至少而家係所有人自願參與。


林:「嗱…大家都玩咗成日喇,一定係好開心,不過呢…你哋唔係話今日主題係惜別會㗎咩,好似重未入正題喎,主席?」
豪:「入正題呢啲…就梗係要由我哋親愛嘅班主任帶領㗎啦,而家咪開始囉!」
林:「死仔包吖…好喇,今日好可能係我同好多位同學嘅最後一次見面,咁我想問下,你哋對我有無乜意見呀,鬧我都得㗎,係你哋報仇嘅最後機會,等我未來可以改善下。」
當然無乜人咁斗膽啦…
鳴:「如果…都係嗰句啦,可以cut抄數學書呢個懲罰會比較好,直接計數有用啲嘅…」
林:「咁…我咪少咗好多歡樂囉?」
豪:「我有意見!佢抄得一個chapter就梗係無意義啦,如果抄晒成本,咁咪多本書用囉,係咪!」
林:「主席你下年係咪讀Maths&Stats?」
豪:「係呀…做乜呀…」
林:「咁呢個壯舉就交畀你嚟實行喇,你唔好行差踏錯,我一定罰你,到你抄完我就用你份手抄本嚟教書,保証你流芳百世。」


豪:「我呢啲小人物,妳就唔好咁益我啦。」
有Miss Lam做我哋嘅班主任實在係我哋嘅福氣,其實大家對佢差唔多有讚無彈。
林:「好喇,講完我不如到你哋講下自己嘅感想吖,有無人想做第一個?」
通常呢啲時候大家都會等勇者,你眼望我眼。
點知一位讀書唔叻,唔多起眼嘅男仔舉手。
「Miss Lam…對唔住,我讀書唔叻,一直都辛苦你哋…今次考得唔好我都唔想…」
講講下想喊咁,隔籬兩位男仔就搭住佢膊頭。
「我諗以後我都唔會再有機會讀書…不過,我都唔想自己做一個廢人…我諗住會去學整車,夠十八歳之後即刻考返個車牌,至少可以揸車送下貨。」
林:「其實,你唔係好差呀,你兩科數都合格,已經係你嘅成功,亦都係我嘅成功,其實讀書都只係學習嘅其中一個途徑,只要你之後搵到自己想做嘅嘢,發揮到長處,做人開心,就係人生嘅贏家;好似我咁,其實我唔鍾意教書㗎,教咗一年就諗過走,但係,我知道有學生鍾意俾我教,所以先覺得有意義而堅持到而家。」
「知道,我會繼續畀心機…」
林:「好…跟住…不如Tamama?」
T:「嗯,呢兩年呢,最開心就係知道自己可以原校升中六,對我嚟講算係好難得,如果之後A level唔太差俾我轆到入大學,已經可以話超出我嘅期望;呢兩年過得好開心,尤其係志華,一鳴,主席,阿強都為大家帶嚟好多歡樂…最後,我好想下年可以勇敢做一樣嘢,可能Miss妳都知,我想同女仔表白。」
林:「搞到滿城風雨,想唔知都難啦…雖然學校入面未必係適合談戀愛嘅地方,但我一定會支持你!如果有任何問題可以私下嚟搵我㗎!既然係咁…不如情聖二號嚟講下有乜感想?」
鳴:「Miss…我下年,一定會!讀好科中文!我要多謝阿Wing…呢兩年…會考兩年,由頭陪到我落尾,佢教識咗我好多嘢,令我睇清楚自己…如果無佢,今日嘅我就唔係而家嘅我…重有好多種種唔同嘅經歷,得著實在係多到數唔晒…為咗妳我抄幾多本數學書都願意!」
林:「乖喇…唔使喊咁口,Miss呢,最後悔就係叫你抄數學書而唔係抄中文書…如果唔係…我覺得我愧對阿Wing…」


就係咁,每個人都用一兩分鐘分享自己呢兩年嚟嘅種種點滴,大家謦謦下粒幾鐘好快就過咗去;至於我分享咗啲乜呢…因為我怕醜所以就唔喺度講嘞,大家自己諗下啦;完咗sharing之後我哋重走去食糖水,廿幾人霸晒人哋成間鋪,呢一刻先真正覺得入到呢一班實在係太好太好,最後所有人先依依不捨咁離開。
林:「各位同學,我揸車走喇,好可惜我架車得一個乘客位所以就唔獻醜喇,Bye bye大家!」
我諗…全校係得我一個咁好彩可以坐到佢架Fairlady,呢個女人真係好正…可惜我只係佢嘅學生,而且佢結咗婚,但又如果,佢未結婚就好可能唔會揸到呢架車。
小學嗰陣打得GT多,我好鍾意Nissan嘅Skyline GTR,因為馬力大,四驅易操控,尾燈夠晒型;但大個咗之後睇得多咗動漫,知道GTR呢架嘢其實好無內涵,可惜吖…好少賽車game有收Fairlady呢架車。
我決定咗,要買盒Fairlady嚟砌,趁重有兩個禮拜暑假剩。
我哋大部份人都係由西貢出返彩虹轉車,成班大帝走晒去上層繼續玩,嘈到拆天,過埋我哋最後嘅中五時光。
到咗彩虹我哋各自轉車,我就同一鳴,詩敏,Wing同一架巴士,咁都重有其他同學嘅,但見我哋兩pair上咗去佢哋就坐下層算…
我同詩敏自然咁走返去右手邊靠後嘅位坐,一鳴佢哋坐喺前面,佢兩個可能攰到傻就互相挨住瞓覺。
我:『曉彤,唔好意思呀,Miss Lam捉住我哋一齊sharing同去食糖水,所以overrun咗,我而家同一鳴Wing,詩敏佢哋一齊搭緊巴士返屋企喇。』
曉彤係一個敏感嘅女仔,我當然會講埋同邊個一齊,而且我都唔想佢即刻打電話嚟…不過呢,人名排列就有細心諗過,我隔籬嘅詩敏當然係看在眼裡。
彤:『嗯,你哋玩得開唔開心呀?』差唔多秒回。
我:『咁就梗係開心啦,不如我返到屋企打畀妳同妳講,而家成身散晒,想喺巴士上面瞌下>_<。』
彤:『好呀!咁我沖涼先,等你電話喇。』
到咗而家,我當然可以好有技巧咁自然stop咗段conversation又唔會令曉彤覺得唔開心,為自己爭取返啲自由時間;詩敏佢就喺我側邊用個意味深長嘅微笑嚟望住我。
雖然唔使煩曉彤嗰邊,但我同詩敏…我都諗唔到有乜嘢可以同佢講,無理由同佢講我掛住奧斯卡同湯馬士㗎,只會顯得自己低能同埋無嘢搵嘢嚟講,盞大家都尷尬…


敏:「呀…唔知肥豪send咗段片畀曉彤未呢?」
我:「點知喎,玩我嗰下佢哋就叻…」
敏:「咁我send咗我嗰段畀佢先啦。」
睇住詩敏send我飛落海段片畀曉彤,caption係:『睇下妳老公幾無用!!哈哈XD!!』
詩敏…多謝你…無言感激。
詩敏…我…好多嘢想同妳講…但係…
敏:「不如我哋聽下歌?」
已有 0 人追稿