賀偽甜故我們仨完結釋出,提下大家未睇嘅就去睇。

填表嘅嘢話咁快就搞掂晒,到咗小息我當然第一時間過隔籬班房,咁唔止我嘅,都有其他同學,向來兩班理科生都熟,而且有時會一齊上堂,所以都無咁礙眼。
一入到去佢哋課室就見到一鳴同曉彤坐喺中間最後面,都係好正路,而一鳴見到我就起身讓咗個位出嚟坐咗去隔籬張吉枱。
我:「第一日開返學覺得點?適唔適應?」
彤:「咪又係咁,係唔同咗人啫,好彩有你兄弟陪我唔會咁悶;係呢,得你一個喺嗰邊會唔會好慘?」
我:「本來應該會…但好好彩,撞返個以前一齊打過波嘅師妹,做緊我嚮導…」邊有得瞞佢吖…
彤:「師妹?乜咁正呀…」
我:「放心啦,傻豬,唔係靚女嚟,無威脅。」
彤:「哈,咁就真係要過去睇下先知。」




好彩旖旎真係普通女仔,我知曉彤係真係會去八…
彤:「唉…唔知詩敏佢哋開學點呢?」
鳴:「我…剩係好掛住Wing…」
我:「其實你落一層樓咪可以搵佢囉。」
鳴:「唔好啦,你哋都知…今日係我同佢嘅乜嘢日子,無謂攞嚟傷心啦,我要好好讀書。」
彤:「唓,咁朋友都可以見嘅啫,唔使做咗EX就變仇人呀?兩年感情假㗎?」
鳴:「唔係,或者…等我考個好成績先嚟畀佢睇。」
彤:「重有成年呀!等到人哋有新仔你先慢慢搵佢啦。」
鳴:「係都無辦法,本身就算唔留班我都打定輸數…而家咪幾好,長痛不如短痛。」
彤:「呢班都幾多靚女吖,溝個師妹返嚟囉。」




望一望,又真係有幾個睇落秀色可餐。
鳴:「唔呀!應承咗Wing要好好讀書,唔係嘥一年嚟專程溝女。」
彤:「理得你,反正就唔關我事。」
就咁吹咗陣水,曉彤真係跟我嚟我呢邊視察。
「阿嫂早晨!」「歡迎阿嫂大駕光臨!」
呢班友真係唔講得笑,有兩三個直頭拍得住肥豪同傻強,玩唔緊要,唔好有惡意就得…
彤:「Hi!大家好!」曉彤亦都輕鬆應對。
我坐返埋位,呢個時候旖旎亦都喺我隔籬。
旎:「曉彤師姐,妳好。」
彤:「師乜鬼姐吖,大家都係同form啫。」




拜託,千祈唔好有乜火花。
彤:「嘻嘻,呢隻嘢就拜托妳幫我睇住先啦。」
旎:「放心啦,我會幫妳男朋友好好適應呢度。」
彤:「唔該晒妳,不過佢好曳㗎,小心啲呀。」
曉彤用右手反手遮住左邊嘴細細聲咁同旖旎講…
旎:「哈,如果佢敢多手嘅話我一定會嚟妳度投訴,到時睇佢點死。」
彤:「好呀,就夠鐘喇,我返去先。」
女人嘅對話總有種令人讀不懂嘅感覺,但就咁睇落應該尚算風平浪靜…掛?
旎:「曉彤,佢係咪有啲小心眼?」
我:「我都唔知,但我諗拍緊拖嘅女仔都係差唔多掛,男朋友隔籬有其他女仔可能會擔心嘅,唔係咁咩?妳有無拍拖?唔會咁諗咩?」
旎:「無呀,我呢啲薯仔無人睇得上。」
我:「唔會吖,我覺得妳性格幾好,女仔唔係剩係睇樣㗎嘛,就算男仔都係啦。」
旎:「你曾經圍住兩個大美女轉梗係可以咁講。」
我:「欸…呢層,我都唔係好知。」
旎:「我都係鍾意詩敏姐姐多啲,雖然已經兩年無同佢交流過。」估唔到佢會提起女神。




我:「妳唔係剩係記得俾佢殺波殺到喊㗎咋咩。」
旎:「唔係講呢啲呀!佢真係好有魅力,就算我係女仔我都感受到,同佢打波全世界都望住佢無人會望過嚟我呢邊。」
我:「女神呢啲,遠觀㗎咋,咁易溝到咩。」
我都係求祈噏,只係唔想佢繼續講呢個話題。
旎:「我就唔信你唔得。」
我:「吓,做乜對我咁有信心,事實擺在眼前。」
旎:「你知唔知對上兩年有幾多人八你哋啲嘢,我覺得詩敏姐姐對你一定係有啲嘢,只係你把握唔到機會錯失咗。」妹妹仔,妳知道得太多了…
我:「點都好啦,我唔會背叛而家女朋友。」
好彩呢個時候李sir入返嚟,等我唔使再糾纏喺呢個問題上。
李sir真係好人,做晒正經嘢之後就俾我哋做自己嘢,細細聲謦欬都可以,佢就喺出面幫我哋執過個新嘅座位表,不過我適應咗Miss Lam嗰套而家反而唔係太慣。
旖旎佢都算係好盡責,差唔多將班入面所有同學都介紹一次畀我識,例如邊個係搞事同搞笑份子,邊個食過三個女仔檸檬所以有檸檬王呢個外號,邊pair男女懷疑搞緊地下情,邊個女仔好鍾意發姣叫我避忌啲;我經歷過咁多嘢,有啲乜同學都係好閒嘅事,但呢啲嘢總係知好過唔知嘅,始終未來八個月都係要成日對住,都唔想講錯嘢得罪人多。
講講下仁慈嘅李sir行咗過嚟。
李:「志華,你本身係咪同旖旎識㗎?」
我:「係呀,三年前一齊打過下波。」
旎:「李sir,如果你唔介意我可以繼續同佢坐㗎。」估唔到佢突然之間咁主動,都開心嘅…




李:「哈,我正想問妳,咁妳就帶佢熟習下呢班啦,麻煩晒妳。」講完就返先生枱繼續砌坐位表。
我:「旖旎…做乜…好想同我坐?」
旎:「你諗乜呀,廢事你一個孤零零咋。」
我:「對唔住…但我都想問清楚先,妳…對我無嘢㗎?」自從假初音一事之後我到而家都係驚弓之鳥,點都係問清楚先好啲,反正我都已經開晒牌,又唔係細路仔,無乜嘢好怕醜。
旎:「你發乜神經呀,以為自己真係情聖呀?」
我:「唔係,只係我唔想有任何唔開心嘅事發生…」
旎:「即係點呀!如果我對你有意即係唔開心嘅事?你真係好黑人憎!」
雖然佢係激動,但係講得好細聲嘅,因為我哋都唔想隔籬聽到我哋講埋啲咁嘅嘢。
我:「旖旎,對唔住,妳知我乜情況,明白我擔心啲乜嘅…」
旎:「我知呀,當我傻嘅咩,但你問得咁直接,我真係想打扁你囉,放心,我而家對你零興趣。」
我:「嗯…咁我無嘢問喇。」希望佢唔係真嬲。
旎:「不過呢,如果去返三年前,我一定追你。」
我:「妳…做乜前後矛盾…」
旎:「無呀,只不過詩敏姐姐個個都唔要,剩係收你做兵,總有你嘅特點,我想體驗下咋嘛。」
我:「感情呢啲,唔係玩玩下㗎…」




玩到出人命,以後重邊敢玩呢。
旎:「知喇,情聖…同埋以後唔好叫我旖旎喇,我改咗個英文名,叫Tiffany。」
旖旎配Tiffany,又幾襯喎。
我:「Tiffany,妳改呢個名唔係因為鍾意Tiffany blue呀…」無記錯佢屋企係中產,知呢啲好正常。
旎:「妳點知㗎!Tiffany blue真係好正㗎!就好似一個青澀嘅少女喺碧綠色嘅湖水上面身心蕩漾咁,無其他顏色可以媲美。」妳唔讀文科嘥晒。
我:「睇到妳校裙透Bra帶就知啦…」
旎:「頂你個肺!變態!我要話畀曉彤姐姐知。」
我:「唔好呀…我無特別意思㗎,我又唔係細路仔,見到乜咪講乜囉,如果妳唔想透出嚟就換返條full shoulder嘅底裙啦。」
旎:「係囉,我細路女囉好未?唔鍾意你呀。」
Tiffany,幾年前我就知佢係個辣椒妹,大情大性,直腸直肚,希望我同佢唔會出啲乜事啦。
最後半個鐘調位,我同旖旎就坐喺右手邊靠窗中間排嘅位置,我坐靠窗,呢個位正正就係詩敏上年下學期坐嘅位,如今我可以睇返同妳當時一模一樣嘅景色,感受嗰種孤獨;當然嚴格嚟講唔係呢間課室,隔籬課室先係。
咁我都未至於有旖旎照應就收埋自己嘅,都有同前前後後嘅男仔打下招呼,佢哋對我都幾好,話知道我成績唔錯希望向我多多請教;我心諗…到時熟咗肯撚定咪又係請教我啲情史同埋點溝女。
中午放學鐘聲響起,我同旖旎講咗聲再見後就走去隔籬課室,重使問…當然係接女。
鳴:「得喇得喇,唔使理我,由得我呢條毒撚自己返屋企啦。」
都唔知佢係咪M底,難為Wing頂咗佢咁耐。




彤:「不如調返轉吖,我送你兩個返屋企咪得。」
我:「去大家樂食埋餐開學飯先返去啦,好無?」
鳴:「頂!咁重衰…」
講就咁講,最後我哋三個一齊去食大家樂。
其實我都掛住Wing,佢真係一個一流嘅朋友。
鳴:「過份呀,係咁閃住晒點食呀?」
彤:「唓,你上年唔係閃住我哋兩個!想放閃咪快啲溝條新女囉。」
鳴:「睬妳都傻,我今年要讀書呀!」
我:「大家都要讀書啦…無謂討論乜閃唔閃嘅問題。」都玩咗兩年有多,重計較呢啲做乜…
鳴:「你試下攞塊鏡出嚟照下,睇下會唔會閃親自己吖?你哋信唔信我今年music day唱電燈膽吖嗱?」係咪失戀太大打擊?可惜我無PTGF介紹畀佢減下壓。
彤:「係咪呀!你唱我唱呀,一齊囉,就睇你唱到乜key!」拜託唔好再唱呢首歌好唔好…
食完飯就真係返屋企。
鳴:「你哋係鬼送我,分明上去做埋嗰啲…咳咳…唔講喇!」
彤:「妖!你同Wing之前兩年唔係咁!」
鳴:「唔好再講喇…嗚嗚…」
彤:「唔好扮慘呀,最多我哋兩個嚟你度一齊打機,等你唔使咁寂寞嘞。」
鳴:「走走走走走!唔好阻住我溫書。」
彤:「唓,我哋都係溫書咋嘛。」
真係服咗佢哋,咁都好鬥嘴嘅…
已有 0 人追稿