32追釋出。

就係咁,我哋返到去好似第一次拍拖去海洋公園嗰時咁,佢打開咗電話個music player插咗一邊耳塞入我右邊嘅耳仔。
敏:「我都攰,借個膊頭嚟吖。」
我:「嗯,好呀。」
敏:「放鬆啲啦,傻瓜。」
佢唔止挨住我膊頭,重用左手捉住咗我右手嘅手背,手指輕輕咁攝入我啲指罅中間,呢一下真係好warm,非常溫馨,令我感覺到女神其實一直都係喺身邊支持緊自己。
當然,佢係長住喺我個心入面。
聽聽下有一首歌,係伊麪唱嘅…
「誰曾路過此使我知 生有好意義




誰仍令我戀一輩子 結局即使注定難合意
現你雖離開 願你都能知
情未變改 一心不會兩意
就算心頭哀 沒法可停止
睡了醒了亦盼跟你重相依
Stay 活著不可親你令我生如死
Stay 你那淺笑讓我哭笑著回味
Stay 但是即使所愛沒法可留起
Stay 我也戀你直至消失天與地
遲 還剩太多的句子 和未說夢兒




如何讓你知當我知 這段匆匆故事無下次
剩太多黃昏 剩太多晨曦
和下半生 當中需要有你
但這些黃昏 但這些晨曦
像已知再沒法跟你在一起
Stay 活著不可親你令我生如死
Stay 你那淺笑讓我哭笑著回味
Stay 但是即使所愛沒法可留起
Stay 我也戀你直至消失天與地」
詩敏,到底妳啲歌單係點執㗎…要忍住,唔可以喊,女神都重咁平靜,我一個男仔要堅強。




我同詩敏兩個落車先,去到中間點就分別。
敏:「開學再見喇!記得打畀曉彤呀,bye!」
我:「知道喇!bye bye…」
話就話開學再見,不過大家唔同form,會有幾多見面機會吖,最多都係練波嗰陣可以對下,如果我重繼續喺校隊嘅話…假如曉彤唔想我打嘅話我諗住quit就算,反正學校唔會夠人打到學界甲組。
返到屋企當然要即刻打畀曉彤report講下今日玩咗啲乜,佢就係咁loop住我俾人掟落海條片喺度傻笑…好嘅,只要妳開心就乜都係好;至於我同女神同兩隻基海膽嘅呢啲故仔就當然收埋無講;講下啲男仔點樣圍住泳裝女神爭影相囉,同埋啲女賭徒點樣搞到肥豪今日做咗過百下sit up…其實我好想知佢哋做完籌碼之後會有乜回報,無理由咁簡單嘅…
剩返落嚟嘅暑假,都係同曉彤正常拍下拖,買咗架雙星Fairlady 370Z嚟砌,我重專登對返Miss架車嘅色嚟買噴油,曉彤都有上嚟睇住我砌,但佢就應該唔認得呢架係Miss Lam部車嚟…咁砌下砌下,咪砌埋曉彤囉…佢都真係幾好砌嘅,無詩敏咁高又輕啲,我好鍾意抱起佢上我條腰但唔郁,要佢好似隻樹熊咁用條腰套動我;另外,我哋都有溫書,我就教下佢計數咁。
好快就到咗9月1號開學日,點知一返學去到校務處就發生咗件我諗都未諗過嘅壞事…其實我真係好蠢,諗深一層呢件事都係好有可能發生嘅,三條友留班有無可能塞晒落人哋同一班度呀…最大鑊嘅係佢兩個留返喺原來班別,我就褪咗去另一班理科班。
彤:「無所謂啦,唔使唔開心,放學一齊溫書咪得囉。」
鳴:「夠鐘上去喇,唔好諗無謂嘢,放心,我唔會俾其他男仔掂你老婆嘅。」
就係咁,我哋三條友上到去各自嘅班別,其實都係隔籬班房啫,想見面係好簡單,我去到課室門口望住曉彤深情微笑,揮手道別,一齊入到相應嘅班房。
屌…Odd到爆,諗返起升中四嗰陣大家都係打亂班,Wing無人識佢都無特別介紹自己,但而家我係踩入去已經同班咗一年三十幾人嘅地頭度,全世界都望住我好似見到外星人咁。
既然都係,趁先生未嚟,不如我自我介紹先,唔係話我好驚無friend埋唔到堆,但至少我都唔想俾人排擠搞到分組無人要嘅地步。
我:「欸…各位5X班嘅同學,你哋好呀,我係啱啱會考失手嘅同學嚟,所以由今日開始會加入你哋呢個大家庭,希望可以同你哋好好相處啦,咁我個名叫志華,大家直接叫我就得,可能你哋當中好多人都已經知道我係邊個…」
點算,真係好㞗,快啲求祈噏完去後排搵個吉位坐就算,陣間先等先生安排睇下邊個咁好彩同我坐啦…點知我講都未講完…
「知喇!天下第一兵吖嘛!」




「失乜嘢手吖!廿一分留班高材生,顧住溝女搞到fail英文啫,一年讀一科慢慢enjoy啦。」
「當自己屋企得喇!但記住教我哋溝女喎!」
我都估到…無咁簡單。
「喂!人哋第一日過嚟唔好玩人哋得唔得呀!你哋班大帝唔好咁過份好喎!」
講嘢嘅係一個女仔,細細粒嘅,短髮平頸頭,齊陰得嚟又散散哋,用同自己身型不合比例嘅聲線同語氣嚟斥責班男仔,咦…咁熟口面嘅。
「唉…果然情聖…Day 1有女照…」班仔無晒癮。
「收皮啦你哋!」講完個女仔就掐咗我過去,原來佢隔籬留咗個吉位出嚟。
我:「妳係…旖旎?」我記得刁鑽嘅名多過個人。
旎:「喂!你唔係唔記得我呀?」
中四嗰陣唔認得曉彤嘅畫面再一次浮現返出嚟。
我:「咪記得囉…妳靚女咗吖嘛…」
其實十幾歲嘅女仔,九成九大個啲就又會靚啲㗎啦,至少飛機場都會變小山坡吖,不過認真講又未係話好靚嘅,同曉彤有一截距離,個樣比較平實易啲相處咁…佢,係我中三嗰陣一齊打過羽毛球嘅師妹,重記得佢當年俾詩敏砌到喊咁口,到咗我中四好似佢話覺得自己身高太矮就退出咗校隊。
旎:「作死你呀,喺度flirt我?你有女㗎喇!」
我:「邊係flirt…只係道出事實咋…係喇…你哋唔係照返上年位坐嘅咩?我呢個位無人嘅?」
旎:「哦,係個無乜嘢嘅男仔啫,我叫佢坐咗去側邊。」妳咁霸道會唔會搞到我俾人歧視㗎…




我:「妳專登…對我咁好?」
旎:「乜喎,呢班得我同你最熟,咪幫下你囉,費事你自己一個嚟到無人無物咁慘。」
我:「唔會嘅,我都會嚟搵妳嘅…」
旎:「信你至奇呀,我唔講你唔認得我添啦。」
無錯,佢係我中三嗰陣一個黐我黐得最埋嘅師妹,好多時就係同我呻點樣俾詩敏打到落花流水,咁我就會帶佢去阿波羅請佢食乳酪雪糕氹返佢;不過當年埕埕塔塔(情塌)嘅嘢又邊鬼識吖,只係一啲好純潔嘅友情,佢嗰陣仍然係一個飛機場,而我隻飛機都重未識得射飛彈…
講咗幾句班主任就嚟到,係李sir,中年阿叔一個,教中文嘅,無特別,但我知佢幾好人,睇住佢一個人捧住兩個A4紙箱嘅通告回條上嚟。
李:「好耐無見喇,咁多位同學…係呢,我哋今年會有一位新同學,唔知大家互相認識咗未呢?」
「放心!Friend過打band喇!」
李:「咁…我唔介紹喇,你哋相處得融洽啲呀,志華你有乜難處就同我講啦。」
雖然佢係好人,不過好似啲學生唔係幾受控。
第一日開學係點?我唔重覆第三次喇…
就喺我填填下手冊嘅時候…Miss Lam出現咗喺課室門口,李sir見到就出去問乜事,之後過嚟叫咗我出去…
林:「Sorry呀,無諗過會咁…以前啲人repeat,都係直接留返喺同一個班別…」
無諗過佢會煞有介事咁專登嚟道歉。
我:「哈哈,一班三個人repeat去晒同一班,好似對個先生好唔公平咁,又或者…啲高層知我同曉彤嘅事,所以先專登分開啫;係嘞,妳做乜咁得閒走嚟搵我嘅?唔使理妳自己嗰班㗎咩?」




林:「喂!第一日做我學生呀?唔知我點操作㗎咩?」講起上嚟又係,唔應該懷疑佢嘅。
我:「小心啲細路唔同我哋呀,一陣作反妳就俾校長鬧死㗎喇。」我諗…全校得我一個會同先生咁溝通。
林:「佢哋敢?係喇,你兩個真係OK吖嘛?」
我:「諗深一層…分開可能都唔係壞事吖,如果我同佢同一班,全世界知我哋乜事,先生可能又頭痛,其他同學又唔敢掂我哋,如果坐埋一齊好似好尷尬咁,無得一齊坐又唔知點咁…」
林:「吖…乜你而家思想咁成熟呀,但…好似你白白浪費咗一年咁。」
我:「乜浪費呀!我重要攞返兩條A嚟畀妳睇㗎,我要話畀全世界知,讀多一年會考未必係蝕底,JUPAS都會計會考分㗎嘛,啱唔啱先?」
林:「吖!咁大口氣,你唔好唔記得攞唔到要點呀…」梗記得,但我懶得理佢…
我:「同埋,如果我同詩敏繼續同班…咪盞大家辛苦,或者我選擇repeat其實唔係為咗同曉彤繼續一齊做同班同學,只係想避開詩敏啫…諗起重要日日同佢見面,到時就真係…」
林:「嗯,Miss Lam都係想你哋讀得成書,開開心心,咁就夠晒喇,唔阻你,返去繼續上堂啦。」
可能我最失落嘅一樣嘢係無得繼續俾Miss Lam教…
已有 0 人追稿