【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 書中自有顏如玉
QQ300k釋出（上）
時光飛逝，話咁快就連新年假都過埋，嚟到二月尾，唔夠兩個月就會考開考，同班同學都開始神經緊張，而我呢…咪又喺咁過，喺我眼中練波同溫書一樣咁重要。
詠：「咦，咁乖嚟圖書館溫書呀？」
我：「嗯，就考試，做下樣都要溫。」
其實點解嚟圖書館呢，係因為比較安全，唔會俾啲小朋友捉咗去打乒乓波，又或者俾同學包括嗰四隻小魔女捉住嚟問嘢…
詠：「你而家同返詩敏一齊打波咪幾好。」
我：「嗯，係呀，好好。」
詠：「咁你兩個而家點？」
我：「無呀，咪一齊打波囉。」
詠：「返唔到去好似以前咁？」
對佢嚟講，我返去以前可能係指繼續做兵圍住詩敏轉，其實呢樣嘢對我嚟講已經無意義；要真正返到以前咁，我都唔知用邊個時間點先正確，而且我同佢嘅心境都有轉變，與其話延續舊情，倒不如話新的開始好似重適合。
但我有兩樣嘢想做好佢先，比賽，會考；連自身嘅嘢都做唔好，詩敏只會覺得我係同以前一樣，一個貪戀佢嘅大細路。
我：「我先唔要繼續做佢隻兵呀。」
詠：「拍過拖果然唔同咗喎，係呢，講起做兵，你知唔知一鳴同曉彤佢哋點樣？」
話時話，Wing由阿嫂變咗EX嘅伴侶嘅EX，呢種轉變都幾搞笑下。
我：「無理過佢呀，佢哋開心咪得囉。」
詠：「我琴日去補習，咁啱見到佢哋一齊放補習。」
我：「係咪好嬲呀，以前佢唔陪妳，而家就陪曉彤。」
詠：「我先無咁幼稚呀，只不過，佢哋動作都幾親匿下，一出嚟就揀條無乜人嘅路拖到實一實。」
我：「又係妳飛佢嘅，而家唔抵得？走去跟縱EX？」
詠：「無呀，關心下佢而家點啫。」
我：「我已經無咁嘅心力，只可以祝福佢哋。」
詠：「唔知佢哋搞埋一齊未呢，一鳴個死仔包實忍唔住㗎喎，但佢哋又唔肯認拍拖。」
我：「其實…一早就搞埋咗。」
當然我唔會講係曉彤主動上一鳴。
詠：「真係？點解你會知？」
我：「呢個係一鳴畀我嘅最後交待…不過妳唔好同人講喇，由得佢哋想點就點啦。」
詠：「放心啦，我都唔會想影響到佢…之但係，你真係無嘢吖嘛？」
我：「有乜嘢喎…已經唔係我嘅事，但如果…俾我知道佢傷害曉彤嘅話，佢嗰巴我一定十倍奉還，當佢係羽毛球打到貼地彈唔返起身。」
詠：「放心，如果佢敢玩女人我都唔會放過佢！Give me five！」
希望唔會發生啦，我知道曉彤佢真係好麻煩，點玩都好，只求唔好出事。
詠：「係呢，想唔想交換玩下？」
Wing向我拋咗個媚眼，帶住半絲淫蕩嘅笑容望住我…點解，呢個女人硬係有時就會色誘我咁嘅。
我：「乜嘢？交換啲乜？」我扮聽唔明。
詠：「你唔好扮唔明喎，打你㗎。」
我：「都唔知妳係咪詩敏派嚟試探我嘅魔鬼…」
詠：「你認為佢會為咗你咁做咩？」
我：「睇怕就唔會。」
詠：「但我成功咗就會話畀詩敏知。」
我：「魔鬼走走走，唔好阻住我溫書。」
詠：「魔鬼唔正咩？」
我：「正呀，但好危險。」
詠：「唉，好想拍拖呀。」
我：「無男仔追妳咩？」
詠：「無呀…可能因為個個都知我同一鳴一齊過，所以有所顧忌掛，我又唔係女神。」
我：「咁咪專心讀書囉，唔好咩？」
詠：「日日溫書好悶吖嘛，詩敏都好啲吖，逢星期三五都可以同你打下波。」
講到尾佢係喺度發姣，而我嘅作用就係可以俾佢安全咁有個男仔聽佢發姣…乜高端玩法嚟？
詠：「唔知曉彤會唔會搞到一鳴溫唔到書呢？」
我：「咪玩啦，一年溫一科中文都溫唔掂就死咗佢好過啦，咪留喺度獻世。」
詠：「你都係溫一科英文啫，又咁勤力嘅。」
我：「我嘅目標唔止英文咁少。」
詠：「點解嘅，係咪考得好詩敏就會同你一齊？」
我：「我諗…我同佢嘅關係未至於咁低B。」
又或者，同佢打好比賽係重要過考得好。
至於考得唔好要做Miss Lam性奴…我真係唔知係乜一回事，可能係佢嗰陣老公令佢唔開心先咁玩我啫，但如果我輸咗…佢又真係要嘅話…我都願賭服輸嘅。
到咗三月，差唔多要考mock，我叫Tiffany專心溫書唔好嚟陪我哋練波住，但係佢都堅持。
點知到五點半左右，另外三隻小魔女入咗嚟禮堂，以為佢哋嚟搵Tiffany啦…
「喂！打完波未呀？」
我：「我？就喇…差唔多執嘢…」
「咁行啦，教我計數呀！」
「我Physics唔明呀！」
啲小魔女…係捉住我兩邊衫袖扯住我走，就好似我係無選擇權利咁…
敏：「Bye bye！一路好走！」
詩敏，嗚嗚嗚嗚…
其實，教下佢哋係無問題嘅，但唔好喺詩敏面前做埋啲咁敏感嘅動作吖，都唔知詩敏會點諗。
講真吖，佢哋有兩個真係幾水下，睇怕好大機會升唔到原校中六，或者佢哋都心中有數，會考呢個分水嶺，真係好考驗友情同人性。
又過咗兩日嘅星期五，由於下星期一開始考mock，我終於成功趕咗Tiffany去溫書。
我：「今日得我咋…」
敏：「咁我一陣捉對中四男雙嚟陪我哋玩囉。」
我：「係呢…前日…我同班妹妹仔無嘢㗎…」
敏：「我重以為你一腳踏四船，咁勇敢，咁大犧牲，淒美動人添。」
我：「點會…真係乜都無！純粹…因為我有會考經驗佢哋先鍾意問我嘢煩住我。」
敏：「呀，我都無懷疑你，你咁急住辯護做乜？」
我：「我驚妳有乜誤會就唔好啦。」
敏：「我好信你㗎喎，定係你信唔過你自己？」
我：「咁就，當然唔係啦。」
敏：「抑或係你唔信我呀？」
我：「絕對唔會。」
敏：「專心打波啦，死人頭。」
詩敏信我，太好喇，雖然唔知道佢有乜打算，但只要兩個人有信心，未來係一定充滿希望嘅；而家，都係認真諗下有乜策略去等我哋比賽唔好第一圈就出局比較好，緊要過兒女私情嘅嘢。
到咗五點鐘。
我：「詩敏，我都夠鐘溫書喇。」
敏：「都差唔多，你睇下對面兩個師弟死咁滯。」
嗱，唔係我想要佢哋攰死呀，只不過換咗塊拍之後做防守簡值就係得心應手，放啲中高波過去兩隻馬騮死跳爛殺，落點又唔係靚，咪又兜返過去畀佢哋殺過囉，就連詩敏都玩上癮。
我：「咁我行喇。」
敏：「睇到你識咁勤力真係好。」
我：「其實係啲小妹妹喺自修室等緊我。」
敏：「知你受歡迎喇！畀心機教人呀。」
時間一日一日過去，好快就考完mock，連卷都對埋，嚟到last day，大家嘅心情都好興奮，不過我就…都會配合下嘅；相照影，名照簽，紀念冊照寫；喺呢一日好多唔同班嘅同學都會走嚟走去趑趄咁轉，但係…我哋三位留班生就只會留返喺自己課室度，避免見到對方。
今日星期五，做完last day要做嘅嘢我同Tiffany照舊去打波，星期三嗰陣詩敏已經同我講咗今日全級中六會去參觀大學，所以拜託我去揸莊睇住啲小朋友，不過呢…其實都無乜嘢做。
於是我就拍住Tiffany打混雙，估唔到又幾順手喎，呢三個月時間佢真係好努力睇到係有明顯進步，不過比較可惜嘅係佢已經無機會再打學界，希望我哋比賽完之後佢唔會放棄羽毛球啦。
打完波我同佢留喺學校自修室溫書。
過咗七點半之後就得返我同佢兩個喺度。