【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: Wave and Wake上的男女關係
50追釋出
講到尾，詩敏都係想玩我，妳試下捉多一打吖，我就唔信妳自己都記得！
彤：「咁…佢叫阿歷山大…麥昆啦…」
屌，點解我要記埋呢啲無謂嘢，六個中文字嘅記憶力夠我背多兩個化學元素啦…重要乜McQueen，正一死港女，臭港女，不過我鍾意…
鳴：「喂！原來教練佢有呢塊嘢㗎！」
佢手上面拎住卷繩同塊板。
我：「Wakeboard？乜咁堅呀！」
我都未等佢有反應就跳咗上佢架船度落扣。
鳴：「乜你識玩嘅咩？」
我：「唔識咪玩到識，跌落水又唔會死嘅…不過你唔好開咁快喎。」
敏：「得啦，你咁鍾意玩，等我服侍你啦。」
結果當然大家估到，我俾佢掟彎戳到腰都斷咁滯，外加不停炒落水度。
敏：「好鬼無用呀你，輪到我玩喇！」
我：「妳開到捉偷盜客咁叫我點跟喎…不過放心，我唔會報仇嘅，妳落水啦。」
敏：「唔使你…一鳴過嚟！換船呀！」
我：「做乜喎，都話我會就住妳㗎咯。」
敏：「死蠢，你去曉彤架船度先幫到我影相拍片㗎！」佢叉住腰一副女神樣命令我，睇嚟好high。
我：「好好好，我會盡力。」
於是乎我同一鳴交換位，由佢負責開船拉詩敏；我呢邊就曉彤揸船跟住佢哋平排，我就反轉坐喺曉彤後面做cam man，同曉彤背貼背…呀唔係，係貼住佢件救生衣坐。
一鳴當然用一種好溫和嘅方式嚟開船，詩敏好快就習慣咗企喺塊板上面直線行，而我就好似影緊賽車直播咁，為咗隻手揸機定啲我就挨落曉彤背脊黐到實一實。
望住詩敏玩wakeboard，我諗返起佢講過那位表哥嘅EX，其實佢自己都差唔多啫，又靚女，身材又好，活潑好動，讀書都唔錯；只不過生活環境關係無得玩啫，如果佢住喺呢度可能一年就操到好似個教練咁款…
彤：「你女朋友真係無懈可擊，傻嘅都識揀。」
我：「曉彤…唔好咁講啦…」
彤：「唉，我連水都唔識游，點算好…」
我：「叫一鳴教妳啦，佢都游得唔差㗎。」
彤：「佢玩就叻，落到水咪剩係顧住盡情非禮我。」其實啲小動作我當然睇到，不過好正常嘅。
我：「咁…唔係都幾好咩…」
彤：「點都好過自己一個人嘅。」
我實在唔識點應佢，唯有保持沉默，有啲嘢都係心照算…唔係，係背照，互相挨住，倚住對方支撐，其實有啲嘢大家都明，亦知道唔會有結果。
詩敏玩完就換位到一鳴，我諗住影開咪繼續。
彤：「不如我哋都換位吖，你教我點影。」
我：「妳㩒呢個制就開始，呢枝桿zoom in out。」
我同佢對調由我揸船，佢就幫自己條仔影，而且佢重除埋件救生衣掉咗喺側邊。
我：「做乜除呀…跌落水點算，呢度好深㗎。」
彤：「無論點你都唔會俾我死嘅。」
係，呢個係事實，如果要犧牲我條命先救到佢我都會選擇咁做，就算之後詩敏佢…其實詩敏要搵個好過我嘅男朋友都唔難嘅；然後曉彤背脊貼到我實一實，曉彤影緊嗰陣詩敏就同我平排開船望一望我；拜託，我只想呢趟旅程開開心心。
一鳴玩完後，詩敏就過返嚟，曉彤著返救生衣都試下玩，結果…當然係滑得一小段就跌落水，呢樣運動少啲平衡力同腰力都唔得嘅，而詩敏就係咁跳落水傍住曉彤，所以都影唔到啲乜。
「See you tomorrow！」
原來聽日都係呢個女教練，咁就唔使擔心兩位靚女有機會俾人抽水；佢重叫我哋聽日早一個鐘嚟到，因為潛水前要搞一大輪先，而我哋買兩個鐘係實際潛入水底嘅時間，呀…日本人做生意真係好老實，其實佢側側膊食咗我哋成粒鐘我都唔會覺得有問題，雖然四條友潛兩粒鐘呢筆數好可觀…
今日真係盡興而歸，還完艇之後我哋四個返到阿波連沙灘睇埋日落先走；順帶一提原來啲水上電單車唔係泊喺呢度附近，教練將三架嘢用索勾埋一齊之後成列火車咁駛走，真係…好型！唔知佢有無男朋友嘅呢？不過自知呢啲女人境界太高我諗都唔使諗。
雖不是萬里無雲，但個天之清澈唔係香港可以媲美，我同一鳴各自拖住女伴隻手睇住天色漸漸折射出橙黃到紫藍嘅漸變色，再將彩帶投射落粼粼波光嘅水面上形成雙層漸變，好靚…靚到我等到入黑先醒起唔記得影相，算啦，重有聽日；不過始終，有啲嘢放喺腦海入面係比起用媒體記錄低嚟得更加清晰。
彤：「死！唔記得上返去還救生衣添…」
我：「無所謂啦，又唔係而家要走，或者陣間經過掛返喺人哋間鋪門口囉，呢啲地方根本無人會諗你會攞走人哋啲嘢。」間間民宿都離譜到將啲飲品嘅貨就咁放喺門口部汽水機隔籬，但唔會有人攞，如果你想半夜去浮潛求祈門口就執到全套。
鳴：「唔緊要啦，妳聽日繼續用，我哋去負責潛水，妳負責浮水。」
彤：「作死你呀！笑人哋都有嘅…」
敏：「不如我哋聽日用件救生衣綁住佢隻腳，睇佢喺水入面倒吊吖。」
彤：「哈哈，好呀！不過…我唔識游水，係咪真係潛到水㗎…」
我：「應該無問題嘅，潛水同游水係兩樣嘢嚟，游水太叻嘅人可能會沉唔到添。」其實就唔會嘅，除咗嗰啲死爆自由式五十米以為自己識游水嘅凱子。
敏：「唔使擔心喎，我會全程陪住妳嘅。」
鳴：「咁樣好似有啲唔啱規矩喎…」
彤：「收聲呀，你兩隻嘢聽日負責做水底攝影㗎咋…哈哈，水都唔識游就學潛水，我都算犀利！」
敏：「妳梗犀利，拖都未拍就做愛先都係咁啦。」
詩敏妳…一句…咁爆出嚟…點解…
我同曉彤即時無聲出，好彩個天黑黑地唔會睇到我哋塊面紅過關公。
鳴：「即…係點啊…」
敏：「唔關你事，呵呵。」