作者榜14釋出

彤:「早晨呀,兩位。」
我哋兩個一齊去到巴士站接曉彤落車,再行幾步返學校。
彤:「你兩個好似好輕鬆咁喎。」
鳴:「放榜啫,都係咁過㗎啦。」
彤:「你兩個剩係睇一科梗係咁講㗎。」
我:「唔係㗎,我希望考得更加好嘅。」
鳴:「妳上年都有三科㗎,今年加三科都得啦。」
會考放榜,對我哋嚟講已經唔係乜嘢新鮮事,加埋我哋三個心中有數,其實同收學校成績表分別不大。就係咁我哋三個慢慢進入校門。


鳴:「點解好似有啲奇奇怪怪咁嘅?」
我:「係囉,好似個個同學都望住我哋咁嘅?」
鳴:「係咪嫌我哋repeat搶走咗佢哋嘅中六學位?」
彤:「呀!係喎,其他同學以為我同呢條粉腸重鬧緊架㗎喎。」
又係喎,自從去完沖繩返嚟之後,對於以前嘅狀況好似失晒憶咁,我企喺曉彤隔籬都可以話算係一單大新聞,呢粒花生實變做其他同學對於今日緊張心情嘅一種調劑。
我:「我想講…我同妳呢啲唔係叫鬧架囉。」
彤:「得喇,係你自己自閉吖嘛…哼哼…」
曉彤左手搭住我膊頭,右手就搭住一鳴…
彤:「呵呵,今日有兩隻兵送我返學,其他人恨都恨唔到㗎喇!」
曉彤真係吖…幸福嘅女人實在唔可以睇小,春風滿面起上嚟嗰種招搖就連我哋都怕咗佢;呢個舉動唔止令操場嘅同學對我哋三個側目,就連上咗去課室嘅都有一堆行晒出嚟走廊一窺究竟;好在我哋幾個都已經塵埃落定唔使怕其他人嘅閒言閒語。


然後我哋喺同一邊嘅樓梯一齊上樓,再各自進入所屬嘅班房,我一入到去就全班都望住我投以不解嘅目光,呢下都幾尷尬下,呢啲私事無理由要同佢哋解釋㗎…
都係睇下坐去邊度好先…旖旎隔籬無人坐…
林:「志華!」課室門口傳嚟某個女人嘅聲音。
我:「Miss Lam…請問…」
林:「你好叻仔呀!」
未等到我有反應Miss Lam就撲咗埋嚟,喺塊黑板對開全部同學嘅面前攬實咗我…係呀…真係攬到實一實心口掂心口肚掂肚嗰隻,再喺度搖我個身體;我都唔得閒理其他同學係乜表情喇,不過我諗驚嚇程度比起見到我同曉彤一鳴一齊返學有過之而無不及。
我:「Miss…呢度課室嚟㗎。」
我諗…身為Miss,就算喺邊都唔應該有呢種舉動。
林:「唓,又唔係我嘅學生,理得佢哋。」
呢個時候Miss Lam先放返開我個人。


我:「妳做乜無端端咁興奮呀?」
林:「你話呢,當然係你嘅成績啦。」
我:「吓,乜妳可以睇到我成績㗎?」
林:「嘻嘻,我專登返嚟八其他先生教成點㗎。」
我:「原來係咁…係囉,妳都無教今年嘅會考班,咁…我考得好好?」
林:「你個死人頭無得做我性奴喇…」
Miss Lam踮高咗隻腳,咬住我隻耳仔同我講。
我:「妳係講真㗎?」
林:「我呃你做乜,一陣你攞到成績單咪知囉,你個樣點解好似好失落咁。」
對於上年放榜日嘅豪言壯語,我當然自知係一時興起嘅衝口而出,可以達成嘅機會實在小之又小,如今Miss竟然專登走過嚟同我親自講;至於所謂嘅性奴懲罰,我又無乜所謂嘅,Miss係一個好吸引人嘅大姐姐我少不免就自然有啲遐想,只不過如果呢件事成真我要點呢?瞞住詩敏?定係循正當途徑同佢申請?
我:「無諗過啫,我以為我實輸㗎。」
林:「咁使唔使我做返你性奴?」
佢又再次踮高隻腳咬住我另一邊耳仔同我講。
我:「點…點敢喎…」
林:「唓,肯定係你同詩敏搞掂咗啦。」


我:「算係啦…多謝Miss關心。」
林:「好好照顧人哋呀,係呢,諗掂揀乜科未呀?」
我:「上年已經一早諗咗啦,放心,兩年後我一定會正正式式還返條A畀Miss妳!」
林:「你要讀MS?」
我:「嗯!唔係點幫你攞A?」
林:「你黐咗線呀?咁嘅成績有pure maths唔讀讀MS?邊個教你咁做㗎?」
我:「鬼叫妳唔教pure maths要教MS喎…」
林:「你諗清楚先好喎,唔讀pure maths大學好多科engine無得揀㗎喎。」
我:「我諗我都唔係好想讀engine嘅啫。」
林:「唉,真係任性嘅小朋友。」
我:「嘻,呢個妳都一早知㗎啦。」
呢個時候原來李Sir已經攞住一大疊成績單嚟到門口,尷尬咁望住我同Miss Lam,而我哋亦都同一時間發現咗佢,Miss Lam同李Sir點一下頭就迤迤然咁走出課室。
當我正想行去旖旎隔籬個位度坐…諗諗下…
我:「Sorry李Sir,失陪一陣。」
出到去,Miss Lam重喺走廊度行緊。


我:「Miss Lam…」
林:「點呀?」
我:「Miss…如果有一日…唔知點解我又變到孤零零,我到時再嚟服侍妳吖。」
林:「食屎啦,唔同你呢啲情聖玩呀。」
我:「做乜喎…」
林:「玩完之後如果我唔再愛我老公咁點算?」
我:「妳同先生,而家幾好吖嘛?」
林:「OK咁啦,我重有兩年要對住你㗎,你最好同我醒醒定定。」
我:「放心,我一定唔會令Miss妳失望。」
林:「嗯,到你MS A唔到嗰日我會好好吊起你,到時再唔好令我失望啦。」
講到尾,佢都係一個又曳又百厭嘅Miss,好彩佢已經結咗婚,同老公亦都無鬧翻到,如果唔係可能我嘅人生又會多一個大麻煩。
然後我乖乖咁入返去自己課室,李Sir有啲無奈咁望住我,係嘅,我都知我係好過份,不過最後一日就拜託唔好鬧我啦。
旎:「原來你同Miss Lam係friend到咁。」
我:「無嘅…呢個係佢嘅問題嚟,佢只係我對上兩年嘅班主任嚟啫。」
旎:「重有頭先乜事呀,女神你又溝到手,同曉彤又和好如初,到底你發生咗啲乜嘢事?」


我:「無呀…我諗純屬好彩掛。」
做乜Tiffany好似好睇唔過眼咁嘅,我過得好少少啫,唔使一副怪罪我咁嘅樣呀…算啦,我都係要低調啲,一陣攞完成績單要好好收埋佢;拜託旖旎佢都考個好好睇睇嘅成績返嚟,畢竟我同詩敏麻煩佢幫手練波其實嘥咗唔少時間,如果失手嘅話我都唔知點安慰佢好,我嘅人生無咁多年可以repeat陪人哋溫書。
等咗陣到我出去攞成績單。
李:「唔好咁百厭喇,以後繼續畀心機,知唔知?」
俾佢教咗大概短短七個月,其實都無乜交流過,希望我無畀到啲乜麻煩佢啦;都係一開學我任何空閒時間都走左過隔籬班房搵曉彤,然後鬧翻,再自閉幾個月…嗯,其實一個正常先生係應該唔會有眼睇我。
憑Miss Lam頭先嘅反應都知我大概考成點,姑且望一眼咁大把啦。
中文C,數學A,附加數A,物理A,化學B,生物B,經濟B,英文D。
原來係真㗎?原來我可以考到咁嘅成績㗎?
有種開心,係可以唔使經大腦思考,直接由個心入面爆出嚟咁,但呢個時候我要扮到好鎮定,皮不笑肉不笑咁行返埋位,再將張成績單反轉放入櫃桶裡面。
旎:「點呀情聖?」
我:「嗯,英文合格。」
旎:「奇奇怪怪咁,都懶得理你。」
包主科六科24分,最高六科27分,但我加下加下好似無多過上年十分喎,唔通教數嘅Miss Lam都會計錯數?係喎,我中文攞少咗一分…唔知佢係點計喇,我都無謂深究;好彩學校俾我唔使上堂都去考econ啫,齋溫書竟然俾我攞多兩分,如果唔係根本就無可能考多十分返嚟…
好快就到旖旎出去攞成績單,返埋位之後個衰妹又係學我攝咗張紙入櫃桶度唔俾我睇。
已有 0 人追稿