作者榜十三釋出

我:「還好嘛,Tiffany?」
旎:「咁關心我做乜,係咪炒咗嘅話你養埋我?」
我:「唔好講笑啦,我何德何能喎…」
不過見佢神色自若,應該唔成問題嘅。
好快全班同學都攞晒成績,我又再一次見識到呢個放榜嘅悲歡離合,場面都幾混亂下,不過呢班就無海洋組合呢啲悲情話劇上映喇;我主要都係留意另外嗰三個小魔女攞乜成績,一個就十九二十分可以直升無誤,一個收到發現自己十四分同李Sir溝通咗幾句就已經執好包袱出去撲學校,重有一個十二分,應該就申請緊留返喺原校重讀等緊學校批準,重有諗緊好唔好去IVE度讀;Tiffany同另外位小魔女就喺度同佢一齊分析利害兼安慰佢。
放榜…其實真係好殘忍;應該話係香港呢個社會好殘忍。
咁我都要填揀科紙嘅,雖然我唔會再有機會同詩敏同級,但我都係照抄佢上年嗰張;走嘅走,留低嘅留低,無乜嘢做嘅我交完揀科紙都係喺度呆坐等分班結果。
好唔好過去隔籬搵曉彤同一鳴呢?不過咁樣做好似顯得我好八卦,我對佢有信心,應該唔會有乜問題嘅,加埋佢男朋友又喺身邊…至於一鳴條友仔,應該唔會敢再fail中文啦,再fail可以投河自盡㗎喇。


就喺我百無聊賴嘅時候,門口有兩個人入咗嚟。
敏:「喂!重使唔使repeat呀?」
詩敏同阿文嚟咗,不過係著住便服。
我:「咦!你兩個…返嚟學校做乜呀?」
詩敏最多就話返嚟關心我啫,文哥你搞乜鬼?唔係專登嚟八我考成點呀?我有啲驚喎。
文:「吖,得你可以放榜,我哋唔可以放榜嘅咩?」平時沉穩嘅佢而家一面不屑咁講。
我:「放榜?你哋有乜榜要放呀?」
然後文哥喺佢個紙袋入面攞咗張成績單出嚟。
文:「登凳!我retake英文咋,呢條C攞得我好苦呀!嗚嗚嗚…」的確所言非虛,英文要cred唔簡單。
跟住到詩敏…


敏:「點呀!快啲讚我叻女先啦。」
我一眼望落去,數學A,物理A…
我:「叻女喇…但點解要考呢兩科嘅?」
敏:「我見橫掂都要keep住溫呢啲嘢,咪順便報嚟玩下囉,等自己多個藉口溫書吖嘛,點知真係A咗。」
一般人都係攞D或者E嘅先會retake博combine cert好睇啲,估唔到佢會走去報兩科已經B咗嘅科目,女神諗嘢真係唔同啲…
我:「點解妳之前唔同我講妳有retake嘅?」
敏:「乜你嗰陣有關心過我嘅咩?」
係嘅,佢鬧得我啱,直到考完oral撞到曉彤嗰一日我先終於重新同佢坦誠相對,之前實在錯過太多。
我:「報CE唔平㗎喎,原來妳都會咁嘥錢㗎?」
敏:「無返一兩條A喺度點看門口呀!咪廢話啦,拎你嗰張出嚟畀我睇下。」


對住師兄師姐當然無得抗命,我唯有乖乖雙手奉上自己張成績單嘅正面比佢哋睇。
敏:「頂你吖…我過去探曉彤喇。」講完就頭也不回揚長而去。
呢個女朋友吖…乜自己條仔考得好唔係應該要開心慶祝嘅咩,點解要一面不悅咁走咗去?哼!如果無人喺度嘅話,我重唔即刻家法侍后,除咗妳條褲打到妳pat pat開花,打到妳乾鮑變濕鮑…如果我敢嘅話…
文:「恭喜晒喎。」佢淡淡咁講。
我:「多謝…我呢啲,讀多一年算得啲乜,好彩啫。」重有嚟自Miss Lam嘅威迫利誘,加埋自閉咗三四個月嘅結果。
文:「點都好啦,下年嘅羽毛球隊就拜託你喇。」
我:「你講真㗎?」
文:「重有得揀咩?係得你一個最適合,文科班個阿方啱啱放榜成績麻麻應該去外國升學。」
我:「咁…球隊係咪得返我一個中六?」
文:「睇怕就係,華女成個中五都無嚟過,就算升到班睇怕都唔會再入返嚟打,至少應該唔會做幹事。」
我:「慘情呢…得我一個嘅話。」
雖然話羽毛球校隊其實無乜嘢要做,主要都係純粹喺學界露個面,plan嘅嘢少過其他學會好多,通常都係整返次BBQ畀啲小朋友玩下就算,但得自己一個…唔係辛唔辛苦嘅問題,係會好孤獨㗎嘛;上年咁啱都話有詩敏同阿文兩個可以分擔下,我又頭頭尾尾出現下咁。
文:「未必嘅,搵旖旎幫下你囉。」
我:「咁樣好唔好呀?已經麻煩咗佢幫我哋練波…而且…」而且我都唔知點講好,雖然詩敏或者無乜所謂,但放個女人喺隔籬始終會增加我煩惱,Tiffany時不時又奇奇怪怪咁…嗯,本身我哋出年都同班,到詩敏last day走埋可能更煩。
文:「旖旎,妳考成點呀?」


旎:「OK咁啦,下年咪又同呢條粉腸繼續讀書。」
文:「下年重繼唔繼續打波呀?」
旎:「可以呀,無乜所謂,反正中六都要塞課外活動。」
文:「咁妳出年就陪志華一齊睇住羽毛球隊啦,好唔好?」
旎:「哦,咁我負責陪睇同打波啦,我唔做嘢㗎。」或者,少個問題妹妹陪我更加好…又或者,自暴自棄捉個中四靚妹陪我更加好。
反正未來嘅兩年,我同旖旎都係脫離唔到關係。
間唔中我會諗,戀愛唔認真都會有啲好處,開心咪一齊囉,到唔開心咪散囉,咁執著做乜;想換畫就換畫,姐姐又試下,妹妹又試下,乖嘅就放學一齊溫書,曳嘅就遲到早退為咗去殘廁gathering…Tiffany唔係唔好㗎,我都想試愛㗎,成日對住其實已經唔會太在意佢係咪一個靚女,反而會好想將佢剝光豬探索一下佢嘅身體,處女嚟喎…
男人都係仆街嚟,如果有個男人唔仆街,只係佢喺度死忍爛忍。
旎:「喂!呆咗咁喺度做乜呀?」
我:「吓,有乜嘢事呀?」
旎:「分好班喇,我同你要過隔籬課室。」
噢…真係唔講都唔知放榜日原來重有呢個環節,揀Physics嘅就過去曉彤班嘅課室,而揀Bio班嘅就swap過嚟我哋呢邊;睇怕上年都係因為同Miss Lam喺會議室虛耗咗太多光陰完全無為意有呢樣嘢發生過。
文:「咁我落返去canteen等你哋。」
然之後我同Tiffany就走過隔籬課室。
詩敏啱啱喺佢哋課室行返出嚟,經過我身邊咬我耳仔:「多我一條A,嬲死你。」


究竟…我做錯乜?其實詩敏retake呢兩科係咪別有用心,為咗同我鬥多A?身為佢嘅男人我竟然對佢一知半解,都唔知點算好。諗返起上嚟,假如上年無發生曉彤嗰件事,詩敏可以專心溫書嘅話,呢兩條A可能一早就已經攞到喺手。
入到陌生嘅課室當然要搵位先,曉彤一鳴後面咁啱有位,我哋已經自動波咁飄緊過去;今朝我哋三個喺學校破冰嘅衝擊力睇嚟重未散去,所以其他本來兩班嘅同學都望實我哋,繼續觀察睇下有無花生食,而我當然一於小理。
旎:「曉彤姐姐,好耐無見。」
唔知點解啲女人走埋一齊總係會令人擔心,曉彤咪曉彤囉,點解要加姐姐呢,雖然佢叫詩敏都係姐姐…另外佢兩個又真係好耐無見嘅,自從我同曉彤鬧翻,Tiffany身為我呢邊嘅親信,當然係好避忌就連隔籬課室都好少行入去,儘管有其他熟人喺入面。
彤:「Tiffany,多謝妳幫我睇住條EX喎。」
呀,我無眼睇喇,乜都唔知。
呢個時候課室其他人就梗係豎起晒隻順風耳啦,尤其係啲女仔,雖然呢度唔多女仔十個都唔夠。
鳴:「哈哈,好耐無見喇…坐啦。」
一鳴叫我坐低之後,自己起身走埋嚟後面同我一齊坐,佢呢個舉動搞到Tiffany被迫坐咗喺曉彤隔籬。
我:「你又搞乜鬼呀?」
鳴:「等咗足足三年終於可以同返你一齊坐!」
我:「你係咪真係想同我一齊坐㗎?唔使勉強喎。」佢上年都只係同曉彤坐咗三個月only,唔知係咪佢哋班主任聞到佢兩個有嘢所以好快就分開咗佢哋,呢件事係Tiffany八返嚟畀我知嘅;而家中六相對上自由,如果佢想同女朋友坐我當然唔會阻止佢啦。
鳴:「費事太張揚啦,我都想專心讀書。」
算吧啦,我哋凳都未坐熱,全世界都已經望實我哋,想唔張揚可能要練成隱身術先可以返學。
過咗陣我哋學校入面人稱理科之神嘅歐陽Sir就入嚟,即係話佢將會係我哋班主任。點解佢叫理科之神?因為Physics係所有理科之首,地位同數學平起平坐,而佢就包辦晒本校所有AL Physics嚟教,重有一班CE會好彩俾佢教到,佢亦都係物理科科主任嚟。


歐陽:「首先想問下係咪大家都清楚知道自己嚟緊會讀邊科㗎喇?如果有疑惑就而家好出聲,唔好到咗九月一先嚟講呀下…」
然之後就係派textbook同參考書書單,重有就係夠膽死畀暑期功課,雖然係啲自由研究題目…
歐陽:「嚟到中六我唔同你哋玩煮飯仔喇,本身我就唔太想做班主任嘅,所以啲班務交畀你哋搞掂,嗱,而家有大半個月時間,你哋喺九月一號嗰日要交到男女班長同班會出嚟畀我,重有座位表都自己搞掂喇,我要求好簡單,我唔得閒理你哋啲恩怨情仇兒女私情,我只係要一種均衡穩定而又亂中有序嘅組合,假設你哋係一堆molecules,一堆atoms,麻煩將個entropy降到最低,我唔想見到有任何nuclear fusion或者fission,首先就唔好全部女仔坐埋晒一堆,呢種系統性偏差會造成不可控結構崩壞…」
Well…其實係咪已經開始教緊書。
講完一輪就換Miss Lam入嚟。
已有 0 人追稿