【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 旖旎的秘密
作者榜11釋出
乜春呀…齊人就要問啲咁尷尬嘅問題喇咩，就連坐佢隔籬嘅肥豪聽到都嚇到呆咗O起個嘴，睇嚟今次唔係夾定攪事，而係呢條友係真傻無得救可以直送停屍間。
聽到條咁嚇人嘅問題，全場都靜晒，傻強真係一面天真咁喺度等人答佢，四位小魔女就喺度靜觀其變，我望一望一鳴，曉彤又望一望詩敏，夾喺中間嘅Wing有啲尷尬，阿文個樣就事不關己當乜都聽唔到咁。
敏：「曉彤，我同妳有乜呀？」
彤：「無嘢呀，一直都好正常。」
鳴：「唔好望住我…其實我乜都唔知…」
強：「咁你嗰日做乜一拳怒轟落志華度？」
俾佢咁樣一問，一鳴塊面當堂紅咗，而呢個時候我隔籬嘅Tiffany竟然插嘴。
旎：「我要更正返，嗰下唔係一拳，而係一掌。」
強：「係囉係囉，睇唔到真係好可惜，出面傳得好犀利，有過好多個版本，有人傳志華俾一鳴打到跪咗喺度再一腳俾佢踢開添。」
旎：「唓，你一早嚟問我哋咪得囉，大把目擊證人睇到。」
鳴：「無㗎…我真係唔知，只不過…嗰下，我容忍唔到佢搞到我隔籬位個女同學喊咗成朝，我諗住…佢一定係做咗啲傷天害理嘅嘢先會攪到佢個女…仔咁慘。」
詠：「唉，其實我都好慘，早知我當年又喊多啲啦…唔知啲衰人會唔會自己打自己呢？」
彤：「放心啦，Wing姐，我會幫你制裁佢㗎喇。」
嗯…呢兩個女人嘅對話又係鬼死咁微妙。
強：「嗯…到底係乜傷天害理嘅事呢？」
鳴：「我唯一知嘅嘢就係我唔可知發生咗乜事，其實我同你一樣對呢件事都充滿疑問。」
然之後眾人開始望住我。
我：「我都係乜都唔知，我負責俾人打㗎咋…」
敏：「一鳴你打得佢好啱，唔修理下佢係唔會生性嘅。」
強：「志華，我就唔信你唔知。」
敏：「唓，我同我姐妹玩家家酒咋嘛，你哋咁上心做乜，與其食人花生不如留返啲精力去溝女啦。」
彤：「咪係囉，嗰少少事，我哋都無嘢，都唔知你哋講到而家係為咗乜。」
兩個女主角講到咁，傻強都即刻無癮收聲；其實，我自己都重有一幕係好想知道係點，就係曉彤當年點同詩敏攤牌，詩敏又點回敬返佢；但既然佢兩姐妹決定封口連我都唔可以知，就等呢件事成為佢哋之間永遠嘅秘密就好。
我：「係呢，Tamama會唔會知你哋食咁貴打退堂鼓呀，無理由咁耐都未嚟㗎？」我決定扯開話題。
豪：「佢敢！？我有打畀佢呀，雖然無人聽但就send咗message畀我，話要遲少少先嚟到喎。」
我：「吓…佢平時做乜都好正路㗎喎，點會無端端一條友消失咁耐呀，會唔會真係有事？」
豪：「我點知喎，就算有事我哋都幫唔到手㗎啦，如果唔係佢一早出聲啦，呢度咁多人，佢話遲啲到咪等下佢先囉。」
我：「等你食完先嚟，咁佢就可以慳返。」
豪：「唔會啦，同咗佢講你接受免息分期付款。」
我：「玩嘢呀！你哋當我係乜？」
豪：「邦民哥哥囉…你呀，有今日都係全靠佢㗎咋，就算要你請埋佢都好應該吖。」
呢個時候侍應姐姐上茶同小食畀我哋，小食係我最鍾意嘅蜂蜜琥珀核桃，望到佢嘅金黃色同表面層芝麻就知係靚嘢，而當我正想攞起對筷子夾嘅時候，我先發現我隻手傷到控制唔到個筷子尖。
然後…我嘗試用左手揸筷子，結果同右手揸差唔多，原來我左手係咁唔靈活；而呢個時候坐我左手邊嘅詩敏就好開心咁食完一粒又一粒。
我：「詩敏，可唔可以喂粒畀我呀？」
敏：「有無搞錯呀，咁大個人重要人喂。」
我：「我隻右手啲手指郁唔到…先搵妳啫。」
敏：「右手傷咗咪用另一隻手囉。」
我：「我隻左手…唔多掂。」
敏：「你睇唔到我用緊邊隻手夾嘢嘅咩。」
識咗咁多年我就梗係知詩敏係右囿，但我估唔到佢隻左手可以揸筷子夾得咁好。
我：「點解妳隻左手可以咁靈活嘅？」
敏：「有備無患吖嘛，咪一早練定囉，攞嚟打下波都OK㗎，同普通人打嘅話。」
呢個乜女人嚟㗎，我實在係太睇小佢，咁奇怪嘅嘢都可以練定嘅…
我：「既然係咁妳就幫下我啦。」
敏：「唔制，你而家練下咪啱囉，我都夾得好辛苦㗎。」咪玩啦，咁多人喺度撩嚟撩去，無人鬧我自己都會唔好意思啦。
旎：「呀…」一塊琥珀核桃出現咗喺我個口前面。
Tiffany用佢對筷子夾咗嚟我個口前面…
我：「喑。」面對小妹妹嘅好意，我都係唯有擘大個口畀佢放粒核桃入我口度，嗯，好味…
旎：「如果師姐唔方便，我幫妳喂呢隻嘢吖。」
敏：「啊…妳鍾意…隨便啦。」
然後又有一粒核桃出現咗喺我個口前面，正當我又擘大個口準備將佢放入口腔之時…
旎：「如果師姐唔介意嘅話，我幫妳喂一世都得㗎。」然後我成個人硬咗，個口半開合咁同粒核桃一齊懸浮喺半空度。
本來佢喂我食嘢呢個舉動都夠惹人注目，佢再咁樣大聲一講，又再次成圍人都望住我，尤其係嗰三隻小魔女露出又驚又喜嘅表情，肥豪同傻強就好似發現一個滿地花生嘅新大陸咁。
敏：「旖旎…妳…想同我玩家家酒？」
旎：「嗯，可唔可以同師姐你爭仔呀？」
乜事…到底發生乜事…係咁多人面前講得咁直接，明挑詩敏機，我一聽到個腦就當咗機，全身僵硬郁都郁唔到，而佢就仍然好穩定咁夾住粒核桃放喺我面前。一個又係咁，兩個又係咁，我以為曉彤嘅背後操作已經夠晒黐線，點知Tiffany嚟到呢一刻先嚟斷線…雖然我一直都知妳對我有啲意思，但而家嘅我又可以點做好。
敏：「欸…妳鍾意就攞去玩啦，如果玩完重有渣剩先嚟還返比我啦。」
搞乜？！其實係咪佢兩個夾埋嚟玩我，詩敏咁講聽到全場人都呆咗。
彤：「夠喇，詩敏妳又打讓賽？係咪想再一次世界大亂呀，我唔准妳咁做呀！」
敏：「我就考A Level喇，無精力同人玩爭玩具…」
旎：「嘻，咁你又點打算呀？」
點算…全世界都望住我…旖旎，本來一早就諗過要同妳攤牌，講清楚我同妳之間係無可能；但自從妳上次發現咗我已經同詩敏喺埋一齊之後，我以為妳已經放低咗…但點解事到如今，喺呢個場合…妳先迫我開口拒絕妳，當住咁多人面請妳食檸檬，我深知道咁樣對妳會做成好大傷害；但我無得揀，我絕對唔可以同妳糾纏不清，因為我更加唔可以傷害詩敏，一生人背叛咗佢一次已經太多，而我亦都換嚟咗慘痛嘅教訓…所以，旖旎對唔住喇，就算…可能我講完呢番說話妳會喊住口咁跑出呢間房，我都一定要講出口，亦唔會出去追返妳…但無論如何，我都係視妳為我其中一個最重要嘅朋友。
我：「Tiffany…多謝妳嘅心意…妳係…一個好好嘅女仔…但…對唔住…而家…」
當我喺眾人面前絞盡腦汁諗緊點樣修飾句句子可以盡可能減輕對佢嘅傷害嘅時候，有一個人突然無端端企起身，離開座位，行咗嚟我隔籬唔知做乜；我俾佢嘅動靜嚇咗一嚇，亦都暫停咗我句對話。
佢企定咗喺旖旎張凳後面，再慢慢挨向前。
文：「Tiffany，唔好再玩師兄師姐啦，好唔好？」
旎：「乜喎，佢同我同班㗎！點會係我師兄？」
文：「咁我係師兄得唔得？唔好玩我啦。」
阿文本來只係前臂輕輕貼住旖旎兩邊嘅膊頭，再緩緩向前伸，雙手滑落去到旖旎嘅心口前面交叉互疊，毫不避忌咁將前臂放去旖旎嘅乳房上面，身體再烏向前令到旖旎嘅後枕挨落去佢個肚度…雖然話佢哋平時打波間唔中都會有少少身體接觸，但而家咁樣，好明顯…即係話！
另外三個小魔女已經露出非常驚喜嘅表情，用手掩住個口，三對眼仔突埋出嚟咁滯；而其他人當然都受到好大刺激，本來諗緊點請人食檸檬嘅我直頭望到呆咗。
旎：「咁快過嚟做乜！佢都未答完！」
文：「我驚吖嘛。」
旎：「有乜好驚？我未玩夠呀…」
文：「我驚…佢話轉會要咗妳咁我點算？」
旎：「有乜可能，我點會鍾意佢？係呢條友先會以為自己真係情聖個個女仔都鍾意佢。」
文：「我唔信，妳肯定鍾意過佢，我未拍過拖都知道女仔最鍾意講大話，睇少陣都唔得。」
係嘅…如果用詩敏嚟計嘅話。
旎：「無呀！就算有…都係N年前啦。」
旖旎塊面紅咗，我諗真係講緊大話，不過呢樣嘢我自己知就好嘞。
文：「咁咪係囉，點可以唔看實妳。」
旎：「咁你可以搶返佢個詩敏走㗎嘛。」
搞乜？唔通呢個年代所有女仔都係咁跳脫嘅？！
詩敏望一望我，眼珠一轉咁講：「交換？好像…還不錯？起碼正正常常，重有人同我打波。」
我：「詩敏呀…唔好癲啦。」
敏：「無癲呀，你諗清楚未㗎？唔好話我唔畀機會你褪軚喎。」
我：「我諗得好清楚呀！我同妳已經無彎轉架喇，X詩敏！我好鍾意妳呀，呢世我都會愛死妳。」
「啪！啪！啪！」肥豪同傻強傳嚟掌聲。
敏：「唓，你最叻就係當眾表白㗎啦，我一早免疫，唔使同我嚟呢套。」
你個詩敏，真係唔推妳上床打pat pat都唔會乖。
豪，強：「咀佢！咀佢！咀佢！咀佢！咀佢！」
敏：「夠喇，你哋重以為自己係初中…」