225k釋出

然後詩敏已經再講唔到落去,因為把嘴已經畀我封實咗,咁既然要玩,就玩到底吧…好快我條脷就侵佔埋入去佢個口度,一開始佢都有少少反抗,但好快就變得逆來順受…至於其他人有乜反應,我已經懶得再理。
敏:「黐線㗎咩!人哋叫你咀就咀,你識唔識獨立思考㗎?」然後一嘢拍落我大髀上面,但睇得出佢塊面紅紅哋,好開心,好幸福。
我:「係呀,我黐線㗎,唔黐線點會做妳隻兵。」
敏:「你話㗎!唔好過幾年同我講頂唔順要退役。」
我:「梗係唔會,做足一世都願呀!」
豪:「好,夠喇,兩位可以抖一抖,多謝你哋嘅精彩演出,我哋夠鐘轉台嘞…阿文同旖旎,你哋兩個係咪又要咀喇?」
文:「哈哈…我同Tiffany…未去到呢個程度喇。」
呢個時候,我醒起一樣嘢,就係要調位,既然佢兩個戀情已經公開,當然就要坐埋一齊㗎啦;三隻小魔女顧住睇好戲又唔會褪位㗎嘞,於是我就讓咗個位出嚟畀阿文,而佢亦都即刻坐咗落去。


但問題嚟嘞,我起咗身咁要坐喺邊呢?我當然唔可以直插返落去阿文個位度啦,因為詩敏唔喺隔籬…叫阿Wing褪一格,好似唔係幾好,無理由要佢同EX坐㗎;既然係咁,即係Wing要坐詩敏而家個位,然後詩敏坐中間,我就同一鳴坐,咁樣就應該最perfect…
點知我喺度度緊位嘅時候,Wing姐見到我眼望望就自動褪咗一格坐喺一鳴隔籬,咁嘅話我就更加唔可以開口話再調,否則只會更尷尬,而詩敏亦都跟住郁咗一格,我就坐喺原本詩敏個位度。
或者我再重複講多次啦,調完位後次序係順時針我,詩敏,Wing,一鳴,曉彤,肥豪,傻強,Tamama吉位,魔女B,C,A,旖旎,阿文。
強:「未係咁嘅程度,即係乜嘢程度?」
文:「即係…我同Tiffany暫時只係預訂拍拖。」
豪:「乜話?訂婚我就聽過啫,訂拖?!聞所未聞喎!」其實唔止嗰兩條傻佬,我哋對佢嘅說法都感到大惑不解,明明佢哋啲動作就表明已經一齊。
文:「哈哈…好抱歉,家母佢比較傳統而且專制,佢想我專心讀書,如果我喺入U之前拍拖嘅話一定會俾佢打個半死,街都唔使指擬出…所以…雖然呢度唔係太多人,大家又唔係話好熟,但都拜託千祈唔好講呢件事出去。」
旎:「有乜分別啫,都話我可以等你咯,一年唔夠好快就過啦!」旖旎交叉撓手,似乎對佢呢個所謂嚟自未來嘅男朋友有啲不滿。
文:「係…我哋係無分別,但我阿媽有分別吖嘛,如果佢察覺到我有唔妥,下年就會日日迫我放學即刻返屋企溫書,小小波都唔俾我打㗎喇,妳都唔想成年放學見我唔倒㗎。」
我:「原來…一直…係因為咁…我重以為你對女人無興趣…」六年嚟嘅謎底竟然今日順便解開。


文:「傻啦…我媽真係癲癲哋㗎…就算我有拖拍都唔想害咗個女仔啦,終日偷偷摸摸提心吊膽…未過試用期都嚇到分手,我唔想咁…如果唔係我中三就同詩敏女神表白啦。」
旎:「你敢!」旖旎用阿媽般嘅眼神(目屈)住佢…
文:「都話中三咯…妳自己中二嗰陣唔係對住志華發姣,重走嚟問我佢有無女。」
旎:「喂!你做乜講出嚟!係咪想死?!」
真係大檸樂…佢咁大反應兼耳仔都紅埋,擺到明就俾人講咗心底話出嚟…咁其實我當年都感覺到嘅,只不過大家都怕怕醜醜,所以乜都無開始…
敏:「啊…原來你兩個嘅勾當已經咁耐歷史。」
文:「無勾當,只係佢走嚟問我我咪答佢囉,呢個妹妹仔又唔識講大話,一聽就知佢想點啦。」
旎:「喂呀!夠喇!停呀!」
救命,紅到落頸喇…佢真係唔識講大話,同嗰啲面不改容嘅大話精女神可以話係差天共地。
豪:「真係精彩!十分精彩!」


強:「簡直絕倫!的確絕倫!」
「啪啪!啪啪!」兩人一齊鼓掌。
認真黐乸線,呢兩條友唔玩相聲實在太暴殄天物,可惜佢哋已經中七,如果唔係一定迫佢哋整場show喺學校公演。
豪:「估唔到等咗三年,到今日先睇到最好睇嘅一幕,果然好戲在後頭,好彩原校升得返啫。」
強:「如果唔係做乜要溫書,假如今日我唔係坐喺呢度,我肯定會抱憾終生!」
都short嘅,如果你兩個唔喺度,就無後悔點啦…為咗呢啲無謂嘢讀書,俾啲讀唔成書嘅同學聽到實想㨃冧你兩條蛋散。
我:「哈哈,咁多年…枉我重喺度擔心你…」
我決定拉一個高遠球幫旖旎解圍。
文:「擔心我乜嘢?你唔係以為我係基呀?」
我:「呢層…我係有諗過…好彩感覺唔到異樣。」
文:「傻啦,我係基嘅話一早上你屋企啪你啦!」
嘩!呢個阿文…收收埋埋咁耐,今日啲發言咁爆…
豪:「喂!咁你哋呢對訂拖情侶又啪咗未?」
文:「係囉,Tiffany,我同妳啪咗未?」
旖旎無聲出,但塊面又由粉紅色變返做鮮紅色,睇怕佢兩個已經共赴巫山享受雲雨之歡。唉,呢個阿文吖,竟然夾埋外人嚟整蠱自己條女都有嘅…


我:「呀!即係話,之前同你打波,有時你阿媽會無端端喺電話同我問好…感謝我同你一齊玩…」
我見過佢阿媽兩次到,唔可以話熟,但電話就講過成十次,嗰時我重唔明點解佢老母做乜咁婆媽,作為隊友同你個仔打波有乜好感謝…
文:「係呀…佢其實係喺度check緊我係咪同男仔打波,定係去咗匿匿埋埋同啲女仔做茍且偷歡之事,所以…一直以嚟麻煩晒你喇。」
我:「唔怪之得,早幾個禮拜佢重語重心長叫我好好努力打比賽,要為學校爭光攞個牌返嚟,我重心諗又唔係你打比賽,你係陪練波咋嘛,做乜你阿媽好似與有榮焉咁…」
文:「哦…佢係想叫你好好努力看實我,等啲女仔唔好掂到我啫。」
我:「換言之,呢幾個月我次次同你練波,即係令你重獲自由,再唔小心俾個女仔掂到你…」
文:「嚴格嚟講你嘅推論係無錯嘅。」
豪:「咁唔通?!你諗住喺入U之前拍拖就要叫埋志華出嚟陪你兩個做架樑,咁先可以有拖拍?」
文:「如果…Tiffany同你哋都OK…我又唔介意嘅,橫掂都可以一齊出嚟打波。」
敏:「喂!一齊打波就話無問題啫,咁如果你兩個開房,使唔使叫志華喺門口standby聽電話呀?」
今日…就連詩敏都咁爆,到底發生乜事…
文:「呢個問題問得好…」
強:「志華!正呀,你以後可以做出租男友陪佢哋拍拖,收返佢哋拍拖門票入場費!」
文:「又唔一定係佢嘅…我諗是但一個男仔都可以取替到佢嘅位置,但如果出嚟唔係一齊打波,我又諗唔到有乜理由同阿媽講。」
豪:「考A level一齊溫書都可以呀?你咪有讀Maths and Stats嘅,我可以幫你做煙幕,再加埋幫你補習,同期執行打個八折畀你又點話呢…」


敏:「呀!咁嗰次,校隊謦出邊個打學界,同你謦到成六點,你阿媽打畀你…之後…我重同你一齊離開學校,重即刻撞到你阿媽…」
詩敏唔Q理肥豪㞗噏,直接打斷咗嗰條友仔。而詩敏口中嘅謦學界,就係約莫我同曉彤第二次出事嘅日子,我就係因為同佢謦出邊個師弟妹,所以唔記得帶A-math書畀曉彤;我有諗過,如果當日記得又會點呢,可能到今日曉彤都重未搵返記憶,繼續同我一齊;雖然我唔係唔鍾意曉彤,但我覺得而家呢個結果係最好嘅,一鳴又畀佢治到,曉彤亦同佢過得好開心;而且我而家相信無論點曉彤都總會有一日搵返記憶,拖得越耐可能對大家做成嘅傷害就越大,係我嗰陣先會咁天真以為可以呃足佢一世。
文:「哈,妳講嗰次,其實真係阿媽買完餸嚟學校門口check我,而並唔係咁啱撞到。」
敏:「咁無帶畀你啲乜嘢麻煩吖嘛?」
文:「少少啦,咪要解釋,我話妳係女子羽毛球隊隊長,喺學校留咁夜純粹係謦公事,再畀埋校網啲相佢睇,不過呢,就算謦公事都唔可以話我哋一定無嘢…所以呢…」阿文欲言又止。
敏:「所以乜呀?」
文:「所以…因為妳嗰陣啲頭髮短得離譜,就話妳係TB,對男仔無興趣,專向啲師妹隊員埋手…」
敏:「頂!咁樣屈我都得嘅!離晒大譜…」
文:「無辦法啦,最慘係我媽諗返起妳當時個cool樣,跟住就信到十足十…」
敏:「旖旎!我向妳埋手喇,一齊唔好理啲不知所謂嘅男人。」
強:「嘩!厲害了!原來佢哋玩交換唔係用自己條仔換人哋條仔,係換條女返嚟!」
旎:「唔係幾好嘅…雖然詩敏師姐好正,但我唔想攪基住啊,等我試完正常嘅先啦…」
黐線,呢班人到底有無邊個係正常?
已有 0 人追稿