每日坐車，都會遇上同一個人: Janice

我同佢都住同一個屋苑，每朝返工都會喺側門撞到，一齊行過去巴士站坐車。平時我坐樓下佢坐樓上，過左一個月左右某日喺側門又係撞到，今次佢同我有眼神接觸，我又留意下佢咩站落車。我喺尾二站落，之前嘅站都見唔到佢，就知佢總站落。第二日我特登坐樓上，坐佢後面幾行，然後一齊總站落。點知落完尾二站，上層已經冇晒人，咁我扮下嘢咁中途去樓下企喺度等，點知又係冇人，即係架車已經得我同佢。。。最後一棧橙佢都落咗嚟等，我同佢有眼神接觸，佢無端端問我乜你都係呢個站落嘅咩，我就話唔係，通常早一個站，但今日想食早餐所以總站落，佢就咁哦，隱約見到佢陰陰嘴笑。落車行返上幢大廈，發現原來呢個位冇餐廳，只係back office位。。。之後果日我又喺總站落，佢又走落嚟問我琴日早餐食咗咩，我話冇食啊，原來呢個位冇餐廳，佢又問咁你又喺度落？！我無言以對。。。

如是者我同佢每日都總站落，不過冇再有任何對話，有次佢個例位比對情侶坐左，佢係咁擰頭睇對情侶幾時走，我都幫佢留意緊，到對情侶走果陣我即刻去霸個走廊位，佢擰頭見到我坐左個走廊位，我揮手叫佢過嚟，佢遲疑左兩三秒都係起身過嚟坐我入面窗口位，只係佢今日好攰咁，坐冇耐就恰著左，我先至有機會細仔咁望真佢。褸屌裙黑絲尖頭平底鞋，諗返起都扯扯地。


好快就坐到總站，我懶係溫柔咁嗌聲起身啦，佢迷迷糊糊就咁一句唔該就算，然後直接行上寫字樓唔理我。可能呢次幫我地破到冰，之後果日我地喺門口撞到，佢居然同我say hi，我反應唔切好formal咁應早晨你好啊，可能覺得我on9，我隱約見到佢嫣然一笑，然後覺得好奇點解我呢句早晨咁機械式，就問「你做邊行架？好似成日要講早晨咁嘅」「做銀行，喺你公司樓下喳嘛」「你又知我公司喺邊？」「喺總站落車一定係去果幢嘢啦，都冇其他地方，咁你又做邊行？」「你得閒留意下，應該會成日見到我」咁我估到佢應該做cs，唔怪得日日黑絲，要留意多啲佢企邊先得。

我係企bank hall，所以全日流流長都可以望住出面留意佢幾時行過。終於，等左幾日可以見到佢經過，「喂halo」「哦～原來你做呢間」「係啊，話說你句咩名？識你好耐都未知」「好耐咩，都唔夠一個月」冇錯，雖然呢排日日坐車坐隔離，但我地接近一句野都冇講過，佢望一望我staff card，「你叫Larren」「係啊小姐，請問有咩幫到你？」「你冇野幫到我，唔講啦，要做野」「咁好啦，得閒再傾。。。」「嗯」佢好冷淡咁走，可能feel到我失望，忽然回頭微笑

「Janice」