每日坐車，都會遇上同一個人: 互相認識

「人如其名啊，又正又nice」我原本只係個腦諗住呢句，但唔知點解衝口而出，尷尬既係，Janice聽到。。。「呃。。。」「sorry我冇心，我冇咩特別意思」「乜我似咁小氣咩，唔係你講我都唔知我個名可以咁樣拆，真係要返去啦，bye」「拜拜」

入黎銀行做野兩年幾，見過既人有無數咁多個，但幾本上都係萍水相逢，除非我有意成為患難之交，否則可以話係零朋友，客如是，同事亦如是。我唔似佢地咁能言善辯，諗左大半年都係覺得呢份工唔適合我。老本來，我辭職信已經打好，但為左想見多啲Janice，我決定忍到我真係做唔住先走。

我唔知佢係有意定無意，之後嘅日子都會見到佢好似巡邏咁經過我鋪頭，又或者有時帶客行過。明明以前都冇見過佢，呢樣都幾肯定我唔會錯，因為做我呢行要知道啲客個底細，究竟多唔多錢，所以我嘅觀察力都幾強，所以冇理由未見過Janice喺我面前巡。

日復日咁過，每朝坐車佢唔係訓覺就係望窗發吽逗，又係既，做cs真係好攰，所以我都唔會點撩佢講野，想佢有啲休息空間。有時佢碌連登或者ig見到啲好笑野會抿嘴笑，有次我膽粗粗問佢有咩好笑，佢就同我share貓既影片，好彩我係貓奴，有follow得意既貓page，即刻share返俾佢。佢每日返工都要戴住副面具做人，難得可以見到佢真實一面，不得不承認，我已經對佢有好感。

呢日我見冇乜客，我轉身準備返自己位call客，忽然Janice叫停左我「喂喂！」「Hi Janice」「想問下呢，搵你申請credit card有冇多啲優惠架？」「其實冇架，你真係要多啲優惠既就去moneyhero果啲啦」「哦。。。咁好啦，咁我上網自己搞啦」Janice轉身行出門口，我先醒起呢個係真正認識佢大好機會，「你而家係咪有時間？黎我位填form啦，我幫你搞」我去佢耳邊細細聲補充「你張卡批到我有佣，到時請你食餐飯」「好啊」



我拎form出黎填，Janice既電話住址生日全部都知道晒，「只要你tu正常，加埋我親自follow，張卡好快批到，你諗定食咩都得架啦」「唔該，你張卡片我要得架可？」我即刻拎卡片俾佢，「Sure!」，喺上面寫低我私人手提號碼。