【愛情】 我同女仔傾偈就會肚痛: 第二章.1
輾轉嚟到十二月，升上中五真係比以往更加忙，學啲嘢難咗之餘、所有老師都想把握呢關鍵一年教晒啲嘢。就算你本身唔係特別畀心機讀書嘅學生，面對咁大堆功課自然會投放咗好多時間。
唯一值得開心嘅，係Miss So做返班主任之後，每一日返學嘅動力都多咗。我會好期待返學見到佢嗰樣、上堂聽到佢把聲、傾偈會氹到佢笑，好似多咗個人每日喺學校等你，令你急不及待想每日返去見佢。
自從上次之後，感覺Miss So對我多嘢講咗，會主動問多啲有關我嘅嘢，又會成日同我講吓笑。雖然同鄧逸俊佢哋比較起嚟，我同Miss So仲未算話好熟，但係如果同自己過去嗰四年對比，坦白講我已經有啲滿足於現狀。
「咁快滿足？」
「既然未畢業，可能會有得再Close d呢」
「不過都要專心啲上堂XD」
宜家Claire姐周不時會message我，八卦吓我同Miss So之間嘅進展，算係佢面對Dse壓力嘅少少娛樂。同時佢作為師姐，又會提我要努力讀書，趁仲有時間好好裝備自己，去面對人生最大嘅一場考試。
其實Claire姐又幾矛盾，一方面好鼓勵我去追Miss So，另一方面又叫我畀心機讀書、盡力考好個Dse。或者佢覺得我同Miss So唔會一齊到，所以唔算好影響學業，話晒我哋之間嘅年紀實在差好遠。
呢個亦係我一直冇去面對嘅問題，就算我幾鍾意佢都好，始終好難想象有女人會同個細自己十年以上嘅人一齊。你話阿Sir就想食學生妹啫，Miss食學生哥呢啲真係要外國先有，講起都想快點強姦我。
點都好，呢個係改變唔到嘅事實，我個問題好快又去返點樣同Miss So close啲。
「就黎聖誕節，送份聖誕禮物比人啦，我諗係女仔都鍾意禮物同驚喜」
根據Claire姐提議，我好快去咗行街揀禮物。既然知道Miss So鍾意毛毛，理所當然揀返樣毛毛主題嘅嘢送畀佢。
行開先發覺，毛毛呢隻嘢始終冇嗰啲Hello kitty呀、Little twin stars呀咁熱門，所以實際都幾難搵。
難得嘅星期六，我行咗差唔多半日都未見到一隻靚嘅毛毛。
雖然行咗咁耐，腳有啲攰又未搵到份心水禮物，但係一諗到Miss So收到禮物會好開心個樣，好快又會有返動力。我覺得買禮物就係噉，只要你揀到一份最滿意、可以令到個對象開心嘅禮物，噉再辛苦啲都值得。
皇天不負有心人，當我行到去成區最後一個商場、最後一間有賣公仔嘅鋪頭，就俾我見到隻好得意嘅毛毛公仔喺間鋪頭角落。
「咦，係秦子柱喎！」
喺我諗住行入間鋪頭嗰陣，後面突然有人嗌住我。
本身我有一刻諗過，會唔會咁橋買禮物畀Miss So就撞到佢，所以仲有啲期待噉轉身。
直到我發現來者何人，先至深知不妙。
「男人老狗買公仔？想買返隻漏口仔陪自己呀？」
阿烽走過嚟搭我膊頭，特登串我幾句。
「睇下唔得咩，同埋邊度有漏口仔公仔呀，大口仔就有一隻。」我見隔離啱啱好掛住隻大口仔，即刻拎起佢塞落阿烽塊面還擊。
阿烽及時擋住，笑笑口講：「差唔多啦，佢把口咁大，講嘢嗰陣啲字咪漏出嚟囉。」
我望真啲先發覺，同佢同行嘅仲有雞豪、木村。
見佢哋咁齊人，我先醒起佢哋今日約咗喺體育館打乒乓波，而呢間商場係最近體育館嘅消遣地方，斷估佢哋係打完波嚟食嘢。
「噉你喺度做咩？」
雞豪隨手拎起一兩隻公仔問我。
「冇呀，悶悶哋咪周圍行吓。」
佢哋噉樣望實我，冇理由照買隻公仔㗎喎！
「唉，一早叫你跟埋我哋打乒乓波㗎啦！」
「咪講咗麻麻地乒乓波。」
「噉咩波啱你呀？」雞豪笑淫淫噉拎起兩隻圓形公仔，極度意識不良。
「衛生波呀。」
「噉即係你都冇咩嘢做㗎啦，同我哋食埋個Tea先啦。」阿烽一路講，已經一路拉走我。
我求其敷衍吓，但睇嚟佢哋冇諗住咁易放過我。
呢個情況，我又冇理由推開佢話要去買公仔，唯有跟埋佢哋食個嘢先。反正搵到禮物，我又行到有啲攰，陪佢哋食完嘢打發佢哋走，就可以唔怕有人見到我買公仔。
我哋求其去咗一間茶餐廳度食嘢，喺下午茶時段食嘢有個好處，就係啲嘢食會平好多。嗌個沙嗲牛麵加西多士都係三十幾蚊，久而久之食Tea變咗我哋圍內嘅傳統，成為區內茶記下午茶時段嘅常客。
同朋友食吓飯吹吓水，明明只係講吓啲無聊笑話、隔籬班啲是非、呢個禮拜發生嘅柒事，但係已經令我不自覺投入其中，冇留意到時間嘅流逝。計埋食完飯周圍行多陣，同佢哋差唔多Hea咗足足兩個鐘，天色都開始入黑。
佢哋嘅活力隨住太陽落山而遞減，加上出咗大半日街都夠皮，所以我哋終於正式道別。一開頭我仲有啲不捨嘅感覺，但係一諗起Miss So份禮物，好快又擺脫呢種感覺，加緊腳步去做正經事。
返到去嗰間鋪頭，其實幾多一家大細、結伴同行嘅少女出入，好似我呢個年紀嘅僆仔實在係稀客。
「哎呀，Sorry。」
間鋪頭門口有啲窄，我掛住衝入去嗰陣唔小心撞到人，不過我冇理咁多，求其道個歉就繼續逼入角落。
因為人有啲多，喺我慢慢逼入去嘅過程搞到我越嚟越緊張，希望快啲見到嗰份可以博得Miss So一笑嘅禮物。
直至我逼入角落，先發現隻毛毛公仔已經冇咗。
我慌張噉四圍望，心諗係咪啲人拎起咗又冇擺返原位，可惜嘅係就算我搵晒成個角落，依然唔見嗰隻毛毛。
Hi Hi囉！唔係食完個Tea就俾人買咗呀嘛？
我行去收銀位嗰邊拉個老細，打算問佢仲有冇毛毛公仔。
「毛毛公仔？嗰度成排都係毛毛公仔呀。」
老細指住鋪頭左邊嘅一行櫃位，櫃上面有十幾隻真係「毛鬙鬙」嘅公仔。
睇嚟因為我講得唔太清楚，於是又向老細解釋：「唔係呢啲毛毛公仔呀，係怪獸公司嗰隻『毛毛』公仔。」
老細嗰樣一臉疑惑，就算佢做公仔生意，似乎都唔係熟悉晒每一隻公仔。
今次我索性用手機上網搵張圖畀佢，費事又要解釋多第三四次。
老細除一除眼鏡，仔細望住我手機：「哦...呢隻毛毛呀......」
「點呀？係咪仲有貨呀？」
我見佢終於認得隻嘢，有啲興奮期待。
「冇啦，啱啱先賣埋最後一隻。」老細戴返副眼鏡，望住我講。
「吓？！」
呢個時候我忽然靈光一閃，諗起我喺門口撞度嗰個人，佢個袋好似係袋住隻藍色公仔。
我個下巴幾乎跌到落地下，但係我都及時接住佢，然後繼續追問：「噉請問吓有冇話幾耐會返貨？」
「最快都要出年啦。」老細無奈搖頭，同我解釋：「嚟緊聖誕又新年，啲人開始放假㗎啦。」
聽到老細呢句，我終於正式放棄。
雖然本身仲有其他毛毛主題嘅禮物，但係始終唔及嗰隻公仔咁得意。而且買公仔嘅其中一種意義，就係想Miss So見到隻嘢會諗起我，然後攬住隻毛毛就好似攬住我噉......
最尾，我只可以灰晒機噉行返屋企收場。估唔到我以為自己淨係食咗個Tea，但其實係連自己啲心機都食埋！
呢一刻我忍唔住鬧自己，秦子柱實在太蠢啦！！！
之後嗰個禮拜，無論我上網搵定係去旺角、深水埗呢啲熱門地方，一樣係揀唔到隻滿意嘅毛毛。學校過埋個聖誕聯歡會就開始放假，如果我喺星期五之前仲未買到禮物，噉就趕唔切送畀Miss So。
雖然穩陣起見，我有搵定其他毛毛主題嘅嘢，例如鎖匙扣、水杯等等，但係呢啲禮物始終唔夠令Miss So印象深刻。難得有機會，我想送一份最好嘅禮物，一份Miss So收到會好開心、好鍾意嘅禮物。
冇辦法之下，我唯有搵救兵問吓意見。
當然唔係阿烽佢哋，嗰班問嚟都蹝氣。
而Claire姐，其實我好少喺午飯時間搵佢，通常佢係夜晚先得閒。不過宜家時間緊逼，我都唔理得太多。
「你唔係話買公仔咩？」
Claire姐見到我問有關禮物嘅意見，好快又提起我啲傷心事，於是我將嗰日嘅事同佢解釋一次。
「做咩咁傻呀，你求其作個理由咪得law lol」
「唉，點會知過咗兩個鐘就冇左＝＝」
由於午飯時間有限，我又怕俾老師、甚至係啲朋友見到我同人Message，所以快快手進入正題：「咁你仲有冇咩建議呀」
「其實唔一定要買既，女仔好鍾意d有心機既禮物」
「例如？」
「手作個d？可以織頸巾haha」
「男人老狗點會織頸巾＝＝」
一諗起自己織頸巾嗰樣，我即刻打咗個冷震。
「如果有人織頸巾比我我會覺得好sweet」
「有冇d低門檻d，同埋都唔夠時間啦，我得番四日時間炸」
Claire姐隔咗一陣冇覆，我本來仲以為佢唔得閒，點知佢send咗條片畀我。
嗰條係一條外國嘅手作短片嚟，標題大約係咩「DIY Needle Felt Kit」，因為條片係得英文，所以我其實唔知佢整緊乜。
如果淨係睇畫面，就見到有個人拎住枝針，然後對住一執毛係噉拮係噉拮，啲毛拮拮吓又俾佢越拮越細，突然變咗做個波噉。佢慢慢繼續加工，將啲膠眼、布耳仔、毛尾整入去個波度，最後形成咗隻好得意嘅貓仔。
「咩黎？」
我望住個人用堆好鬆散嘅毛，但係又整到個成品好結實，突然間好好奇。
「羊毛氈黎架，好多人拎黎整d細細隻公仔，或者天竺鼠果啲小動物」
「你又知呢ｄ野既？」
黏土我就見人玩得多，呢啲羊毛真係未見識過。
「暑假果陣比人捉左去上幾堂玩過下xd」
「玩呢d咁犀利」
「不如你就整呢d比你個Miss啦」
「好似好難咁，又唔知起邊度買d野＝＝」
「好易架炸，我教你咪得law」
我見條片短短哋五分鐘都唔使，應該真係幾易整，於是我俾Claire姐說服咗，改用羊毛氈手作做禮物送畀Miss So。
時間關係，我今日放學已經起程買料。經過Claire姐推介，我目的地係將軍澳一間羊毛氈專門店，佢話嗰度選擇多質素又幾好。
只係對我嚟講，今次同千里大長征係冇咩分別。
事關小弟其實係住喺上水，唔知係因為份人太毒定住得有啲偏遠，以往小弟嘅活動範圍通常只活躍於上水粉嶺，最多就係東鐵線範圍內，基本上要轉車我都覺得遠。
更加唔好提每年嘅書展、動漫展，單係車程我已經要搭成個鐘，仲要忍受埋排隊入去嗰段時間，令到我每次去親都好似體驗緊一種考驗、一場遠征。
根據我嘅體感時間，今次搭到去寶琳站直頭耐過我以前去書展，斷估超越埋荃灣同柴灣之間嘅距離。
為咗Miss So，我好似不知不覺間做咗啲以前絕對唔會做嘅嘢。
喺Claire姐指示下，我好快搵到嗰間鋪頭。入面確實有好多毛色選擇，連嗰啲膠眼都有唔同款式，仲有啲係現成一包包嘅貨品，好似試玩版噉有齊晒材料同工具畀你。如果佢有毛毛款式，可能我都會直接買現成嚟整，可惜佢通常得啲貓貓狗狗主題。
為咗唔使再喺上水嚟多次，大部份材料我會預多啲份量，尤其負責拮毛嘅幼針同中針。因為Claire姐話太大力啲針有機會斷，所以叫我買定多幾枝先。
買完材料之後，我順便喺嗰度食埋嘢再啟程返屋企。到我返到屋企已經係八點半，好彩我搭車嗰程有做噉啲功課，沖埋個涼再做埋啲手尾就可以正式開工。
聽完Claire姐講解，首先係拎一大執毛打個結，然後再捲埋一舊用中針係噉拮，拮到佢變實成形。
「Oh shit！」
俗語話打響頭炮，可惜第一炮打中嘅係我隻手指。因為拮羊毛要啱啱好穿過羊毛小小，結果我拮咗幾吓，就唔小心插中自己擺喺羊毛後面嘅手指。
不過小小痛算得係咩，我黐咗塊膠布又繼續上路。
拮拮吓先發現，睇片好似覺得好容易，但實際到自己落手，唔知點解舊羊毛拮極都唔實，個形狀睇落又奇奇怪怪。
好彩Claire姐會抽時間解答我啲問題，雖然隔住個電話教始終慢咗啲，但起碼叫教返啱我啲手勢、去配合我買返嚟嗰塊發泡膠墊，同埋教咗我一啲拮針技巧。
拮咗大約幾個鐘，我總算拮到個頭嘅形狀出嚟，之後因為Claire姐要瞓，我驚自己亂咁嚟會搞爛晒，所以冇再繼續整落去。
搞咗一晚只係得個頭...仲要連眼耳口鼻都未整，搞到我有啲擔心趕唔趕得切......
「起身啦，秦子柱！」
講呢句嘅唔係我呀媽，而係Miss So。
太過擔心份聖誕禮物嘅進度，搞到我琴晚冇覺好瞓。平時我聽唔明Miss So噏乜，至少會精精神神噉望住佢講書，結果今日實在頂唔順，罕有喺上佢堂嗰陣伏低瞓著咗。
其實Miss So算係幾好，佢冇特登大叫我個名去嗌我起身，而係趁大家小組討論緊，走過嚟後面嗌我同拉我起身。
咁啱嘅係佢行到去我後面嗰陣，我已經Feel到佢想嗌我而開始坐返直個人，但係Miss So冇預計到我會噉做，所以當我坐直嗰一刻佢反而避唔切，令我個頭挨咗落啲軟綿綿嘅嘢......
「唔...唔好再瞓覺啦男班長。」
Miss So冇乜特別反應，只係即刻褪一褪後，我諗佢應該知我唔係特登。
「Sor、Sorrry，琴日瞓得唔係咁好。」我搲頭道歉，無論係撞到佢定上堂瞓覺都好。
雖然嗰種觸感確實係會令人有啲心動，不過我仲未走火入魔到黐線佬嘅地步，又唔會太厚顏無恥嘅。
喺我搲頭嗰陣，Miss So見到我有兩隻手指黐咗膠布，於是好奇問我：「咦你做咩整親？」
「吓、吓......」
我望一望嗰兩隻因為整禮物受傷嘅手指，求其噏個理由：「我...我呢排學緊煮嘢食呀嘛，哈哈......」
「記住小心啲呀。」Miss So有小小擔心，跟住突然間又好興奮：「噉你煮好咗有冇我份㗎？！」
「可、可以呀...我煮得掂嗰陣就、就帶啲返嚟畀你......」
聽到佢噉講，我忽然有啲面紅，一嚟冇諗過佢會關心我，二嚟冇諗過佢會對我煮嘢食有興趣。
「你話㗎！」Miss So好滿足噉笑咗吓，然後就行咗去另一邊。
睇嚟我除咗送禮物之外，意外多咗樣To do list。
今日返到屋企，我求其拒絕咗阿烽打機嘅邀約，快快手抄完啲功課又再開工。得返三晚時間，如果我仲掛住打機就好肯定趕唔切。
由於我怕俾屋企人見到我喺度整手作，所以係鎖埋門喺房整。
「細佬，食飯啦！」
點知因為我阿媽突然拍門，搞到我剪高咗一個窿。
呢個窿係拎嚟黐隻眼入去，宜家照擺入去黐嘅話，隻左眼會好明顯高咗一半。
「Shit！」
我急急腳將啲工具擺晒入櫃桶再去開門，費事我屋企人喺度繼續催我。
「搞咩呀你，平時都唔鎖門。」
「冇呀，溫緊書諗住專心啲嘛。」
「吓？」阿媽望住我張檯空無一物，疑惑噉問：「書呢？」
「呃、呃......」我望返張檯，有啲心虛一時唔知點答好：「諗、諗住食飯咪收埋咗囉！你出返去先啦，我諗住嗱嗱聲食完繼續溫。」
「噉你加油啦，唔夠食就出嚟拎喇喎。」阿媽臨俾我推出房之前講，佢見到我話要溫書，似乎都幾開心。
我坐返低之後鬆一口氣，望一望個鐘先發現原來宜家成八點幾。即係我已經唔覺意整咗幾個鐘頭，我諗就算我真係溫書都冇宜家咁專心。
諗到呢度我又決定獎勵吓自己，至少食埋個飯沖完涼再繼續努力。當然我冇忘記到自己啱啱先剪高咗毛毛隻眼，所以沖完涼之後就Send張圖畀Claire姐睇，睇吓有冇得補救。
「想問吓隻眼唔對稱可以點救＝＝」
「隻毛毛搞咩黎？整容失敗？XD」
「唉唔好提，岩岩比我屋企人嚇親所以剪錯位。」
「其實冇咩野既，反正你其他位都未整，你咪當係精靈d囉，唔洗笑得咁死板。」Claire姐話口未完又Send個Sticker畀我示意：「好似佢咁」
我望一望嗰Sticker，如果有呢個樣嘅毛毛，確實係幾盏鬼同特別。
於是我將計就計，重新畫過啲草圖，睇吓啲眼耳口鼻可以點擺嚟互相配合。最後我用細線當做嘴、其他毛整做個鼻同埋兩隻角，再用幼針拮到佢哋固定喺個頭度，成功整咗個戚起半邊嘴伸脷、對眼好鬼馬嘅毛毛頭。
「又幾醒喎你」
我見個成品出奇哋幾得意，即刻Send畀Claire姐睇吓。
「洗乜講！證明我教人幾有天份」
佢又Send咗個Sticker出嚟，我諗佢宜家嗰樣應該同我隻毛毛一樣，有返咁上下得戚。
呢個鐘數Claire姐差唔多又要瞓覺，總結我第二晚嘅進度，終於叫做搞掂咗個頭，完成咗隻嘢一半。
之後嗰晚，因為我拮得耐咗開始越嚟越上手，幾順利噉整到毛毛個身。不過唔好彩嘅係嗰日功課較多，其中仲要係冇得抄嘅中文同英文作文，所以我整完個身就唔夠時間再整落去。
嚟到第三晚，可以話係決勝負嘅時刻。
理論上我只要將個頭同個身拮埋一齊，成隻嘢就宣佈大功告成。只係喺合體之前，仲有啲細節要加上去。
我開始將一啲黃色嘅羊毛拮落毛毛嗰身度，當你將額外嘅毛拮上去，嗰啲毛就會覆蓋咗隻嘢本身嘅顏色。我圍住隻毛毛鋪咗一大半，特登留返佢手手腳腳啲位置，令佢睇落好似著咗件T-shirt。
呢個正正係我計劃一部份，除咗要送隻自己整、夠特別嘅毛毛之外，隻嘢最好仲會有啲我同Miss So之間嘅特別回憶，等佢望到隻嘢會更加容易諗起我，亦令到隻毛毛更加獨一無二。
雖然講係噉講，但係我同Miss So其實又冇咩特別聯繫，或者話淨係屬於我同佢兩個人嘅回憶......
就算你話中一迎新家長日嗰次，都只係我個人單方面嘅經歷，Miss So根本唔知我嗰陣又肚痛又嘔。
最後我唯有退而求其次，將一句有啲老土、但係Miss So又好鍾意嘅格言拮上去。
「Never Give Up」
Miss So第一次講呢句嘢，係喺我哋中一班際排球比賽嘅時候。
「喂！救波呀！」
我哋班其中一個同學大叫，可惜佢啲隊友並唔係聲控嘅，唔係嗌完就真係識救。
「啪！」
「嗶——」
個排球精妙噉喺底線之前落地，令我哋班以四比十六結束上半場。休息期間，大部份上場嘅同學都表現到好氣餒，全部靜晒唔知講咩好。
除咗嗰位不停大叫指揮隊友嘅主將。
「鄧逸俊！唔該你專心啲啦，望住個波飛過嚟都可以打唔中？」
「仲有你呀，攔網醒少少先得㗎？人哋跳起你都未跳，小兒麻痺㗎你？」
「唉，咁嘅節奏感死得喇！」
老實講我其實分唔清佢呢啲叫指揮定躁狂。
由於佢本身已經係排球隊，所以實力係咁多個同學之中最勁，同時又係對其他人最嚴格嗰個。
「呀...周嘉欣，如果你可以打大力小小就好啦。」而佢因為唔敢鬧女仔，所以主要當啲男同學係出氣袋。
「如果係冇心打嘅不如投降啦。」主將鬧到開始發悔氣。
「喂——夠喇。」
呢個時候Miss So見佢越嚟越失控，開始行過去控制場面。
Miss So嗰陣心態上仲係青春少艾，投入比賽嘅程度直頭去到自願做啦啦隊，同幾個女同學拎住啲啦啦球打氣。
「打得唔好佢哋都唔想，你可以善意噉提點佢哋嘛。」佢友善噉同主將講，嘗試緩和場面。
雖然主將態度非常惡劣，但係佢喺上半場確實救咗唔少波，幾乎憑一己之力力挽狂瀾。
「之前練習提點咗好多次啦，打極都唔進步，點贏啫？」相反主將發晒脾氣回應，就算佢打波再勁，心態上亦只係個中一學生：「你哋咁勁自己打晒佢囉！」
「宜家場比賽都未完，邊個話贏唔到呢？」Miss So好有耐性，對住主將循循善誘：「既然你有呢個能力，就應該嘗試去帶領大家贏波，而唔係帶頭認輸。領導嘅作用唔單止係提點隊友錯失，仲要鼓勵士氣。」
「打仗都講士氣啦？你有冇聽過啲將軍對住自己人係咁嗌『我宣怖呢場仗輸咗啦』、『非洲兒童都好波過你哋呀』或者『你哋唔肯面對現實』blablabla之類？」
Miss So見自己越講越激動，抖大啖氣冷靜吓再講落去：「放棄的確睇落件好輕鬆、好容易嘅事，可以咩都唔理、扔低晒所有嘢行咗去。但係你如果可以堅持不懈、克服所有困難去達成最初嘅目標，先係一件最值得欣賞嘅事，比起半途而廢，我更加想你哋學識Never give up。」
佢講完之後，上場嘅同學依然保持沉默，不過可以睇得出，佢哋嘅眼神已經唔同。
Miss So作為啦啦隊隊長，隨即帶領大家喝彩提升士氣，緩和緊張又尷尬嘅氣氛。主將同其他人決定冰釋前嫌，聚埋一齊商量點樣反敗為勝。
當中主將改變最大，可能係佢終於明白作為一個隊長要點做。佢根據每個隊友嘅能力重新分配崗位，啲指示亦有咁簡單得咁簡單，反應快嘅去攔網，其他人負責防守同埋盡量Set個波比主將執生。
下半場開始，我哋一洗頹氣，每個人同樣恢復鬥志。其他隊友冇再俾主將鬧，開始越嚟越有自信、打得越嚟越好。最後靠鄧逸俊緊要關頭用腳救波，反而意外絕殺對手，以二十一比二十贏咗冠軍。
自此之後，Never give up成為咗Miss So教我哋嘅格言。
望住拮咗落毛毛身上嘅呢句，我幾滿意自己啲手工。既然仲有多餘嘅細線，於是我又喺毛毛背脊將啲線拮咗做個「1B」，當係紀念我同Miss So第一次識嘅地方。
最後我將身體同個頭拮埋一齊，再用幼針修飾吓就正式完成，為咗方便拎去送畀Miss So，我仲特登買咗個透明盒裝住隻嘢。
我整完嗰陣已經成一點幾，Claire姐見聽日係送禮deadline，所以先咁有義氣等埋我搞掂隻嘢先瞓，不過佢其實都好攰，一見到我話整好就即刻去咗瞓覺。
而我整完之後，就慢慢欣賞吓自己整咗幾晚嘅傑作。話晒對咗隻嘢咁耐自然有啲感情，好似當咗佢係自己個仔噉。送咗畀Miss So，恐怕唔會再見得返隻嘢。
我開始對隻毛毛有啲期待，唔知Miss So收到會有咩反應呢？
為咗快啲去到聽日，可以望到Miss So收禮物個樣，我嗱嗱聲走去瞓覺，冇再慢慢觀賞隻毛毛。
「希望你今日順利la，你隻毛毛咁得意miss應該會好鍾意xd」
第二朝起身，就見到Claire姐send message嚟同我打氣。
坦白講今次整禮物畀Miss So，又意外令我了解多咗Claire姐，冇諗過佢會學啲咁冷門嘅手作。
唔知係因為受到Claire姐祝福、定因為終於有得送禮物畀Miss So，我懷住興奮又緊張嘅心情返到去學校。