【愛情】 我同女仔傾偈就會肚痛: 第二章.2
行入門口，首先要做嘅就係捐錢。
其實我都唔明呢個係咩政策嚟，學校喺聖誕聯歡會呢日加多項規則，就係要學生捐十蚊或以上畀學校個基金，先可以著便服返學。而今日難得開Party，大家費事著住件校服咁掃興，所以都會乖乖哋捐錢畀學校。
過咗門口嗰關，返到課室我先開始煩惱送禮物嘅時機。
正常今日嗰行程會係先去禮堂睇音樂比賽，然後返課室搞大食會，最後下晝一點就放學。如果我喺大食會嗰陣送畀Miss So，到時周圍啲同學一定會好八卦湧埋嚟，噉就全世界都知我送禮物比Miss，又會阻住我同佢相處。
即係話最好嘅時機起碼要等到放學，然後我再一個人去教員室搵Miss So。雖然唔知到時鄧俊逸班人會唔會又去咗圍住佢，但點睇都好過全班人望住我送禮物。
本來要等四、五個鐘頭，其實係幾漫長。
不過慢慢聽吓啲人唱歌，我好快又投入咗聖誕聯歡會嘅氣氛，尤其某啲學生出奇哋唱得幾好聽，甚至令你覺得佢可以去做歌手咁濟。加上社際比賽嗰Part，你又會見到某啲平時好正經嘅老師，上到台竟然會好快好落力去參與表演，令到成個表演好有「聯歡」氣氛，不論師生都會樂在其中。
喺充滿功課同考試嘅學校裏面，可以有一日拋開晒所有嘢、全校人一齊投入去玩樂其實係好難得。過去中一至中四我仲習以為常，對每年一度嘅聖誕聯歡會越嚟越冇感覺，就好似中一二
嗰陣，冇諗過有Miss So做班主任係件咁難得、咁美好嘅事。
好多時候我哋身處其中，反而察覺唔到嗰段時光有幾咁重要。
唔知係咪因為升咗上中五，距離中學生涯完結、甚至係同Miss So相處嘅時間只係得返年幾左右，我冇諗過睇場音樂比賽竟然會咁多嘢諗，甚至睇到有啲眼濕濕。
呢個時候我望一望Miss So，發現佢竟然一樣凝淚於眶。喺禮堂燈光昏暗之下，佢對水汪汪嘅眼睛就好似星星噉閃閃發光。
唔通我哋諗緊嘅係同一樣嘢？
雖然Miss So仲係眼濕濕，但係一諗到我哋可能心有靈犀我就覺得好開心，慢慢由望住台上嘅表演變咗做望佢，想知佢會唔會真係喊咗出嚟。可惜我哋坐得有啲近，所以Miss So終於發現咗我望住佢，即刻擰轉頭抹一抹眼角啲淚水。
「專心啲呀！」Miss So指一指個台，用口型同我講。
我笑笑口望返上台，費事令佢難堪。之後我間唔時都會偷望Miss So，但係佢似乎已經冇再想喊。
直至音樂比賽圓滿結束，所有班別返去各自課室，舉行各自嘅聖誕Party。我哋快快手將啲檯推埋去中間同埋側邊，等啲嘢食送到就正式開始。
食嘅嘢不外乎係嗰啲Pizza、KFC、菠蘿腸仔、公司三文治，唔算話好特別。
仲記得中二嗰陣，曾經有啲女同學提議自己整少少嘢食，於是有班同學就上咗我屋企整壽司卷。點知第二日幾乎完全無人掂我哋啲壽司，最後都係靠Miss So好好人噉，同我哋整嗰啲人一齊清晒佢。
今次啲嘢食喺我哋班男仔餓狗搶屎嘅情況下，好快清咗接近一半，連班主任都要撳住我哋，費事我哋食晒啲嘢搞到女同學冇得食。
「男班長可唔可以拎舊Pizza畀我呀。」
混亂之中，Miss So企喺側邊嗌我。
「好...好呀......」
聽到佢突然叫我拎嘢畀佢食，搞到我有啲緊張。
明明只係好少事，但係個對象一換咗做Miss So，我就唔知點解會有啲心動、有啲緊張噉。如果換轉係阿烽，甚至係其他同學叫我，我應該會覺得唔太耐煩。
或者呢種就係鍾意一個人嘅魔力。
「唔該。」Miss So望住我拎舊Pizza畀佢，順便見到我隻碟上面啲嘢食：「哎呀點解你舊雞翼好似好好食噉。」
佢講完自己都笑笑口，睇落好似唔好意思，但又有種得意嘅感覺。
「畀、畀你囉。」竟然佢有興趣，我義不容辭將舊雞翼拮咗畀佢。
呢個時候我突然諗，如果我本身咬咗啖隻雞翼，唔知Miss So會唔會照要嚟食？
唔得唔得，噉樣諗就真係Over咗啦，十足十上網睇到嗰啲會偷人水杯嚟飲嘅癡漢，鍾意人還鍾意人，唔可以走火入魔嘅！
Miss So見我搖晒頭噉款，以為我其實唔情願，於是就話：「你係咪唔想畀我呀？一係還返畀你嘞。」
原先我本能反應係諗住同佢澄清誤會，等佢可以自己食返。點知我仔細一睇，發現佢竟然咬咗一啖？！！！！！
嗚呀！！！！
好難揀呀！一方面係Miss So嘅口水尾，另一方面係Miss So嘅好感度，好似點揀都會對唔住自己！
呢個機會簡直係千載難逢，相信之後唔會再有，但係細心一諗，會唔會係Miss So特登試我，睇吓我係咪啲好咸濕嘅人呢？
嗚呀！！！！
呢刻我真係諗起無心睡眠嘅一句歌詞：
「Whoo-Oh-O～～腦交戰！！」
直至我望到Miss So呆咗噉等我回應，所以嗱嗱聲應返佢：「呃...唔、唔使啦，啱啱諗緊其他嘢啫。」
我嘅理智成功壓過衝動，阻止我成為變態佬嘅一份子。
Miss So聽到我噉講之後甜甜一笑：「見你咁好人，我畀返舊炸雞你啦。」
雖然炸雞上面冇佢嘅口水尾，但係可以噉樣同佢互相Share嘢食，令我同樣感到滿足、甚至有種甜蜜嘅感覺。或者呢個係上天見我冇做到變態佬，特登送畀我嘅獎勵。
拎完嘢食，我哋行埋咗去一邊。其他同學各自自圍埋一圈傾偈，霎時之間變咗做我同Miss So單獨相處。
當我察覺到呢個moment，個肚好自然又再作痛。我冇辦法唔停低手腳，集中精神應付個肚先。
「咦你做咩唔食嘢嘅？」
Miss So見我捧住啲嘢食又唔食，好奇問我。
經過我多年飽受肚痛煎熬，我已經學識咗點樣去隱藏自己嘅面容，所以呢刻佢完全察覺唔到我係肚痛緊。
「冇......冇呀......食吓抖吓。」我盡量用短句回應，費事俾佢發現我有唔妥。
「哦......」
Miss So點一點頭，見我冇咩嘢講就繼續食嘢。
其實我feel到呢刻係個唔錯嘅機會，無論係送禮定係普通傾吓偈，不過我又唔知點開口好。
「All i want for Christmas is you......」
班房突然響起歌聲，原來係有啲同學見悶，所以開咗個Youtube嚟播吓歌。聽到啲聖誕歌，我醒起啱啱Miss So喺禮堂想喊個樣，於是決定提起呢樣嘢。
「係呢......」
「做咩？」
「你啱啱做咩眼濕濕？」
我快快手講，費事講到疾吓疾吓。
「咩呀...多、多事喇你......」
Miss So聽完之後，怕怕羞羞噉擰轉頭解釋：「啲學生唱、唱得太好聽啫......你唔好同其他人講呀，如果唔係你就知味道。」
佢啲反應又可愛又搞笑，唔講仲以為肚痛嗰個係佢。唔知係咪因為見到Miss So啲反應幾可愛，我個肚痛好似痛得冇咁勁，慢慢有舒緩嘅跡象。
「我、我不嬲都好守得秘密嘅。」
「係至好講。」佢好快又轉話題，問我：「你今日有冇收到聖誕禮物呀？」
「吓...冇喎，我哋男仔唔興呢啲。」聽到Miss So講起聖誕禮物，我就諗起個袋入面隻毛毛：「你呢？實好、好多人送畀你啦？」
「冇喎，又唔見你送畀我？」佢嘅反應出乎意料，睇嚟連鄧逸俊嗰班人都冇送畀佢。
「呃......你、你早啲講嘛......」呢個時候確實係拎份禮物出嚟嘅好時機，只係周圍仲有人喺度，我怕佢哋會哄埋嚟睇熱鬧。
而且宜家話冇禮物，到放學嗰陣再突然送畀佢，可能會更加驚喜？
「自己嗌人送就冇意思啦。」Miss So特登好誇張噉嘆咗口氣，然後見啲同學開始越嚟越high，所以行去維持秩序：「喂！！唔好播咁大聲呀，嘈到人呀。」
望住Miss So Sad Sad哋嗰樣，我覺得自己好似整蠱緊佢噉，忍唔住偷偷哋笑出嚟。
之後嘅行程，不外乎係一齊唱吓歌、玩吓啲集體小遊戲。睇落簡簡單單，同時又會覺得好開心。
有時覺得聖誕節，好似特登畀一個理由大家去聚首一堂，一齊慶祝、一齊玩樂、一齊狂歡，為平日乏味嘅生活帶嚟歡樂，希望以好嘅回憶去結束呢一年。
開心嘅時間過得特別快，眨吓眼已經下晝一點半，所有同學將啲檯凳搬返原位，正式宣佈是日聖誕聯歡會完結。
亦係我開始實行今日最重要嘅目標。
原定我哋班毒撚圈子今日放學之後，會去網吧打返幾個鐘頭機慶祝吓，不過為咗送禮畀Miss So，我求其同佢哋講話急孱，叫佢哋去住先。
「哇，你平時唔係話返屋企先屙屎㗎咩？」
阿烽把握機會疾我，冇輕易放我走人。
「係囉係囉，你話屋企個廁所先最自在喎。」
雞豪以為我真係急屎，諗住搭嗲拖延時間。
「啱啱食得太多嘢忍唔住呀嘛，你哋再嘈我就屙落你哋個口度。」我講完即刻衝入去廁格，費事同佢哋越傾越嘥時間。
喺廁格匿咗差唔多五分鐘，我留意到廁所外面再冇我認得嘅笑聲，估計佢哋已經先行出發去網吧。
機不可失，我立即加快腳步離開廁所，行去Miss So所在嘅教員室。話晒今日晏晝唔使上堂，我都有啲驚佢其實會唔會走咗。
上到去一樓教員室，門口外面唔見鄧逸俊班人企喺度，我心入面不受控噉幻想兩個可能性......一係就佢哋冇嚟搵Miss So，一係Miss So已經離開咗學校。
我抱住緊張嘅心情，把聲有啲震噉開咪嗌Miss So，睇吓佢仲喺唔喺教員室入面。
「唔...唔該......我想搵蘇煦瑜老師。」
。
。
。
。
。
「咯。」
教員室對門終於回應我嘅沉默，可惜行出嚟嘅係第二個老師。
佢一出到嚟就俾企喺門口嘅我嚇親，佢見教員室外面得我一個，於是好心提醒我：「你搵Miss So呀？佢啱啱走咗啦喎。」
「吓？！」我毫無掩飾噉嗌出嚟，差啲唔記得個老師仲喺我前面：「呃、呃......唔該晒。」
唉，唔通就係因為我扮屙屎，搞到錯過咗送禮物畀Miss So嘅機會？
我越諗越氣餒，行到去走廊矮牆嗰邊挨住，將自己個頭沉沒喺雙臂入面。
學校放學之後嘅寧靜，令我回想起幾個鐘之前嘅熱鬧。
今日明明有幾次機會可以送禮物，無論係入禮堂之前、開緊Party嗰陣、定係Party一完咗嘅時候。諗返起真係有啲嬲自己點解面皮咁薄，因為怕其他人嘅目光，而令自己錯過表達心意嘅機會。
可惜人始終唔可以時光倒流，就算只係一個鐘頭，有啲機會冇咗就係冇咗。
「唉。」
我已經連續嘆咗無數次氣，既然送唔成禮物，我都無謂再留喺呢個冇Miss So嘅學校，去Join返阿烽佢哋打機當安慰自己仲好。
「秦子柱，你仲未走嘅？」
喺我抬高頭嗰刻，忽然聽到Miss So把聲。
我望向左邊，發現真係Miss So企咗喺度！
「我見佢哋走晒喇喎，你有嘢唔開心呀？」佢應該見我自己一個，以為我有嘢煩惱。
的而且確，我啱啱嗰沮喪樣似足啲生意失敗、老婆走佬嘅人噉。不過我啲煩惱，已經隨住Miss So出現而一掃而光！
「你...你唔係走咗㗎咩？」我反問佢，見佢忽然出現，覺得又驚又喜。
「我漏咗啲嘢返嚟拎嘛。」Miss So估到我噉問嘅意思，再問返我：「你嚟係搵我？」
「係、係呀。」
呢刻我開門見山，直接喺個背囊度拎份禮物出嚟，費事有啲唔知咩意外，搞到我錯過埋最後嘅機會。
「送畀你......聖、聖誕禮物。」
「咁突然？！你又話男仔唔興嘅？」Miss So雙手接著個盒，仔細望住入邊隻毛毛。
「諗住畀、畀個驚喜你嘛...我自己整㗎......」我有啲怕羞噉同佢解釋，順便講解吓隻嘢：「我仲......拮咗句Never give up落去。」
「我見到呀，隻嘢好靚好得意......」佢目不轉睛噉望住隻毛毛，雙眼逐漸變得晶瑩。
到佢匿埋眼深呼吸嗰下，竟然湧出兩行眼淚。
「吓......」我呆呆哋望咗Miss So幾秒，然後手忙腳亂噉拎紙巾畀佢：「呃...唔使咁激動嘅......」
雖然我有期望過佢會好開心，但係完全冇諗過佢直頭感動到喊出嚟，一時之間唔知講咩好。
「噉你...你整得好有心機嘛，多謝你......」
「你鍾意就好啦，整咗我幾晚。」
「隻毛毛係點整㗎？」
「呃...有啲複雜，大約就係用枝針係噉拮啲羊毛？」
「吓即係你隻手係俾啲針拮到？」
Miss So聽完之後，好醒目噉將呢隻毛毛同我手上嘅傷口聯想起嚟。
「係呀，你又幾醒喎。」
「哎呀你下次求其買小小嘢都夠㗎啦......」Miss So忽然有啲內疚，啱啱止住嘅眼淚又想衝出嚟。
「冇嘢嘅，小小皮外傷啫，哈哈。」
「多謝你，呢份應該係我收過最鍾意嘅聖誕禮物......」Miss So強忍淚水望吓隻錶，帶點歉意同我講：「我差唔多要車我屋企人去睇醫生啦，之後再同你傾？」
「啊，好、好呀，你有嘢做就做咗先啦。」
「放完假之後見啦，聖誕快樂。」
Miss So行入教員室之前同我道別，佢對淚眼笑起上嚟，好似比平時多咗份吸引力。
「聖、聖誕快樂。」
任務總算完成，我睇落孤獨噉一個人離開學校，但係心入面覺得好甜。
一個人喺路上，我開始諗返起啱啱啲情境，回味吓Miss So感動到喊個樣，又諗起自己見到佢喊之後，似乎因為掛住望住佢而冇肚痛到。
諗諗吓，突然醒起自己仲未知佢喺禮堂究竟諗咩諗到想喊，有啲後悔啱啱冇問真啲。不過再諗深一層，Miss So嗰陣諗咩其實唔重要，最重要係佢鍾意我份聖誕禮物！