【愛情】 我同女仔傾偈就會肚痛: 第二章.5
「點解Miss...Miss So又喺度......」
木村坐喺張凳、打住喊路問我。
啱啱仲未瞓夠嘅佢，都係迷迷糊糊噉跟大隊Check-in、安檢、出境，所以冇留意到Miss So幾時出現。
「佢話本身個Miss病咗，所以嚟幫手帶隊。」
我望住隔咗幾行嘅Miss So解釋。
雖然佢嚟係一件好事，但係就令問題變咗喺木村身上。因為我喺成個遊學團入面同埋佢最Friend，變相我好難扔低佢走去同Miss So傾偈。
就算我真係咁絕情，我都冇辦法好似平時放學噉同佢單獨相處。如果俾木村見到我成日黐住Miss So，佢肯定會同返阿烽同雞豪講，到時成班人肯定日日拎嚟講笑。
見到木村隻眼半開半合嗰樣，我頭一次有想捏死佢嘅衝動。
唉，睇嚟有時就係要喺兄弟同女人之間二選其一。
我放棄捏死佢嘅諗法，自己去個廁所冷靜吓。始終唔係木村話嚟嘅話，我已經跟埋阿烽佢哋去咗台灣，連同Miss So一齊去旅行嘅機會都冇，所以有時又唔可以咁衰仔。
第一次嚟到呢度，我本來諗住參觀吓周圍。只係附近其實冇咩特別，就好似平時啲商場噉店舖林立。
睇睇吓我都唔諗明，點解呢啲地方仲會有啲珠寶、手飾、時裝舖頭，你話食肆都可以俾人上機前醫吓肚，但係會有人臨飛前仲買衫買頸鏈㗎咩？
睇怕呢個問題唔係我呢種人可以理解，既然冇咩好行，我決定返返去閘口等上機算。
「秦子柱，唔好掛住行唔記得上機喎！」
返去嗰陣，竟然俾我撞到啱啱去完廁所嘅Miss So。可能佢見我望住啲舖頭，以為我仲想入去睇。
「宜、宜家返去啦，反正全部名牌嘢，冇咩好睇。」
「係囉，我都覺，點會有人喺度買手袋。」
「係囉係囉！我仲以為係咪自己見識小。」
我有啲開心噉應佢，估唔到佢同我諗法一樣，不自覺FF我哋係咪心有靈犀。
返去嘅路程唔算太遠，所以我哋傾唔到好耐。正當我諗住行返埋自己位嗰陣，Miss So竟然拉停咗我。
「做咩？」
Miss So指一指個登機閘口，提議：「我哋個Nuｍber呀，你介唔介意陪我影張相。」
就係嗰碌有時間、目的地同航班編號，啲人好鍾意拎嚟打卡嘅柱。
「可、可以呀......」
佢好熟手噉拎部手機出嚟研究角度，揀好個位Selfie就嗌我企埋去。
坦白講，呢刻我已經有心跳加速嘅感覺，畢竟我以往同佢嘅合照，只有班相同埋其他活動嘅大合照，今次係我第一次可以同佢單獨合照。
我望住螢幕入面嘅自己，又想企近Miss So少少，又驚企得太埋唔好意思，搞到嗰樣尷尷尬尬，連Miss So都忍唔住笑我。
「哈哈，你個樣做咩呀，要望鏡頭先得㗎嘛，嚟多張啦！」
「係冇你咁、咁熟手㗎喇......」
俾佢噉樣笑一笑，即刻搞到我面都紅埋，唯有唔再理自己個樣，專心望鏡頭笑吓就算。
「咔嚓。」
清脆嘅快門聲響起，示意我哋第一張合照終於誕生。
我個樣睇落依然係有啲拘謹，但起碼叫不過不失。
返到埋位，Miss So send返啱啱張相畀我，令我可以save低呢張咁有紀念價值嘅合照。而且估唔到嘅係，佢竟然直接Po埋上IG！
我望到個Post覺得心情好矛盾，一方面慶幸自己可以出現喺對方個IG入面，另一方面又好明顯驚阿烽佢哋睇到張相，然後會成日拎嚟抽水講笑。
點都好，我有預感呢個旅程仲會有好多第一次等緊我。
「唉，好撚悶呀。」
木村終於瞓飽，諗住撳吓手機消磨時間。我靜靜雞偷望佢個畫面，發現佢竟然想開個IG嚟睇。
仆街，唔係開口中吓話？！
「喂屌，不如搵啲嘢玩喇！」
我即刻撳低佢部手機，阻止佢有任何機會碌IG。就算我同Miss So張合照遲早會曝光，起碼等我拖延吓有多啲心理準備先，費事呢刻俾木村直接質問我。
「有咩玩呀，校長喺度鋤Dee都唔得喇。」
「包、包剪揼？」
「小學雞咩你，包剪揼都好玩？」
「你識咩呀，難得離開香港唔通仲掛住碌手機咩！」
我用盡渾身解數，極力阻止木村拎起部手機。過程入面連嗰啲咩劈手指、拇指擂台、天下太平嘅遊戲都拎晒出嚟，好彩木村有返咁上吓低能，玩咗一陣已經越嚟越投入，冇再諗住碌IG。
「頂，差小小！」
玩到劈手指嗰陣，佢直頭可以用激動嚟形容。我哋同樣輸到去殺傷力最大嘅食指，令戰況鬥到難分難解、熱血沸騰。
「嚟呀？！」
「嚟囉！」
「嚟呀！」
「你嚟呀？！」
一輪互劈之後我哋仲未分出勝負，甚至玩到掌心冒汗，要不時抹走啲汗費事跣手。最尾玩咗唔知幾耐，終於拖到去要上機一刻。
「大家拎定啲機票護照出嚟喇，記住Check清楚唔好漏嘢。」
其中一個帶隊老師示意，其他學生相繼起身排隊。
「喂...要上機喇喎。」我見木村太過專心，提一提佢。
「得啦！最後一鋪決勝負！」
「傻咗咩...上機慢慢玩咪得囉。」
望住大隊越行越遠，身邊越嚟越少同學，我反而有啲緊張，驚陣間跟唔切佢哋。
「你唔係淆底呀嘛？」
木村好似走火入魔噉，好勝心特別旺盛，執著要喺上機前分個勝負。
俾佢噉樣挑釁吓我，身為男人嘅尊嚴開始叫我上前迎戰。
「最後一鋪呀嘛？嚟囉！」
「你先定我先？」
「我先啦。」
木村用力夾實，將兩隻手指夾到變白，準備抵擋我嘅全力一擊。
我冇好似佢噉用死力夾實，而係專心睇住佢手指顏色嘅變化。佢呢種夾到手指變白嘅力道，正常唔會維持到幾耐，只要睇準佢鬆懈嗰一刻再全力劈落去，勝利自然手到拿來。
另一個技巧，就係要斜斜哋劈落去，集中攻擊佢一邊嘅手指，噉先容易令佢兩隻手指分開。
我靠右側身、將手掌微微舉高，好似啲武士噉聚精會神，等待最佳嘅出刀時機。
「你肯打未呀，又話要快。」
木村又攰又唔耐煩，喺度抱怨。
突然，佢兩隻手指抖動咗吓。
機會！
「喝！！！！！」
我氣聚丹田，低聲怒喝助威，利用扭腰帶嚟嘅力量牽動上半身、胸大肌、三角肌、再傳遞去到指尖！！！
我甚至感受到指尖依附出一道劍氣，喺半空中劃出一個弧月。
呢場劈手指，係我贏了。
「喂！你兩個！」
忽然我望到Miss So喺對面大叫，令自己即刻洩咗道氣，最後劈出嘅一擊軟弱無力，仲要承受唔住撞擊而歪開兩指。
而木村因為背住咗Miss So，所以冇比佢影響到。
「仲喺度玩埋啲無聊嘢！」Miss So叉腰行近，訓話我哋：「聽唔到嗌集合啦咩？」
「佢、佢囉，係噉拉住我話要玩埋呢舖......」
我射個波落木村度，驚Miss So以為我真係咁低能。
「我唔理啦，總之兩個都有份！」佢Keep住認真嘅態度，冇諗住同我拗落去：「快啲執齊嘢排隊上機！係咪想俾校長鬧呀？」
佢搬埋校長出嚟，搞到我當堂驚一驚，望吓校長係咩位置。好彩佢已經開始排緊隊，只係得返幾個帶隊老師喺度睇吓有冇人未跟上。
喺Miss So嚴密看管下，我哋唯有乖乖排隊預備登機。
「啱啱你甩咗手，計我贏呀。」
「係係，你話計就計喇。」
啱啱俾Miss So見到我咁白痴已經好醜怪，仲邊閒同佢爭輸贏，而且最重要嘅係任務完成，捱到上機佢應該唔會得閒碌IG，噉就唔怕佢宜家睇到Miss So個Post。
上到機後，因為我個位睇唔到Miss So，所以好專心噉留意呢個第一次接觸嘅環境。周圍冇我想像中咁特別，除非你係坐喺窗口位，可以睇到窗外難得一見嘅風景。如果唔係嘅話，其實你大部份時間得個坐字，睇吓點樣消磨時間。
木村以前去過幾次旅行，自然好熟悉部電視啲操作，快快手揀咗套戲開嚟睇。
我撳嚟撳去見冇乜有趣功能，學木村噉揀咗套戲嚟睇。之後食埋個飛機餐再恰多陣，眨吓眼就飛到新加坡。
呢刻我對架飛機已經冇留戀，淨係想快啲落返地面行吓舒展筋骨。
喺我等緊木村拎行李落嚟期間，竟然俾我見到Miss So個樣有啲吃力，似乎係個儲物櫃太高，所以佢拎唔返自己啲嘢。
佢無助嘅眼神入面，仲有一刻同我對上咗。
唔使問阿貴，我梗係要去發揮自己啲男人魅力，幫佢拎啲行李落嚟！
雖然佢喺我後面隔咗五六個位，但係為咗逞英雄我決定夾硬擠過條走廊。
點知我行咗一半未到，隔離就有人突然嗌停我。
「呢位同學，可唔可以幫我拎個袋落嚟？」
係嗰位我同阿烽之前討論過，又後生又幾靚女嘅Miss Lau。
由於我本身對佢真係冇咩興趣，所以就算佢喺名單上面亦唔太在意。
「哦...可以呀。」
佢當面嗌到我，又冇理由咁冇禮貌無視佢嘅。
Miss Lau袋嘢唔算太重，只係擺得太入所以搞到自己拎唔到。
「唔該晒，同學你好好人呀！」
佢笑容燦爛噉多謝我，宜家近睇先發覺，其實Miss Lau確實有幾分吸引力。佢身型嬌小、一頭烏黑亮麗嘅直髮，畀人一種嬌柔弱女嘅感覺，同Miss So完全唔同。
「呃，好、好少事啫。」
一個唔覺意睇得太入神，都係快啲行去幫Miss So先。
到我抬起頭望返去嗰邊，發現有個空少幫緊佢拎個背囊落嚟，搞到我霎時呆咗喺中間唔知過唔過去好。
眨吓眼我哋中間嗰幾個人都走晒，Miss So仲行到嚟我面前。
「我、我幫你......」
「唔好企喺中間，阻到人呀。」
我原本諗住將功補過，幫佢揹住個背囊，點知佢一嚟就Cut咗我講嘢。
佢半推半撞噉示意我行前，令我唔好意思塞實條路，聽佢講返返去拎自己個背囊。
我行行吓突然思疑Miss So啲語氣態度，同平時好似好唔同，唔通佢以為我寧願幫Miss Lau都唔幫佢？
再加埋之前佢聽到我同阿烽討論Miss Lau，呢舖真係水洗都唔清......
「Miss你嗰喼呀。」
「唔該。」
去到落機拎行李嗰陣，就算我主動抽起個喼畀佢，佢只係冷淡噉講句唔該，然後全程再冇同我講嘢。
女人唔係真係咁小氣呀嘛......
望住佢同其他學生傾偈個樣，我瞬間冇晒心機聽導遊同領隊講嘢，連自己去緊邊都唔知。
偏偏呢個時候，Miss Lau又會走嚟聊我講嘢，可能因為我啱啱幫過佢，所以想嚟認識吓我。
「同學，其實我可以點嗌你？」
「呃...秦、秦子柱。」
「我就噉嗌你子柱得唔得？」
「我冇咩所謂嘅......」
「噉你係點解會嚟新加坡呢邊？」
「呃...覺得新加坡神、神秘啲？想了解吓。」
「另一位同學呢？」佢指一指木村問。
坦白講Miss Lau比起Miss So真係主動啲，算係嗰種典型比較Nice嘅老師，對住任何學生都會接觸了解。唔怪得佢平時喺學校已經幾好人緣，明明只係今年啱啱新入職。
木村傾傾吓變到越嚟越多嘢講，睇嚟Miss Lau嘅威力真係不容忽視，可能因為佢又後生又Friendly，令人覺得自己好似同緊個師姐或者朋友傾偈，反而冇乜老師感覺。
不過全靠木村咁多嘢講，先可以分散吓Miss Lau啲注意力，等我有機會偷望吓Miss So。如果佢一望過嚟呢邊，我就要扮到冇份傾偈噉，費事佢又誤會我。
好彩傾多陣旅遊巴終於嚟到，我唔使再提心吊膽噉應付Miss Lau。
上到旅遊巴之後，我先第一次細心留意新加坡呢個地方。
整體嘅感覺確實同香港有啲異曲同工之妙，新加坡大部份地方好似新界噉，冇乜高樓大廈，不過啲路相對香港就闊好多，而且唔少住屋仲用緊橙色瓦片屋頂嘅設計，外型感覺更加西式，同香港啲唐樓唔同。
另外一啲地區就似香港嘅新型屋邨，有一排排比較高嘅建築，外型亦同香港差唔多。係去到少部份地區，先會似中環噉有咁多摩天大廈，但係唔會有香港咁密不透風。
我喺新加坡住嘅地方，不外乎係啲青年宿舍，不過同附近啲歐式風格嘅外牆、建築支柱唔同，我呢個街口嗰幾棟嘢係用返現代建代風格，四四方方冇咩特別。
室內方面同樣簡單為主，係間唔時有啲塗鴉風格嘅圖案點綴吓。
最特別嘅，就係我個分組間房同Miss So間房咁啱分咗喺同一層！俗語有話近水樓台先得月，話唔定關鍵時候呢個好處可以發揮到啲作用。
由於時間關係，我哋未參觀得晒成棟嘢，就要擺低啲行去趕去第一個行程地方。
「哇屌...唔撚係呀......」
木村一望到眼前嘅地標，就口震震噉講晒粗口。
第一站，係濱海灣花園嘅天空樹。
當中主要嘅特色係喺成個花園入面，有十幾棵好似樹嘅建築，其中兩棵有條空中步道連接，等啲人可以喺半空中俯瞰周圍景色。
個景點其實冇乜問題，問題在於木村係畏高嘅。
「屌屌屌屌屌......你唔巧痕咁塊啦......」
木村猛咁捉住我，仲驚到口齒不清。
「你同啲老師講咪唔使上嚟驚囉。」我不滿噉應佢。
因為木村要我傍住佢，又唔畀我行咁快，搞到我成程都行唔到去Miss So隔離搵佢傾偈，仲要變咗全隊包尾嗰個。
「俾禁多人知我畏高咪巧、巧柒......」雖然佢把聲震晒，但係個樣keep住扮冇嘢，費事有人擰轉頭望到佢咁驚青。
「得啦，咁你放個手俾我影張相都得掛。」
喺呢段路程我已經放棄咗追上Miss So，宜家影相純粹係想留個念。
「出...出去出回！」
「彈出彈入咩......出去出回。」我冇理到佢，專心揀個靚位影相。
呢度除咗望到周圍一大片樹林之外，仲可以望到新加坡名勝嘅金沙酒店。有個咁特別嘅地方，令我諗起今朝同Miss So Selfie嗰陣......如果可以同佢喺度影到張相就好啦。
「難人老狗，死唔死影禁耐呀......！」
可惜現實係有條友每隔幾秒就會催一催你。
「咪返緊嚟囉。」
正當我諗住求其影一張相，Miss So咁啱因為行咗去欄杆影相而入鏡，整到我幅相好似特登幫佢影噉。
我望一望張相，發覺又影得佢幾靚......留返嚟自己收藏都好。
跟住嘅行程就係去隔離個溫室度遊覽，簡單嚟講入面有兩個好大嘅區域，其中一邊有好多罕見嘅植物、雕塑、擺設畀你睇。而另一邊叫做霧林嘅區域，主要賣點係中間一個室內瀑布，同埋好似置身叢林入面嘅感覺。
由於佢瀑布外面又有嗰啲空中步道，換言之我又要湊仔噉湊呀木村。
唉，估唔到嚟咗新加坡之後，望得再多嘅竟然係Miss So個背影，分分鐘仲衰過平時喺學校嗰陣。
「喂...！梨、梨又痕咁快？」
「你再嘈我就掟你落去㗎喇。」
「得！唔、唔嘈！」
俾我恐嚇完之後，木村的確冇再大呼小叫，可惜我依然冇得去搵Miss So。
行完個溫室，我哋又去咗個濱海藝術中心嘅外面行吓，再沿路行去魚尾獅公園。
宜家已經差唔多六點，我諗以遊學團嚟講唔會畀我哋太夜仲周圍走，所以呢度應該係今日最後一站，然後就食嘢返宿舍。
唉......明明難得可以同Miss So去旅行，但我已經浪費咗一日。
「我哋宜家喺度自由活動一陣啦，大家可以周圍行吓影相或者休息吓，但記住唔好行咁遠呀吓。」
聽到領隊噉講，大家都各自各精彩，有啲去咗買嘢飲、有啲搵個位坐吓、有啲去咗影隻魚尾獅同對岸個金沙酒店。
新加坡真係幾熱，不過就冇香港咁焗，我企咗喺魚尾獅附近嘅海邊，諗住有啲水氣可以涼爽吓。
木村依然企喺我隔離，行咗差唔多半日，佢個樣開始又有啲眼瞓。
聽講佢唔係好識游水，其實係咪應該要推佢落海......
「唔知阿烽佢哋喺台灣嗰邊點。」
「希望佢哋嗰邊都咁悶啦。」
「哇夠黑心，我鍾意。」
「我有啲攰，不如去坐吓。」
木村見某啲同學坐得咁開心，想去坐埋一份。
「呃...我諗住再周圍望吓先。」
「咁你自己慢慢望喇，我去坐陣先！」
結果，我忽然咩都冇做就擺脫咗木村。不過宜家呢個情況，你嗌我去搵Miss So我又唔知點開口好。
睇怕今日好難會有咩進展，唯有夜晚搵Claire姐打救吓，聽日先再努力啦。
突然，我Feel到膊頭有啲重，就好似今朝木村挨住我瞓嘅重量。
「做咩呀？冇位畀你坐？」
我一路講一路擰轉頭，發現挨住我嗰個人，竟然係Miss So！
「做咩呀？挨吓都唔得？」
佢用我膊頭托住隻手，不滿噉問。
「唔、唔係，我以為阿川又想挨住我瞓啫......」
我極力控制自己唔好表現到嚇親或者唔情願，驚Miss So會縮返開隻手。
雖則佢忽然聊我講嘢，搞到我唔知同佢講咩好，但起碼佢冇收返隻手，等我有得享受耐啲呢次身體接觸。
可以嘅話，真係想俾佢挨一世。
唔係，係愛一世。
我哋靜靜哋望住個海企咗陣，因為俾佢挨住嘅關係，我慢慢有啲心跳加速嘅感覺。為免太緊張會搞到自己肚痛，我決定搵啲嘢同佢講吓。
「係、係呢...其實我有、有張相想畀你睇......」
我打開手機，將我幫佢影嗰張相Show出嚟。
「啊！你偷影我！」
點知佢望到張相之後好大反應，拎咗我部手機睇吓仲有冇其他相。
「咩、咩呀，明明係我影、影緊相你行過嚟攝鏡。」
「你可以嗌我行開㗎。」
「咁我好人咪、咪當幫你影張相囉......張相唔靚咩？」
「少少喇...但係影到我隻手有啲肥！」
「宜、宜家係興有啲肉地㗎。」
「都唔知係咪，總之你冇問過我就唔得。」
Miss So蹺起雙手，嬲嬲哋噉講。
「咁......不如你等我一陣！」
我周圍望咗陣，見到某個地方突然靈機一觸。
「又買朱奶？」
返到嚟之後，佢諗住估我買咩畀佢。
「唔係呀，今次係朱古力雪糕。」
「唓，咪又係差唔多。」
「你話唔好請咁、咁多朱奶啫，冇話唔要朱古力味。」
佢把口聽落抗拒，但係依然笑住打開個雪糕杯嚟食。
「唔...！多謝男班長！」
「咁宜家打和喇喎。」
「勉強當係喇......你冇買畀自己食咩？」
Miss So食食吓望住我望住佢，發現我隻手咩都冇。
「冇呀，淨係諗住請你食，你覺得好食就得啦。」
「......」佢靜靜哋食多幾啖後，突然開口：「見你咁慘，請返你食一啖啦。」
佢講完之後，將個雪糕杯遞畀我。
Na、Nani？
個雪糕杯入面，只係得一枝羹！
我戰戰戰兢兢噉接過杯雪糕，個心跳得越嚟越快。
Miss So冇特別嗌我要點樣食，係咪即係佢其實唔介意？定我應該要問一問佢，費事食到埋口佢先嗌停我會好柒？或者我只要特登唔出聲，扮到好平常噉其實就冇事？
「......」我扮想𢳂大啖啲，趁機拖延吓時間，偷望Miss So睇佢有咩表示。
佢淨係望住個海，似乎唔介意我用佢隻羹食。
我見Miss So唔太Care，加上拖得越耐越容易令佢覺得奇怪，於是決定快刀斬亂麻，將啖雪糕直接隊入口！
。
。
。
。
。
嗚呀！！！！！！！！！！！！！
會唔會太甜！！！！！！！
雖然食落去味道冇任何特別，但最重要係嗰刻嘅心動，好似直接跳過咗味蕾，將「甜」嘅感覺灌輸畀大腦。
「幾、幾好食......」
我繼續扮到若無其事，遞返杯嘢畀佢。
然後靜靜哋望住佢，用返同一枝羹𢳂雪糕食。
我分唔清呢種心動嘅感覺，究竟係癡漢先會有，定係人之常情。只係覺得個心就好似俾一場風暴席捲而過，留低緊張、喜悅、或者係興奮嘅感覺，呢種心情實在好難可以精準噉描述出嚟。
唔知呢刻嘅幸福，係咪用大半日同唔到Miss So傾偈而換返嚟，但係唔使等到聽日先有進展，個天對我實在太好啦！