【愛情】 我同女仔傾偈就會肚痛: 第二章.6
之後嗰日，我同Miss So冇再好似琴日咁陌生，我哋早餐會坐埋一齊食，去行程嗰陣亦會不時行埋一齊傾偈。由於Miss So都會聊吓木村傾偈，而木村又冇阿烽咁抗拒佢，令到我哋一齊傾偈嗰陣算係幾融洽。
雖然宜家變咗我冇得同Miss So單獨相處，但係起碼唔使再諗點樣喺木村同佢之間二揀一。
「喂！行咁遠做咩呀。」
佢拉住我衫領，唔畀我繼續行。
梗係為咗唔使講英文啦，唔通睇風景咩。
「冇、冇呀，我見人哋學校咁靚咪諗住望、望吓風景囉。」
「人哋特登搵啲學生嚟帶我哋參觀，你緊係要把握機會交流吓啦。」Miss So將我捉返埋去啲學生隔離。
同個老師一齊行嘅代價，就係佢成日會督促你踴躍問問題，同埋留心聽導遊講嘢，作為學生嘅我亦只可以服從。木村本來係同我一人走一邊，可惜佢同樣俾Miss Lau嗌咗返嚟，大概係因為我哋喺機場同佢講過吓嘢，所以佢就特別勸木村去同啲學生交流。
畀Miss So噉樣推我去問問題，我先知原來新加坡啲學校係唔開冷氣，明明差唔多成三十度都只會開風扇。
可惜新加坡啲學生同我學校一樣係走「純樸」路線，想搵個靚女學生交流吓都冇。
之後我哋去咗拜訪啲印度人社區、參觀展覽同濱海堤壩等等，再悶嘅行程，有Miss So喺隔離一齊行都會變得有趣。
加上呢啲行程主要係聽導遊介紹，變相冇乜主動問嘢嘅壓力，可以好好享受同Miss So傾偈講笑嘅時光。
「呢舊石像好似你，哈哈。」
「我嗰樣明顯型好多啦。」
「個黃昏好靚呀，你想唔想一齊影張相？」
「好、好呀。」
夜晚嗰陣，我哋又去咗個夜晚先開放嘅動物園。
「喂！男班長都插隊？」
「明明係你插我隊先，我只係排返自己個位啫。」
「哈哈，嗰隻松鼠好得意！」
「咩呀，嗰隻係水瀨嚟㗎喎。」
同Miss So一齊行得越耐，我個世界慢慢好似得返佢噉，就嚟連木村都容不下。喺我眼裏面，今次個遊學團已經變咗做我同佢之間嘅旅行團。
完成埋最後一個行程，我先意識到今日同Miss So之間嘅相處好順利，甚至會FF除咗拖手嗰啲親密接觸外，我哋相處落係咪已經好似一對情侶噉。
我好想往後嘅日子，都可以噉樣同Miss So相處落去。
「唉好攰呀，上車之後要恰返陣先。」
「Miss、Miss So呀......」
「嗯？」
「呃...都係冇、冇嘢......」
「講啲唔講啲，你返到去記住早啲休息啦，聽日仲要早起。」
臨上旅遊巴前，我腦海入面突然閃過表白嘅衝動。不過到我真係想講出嚟嗰陣，好快又俾我自己撳住咗。
如果咁突然走去表白，其實係咪太衝動？
呢個問題，我又去咗尋求Claire姐嘅意見。
「呢個問題你好似都煩咗好耐xd」
「今次唔同呀，你唔覺得今次好有緣咩？」
「明明本身佢冇份嚟，但係咁好彩有老師病左，仲要係我呢邊唔係台灣果邊，然後又咁好彩學校冇揀其他人而係揀左Miss So」
「當咁多巧合一齊發生，就唔係巧合咁簡單？」
「你地今次真係幾有緣既」
「但係你驚唔驚表白失敗左之後，你地之後會尷尷尬尬有條刺，冇得再好似宜家咁？」
Claire姐嘅說話，好似一盤冷水淋去滿腔熱血嘅我度。
我噉講並唔係對佢有咩怨言，啱啱相反，佢啲意見令我有返啲理智，未至於盲舂舂噉跌到粉身碎骨。
宜家個情況就好似一場賭局，如果你All in落去，的確有機會贏個滿載而歸；但係如果你賭輸咗，你辛苦累積嘅一切都會斷送；若言你仲有理智，自然會棄牌離場，至少可以袋走手上有嘅籌碼。
「可能你之後會冇咩野，但係你Miss亦有可能為左唔想再令你誤會，會刻意同你保持返啲距離。」
除非現況好惡劣，如果唔係我諗冇人會特登破釜沈舟，捨棄現有嘅安穩。
只係另一方面，呢個確實係天賜良機。先唔講啱啱嗰一連串巧合，今次仲要係去外地旅遊，喺異國表白仲唔夠晒特別？要由毫無準備變到宜家噉樣，分分鐘仲難過中六合彩。
究竟我應該要安於現狀，定係把握機會？
木村佢同緊其他同房玩啤牌，我為咗等自己可以專心冷靜吓，行咗出走廊嘅梳化度坐。
呢間宿舍走廊無窗，僅靠昏暗嘅燈光照明，令到條走廊好似個密閉空間噉，喺度煩惱心事嘅人似乎只會越諗越壓抑。
我呆滯噉望住部手機，無論再望多幾多次啲對話，我都係唔知點樣回應Claire姐好。
或者話，我係唔知點樣回應自己好。
有時覺得Claire姐講嘢好Mean、好Cool，可能係因為佢講嗰啲嘢係現實。
而現實就好似一道牢不可破嘅高牆，任你點樣加以破壞、扭曲，現實依然屹立不倒。你只可以企喺高牆面前思考，究竟係正面挑戰，定係轉身離開。
「秦子柱，唔係嗌你早啲休息㗎咩。」
喺我仲糾纏不清嗰陣，Miss So突然出現，同佢喺五年前走入我人生一樣咁無法預計。
佢行過嚟坐喺側邊，我先發現原來佢係啱啱沖完涼。宿舍個設計係男女浴室分開喺唔同層數，而我哋呢層正好係女性浴室，不過唔知點解宿舍冇將男女房分層，所以俾我見到佢沖完涼嗰樣。
其實我一路覺得女人沖完涼係特別性感，嗰種頭髮半乾半濕、面上泛起淡薄紅暈嘅感覺，係化妝品無法媲美嘅清新脫俗。
「瞓唔著咪...出嚟行吓坐吓......」Miss So呢刻靚到我不敢直視。
「你冇事呀嘛？」佢印一印面上掠過嘅水滴，側住頭問我：「有咩唔開心可以同我講喎？」
「冇嘢呀......今日都幾、幾開心呀。」
唔知係我個樣睇落死氣沉沉，定係佢擅於睇人眉頭眼額，估唔到Miss So一眼就睇穿我。佢咁關心我確實係幾開心，可惜我又同唔到佢講我煩緊啲乜。
「個女仔唔鍾意你？」
我嚇一嚇噉望向Miss So，好奇佢點解會噉諗。直至我見到佢視線望向我部電話，先知佢誤會咗我。
因為我個畫面仲停留喺同Claire姐嘅對話度，加上個樣又唔方開心得去邊，自然會令人以為我有感情煩惱。
「又唔算係嘅......」
誤打誤撞之下俾Miss So講中咗，於是我索性當「嗰個女仔」就係佢嚟回應。
「佢已經有對象？」
「以我所知就冇。」
「咁咪得囉。」Miss So用毛巾擦乾自己啲頭髮，一副輕描淡寫嘅樣：「咁易放棄㗎咩？」
我望住佢呆滯咗一陣，唔識反應。
雖然佢唔知來龍去脈先會噉講，但係由一個暗戀對象去鼓勵自己唔好放棄，嗰種感覺都幾矛盾同微妙。
一方面充滿無奈，另一方面又充滿動力。
「你覺得我應該要堅持？」
「噉正常情況嚟講，如果你仲鍾意人點解唔繼續努力？」Miss So捏一捏我膊頭鼓勵：「幸福係要主動爭取嘅，未到最後一刻都唔應該放棄。」
今次佢講嘅嘢，比起嗰短暫嘅肢體接觸更加震撼到我。
「唔好諗咁夜啦，聽日唔知醒會比人鬧㗎。」
「哦...咁你都早、早抖啦。」
我聽Miss So講好快就行返入房，因為我已經諗到個答案。
「喂子柱，鋤唔鋤Dee呀？」木村見我返入嚟，諗住聊我一齊玩。
「唔啦，有啲眼瞓。」
我頭也不回噉爬上上格床，匿喺被竇度研究聽日嘅行程。
最終喺我對住個行程表上網Google後，發現到一個非常適合嘅地方。
聖淘沙島，就決定係你啦！！
自信滿滿嘅我，臨瞓前仲同Claire姐分享呢個決定：
「今次個遊學團，就係我同Miss So一鋪定勝負既時候！」
聖淘沙，係新加坡一個鄰近市區嘅島嶼同旅遊勝地。
島上設有賭場、水族館、環球影城、水上樂園同探險樂園等等。雖然上述設施全部唔包埋喺今日行程入面，但係我哋始終會入去睇個沙灘音樂表演，喺夜晚、沙灘、海邊嘅加持下，仲唔係一個表白良機？
講喺噉講，當我瞓醒冷靜完之後，好快又陷入猶豫不決嘅狀態。畢竟失敗就要接受有機會一無所有，就算琴晚俾Miss So鼓勵完，我都唔敢話自己有呢個決心。
我本來預早起身，係諗住落到去食早餐唔使咁多人，點知呢個鐘數，竟然俾我喺走廊撞到Miss So。
果然係近水樓台先得月，住喺同一層係易啲撞到。
「Miss早晨......」
不過比起仲係著緊睡衣嘅我，佢個Look已經係換好行裝、準備出發。
「男班長早晨。」Miss So打完招呼，忽發奇想問我：「係呢，你想唔想出去食早餐呀？」
「吓？」
「本來我約咗Miss Lau，但係佢個肚好似有啲唔舒服。」
「咁、咁我同你去啦。」
「咁你要快啲換衫喎，費事俾太多人見到我同你出去食嘢。」
聽到呢度我自然狗衝去梳洗換衫，唔使十分鐘已經落到樓下同佢出發。
「我哋去邊度食？」
「唔知㗎，睇吓附近有咩食囉。」
同Miss So去單獨食飯，令宜家個氣氛由遊學團變咗做真係去旅行噉，周圍再冇校長、老師、同學相隨，可以任我哋去探索未知嘅地方，簡直係為今日表白嘅日子打響頭炮。
為咗認得路返宿舍，我哋最尾喺街尾揀咗間蝦麵舖頭，間舖頭裝修簡約，睇落有懷舊冰室嘅感覺。
「話咁快聽日就要返香港啦。」
「係、係囉，如果可以長啲就好......」
今次係我哋第一次撐檯腳，搞到我都有啲緊張，冇平時喺學校咁自然。
「係呢，你聽日返香港之後坐咩車返屋企？」
「咪同木村佢哋坐、坐巴士。」
「咁我可唔可Join埋你哋？本身我諗住同A班啲女仔坐的士，但係佢哋滿咗人。」
「好、好呀......佢哋應該都冇所謂。」我爽快回應Miss So，只要可以同佢多啲時間相處，基本上我係無任歡迎。
加上如果今晚表白成功，噉聽日自然要一齊坐車返去，把握機會見多幾面！
我搖一搖頭，制止自己繼續FF落去。做人始終腳踏實地好啲，一日未表白，幻想幾多嘢都係假嘅。
之後嘅時間，我見Miss So Keep住撳吓手機，所以冇點主動聊佢講嘢。加上我哋怕遲咗返去集合，食完嘢喺附近行咗陣就返咗去宿舍。
「哇，個教堂都幾靚！」
「呃，少少啦......」
當我所有注意力去晒聖淘沙度，今日嘅其他行程相對變得枯燥乏味。就算Miss So喺隔離，我依然對眼前嘅景物提唔起興趣，腦入面只係不停構思緊表白要講咩好。
我鍾意咗你？
呢個睇落最正路，但係好似普通咗啲。
我愛你？
呢句睇落係拍戲啲人先噉講，有啲難開口。
想成世都做你嘅男班長？
呢句有啲特別，但係諗落又好奇怪，做男班長不如做男朋友，做男朋友又不如做老公......
「隨便喝，不用客氣。」
去到我哋參觀公屋嗰陣，有對夫婦仲幾好客請我哋飲茶。
「男班長，覺得人哋啲公屋點呀？」
Miss So同我坐咗喺張梳發度，問吓我意見。
「啲老公幾、幾大呀。」
「老公？」Miss So見我九唔搭八，即刻爭住笑我：「哈哈，你想同人哋爭老公呀？」
頂，有時候當你個腦諗住一啲嘢，把口好自然會跟住講出嚟。
「咩、咩呀，我意思係人哋公屋好大嘛。」我腦筋急轉彎，夾硬幫自己作個解釋：「香港叫綜援做老綜，咁有一定樓、樓齡嘅公屋咪叫老公......」
「未聽過有人咁嗌㗎喎。」Miss So擠起兩邊面珠墩，依然忍唔住偷笑。
「個、個個後生都係咁嗌。」
雖然氹到佢笑係件好事，但係佢噉樣不停聊我講嘢，搞到我好難專心去諗表白嘅內容。直至我哋全日嘅行程行得七七八八，我依然未諗到要點樣講好。
嚟到最後一站，就係我嘅決勝之地——聖淘沙。
我哋首先會經過環球影城個門口，然後行到入去海邊嘅表演場地，大家就算冇得入環球影城玩，都會好雀躍想喺門口影相留念。相反我嚟到呢個位，個心已經Up住Up住，好似醞釀住一種緊張同不安嘅情緒，甚至內心有另一把聲，開始勸自己不如唔好表白。
我唔知呢個係咪身體啲防禦機制，為咗保護自己唔好俾潛在嘅風險傷害，所以不斷勸自己唔好靠近。
只要唔表白，就唔會有機會受傷。
抱住呢種諗法嘅潛意識，開始同琴晚充滿熱誠嘅我互相交戰。呢刻個心越混亂，自然會越不安。
到我坐咗喺觀眾席，望住在座所有人鬧哄哄等開Show，我希望個天唔好咁快黑，表演唔好咁快開始，等我可以有多啲時間決定係咪要表白。
「睇吓你寧願驚潛在既受傷，定係想爭取潛在既幸福？」
喺思緒糾纏不清之下，我又再向Claire姐取經。
事到如今，佢冇再用一貫理性又帶點對立嘅意見去回應我，反而係偏向支持同鼓勵。我冇預計過佢會噉樣應我，忽然間又好似有返啲勇氣去表白。
「登——」
天色逐漸染上一層幽藍，兩邊嘅燈光映射出一對男女走過沙灘，示意表演正式開始。
無獨有偶，男主角個性格同我一樣係膽小懦弱，佢喺女主角帶領之下，錯誤展開一段冒險之旅。不過隨住劇情推進，佢成功鼓起勇氣救返跌落海嘅女主角，音樂隨之而變得澎湃激昂，好似鼓舞緊同樣需要勇氣嘅我。
最後，一輪煙花伴隨水幕上嘅投影綻開，一道道火光劃過夜空、為Miss So半邊面頰帶嚟光彩。
佢隻眼依然渾圓明亮，塊面依然飽滿可愛。
音樂靜止，煙花熄滅，表演完結。
「Miss So，陣間可唔可以同你傾幾句？」
喺觀眾席傳嚟掌聲之前，我細細聲同佢講。
「吓...好、好呀。」緊接而嚟嘅掌聲，令到Miss So聽得有啲唔清楚。
我冇直接表白，係因為想搵個單獨相處嘅機會，等佢可以好好回應我嘅心意。
根據過往兩日經驗，導遊去到最後一個行程都會畀我哋周圍影相留念，所以我決定搏佢會繼續畀自由時間我哋，等我可以同Miss So去個無乜人嘅地方。
「好！人齊未？」導遊同其他老師點算人數之後，繼續宣佈：「咁我哋喺度等一陣，之後就返宿舍啦。」
吓？！
說好嘅自由活動呢？
我望向周圍，發現所有人企喺原哋傾偈，證明唔係我聽錯。
「男班長，你啱啱係咪有嘢想同我講？」
Miss So行過嚟問。
「呃......係、係呀。」
我望住一大班人企喺佢後面，雖然佢哋未必聽到我講咩，但係好明顯唔係一個合適嘅表白時機。
「噉你想講咩？」
「我想講話......」
突如其來嘅意外，令到Miss So喺我眼中好似喺度咄咄逼人，想將我逼向萬丈深淵嘅懸崖。
「我想講......你、你等我一陣先！」
我唔知邊度嚟嘅勇氣，突然衝咗去導遊身邊：「唔好意思，想問吓我哋有冇時間周圍影吓相？」
好彩校長同其他老師都冇企佢隔離，我先敢咁直接問佢。
導遊睇一睇錶，用佢唔太流利嘅廣東話應我：「架車應該要啲時間兜入嚟，可以呀。」
Yes！！！！！
導遊聽完我建議之後，決定帶我哋去隔離個沙灘度行吓，嗰度仲有一兩間酒吧同士多，可以等啲老師同學買吓嘢飲。
由於我啱啱已經同Miss So講定咗，所以我哋特登落後大隊小小，兩個人靜靜哋喺海邊漫步。
呢個沙灘唔算好闊，啲沙灘凳同海邊只係得四、五米距離。不過勝在入夜之後冇乜人，得返少數鬼佬仲會坐喺酒吧度聚會。
「呼......呼碌呼碌......」
溫柔嘅海浪聲喺耳邊環迴，令氣氛逐漸平靜落嚟。
呢一刻終於嚟到，身邊再冇游人騷擾，只有寧靜嘅大海做我觀眾。
本來我以為平時同Miss So傾偈少咗肚痛，呢一刻應該可以表現得自然啲。可惜海浪聲冇辦法舒緩我嘅肚痛，我感覺到當刻個肚係同以往一樣，甚至有過之而無不及。
喺周圍環境薰陶之下，Miss So變得好有耐性，慢慢等我開口講嘢。
「Miss So你......你、你仲有冇諗個前度？」我試探吓佢，順便為自己集氣，準備好忍住下一波肚痛示愛。
「冇乜喇...開始睇淡咗。」
機會嚟喇，飛雲！
我就算幾乎行唔到、啲腸胃痛到好似要俾人捏碎，聽到呢一句都即刻士氣大增，想把握眼前呢個大好機會。
「其實...我有啲嘢想同你講。」
出人意料嘅係，呢一句係Miss So講出嚟。
「係......？」
「我最近......對個男人有好感，唔知同唔同佢一齊好。」
。
。
。
。
。
「嗰男人......係邊個？」
我呆咗噉企喺原哋、細細聲問。喺佢未講個答案之前，我不停幻想佢會話嗰個男人其實係我，等我可以名正言順表明心意。
「你唔好同人講喎。」Miss So望住個海，怕怕羞羞噉講：「係學校個鄭Sir。」
當我聽到個名唔係自己，個心突然心跳加速。呢種心跳加速跳得好快好快，直頭有種錯覺以為自己係心臟病發，疑住再繼續落去會死嘅感覺。
我聯想起Miss So喊嗰陣，佢去咗搵鄭Sir幫手睇住我哋，同埋佢食飯嗰陣，總係會撳手機同人Message。
我個心已經唔止係un住un住，而係好似俾舊大石砸住，砸到自己抖唔到氣。喺心痛同埋肚痛夾攻之下，我把口連一隻字都好難講到。
「嘻嘻，做咩呀唔講嘢？意外得滯？」
「諗緊......」
我耷低頭，驚佢望到我個樣。
「Miss So！你飲唔飲嘢呀？」
Miss Lau突然喺士多嗰邊大嗌，無意中幫我吸引咗Miss So注意力，算係救咗我一命。
因為我終於忍受唔住，逼不得已要嘔出嚟。
「嗚......！」
好彩我哋企近海邊，大海好快就幫我沖淡啲嘔吐物，加上啲海浪聲連綿不斷，Miss So完全冇發現到我嘔。
真係慶幸自己諗住喺海邊表白。
到Miss So擰過嚟嗰陣，我已經企返直個人、抹好個嘴。
「男班長你飲唔飲嘢呀？校長請喎。」
「我、我飲水......得㗎喇。」
「飲水咁普通？返去都有得飲喇。」
「宜家......口渴呀嘛。」
嘔完之後，我啲肚痛舒緩咗唔少，只係個心依然好痛，就算你摸住佢都減輕唔到嗰種痛楚。
「係呢，啱啱講到邊度？」
「你話......對鄭Sir有好感？」
「呃，小、小小啦。」
一講起鄭Sir，Miss So即刻有啲面紅。
「你係幾時開始......？」
「呢兩個月......？因為佢察覺到我有時會唔開心，又會成日走嚟氹吓我笑。」Miss So會心微笑，講起一啲我從來唔知嘅事：「我覺得佢幾體貼，會係個幾好嘅男朋友...但係又驚佢會唔會突然變咗我前度噉......」
「你覺得我應唔應該畀個機會自己？」
Miss So呢個問題，我聽完之後都問咗自己一次。因為當我稍微平伏落嚟，我先醒起自己本身係諗住表白。
我應唔應該畀個機會自己？
我記得琴晚Miss So講過，幸福係要自己爭取嘅，既然「嗰個女仔」未有對象、未到最後一刻都唔應該放棄，而Claire姐啱啱亦鼓勵我，唔好因為驚潛在嘅受傷而放棄爭取潛在嘅幸福。
不過，宜家Miss So已經有對象，仲要係一個有工作、比我更加成熟、年紀同佢更加夾嘅男人，而潛在嘅受傷，好明顯已經浮咗上水面、可以預視得到。
如果你要我揀，我都會揀一個差唔多年紀、思想步伐一致嘅女人，好過一個細自己十年、未經歷過社會洗禮嘅妹妹仔。
當「鄭Sir」呢個角色出現，證明我已經嚟到最後一刻。
雖然我本身好難得先鼓起勇氣表白，但係我呢刻好似一個俾人拋上天嘅波波噉，當個波用盡氣力衝上半空，佢就會毫不留情噉跌返落嚟。
我已經用晒衝上半空嘅力量。
聽完Miss So講咗小小同鄭Sir嘅嘢，我突然醒起幾個禮拜前，喺教員室外面望住佢飲朱古力奶嗰樣。我記得嗰陣有個諗法，係希望以後可以好似嗰一刻噉，靜靜哋企喺Miss So隔離望住佢。
直到佢宜家嚟問我意見，我先明白到自己已經身處一個最佳位置。
最初Miss So突然同我講失戀嘅事，可能係因為佢一時衝動、太過唔開心想搵人呻吓。而呢刻佢主動問我感情意見，某程度上印證咗佢對我嘅信任，我喺佢心目中嘅位置係連私人嘢都可以傾訴。
同Miss So傾到偈、間唔時氹佢開心、幫佢解憂，除咗得唔到佢嘅愛之外，呢啲其實同樣係我最初渴望嘅目標。
只要唔表白，就可以一直保持喺呢個位置，甚至去到以後。
我終於明白點解Claire姐會成日勸我諗清楚，接唔接受到表白失敗嘅代價。
當我確實預視到自己好大機會失敗，我先認真去諗呢個問題。
「我覺得......你可以唔使咁急住，觀察鄭Sir多一排先決定。」
我整理好思緒，用一個好朋友、希望Miss So幸福嘅角度回答。
「下話？我都驚自己會太衝動，好彩問一問你先咋。」
「唔、唔使客氣。」
望住佢對我笑得好甜個樣，我第一次冇甜蜜心動嘅感覺。
之後導遊話旅遊巴差唔多到，開始集合返走開咗嘅人，所以我哋都行返去跟住大隊。
我靜靜哋跟喺Miss So後面，趁我哋仲喺沙灘、周圍仲未有人，擅自摷佢背囊最外面個袋。
「做咩？」
佢Feel到我拉佢背囊啲拉鍊，一路行一路半擰轉頭問。
「冇、冇嘢......想借張紙巾啫。」