【愛情】 我同女仔傾偈就會肚痛: 第二章.8
要捧走畢業盃，首先要做嘅係湊人數。
話晒賽制係五人足球，我哋加埋都係得四個，自然要搵多一個正選加幾個後備。
中二嗰年嘅強大陣容，其實一早已經各散東西。有個轉咗學校、另外兩個落去咗C班，淨低踢波勁嘅只係得返阿烽同木村。所以最後嗰個正選，我哋搵咗有運動底子嘅田徑隊，諗住靠佢鳩跑鳩爆嚟做進攻手段。
其餘幾個後備，我哋唯有揀啲有踢過吓波嘅朋友就算。
為咗一雪前恥，除咗鬥心之外，技術同戰術一樣好重要。我哋有別於上年嘅求其，今年特別抽時間落球場訓練，尤其我同雞豪未受過正式訓練，自然要惡補吓啲波底。而田徑隊同我哋唔算好熟，加上佢自己又有校隊練習，所以通常係得我哋四個人練。
有踢開波嘅朋友都會明白，若果技術唔好，最起碼要有體能去搭救。就算你傳失咗個波，只要你有氣有力肯去追個波返嚟，一樣可以發揮到作用。加上五人足球人數有限，冇常規比賽分工咁細緻，基本上最好係五個人全攻全守。
不過波底呢樣嘢始終要日積月累，最尾我哋決定採用最平民嘅戰術——「泊大巴」。
簡單嚟講，就係防守反擊戰術。因為呢個戰術係將所有球員縮起後半場防守，睇落好似一架巴士泊起龍門前面，所以又叫做「泊大巴」。
以我哋現有嘅人腳分配，由木村負責守龍、我、阿烽同雞豪負責後防、田徑隊負責進攻。
訓練方面，將會沿用職業足球隊嘅基本操練，跑圈同埋「馬騮搶球」。
呢兩項訓練，一邊可以提升體能，另一邊可以提升基本傳球、甚至係面對敵方球員搶波時嘅抗壓能力，對我同雞豪嚟講已經綽綽有餘。而阿烽同埋田徑隊，分別會各自練多啲長傳同射門技術。
見到我哋咁認真，連C班都忍唔住喺Lunch踢多咗波，費事技術生疏。有時我哋索性會打幾場練習賽，當係熟習吓比賽嗰陣嘅心態。
本來我哋同C班啲人係比較Friend，因為我哋成續比較接近，又有唔少朋友喺B、C班上上落落，所以帶動埋我哋兩班人嘅圈子會一齊玩。宜家噉樣一齊踢波，感覺好似返咗去初中年代，嗰種每日落草地踢波嘅青春日子。
當然以前冇Dse壓力，係會Enjoy好多，但係宜家至少喺球場上面，我哋係無憂無慮嘅。
「秦子柱！你好耐冇嚟搵我補英文喇喎。」
至於球場外面......少不免係麻煩啲。最近掛住練波，我已經成兩個禮拜放學冇搵Miss So。
一方面我係想努力捧個盃返嚟畀佢，另一方面，我都算係想借練波嚟逃避溫書壓力。
「呢排要、要練波呀嘛......哈哈。」
「噉你掛住練波唔使讀書喇。」
「噉下個禮拜就比賽，梗係要最、最後衝刺。」
「狀態嘅嘢，你一鬆懈咗就好難Keep返㗎。」
「放心喇，總之......一完咗個比賽就、就會同你瘋狂補英文！」我豎起個手指公畀佢，特登講得誇張啲。
「嘻，你話㗎！等我搵定幾份Mock卷畀你！」聽到我噉講，Miss So終於肯俾我打發走。
講真嗰句，明明係佢叫我盡力，噉唔練波又點叫盡力呢？偏偏佢宜家又話我練得太多、少咗溫書，果然女人係好難捉摸嘅生物。
不過最尾見佢笑得咁可愛，好快又順返條氣，就算要做多幾份卷都抵返晒。
嚟到十二月頭，今個月可以話係中六最後嘅歡樂時光，陸運會同學校旅行已經完咗，得返班際比賽同聖誕聯歡會。過埋呢個月，一月要考畢業試，而二、三月係Dse最後嘅衝刺時間。
中學生涯仲可以留低咩特別回憶，好睇今次畢業盃比賽。
根據事前抽籤，賽程會由B班對A班、C班對E班，D班因為冇報名所以冇份。我哋同C班好似漫畫啲情節噉，約定喺決賽分勝負。
首先上映嘅戲碼，係B班對A班。
作為中學最後一年嘅班際比賽，我本身幾期待今次會係一場精彩比賽。可惜A班踢開波嘅得兩個人，其他隊友只係臨時拉夫湊人數，連基本「掃把腳」傳波都唔識，有時拎到個波往往會篤走咗去。
雖然識踢波嘅嗰兩個人，間唔時會配合出一啲流暢組織，不過俾我哋四個防守球員人數壓制，始終造唔出有實際威脅嘅攻勢。
相反，我哋憑住一次反擊率先得手。佢哋兩個後防新手反應偏慢、缺乏企位意識，田徑隊一推一扭就已經單刀對住龍門，最尾亦輕鬆射入。
嚟到下半場，我哋見對面實力有限，開始踢得越嚟越進取，連我同雞豪都壓上去一齊進攻。對面識踢波嗰兩個只可以回防死守，慢慢令到形勢往一面倒，佢哋近乎毫無還擊之力。
當佢哋出現疲態，阿烽乘機帶波上前一個扭幾個，成功拉開比數到二比零。
「嗶——嗶——嗶——」
最後我哋一直維持攻勢去到完場，無驚無險噉進入決賽。
第二日C班對E班，我哋特登去睇波撐場，順便事前觀察吓決賽對手。
坦白講，我幾慶幸係佢哋抽到E班。論整體實力，C班其實係中六級入面最強，除咗嗰兩個B班跌落去嘅足球隊，佢哋其餘三個人一樣有豐富踢波經驗，基本傳控、走位、防守觀念一應俱全。
由佢哋嚟打E班，噉我哋自然輕鬆唔少。
比賽一開始，C班就積極搶攻，尤其嗰兩個前B班真係好犀利，扭波勁又識配合，頭幾分鐘已經創造咗兩次射門。加上另外兩位球員會上前同佢哋換位跑動，而前B班嘅人又會補位防守，結果造成一浪接一接嘅攻勢，就算失咗波都好快搶返同再組織攻勢，
佢哋唔似我哋噉樣特登訓練戰術，但係就靠默契配合，打出兼備流暢同威脅嘅進攻足球。甚至因為佢哋每個人都有一定足球觀念，所以走位同企位唔會炒埋一碟，睇落比起我哋更有隊形。
睇睇吓，我開始驚決賽對住C班，就算泊大巴都未必贏到。
不過望耐咗，我又發現有啲唔對路。
所謂四肢發達、頭腦簡單，我哋學校通常成績最差嗰班人，往往會雲集好多體育高手。
冇錯，C班的確攻勢凌厲，幾乎撳住E班嚟攻咗十幾分鐘。只係當形勢慢慢陷入僵局，我先留意到E班其實守得幾好。
首先要提嘅，係對面個龍門——「龍貓」。
呢個唔係佢花名，而係因為我唔識E班啲人，所以憑印象幫佢哋改嘅。
E班龍門個身型，同宮崎駿套戲入面隻「龍貓」近乎一模一樣，加上五人場個龍門尺寸又會細啲，令到隻龍貓淨係企喺度都霸咗三分一位置。只要佢有基本反應，向左右郁一個身位已經可以Block晒所有射門。
而龍貓前面，係一對後防孖寶。
就我所知，佢哋兩個都係田徑隊，由於身型大致一樣，又係一齊司職後防，所以我稱呼佢哋做後防孖寶。
佢哋最大賣點係默契同埋敏捷性，雖然三番四次俾前B班扭過咗，但係好快又會追返上去緊逼，加上龍貓龐大嘅身型，令到C班多次無功而還。另外佢哋波底好、速度快，E班幾次反擊都係由佢哋喺後場帶波上前，再交俾其他隊友組織。
負責連接後防同進攻球員，係一隻「黑猩猩」。
顧名思義，條友真係好黑、好高同好撚大隻。其實我哋呢個年級嘅平均身高係偏矮，大部份人係喺一米七至一米七五左右，但係佢差唔多有成一米八五咁高。呢隻黑猩猩之所以特別標青，係因為佢屬於上一年嘅留級生，而且又係打開籃球、有操練過副偈。
佢波底算係E班入面最差嗰一個，但係憑住身型同體力制霸，令佢經常可以阻截到C班攻勢，甚至搶埋個波返嚟。
最後一個，係E班嘅領頭人——「插花華」。
改呢個名，係因為阿烽嗌佢做阿華，而呢條友好鍾意花式扭波，所以叫佢做插花華。聽阿烽講，插花華係前足球隊成員嚟，同樣係留級生，不過佢身高只有一米六五。可能正正因為佢身高矮、重心低，所以扭波盤球特別勁。
每個球場入面，總會有個好鍾意扭波同扮C朗嘅MK仔，插花華就係嗰個人。當中連射自由球嗰陣抖大啖氣、怒轟人牆嘅細節一樣照辦煮碗，唔踢波都可以去撈Cosplay。
撇除呢樣嘢，插花華腳下技術確實犀利。
無論係傳球、盤帶、射門方面，佢係E班、甚至係在場人士嘅頂尖。通常後防孖寶帶波上前，或者黑猩猩搶到個波之後，就會交畀插花華判斷情況、組織攻勢。就學生程度嚟講，你可以話佢係C朗同美斯嘅混合體。
結果半場完結嗰陣，係由E班領先一球。
趁住兩邊中場休息，我哋特登行去同C班打氣。話晒見識到兩邊實力差唔多之後，梗係寧願自己Friend啲嗰邊入決賽。
經過上半場熱身，兩邊好似正式進入狀態。佢哋一改上半場嘅僵局，變得有來有往、火力全開。作為觀眾嘅我，慢慢睇得越嚟越緊張投入，會為佢哋每一下嘅射門、防守、攔截、突破歡呼喝彩。
一邊係靠默契配合，另一邊係側重個人能力，兩邊鬥到難分難解，眨吓眼比賽已經嚟到二比二。
喺一次攻勢入面，前B班嘅兩個人連續三角短傳，再一次突破後防孖寶嘅防守。不過劇本依舊，孖寶重新喺後方追上緊逼，阻止C班帶波進入中路，收窄佢哋射門角度。
前B班企喺邊路位置，決定回後組織，等待E班出現下一次破綻。
正當大家以為C班想傳吓波回氣，佢哋突然施展換位跑動，兩個後防一齊上前突擊。
前B班睇準機會，決定放個直線傳球上前，等後防隊友拉開孖寶之後，自己可以插入中路等待機會。
論速度，孖寶始終更勝一籌。佢哋及時追上C班後防，令對方難以騰出空位傳中。
錯失機會嘅C班後防，唯有傳畀後上緊嘅前B班，等佢博個遠射機會。
可惜呢吓棋差一著，佢傳得太過細力，令前B班要偏移自己軌道去追波。呢個時候，一直喺球場通街走嘅黑猩猩自然睇準機會，同佢鬥快去追波。
就算前B班本應速度佔優，但係依然俾黑猩猩體型壓制之下搶去身位，冇辦法發揮出應有嘅速度，仲俾黑猩猩搶走個波。
黑猩猩一拎到個波，就即刻轉身交畀插花華。
得返另一個前B班守住防線，係絕對抵擋唔住插花華。佢忽然使出一招「施丹轉身」，蜻蜓點水噉踩停個波然後轉身、另一隻腳就順勢拉走個波。成個動作既花巧又實際，而且對速度影響唔大，令前B班直頭沒有回應，只可以企喺原哋望住對方扭過自己。
唔講真係以為自己睇緊《衝鋒廿一》嘅「惡魔蝙蝠旋風」。
最後插花華長軀直進，其他C班回唔切防，俾佢單刀射成三比二。
入咗呢球之後，C班喺剩餘時間都攻唔入E班，飲恨無緣決賽。
「唉，搞唔撚掂，要靠你哋喇。」
其中一個前B班完場後行過嚟同我哋講，睇得出佢幾失落吓。
「放心喇，實會幫你哋覆桌嘅。」阿烽唔知係下巴輕輕，定係想安慰自己朋友：「等我射爆嗰隻龍貓。」
「你咪咁老定呀，佢哋嗰兩個守得好勁，阿華又係勁到黐痴撚咗線。」
「我哋有大巴戰術呀嘛，至少都守到完場啦，係咪呀漏口仔。」
「係啩......」
我望住E班啲人，冇乜自信噉答阿烽。
本身我已經冇乜信心贏到C班，宜家仲要對付打贏C班嘅E班，我開始質疑自己，係咪真係完成到同Miss So之間嘅約定。
簡單睇過佢哋一場比賽，我同阿烽大約有啲眉目，喺放學之後開始討論詳細戰術。
根據晏晝嘅經驗，E班主要進攻手段落喺插花華同孖寶突擊。我哋會派田徑隊同阿烽夾實插花華，我同雞豪就各自防守孖寶其中一人，淨返嘅黑猩猩因為波底較差，所以適當噉放任佢推波射門應該冇問題。
當然宜家只可以算係紙上談兵，對於落到場係咪真係Mark得實佢哋，我其實有所保留。不過萬一情況惡劣，我哋縮晒起禁區附近穩守突擊應該仲有勝算。
過多兩日，終於嚟到畢業盃嘅決賽。
除咗決賽兩班同學之外，現場仲有某啲A班、C班同想食花生嘅同學觀戰，突然俾咁多人望住，搞到我未開波已經有啲緊張。
「加油呀男班長。」
熱身嗰陣，Miss So行過嚟拍一拍我膊頭打氣。
雖然佢冇好似中一噉拎住啦啦球打氣，但係依然好細心買咗箱水畀我哋。
「放心啦，拍定手先都得。」
「咁有信心？係真唔係呀你，」
「話晒練咗咁耐......總、總之實會捧隻盃畀你嘅。」
我見隔離冇人，大膽提起我哋個約定。就算本身冇乜信心，我喺Miss So面前依然想表現得堅定啲，因為我好想氹到佢開心，又可以為佢留低一啲特別嘅回憶。
「唔使咁大壓力喎，贏唔贏到都好，只要你有全力以赴我就會好開心。」
佢好似睇穿咗我，嘗試舒緩吓氣氛。
跟住因為我哋仲要猜波熱身，所以Miss So同我哋成隊打完氣之後就行返去場邊。
「嗶——」
直至球證吹哨示意，決賽正式開始。