【愛情】 我同女仔傾偈就會肚痛: 第二章.9
首先係E班負責開波，正好符合我哋防守反擊嘅戰術。我哋排好陣勢，等佢哋越過半場之後先由田徑隊開始逼搶。
當然呢吓逼搶其實純粹做吓樣，目的係等對方覺得有壓力而傳畀插花華。田徑隊甚至特登留出一條路線，等孖寶傳比插花華之後，佢同阿烽就會一前一後夾擊目標。
不出我哋所料，孖寶真係傳咗畀插花華。
「鬼呀！！！」
正當插花華諗住推波上前，嘗試擺脫阿烽防守嗰陣，孖寶及時提醒咗佢。
面對來勢兇兇嘅田徑隊，插花華表現得非常淡定，佢輕輕一推個波，就令到個波喺田徑隊兩腳之間穿過，瀟灑噉通咗佢「坑渠」。
無可否認，佢呢吓真係成個美斯噉款，連場邊嘅觀眾都忍唔住發出歡呼。
插花華成功擺脫田徑隊，乘機向邊路帶波推進。好彩阿烽及時許避開收制不及嘅田徑隊，冇俾佢撞停咗而跟甩插花華。
當阿烽嚟到邊路支援，戰況隨即陷入我、阿烽、插花華同埋其中一個孖寶嘅二對二狀態。由於我哋打得好保守，佢哋就算壓到去接近底線位置，都未有咩空位可以突破我哋。
插花華費事自己友塞晒喺邊路，所以嘗試走返入中間尋求空位。呢個時候，對面隻黑猩猩忽然走咗嚟我隔離，唔知係咪因為佢唔太識踢波，所以佢又冇走位又冇諗住要波，睇落仲似係幫我Mark緊孖寶多啲。
我見黑猩猩奇奇怪怪，就費意晒注意力落佢度、繼續專心睇實眼前嘅孖寶。直至孖寶推波走入中路，我先發現黑猩猩嘅目的！
我視線一直跟住孖寶，當佢想突破進入中路，我都好自然向中路嗰邊跟上。就係噉樣，我成個人直接撞咗落黑猩猩度。
單、單擋？！！！
雖然我知黑猩猩係打開籃球，但係宜家踢波可以單擋㗎咩！！
我跌落地吓望向球證，發現佢完全冇任何表示。
可能係因為黑猩猩純粹企喺原地、冇做到任何動作，所以未算構成犯規。相反，我呢個體型撞埋去就好似撞落道牆噉，對方絲毫無損之餘，我仲要跟甩咗自己個目標。
呢刻我完全體驗到，體型上嘅差距可以造成幾大影響。
好彩雞豪有及時補位，擋走咗孖寶嘅射門出場邊，令我哋只係失咗個角球。
「喂唔撚掂，雞豪你幫我Mark一Mark佢。」
「黐撚線唔要呀，我同你咁高咁大換我Mark都冇用。」
我趁E班仲去緊執波，把握機會同雞豪交換位置。可惜佢因為上年嘅啲陰影，所以唔想再Mark大隻佬。
本來我想鬧佢唔顧全大局，嚟到決賽仲淨係諗自己。不過啱啱噉樣撞一撞，我都開始明白點解佢咁大陰影，經歷過呢種全力撞埋去，但係對方依然郁都唔郁嘅體型差距，雞豪仲肯踢波已經係好勇敢。
尤其佢上年喺邊路，俾某個D班肥仔不斷強姦。
我哋當中體型最高大、最有機會Mark得實黑猩猩嘅係田徑隊，可惜佢因為要負責反擊，所以要企喺禁區邊防守。
換言之，得我可以防守企喺近柱嘅黑猩猩。
「嗶——」
球證冇畀時間我慢慢考慮，佢吹響哨子，插花華就即刻將個波傳入禁區。
唔知插花華有心定無意，佢腳傳球唔高唔低、喺半腰之間傳咗畀黑猩猩。呢種情況，反而令唔係好識踢波嘅佢手忙腳亂，因為佢一心諗住要頂頭鎚進攻，但係宜家個波位置尷尬，令佢反應唔切用邊個位接波好。
最後黑猩猩彎腰衝前，將個波頂返畀中場嘅孖寶。可惜佢呢個姿勢食唔到力，頂出嚟個波軟弱無力。
我一直喺佢後面觀察形勢，見到機不可失自然搶閘衝前。
根據我哋制定嘅戰術，當我、雞豪或者田徑隊搶到個波，首要任務係儘快傳畀阿烽，然後散開走位。如果係由阿烽搶到，噉我哋就只需要專心走位。
以對方目前形勢，插花華仲喺角球位置附近、黑猩猩喺前柱頂錯頭鎚、而其中一個孖寶仲同雞豪爭緊身位。
換言之，淨返嗰個孖寶起碼要一個守兩個，呢個係B班絕佳嘅反擊機會。
我將個波橫傳畀無人看管嘅阿烽，就同田徑隊各自喺左右兩邊衝上前。雞豪見到呢個情況，及時醒起我哋嘅反擊戰術，跑到去阿烽斜前方為佢提供一個短傳選擇。
淨返嘅孖寶果然有一定防守觀念，佢見到三個敵對球員同時進攻並冇手忙腳亂，而係率先跑返去後場觀察傳球路線。
事實上，我同雞豪嘅跑位都係掩眼法嚟，只係為咗盡可能分散對方人手同注意力，阿烽嘅首要目標由始至終係田徑隊。
佢睇準機會，放咗個直線傳球畀田徑隊長軀直進。
田徑隊速度確實係勝人一籌，我哋近乎同時起步，但係佢已經跑前我兩三個身位。
可惜對面孖寶同樣係田徑隊成員，速度絕對不容忽視。
佢見阿烽傳波畀田徑隊，即刻就逼向嗰邊，諗住同田徑隊鬥快踢走個波。佢哋兩個風馳電掣，好似瞬間將個班際比賽咗做個人短跑項目。
不過呢個始終係足球比賽、容許選手有肢體接觸，而田徑隊身型佔優，成功搶贏身位率先掂到個波。
田徑隊成功爭取到優勢後繼續引球推進，嘗試擺脫對方殺入中路，可惜孖寶嘅機動性實在太高，就算俾人推過咗都會極速轉身，重新追返上去緊逼對方。
喺孖寶不斷糾纏之下，田徑隊可以射門嘅角度越嚟越細，最尾個射門俾對面隻龍貓輕輕一拍，就將個波擋出底線。
由佢哋開角球，變到我哋開角球，睇落係個唔錯嘅反擊。
事實上，係佢哋防守咗我哋一個黃金嘅反擊機會。
呢刻我可以感受到，E班無論係進攻定防守方面，都係俾我哋更加有優勢。
呢種強弱差距，令我諗起中二嗰年輸畀E班嘅回憶，甚至打從心底有種不安，驚Miss So又要失望多次。
之後嘅形勢，我哋一直處於被動。E班除咗攻勢越嚟越凌厲，仲好似睇穿咗我哋嘅反擊戰術，好幾次都無視我同雞豪，淨係防守阿烽同田徑隊。
就算我哋三番四次力保不失，可惜喺完半場前因為雞豪一次攔截失誤，意外將插花華嘅傳中踢咗入自己龍門，令比數改寫成零比一。
「呯呯呯呯呯！！！」
雖然係我哋擺烏龍，但係E班啲人依然把握機會，行到去球場中間扮向天開鎗掃射慶祝。
望住佢哋咁得戚嘅神情，我呢刻個心情當然唔好受，尤其我哋上半場守咗咁耐，最尾竟然係輸咗喺個烏龍波上面。
「唉，搞乜撚呀雞豪，咁簡單你都可以烏龍。」
「Sorry囉，我鬼知個波會噉樣彈入龍門咩。」
我忍唔住鬧吓雞豪發洩，而佢大概係知衰，所冇乜點去駁返我。
淨返嗰分幾鐘我哋都唔夠時間進攻，只能夠維持零比一嘅比數結束上半場。
今日陽光普照，天氣幾悶熱翳焗。加上失波之後心情唔好，我哋休息嗰陣都冇講嘢，淨係想飲幾啖水休息吓。
「辛苦晒你哋喇。」Miss So感受到我哋氣氛有啲差，行埋嚟同我哋打氣：「加油呀，你哋已經打得好好。」
佢好細心噉遞枝水畀我，附送埋感動人心嘅笑容。
不過我呢刻心情仲未平伏，接過枝水之後就專心飲用，連唔該都冇同Miss So講。
「失一球啫，下半場仲有好多時間，逐步逐步嚟就追得返㗎喇。」
可能因為我哋仲未有人講嘢，所以Miss So繼續鼓勵我哋。
「多謝Miss。」
「Miss講得啱呀，起碼佢哋實際上都攻唔入，我哋仲有機會嘅。」
阿烽同田徑隊都唔好意思唔應Miss So，所以帶頭講嘢同檢討戰況。相反，Miss So視線仲停留喺我身上，似乎期待緊我嘅回覆。
「......」
我拎起樽水，將飲淨嘅水倒落自己個頭度降溫，順便迴避Miss So。
與其話心情唔好，其實我唔知點樣面對佢先係重點。
雖然佢都講咗幾次，話只要我盡力以為，係咪贏到比賽其實唔重要，但係我始終希望喺最後一年，可以為Miss So留低一個美好回憶。
尤其佢當初交份報名表畀我嗰陣，個表情可以睇得出佢點都係有啲期望。
Miss So見我依然唔講嘢，冇諗住窮追猛打，講多句加油就留返啲空間畀我哋商量戰術。
根劇上半場嘅形勢，其實我哋可以做嘅改變真係唔多，輸烏龍球只可以話唔好彩，並唔係因為我哋防守有咩漏洞。
既然落後一球，我哋唯有改變進攻戰術，叫阿烽喺反擊嘅時候試吓傳波畀我攻門。實際上呢個只係權宜之計，畢竟我控波同射門方面始終唔及田徑隊，呢次戰術調動係想令E班以為阿烽轉移咗目標，繼而分散啲人手嚟Mark我。
「嗶——」
我哋懷住緊張嘅心情、背負同班同學嘅期望返上球場。
比賽再次開始，我哋主動進攻之下，一般都係交畀阿烽或者田徑隊遠射攻門，諗住殺對面龍貓一個措手不及。
雖然話有中場休息，但係我哋其實得五分鐘時間，加上受到天氣影響，我哋體力方面比上半場下降咗唔少。
戰況係五五波嘅話，呢個亦唔算咩大問題。偏偏我哋係採取反擊戰術，防守用嘅體力本來就比進攻多，令我哋速度方面逐漸落後於E班，有好幾次甚至走甩咗孖寶俾佢哋後上攻門。
而且我哋就算派兩個人夾實插花華，好多時候佢依然可以突破防守，交出傳球或者射門。
「雞豪睇實邊線呀！」
阿烽一邊指揮防守、一邊應付插花華。
對方早就習慣我哋用兩個人夾擊佢，所以每次拎波都會拉後距離，等阿烽同田徑隊處於佢視線範圍之內，自己又可以睇清形勢選擇傳波定盤球。
不過我哋話晒有人數優勢，一般情況會由田徑隊上前逼搶，阿烽企喺後面補位，順便指揮我同雞豪走位。
考慮到宜家落後一球，我哋防守方面自然變得更加積極，變成田徑隊同阿烽一前一後、一左一右上前進逼。
理論上以呢個組合，插花華避得一個都好難避到第二個。
理論上嘅話。
現實係，佢左右兩腳高速而細膩互傳，巧妙噉利用阿烽同田徑隊之間嘅空隙，成功連人帶波穿過佢哋。
呢種睇落基本嘅盤球訓練動作，經由插花華施展出嚟就好似啲足球遊戲入面，要五星球員先可以使用嘅花式技巧噉。
嗰一瞬間，我諗全場人都呆咗唔識反應，以為自己眼花睇錯嘢。
好快插花華又繼續推波上前，提醒返我哋呢場唔係佢嘅個人表演賽，而係B班對E班嘅班際足球畢業盃。
由於我距離較近，所以自然要上前補位，負責阻止插花華殺入禁區。
貿然上前搶波係防守大忌，稍一不慎就會出現破綻、令對方有空位突破防守。我一邊退後，一邊專注觀察對方雙腳，等待最佳嘅攔截時機。
「波！！」
我眼角突然閃過一個身影，發現其中一個孖寶再次喺右邊後上。佢見我要分心防守插花華，即刻趁機衝入底線，等插花華傳波畀佢就可以嚟個傳中組織。
嚴格嚟講，我應該要稍微移動位置，等自己可以遮擋佢哋之間嘅傳球路線。但係噉，我左邊亦會出現空位，令對方有機可乘。
根據上半場經驗，插花華有得揀嘅話一定會偏向帶波多過傳畀隊友，即係我哋俗稱嘅「獨食」。加上佢啱啱過阿烽過得咁靚，以佢Mk式C朗英雄主義，肯定會想扭埋我等自己有得入波。
於是我決定保持原位，一心一意防守插花華。
佢見我明知右邊有孖寶都唔守，似乎以為我挑釁緊佢，想同佢一對一單挑。呢吓誤會，反而令好勝心旺盛嘅佢更加執意要扭過我，就算孖寶處於大好位置依然忽視對方。
「嚟呀，過嚟呀！」
插花華突然原地插花，諗住反挑釁我令自己可以有空位突破。
不過佢仲未明白，我完全冇為意佢任何多餘嘅假動作。
由始至終，我視線一直係追蹤緊佢最接近個波嗰隻腳，所以任佢上半身再多擺動、兩隻腳再多繞過個波嘅假動作，只要佢掂唔到個波都係對我冇影響。
就好似劈手指噉樣，我等緊佢出現破綻嘅一刻。
經過幾吓插花對我冇用之後，插花華終於忍唔住要進攻，佢首先輕輕踏出右腳，然後連人帶腳都往右邊傾前。
呢吓係常見嘅假動作，透過轉移重心嚟瞞騙對手，實際係以另一隻腳推波去相反方向。我目標係最接近個波嗰隻腳，呢吓假動作當然呃我唔到。
終於，插花華另一隻腳決定要帶波上前。承接佢嘅假動作，佢將會用左腳推向左邊突破。
直至插花華隻腳掂到個波，一直靜待契機嘅我即刻伸出右腳，準備好喺佢條路徑上面攔腰截擊。
如果佢係衝鋒廿一，噉我就係進清十朗。
可惜嘅係，宜家始終踢緊足球比賽，而插花華嘅足球天賦確實係比一般人高。
我預測依然冇錯，佢係以腳外側接觸個波，將個波推向左邊。只係喺近乎一秒之間，佢隻左腳又極速兜去外面，以腳內側將個波推返去右邊。
即係球壇俗稱嘅「牛尾巴過人」。
由於我隻腳已經伸咗去我嘅右邊，所以嚟唔切反應，只可以任由佢突破。
估唔到插花華唔單止扭到成個C朗美斯噉，直頭連巴西球星朗拿甸奴嘅絕技都學埋。
望住佢個背影，我覺得佢好似陣風一樣掠過，想捉都捉唔住。
插花華推多兩三步就會殺入禁區頂嘅位置，雞豪仲喺另一邊跟實孖寶，嚟唔切補位防守中路。雖然木村係全級唯一嘅足球隊龍門，但係以對方射術嚟講，呢球可以話係E班嘅必入球機會。
正當我以為要失多球嘅時候，另一道身影又喺我眼角閃過。
佢喺中路斜線走位，趁插花華推入中路之際搶佔先機，飛身剷向對方！
佢喺插花華半死角嘅方位出現，令到對方無法預計，俾佢剷到飛起之餘、個波仲完全停喺腳下。
當插花華飛落地之後，我先留意到剷低佢嘅嗰個人係阿烽。
睇嚟呢場比賽除咗係B班對E班外，仲係兩邊主將——阿烽同插花華嘅對決。
「反擊呀！！」
阿烽一拎到波，即刻指揮我同田徑隊上前反攻。
為咗擾亂對手，佢今次仲親自帶波推進，增加敵方防守嘅難度。根據現場企位，今次係由黑猩猩緊貼田徑隊，其中一個孖寶回防阻截阿烽。
一如我哋所料，對方防守嗰陣依然會選擇忽略我。最後阿烽一推一扭，輕鬆擺脫孖寶再傳個直線畀我。
喺無人看管之下，我成功引球推入禁區，單刀面對龍門。
本來我仲諗緊好唔好橫傳畀田徑隊，不過見佢身位完全輸晒比黑猩猩，唯有親自處理呢球射門。
雖然距離好遠，但係我開始感受到全場目光集中喺我身上。
一如防守同劈手指，單刀同樣係一場心理博奕。
眼神、龍門企位、腳下動作，呢啲因素將會影響雙方判斷，造就不同結果。往往喺幾秒之間，就係決定勝負嘅關鍵。
我嘗試忽略場外目光、集中精神望向龍貓，睇吓佢嘅企位同腳部動作。如果佢企得前，我就會推向中路射遠柱；如果佢企得後，噉我就射個近柱地波。
正常龍門對住進攻球員，雙腳會不停有啲細微移動，確保自己可以靈活移動或者撲波。可惜龍貓並唔係一個踢開波嘅人，呢一刻佢完全冇任何動作，諗住等我起腳先去擋個波。
換言之，我冇得捉任何心理，只可以單憑射術嚟分勝負。
「鬼呀！！」
同一時間，阿烽提醒我身後有E班球員逼近。根據我哋戰術，當佢提醒我有鬼嗰刻，就係代表敵人距離我得返三、四個身位，所以我要即刻作出決定。
基於宜家位置偏右，我決定大力射向近柱，博龍貓反應唔切。
「噹——」
最終角度拎得太盡，個波最只可以中柱出界。為咗避開龍貓嗰副龐大身軀，射死角係冇辦法之中嘅辦法，可惜喺我腳下，就變相錯失咗一個入球機會。
「唉，Sorry。」
我見自己浪費機會，返到去後場自然同啲隊友道歉。
「唔緊要喇，射唔入嚟講中柱係最好嘅結果。」阿烽專心望向對面，一邊專注對手動向一邊安慰我：「啱啱好令佢哋覺得你都有啲威脅，就唔會淨係Mark我同田徑隊。」
跟住嘅形勢就好似阿烽所講，幾次反擊入面E班會派人跟返住我。阿烽同田徑隊多咗空間發揮，令到我哋整體有返啲攻勢。
喺其中一次反擊，阿烽仲成功偷雞，誤導晒E班啲人以為佢要傳波畀我，實則係自己推波上前攻門。佢步大力雄、一下炮彈式遠射成功偷襲龍貓，將比數扳平為一比一。
難得入波，我哋都好似E班噉去到球場中間，跳返隻曾經好紅嘅騎馬舞慶祝，順便當係向佢哋還擊。
「B班好嘢！！」
「加油呀！！」
戰況重新回到起點，帶動到啲觀眾重燃激情，繼續幫我哋打氣。當中尤其是Miss So，嗌得好落力之餘又望住我哋笑得好開心。
如果想佢保持呢個笑容，單係追平比數仲未夠。
不過E班始終唔易對付，加上我哋體力下降得越嚟越快，每次反擊亦越嚟越乏力。好彩嘅係E班啲速度同樣放緩，睇嚟佢哋終於有啲疲態。
兩邊體力就快見底，令到戰況慢慢陷入僵局，大家攻唔入大家嘅狀態。
如無意外，我諗會維持宜家個比數去到完場。由於時間所限，所以賽制係會跳過加時賽，直接進入射十二碼嘅環節。
對我哋嚟講，呢個結果其實非常之不利。
皆因我哋五個人入面，只有田徑隊同阿烽係有穩定射術，尤其以龍貓身型同五人場嘅龍門尺寸，就算係射十二碼都唔係咁易入。相反，對面有插花華同孖寶識射波，加埋黑猩猩都有機會射得唔差，令潛在嘅結果有可能係三比二，甚至係四比二。
而根據五人足球賽制，頭三輪十二碼入得最多嗰邊就會贏，所以我哋好大機會因為噉而輸。
最理想嘅做法，自然係喺進入十二碼階段之前絕殺佢哋。
講係噉講，實際上我哋都唔知可以點樣突破僵局。E班經歷過咁多次反擊，就算本身冇隊形冇戰術都開始識得點防範我哋，佢哋會以孖寶跟實我同田徑隊，再由插花華同黑猩猩去緊逼阿烽。
俾兩個人夾擊之下，阿烽除咗冇空位第一時間傳球，亦被逼拖慢成個反擊，連冇人防守嘅雞豪都好難傳到畀佢。
時間逐分逐秒過去，呢場大戰即將嚟到完結一刻。
我哋兩隊見差唔多完場，進攻嗰陣開始冇再快上快落，通常喺後場慢慢猜上去就算。加上俾太陽持續暴曬底下，我哋直頭冇意欲全力奔跑。
有時候明知要改變現狀，但係偏偏有心無力，只可以無奈接受現實。
「嗶——」
正當我諗住喺後場推上去嗰陣，對面隻黑猩猩唔覺意踢跌咗我，令我哋有個罰球機會。
「SorrySorry。」
黑猩猩其實算係幾好人，幾次撞跌我都會道歉。
可惜喺後場有罰球機會，我哋通常只會短傳組織，無助改變戰局。
「加油呀，男班長！！！！」
Miss So見我俾人撞跌又負責開波，特登大嗌嚟幫我打氣。
佢呢吓嗌到咁大聲，我諗全個球場嘅人都聽到，令我開始覺得好尷尬。同一時間，本來我已經俾太陽曬到迷迷糊糊，但係佢噉樣嗌一嗌，我忽然又有返啲理智、喺腦海萌生一個想法。
「阿球證呀......想問吓仲有幾耐完場？」
「差唔多就完。」
「即係幾多呀，冇錶呀大佬。」
「唔......兩分鐘。」
球證望一望錶之後答我。
仲有兩分鐘.....睇落唔算好多，但係另一方面亦代表場比賽仲未完。
Miss So好似嗌醒咗我噉，令我記起佢成日提到嘅「Never give up」，同埋中一班際排球嗰陣，佢係點樣鼓勵我哋唔好放棄、克服困難去達成初衷。
我嘅初衷，依然係想氹Miss So開心、幫佢留低最美好嘅回憶。
雖然我呢刻的確係攰到唔想再跑，但係如果最後十二碼輸咗，恐怕我之後就會後悔自己點解唔跑埋呢兩分鐘，至少盡力去搏個希望。
趁住球證同E班未催我開波，我揮手示意其他隊友行過嚟。
「搞乜呀，求其短傳開個波咪得囉，唔使斬啦。」
「咪係，仲揼波鐘想曬撚死自己咩。」
阿烽同雞豪一行埋嚟就話我。
「唔得，要阿烽負責斬呢個波。」
我驚球證會唔畀我哋討論，決定盡快講晒所有嘢：「你哋應該都明白，一拖到去十二碼我哋贏面就好細。我啱啱問過球證，宜家只係得返兩分鐘，換言之我哋仲想贏嘅話，呢兩分鐘就係最後機會。」
我見佢哋靜晒噉聽我講嘢，應該開始動搖。
「一般嘅進攻我哋已經試過，但係呢球罰球，就係我哋最好嘅破局機會。我哋其他人一齊衝上前擾亂佢哋，阿烽趁機睇吓邊個人最有機會就傳畀佢。」
「全部人壓晒上去，噉俾佢哋拎到波咪好危險？」
「啱呀，宜家都係打和啫，會唔會最尾連十二碼都冇份踢。」
「贏唔到嘅十二碼，踢到都冇意思喇。萬一俾人搶到個波，到時我哋超技術又好、鳩踢個波出界又好，總之要贏就要出奇制勝。」
「但係實際你係想......」
「嗶！B班唔該快啲開波。」
時間所限，我冇得再說服佢哋，只可以睇吓佢哋信唔信我。
我行到去中場線停低，預留多啲位置俾我走位。
望住E班四個人殺氣騰騰嗰樣，我心入面都有啲淆底，冇咩信心可以突破佢哋。
直至雞豪、木村、田徑隊一齊企喺我隔離。
E班望到我哋呢個奇怪陣勢自然提高警覺，避免最後關頭先嚟失守。不過佢哋始終未摸清我哋嘅戰術，所以偏向謹慎防守。
而場邊一班觀眾見到呢個情況，同樣肅靜落嚟、目不轉睛噉留意場上動態，驚一個唔小心就會錯過突破僵局嘅一刻。
我視線對上Miss So，見佢同樣望住我、口中念念有詞，可能係驚再大嗌會搞到我哋分心。
「嗶——」
球證再一次吹哨，示意我哋正式開波。
我哋四個擰轉頭望向後方，等待阿烽嘅指示。佢呢刻專注觀察形勢，一邊留意E班企位同場上空位，一邊默默噉舉高左手。
然後突然揮落。
跑！！！
我哋心領神會，以四條路徑同時跑向對面龍門。
可能係因為訓練有功，我哋默契十足、諗嘢一樣之餘大家嘅路徑又唔會相撞，驟眼睇落就好似四架高速行駛嘅列車。
呢吓出奇不意，令E班一時混亂、用咗幾秒時間先反應得切。
「一、一人Mark一個！」
插花華立即指示隊友，以人盯人方式應付我哋。
由於我哋連木村都衝埋上嚟，啱啱好分散晒佢哋龍門以外每一個人，所以阿烽自然可以毫無壓力噉作出傳送。
孖寶防守田徑隊同雞豪、插花華防守木村、黑猩猩防守我。
雖然佢哋起步稍慢，但係每個人速度唔差，好快就已經緊追住我哋。E班見我哋採取突擊戰術，無意中重燃鬥志，怕意外俾我哋絕殺。
我哋一邊向前跑，一邊擰轉頭望向阿烽，大家同樣等緊阿烽傳出關鍵一球。
喺我眼角餘光入面，仲可以感受到黑猩猩凌厲嘅氣勢。佢為咗彌補差距，正用盡全力噉向我衝埋嚟，只要我一停低，恐怕就會俾佢撞個粉身碎骨。
到我哋開始接近對方禁區，阿烽終於起步，將個波踢向半空。
我哋集中精神望住個波，只要率先預測到落點，就可以率先獲得優勢。根據呢個路徑，佢係想傳畀中路嘅木村......唔係，係傳畀最右邊嘅我......
唔係！
係直射！！
阿烽想直接射門！！！
個波喺半空中呈現一條完美弧線，而且力道去到中途仲未有減弱跡象，好明顯係一個射門。我哋大部份人冇因為噉停低腳步，而係繼續跑向龍門。
因為有踢開波嘅人自然會明白，個波一日未過白界一日都存在變數，到時候就要靠我哋執死雞或者解圍。
相反，黑猩猩冇踢開足球，佢見個波唔係傳球已經收慢腳步，放棄喺後面緊逼我。
事實上，阿烽呢球的確係幾完美，個波同樣兼顧到力度同角度，幾乎可以預視呢球會直入死角，為我哋打開勝利之門。
不過，現實總係唔會盡如人意。
個波去到禁區嗰陣，勢頭減弱得太過緩慢。照噉樣落去，最尾只會中楣或者中柱。
我同木村一路踢開後衛同龍門位置，見識過大大小小飛向龍門嘅足球軌跡。呢一刻自然預計到個波好大機會唔入，所以係咁多個人入面最落力跑去龍門嘅兩個人。
我哋各自衝向喺柱邊同龍門前面，準備好成為防不勝防嘅伏兵。
而龍貓同樣缺乏足球經驗，早以為個波會飛出界外，冇再準備任何動作。
望住龍腦一面呆滯，只要個波彈向我同木村其中一邊，呢球就可以話係入咗九成。
當我諗住穩操勝券之際，忽然感受到一股殺氣。
因為我一直擰轉頭望住個波，所以順勢望到後面嘅狀況。
我見到嘅係，插花華已經越過咗木村，直逼向我呢邊！！
佢原本見個波來勢似係射門，的確有減慢速度嘅跡象，但係佢可能見到我同木村咁落力，所以選擇盡忠職守、加速去追上我哋。只係唔知佢想防守我哋，定係想直接頂個波出界。
後者嘅話，噉我哋就會失去唯一嘅入波機會。
論位置嚟講，我暫時比佢更有優勢，不過呢個優勢，只會持續到去個波中柱之前。因為佢距離較遠，當個波彈返出嚟嗰陣仲可以利用現有嘅速度搶位。相反我個位置太近，變相要停低等個波彈出嚟、再衝去個波度補射。
我嘅身體反應得比大腦更快，決定飛身一躍，喺半空中睇準個波嘅來勢。
坦白講，其實我好怕頂頭鎚。一嚟本身有啲驚波，二嚟每次頂完頭鎚，硬係覺得個頭會唔太舒服，感覺就好似頂多兩頂會腦震盪噉。
雖然作為後衛，頂頭鎚其實係必修課門，但係我哋通常都係圍內Friend踢吓波，所以我一直冇去勉強自己。通常要我頂嘅話，一係求其跳吓扮頂唔到，唔係就嗌其他人幫我頂咗佢。
可惜在場入面，只有我最接近個波嘅落點。
為咗避免變做幫對方解圍，我特登用個頭嘅側邊將個波撞入網。就算真係俾我頂錯位，最盡應該只會頂向龍門前面，木村依然可以補射。
我相信宜家呢一刻，係我人生第一次主動、亦係最重要一次嘅頂頭鎚。為咗捧盃、為咗Miss So，呢個係我必定要頂嘅頭鎚。
「噹——」
。
。
。
。
。
呢一球，究竟係入定唔入？