【愛情】 我同女仔傾偈就會肚痛: 第二章.10
頂完個頭鎚，我感覺到自己迷迷糊糊、有幾吓甚至眼前一黑。周圍嘅聲音好混雜，但係又好似好細聲噉。
唉，果然係唔應頂頭鎚，都唔知頂得多會唔會智商下降。
我試吓匿埋眼休息，希望一陣之後唔會再有呢啲唔舒服嘅感覺。
話時話，點解我會覺得個背隻腍腍哋？對腳仲好輕冇咩重量，好完全唔似係踩緊地下。
不過呢啲都唔係重點，究竟最尾個波有冇入網？
我近乎扎醒噉擘大眼，視線由朦朧慢慢轉清、周圍啲聲開始越嚟越大、個頭越嚟越痛。直至我視野恢正常，我先發現自己瞓咗喺地下，身邊有Miss So同阿烽喺隔離。
「秦子柱！你見點樣呀？」
Miss So好緊張噉望住我，兩隻眼已經湧出淚水。
「冇...冇嘢。」我慢慢坐返直個人，嘗試搞清發生咩事：「場比賽呢？最後個波有冇入到？」
不得不提今日真係好熱，我感覺到成頭汗之餘，額頭個位仲係噉滴落我隻眼同塊面度。
我伸手抹走啲汗，費事自己又痕又睇唔到嘢。
點解啲汗......質感有啲唔同？
仔細一睇，我發現手掌上面嗰啲全部都係血。
我再望吓周圍，見到自己瞓喺柱邊、大部份觀眾隔咗四、五米噉圍住我，終於估到發生咗咩事。
「場比賽完咗喇，你暈咗差唔多成五分鐘！」阿烽有啲激動對住我講。
佢咁激動，我諗場比賽應該兇多吉少：「唉，我最尾頂咗個波出界......？」
「你唔好亂郁先喇，你仲流緊血㗎......」Miss So突然中途插嘴，想阻止我追問落去。見到佢咁著緊我，搞到我忽然心動、當堂連個頭都冇咁痛。
不過我呢刻冇理到佢，依然專心望住阿烽，等緊佢講個結果出嚟。可惜阿烽一面沮頭喪氣，擰轉頭冇理我。
「你頂咗個波入網，我哋贏咗喇！」
阿烽突然喺背後拎個獎盃出嚟，畀個驚喜我：「你頂完個波嗰陣撼落條柱度撞暈咗，然後E班又急住開波，所以我哋最尾換人死守到完場。」
「Yeah！！！！」
「子柱Carry！！」
其他隊友同埋同學就好似一早約埋噉，喺阿烽講個真相出嚟之後先繼續慶祝。
面對佢哋用掌聲夾歡呼嘅歡迎，我怕怕羞羞噉耷低頭迴避目光。
然後我嘅焦點，就落咗係個獎盃上面。
「中六級足班班際畢業盃
冠軍 」
個獎盃唔算好大，大約一個前臂嘅高度左右，不過兩邊綁晒紅絲帶噉，望落又幾有Feel。
我擅自拎起個獎盃，然後轉交畀另一邊嘅Miss So。
「嗱......講、講好咗話畀你。」
佢猶豫噉接過獎盃，然後破涕為笑：「傻、傻咗咩......洗乜咁博命呀......」
「唔該借借！」
呢個時候，有個校工突然趕到。佢手上拎住一個急救箱，應該係有啲同學去咗醫療室嗌佢嚟。
「哇，呢位同學搞咩嚟呀。」
佢望到我個傷勢覺得意外，一邊嗌我瞓返低，一邊拎啲紗布幫我止血。
「呃......唔覺意撞親條柱。」
「噉你仲有冇邊度唔舒服？唔使驚呀，我哋叫咗白車嚟㗎喇。」
「吓......咁大件事？你嗌咗白車嚟我仲驚喎。」
「佢哋你啱啱暈咗呀嘛，去醫院檢查吓穩陣啲。」
個校工係噉聊我傾偈，似乎係想睇吓我啲精神狀態如何。
冇幾耐，救護車好快就嚟到。由於Lunch時間都就嚟完，所以好多同學已經返晒班房，得返Miss So同啲隊友喺度。
啲救護員又係檢查吓我，然後將我搬上擔架準備抬入救護車。
「阿哥哥仔....可唔可以畀我同Miss講幾句？」
臨上救護車前我問。
「幾句好喇喎，唔好拖咁耐呀。」
個救護員幾好人，幫我嗌咗Miss So過嚟。
「做咩呀男班長......？你唔使驚喎，我會通知你屋企人㗎喇。」
佢依然仲係眼濕濕，好擔心我個情況。
「唔、唔係呀，我諗住答返你啫。」我揮一揮手示意佢貼埋嚟，費事俾太多人聽到。
「......？」
不過佢貼得實在太埋，啲頭髮幾乎遮住咗我半邊面，甚至可以聞到佢啲洗頭水嘅香味。
「因為......」
我冇俾啲香味沖昏頭腦，繼續回應返佢啱啱個問題：「約、約好咗要一齊睇戲呀嘛。」
Miss So嚇一跳噉望住我，雙眼又再忍唔住喊。
「講完啦唔該。」
我笑住望一望Miss So，再同個救護員講。
雖然睇落好似瀟灑得濟，但係我話晒都叫幫手捧咗個盃返嚟，懶吓型應該唔係問題啩。
去到醫院之後，個醫生幫我處理完個傷口，就叫我留喺醫院觀察返兩三日，搞到我屋企人都以為好大件事。
「哎呀，我個仔仲要考Dse㗎，佢平時已經恰吓恰吓，宜家噉樣撞一撞會唔會再蠢啲㗎？」
「放心喇伯母，留院只係方便我哋檢查㗎啫，因為一啲腦部受損可能會喺三日到一個月內先出現，但係現階段睇你個仔係冇乜問題。」
總之因為噉，令到我呢個星期六日都要留喺醫院度過。啲醫生護士通常會隔四個鐘同我做一次檢查，照吓隻眼呀、測試吓啲動作同問吓我問題噉，我除咗有啲暈同埋會作嘔外，基本上冇咩問題。
如果要數嘅最大問題，就係喺醫院入面真係幾悶。尤其我撞親個腦，啲護士通常會叫我休息多啲、唔好用咁多腦，就算睇電視都唔好睇咁耐，所以我大部份時只可以攤喺張床度、放空晒成個人。
不過一個人只要冇嘢做緊，個腦好自然會搵啲嘢嚟思考，我不自覺諗起琴日場比賽，嘗試搵返最尾一刻嘅細節。始終我難得可以做到絕殺英雄，偏偏因為忍唔住匿埋眼去頂波，再加上撼埋落條柱度暈咗，令到我對自己點樣入波係完全冇印象。
更唔好彩，當時現場竟然係冇任何觀眾拍緊片。結果我對於自己人生中嘅重要一刻，只可以透過其他人口述嚟得知實際情況。
而且呢個星期六，本來我同阿烽佢哋約好咗，只要我哋贏到冠軍就會去網吧同打邊爐慶祝，順便試吓拎個獎盃嚟熝肥牛食。宜家我要住院嘅情況下，只可以無奈睇住佢哋Happy。
「唉，點解我咁慘㗎。」
望住阿烽喺個Group度Po晒相話出發，仲特登影住個獎盃，搞到我忍唔住開聲呻吓。
「後生仔冇咩病痛算係噉喇，呢度大把人慘過你呀。」有個姑娘語重心長噉講，佢本來喺隔離照顧緊個老人家，但係聽到我講嘢之後，忽然擰轉頭聊我講嘢。
唉，瞓得太耐直頭當咗做自己屋企張床，唔覺意講埋啲心聲出嚟。
之後俾佢Chur住傾咗陣偈，我唯有不停附和，最尾再靠借尿遁避開佢啲呃偈傾。
返到去間病房，我差啲以為自己入錯地方。因為喺我張床位前面，竟然圍住咗四、五個人喺度。
其中一個，當然係我幻想得最多、最希望見到嘅Miss So。
「你哋......？」
我細細聲試探吓，始終怕自己係咪撞親個頭認錯人。
「去咗邊呀男班長，想偷走呀？」
「梗係嚟睇你死得未啦，唔通嚟參觀咩。」
「行得走得，即係冇咩事啦。」
面對佢哋一人一句，我唔識反應噉慢慢行返自己張床。
然後，我見到我張檯上面，擺咗座我哋琴日贏返嚟嘅獎盃。
「你哋.....唔、唔係去慶祝咩？」
明明佢仲特登喺個Group度晒命，宜家忽然間又咁人齊出現喺我間病房，我開始以為自己有幻覺。
「你琴日咁威，梗係預埋你一齊喇。」Miss So撳住我兩邊膊頭，將我壓落張床坐喺度：「喺我嗌埋佢哋嚟㗎，咁你個頭見點呀？」
「好、好好呀......」
突然間咁多人嚟探我，梗係好啦。
當我感受到Miss So溫暖嘅雙手，我先肯定自己唔係出現幻覺。對於眼前呢片景象，我自然有種感動蘊釀喺心頭。
之後我哋只係圍埋一齊聊吓偈，講返琴日比賽啲細節同我撞暈咗之後嘅事，話晒呢度係醫院，我哋總唔能夠喺度開Party。
佢哋臨走嗰陣，我哋仲一齊同個獎盃影咗張相。
雖然比起獲勝嘅球場上面，喺醫院病房影團體相係冇咁型，但係望住我頭上嘅繃帶，呢個背景對我嚟講亦別具意義。
趁阿烽佢哋去咗睇張相影成點，Miss So喺身邊搭住我膊頭，細細聲講：「多謝你咁盡力呀，男班長。」
佢個笑容感覺幾安慰，可以隱約睇得出佢對我有幾分驕傲。
坦白講，我冇諗過自己會成為絕殺嗰個人。由訓練去到實戰，一路以嚟都係阿烽負責指揮大局、助攻助守。要數英雄嘅話，我諗班上面嘅人本身毫無疑問會覺得係阿烽。
不過最靠Miss So，如果唔係我喺球場上面醒起佢嘅格言，去到最後一刻依然盡力而為、Never give up。恐怕我都唔會有嗰個突擊戰術嘅念頭，甚至係最尾嘅埋門衝頂。
要數贏波英雄嘅話，Miss So絕對佔一席位。
「我多謝你就真......」我細細聲回應返佢，費事俾其他人聽到：「不過你諗定想睇咩戲喇喎，我、我就咩都啱睇嘅。」
講到贏波，點可以唔再提一提我哋之間嘅秘密。
就算去到贏咗冠軍，阿烽佢哋依然唔知我同Miss So有呢個約定。
「唓...唓！」佢好似有啲唔忿氣，細細力打咗我一吓：「等你做晒我啲Mock卷先講，你話同我瘋狂補英文㗎！」
「哇，乜、乜你咁奸茅......」
望住Miss So怕羞又含蓄嘅笑容，我覺得自己終於成功留到個開心、特別嘅回憶畀佢。