【愛情】 我同女仔傾偈就會肚痛: 第三章.2
第二日返到去，我哋特登影返張班相留念。呢次係我哋最後一次齊人上Miss So嘅堂，之後就算仲有Oral要練習，都再唔係呢種一班人對住一個老師嘅上堂感覺。
望住佢講書鬧人嗰樣，我個腦不自覺諗起第一次見佢行入班房嘅身影。經過呢六年時間，Miss So大致上冇乜點改變，教學依然用心、笑容依然甜美。係外表睇落成熟咗少少，同埋就我所知經歷咗兩次情傷。
而我經歷咗呢六年時間，性格依然係咁毒撚。唯一嘅分別，可能就係我肯去主動接觸Miss So多啲，或者可以話我上最後一堂嗰陣，唔使好似第一次見面噉個肚痛住聽佢講嘢。諗起呢六年時間貶吓眼就過，以後冇得再上Miss So嘅堂，我都開始有啲感觸。
不過回望返呢六年，我至少慶幸自己喺中五嗰陣有嘗試去追Miss，如果唔係我肯改變自己，最尾呢兩年都未必有咁多同Miss So之間嘅特別回憶。感覺呢兩年就好似一個小小嘅旅程，而旅程總有完結嘅一日。
「Miss So呀？你......晏啲收工可、可唔可以同我食餐飯？」
補課完結之後，我見冇乜人喺佢側邊，趁機自己一個搵佢。
「吓？聽日考試喇喎，你唔使再溫多啲咩。」
「呃......噉都要食飯㗎嘛，咪、咪當放鬆吓囉。」
「都可以嘅......但係我今日多嘢做，可能要六、七點先收到工。」
「可以呀，噉我返、返屋企抖一陣等你喇。」
對於呢個旅程，我決定以表白作結。
本來我都諗住好似嘉豪噉，喺Grad din或者放榜呢啲最後一次見嘅日子表白，噉就唔使怕之後會尷尬。可惜我嘅情況有啲唔同，考慮到Miss So已經開始諗緊同鄭Sir復合，我怕六七月先表白會太遲。
雖然今次就算佢哋一齊返，我都會照繼續表明心意，但係如果可以喺佢哋復合之前表白，就有機會令Miss So唔使再黐返去個賤人度。
當然我又未去到咁有自信，覺得Miss So會喺鄭Sir同年紀差距之下揀我，不過阻止佢同鄭Sir復合只係其次，我想同Miss So坦白自己嘅心意先係最重要。
今次突然咁衝動，主要係因為受到首歌同嘉豪所打動。尤其嘉豪竟然肯放低自尊，再一次面對三年前嘅陰影，呢樣嘢令到我覺得自己並唔係孤單一人，喺追求幸福嘅路上，大家同樣需要鼓起勇氣。
就算最後唔成功，我相信自己都唔會後悔。因為過去呢兩年，無論係我同Miss So嘅關係變好、贏畢業盃定係幫佢趕走鄭Sir，幾件事嘅共通點都係源於我肯行出第一步。與其思前想後太多，倒不如行動先係最實際，只有我決定行動，先有機會換到Miss So一生嘅笑容。
臨時臨急決定表白，基本上我咩都準備唔切，唯有執靚仔啲個人，喺屋企組織吓到時應該講啲咩好。
唔經唔覺又過幾個鐘，天色入黑之後，我開始越嚟越緊張，喺屋企行嚟行去等Miss So個Message。
直至去到七點，佢終於打電話嚟。
我哋最尾約咗係一間車仔麵鋪頭食嘢，雖然我好緊張，但係餐飯尚算正正常常，同佢傾返吓佢返工啲嘢、我考Dse啲嘢，或者一啲無關痛癢嘅話題。
「你啲豬皮好似幾好食喎......」
「你、你攞啲囉。」
「嘻嘻，我都分返啲魚蛋畀你啦。」
望住我哋各自喺個碗啲嘢食度夾嚟夾去，我個心好自然又開始猶豫好唔好表白。萬一表白失敗，我就唔止冇得再成日同佢傾偈，仲好大機會失去埋分享嘢食呢啲咁平凡、但係又幾甜蜜嘅互動。
我盡力用上次大埔件事去說服自己，只要開始咗行動就唔會再猶豫，費事自己再胡思亂想。甚至食飯嗰陣特登唔提起鄭Sir，驚自己聽完之後又會影響到自己。
因為我今次嘅動力比新加圾嗰陣更加大，唔希望自己會再次半途而廢。
「哎呀......都差唔多啦，你返到去記住早啲休息，執齊啲嘢呀。」
埋完單行出門口，Miss So伸住懶腰噉同我講。
「可、可唔可以陪我行多陣......？」我膽粗粗噉問，因為跟住落嚟先係戲肉。
「好呀。」佢望一望錶，見宜家其實未算好夜，所以都肯陪我行吓。
我哋行咗去北區運動場隔離個公園，入夜之後，呢個公園靜靜哋冇乜小朋友，係個傾偈嘅好地方。而且呢度仲有兩個鞦韆俾人玩住傾，可以順便幫我分散吓注意力。
Miss So充滿童真，所以好快就沉迷喺個鞦韆度，又同我講返佢啲童年舊事。當周圍嘅氣氛適當，我開始同Miss So傾得深入啲，當係喺我表白之前熱一熱身，費事一嚟就單刀直入。
除咗熱身之外，我亦等緊一個時刻。
夜色沉寂，公園只係得返我哋兩個。俾周圍墨綠色嘅小樹包圍，抬頭只有一道淡雅彎月、細碎星星之下，呢個公園好似變咗做我同Miss So之間嘅小天地。
臨陣磨槍嚟講，呢個地方都算係噉。雖然比起新加坡嗰陣冇浪漫嘅海邊、清幽嘅沙灘、溫柔嘅大海作伴，但係最重要嘅，係有Miss So喺身邊就夠。
「你係咪聽日就考英文，所以好緊張呀......？」
「你...等、等我一陣先。」
我拎出一早準備好嘅膠袋，放心將累積落嚟嘅嘔吐感爆發。
因為上次喺新加坡，我印象中係嘔完之後就冇咁肚痛。難得我下定決心表白，我都唔想自己講嘢一舊舊。
其實我個膠袋本來只係備用，冇預計到自己真係又會嘔。我以為有上次嘅經驗，今次應該會冇咁緊張。
「哇點呀你，冇事呀嘛？！」Miss So見我嘔埋上嚟，即刻過嚟掃我背脊：「放鬆啲啦，你畀太大壓力自己會影響發揮㗎。」
「冇、冇事...我一直都係好易肚痛，慣咗㗎喇。」我抹一抹嘴邊，見自己個冇再肚揦住揦住，終於放心進入主題：「Miss So呀......其實我有啲嘢想同你講好耐。」
「你慢慢講啦，係咪我畀到太大壓力你......？」
「我鍾意你。」
「吓？」
「我鍾意咗你好耐，係想你做我女朋友、想一齊行落去嗰種鍾意。」
「唔好講笑喇男班長......」Miss So前一秒仲以為我考Dse好大壓力，下一秒就聽到我表白，自然難以置信。
慢慢佢見我眼神堅決，反而自己開始有啲猶豫：「你...講真㗎......？」
我點一點頭，進一步向佢解釋：「其實我以前已經鍾意你，本、本來我見你鍾意咗鄭Sir，都諗住成全你哋，做返朋友就算......不過後尾見到鄭Sir點樣傷害你，又見到你想同佢復合，我覺得與其睇住你黐返去啲賤人度，不如博個機會畀自己去珍惜你。」
「你可唔可以......畀個機會我？」
今次應該係我六年以嚟，第一次夠膽直視佢雙眼咁耐。我個心不斷加速跳動，期待緊佢會講出我渴望而久嘅答案。
佢以眼神回應我嘅眼神，我哋對望咗一陣，可以感受到佢視線有啲飄忽，似係有好多感情同言語組織緊。
「首先，我都想多謝你嘅心意......」過多一陣，Miss So終於開腔回應我：「坦白講同你一齊喺幾開心，好多謝你成日支持我、又對我咁好。」
聽到呢度，我都好明白跟住落嚟佢要講嘅嘢先係重點。
「不過，我一直以嚟都只係當你係學生......」
「你係咪接受唔到我細你太多？」
「我唔知呀...因為我冇諗過同你發展到嗰種關係，最多只係當你細佬噉看待......」
「細佬」呢個詞語，感覺上好似幾親近，甚至比朋友更加有過之而無不及。只係另一方面，「細佬」亦局限咗我作為類似屋企人嘅一個地位，令我只可以無限接近Miss So，但係永遠都去唔到可以同佢拍拖嘅距離。
Miss So見我唔太開心，嘗試說服我去放低佢：「其實你仲係讀緊中學啫，話唔定你第時識多咗女仔，會發覺人哋更加吸引呢？」
「照你噉講，我、我咪要識晒全港啲女仔先可以鍾意人？」
「你宜家梗係覺得我好喇......但係你諗吓過多幾年，我可能就老得好快，到時就唔啱你㗎喇。」
「我都未厭你年紀大，點解你要咁話自己？」
「你唔明呢...你值得搵得個更好嘅女仔。」
「你都值得一個識珍惜你嘅男人。」
我不斷反駁Miss So，係因為我真係好唔想放棄：「雖然我喺你眼中未必係嗰個男人，但係你喺我眼中已經係最好嘅女仔。」
同Miss So拗咗一陣，其實我明白我哋已經係冇可能。如果要接受現實，我起碼想要一個由佢親口講出嚟嘅答案。
「咁係咪即係你唔會接受我？」大概係因為我開始打定輸數，所以喺佢答我之前已經忍唔住喊。
「不如我哋等你考晒試先再傾呢個話題啦...我、我唔想影響到你......」
Miss So講講吓同樣控制唔到啲眼淚，以淚眼同我互相對望。
隔住眼淚望向Miss So，我忽然好似清醒咗啲，明白到自己其實幾咁自私。如果我最尾Dse成續唔好，以佢嘅性格實會怪責自己，覺得係因為佢拒絕咗我而影響我啲表現。
更何況枉我仲成日記掛住Miss So嘅笑容，點知宜家令到佢喊嘅偏偏就係我。
「我、我明㗎啦......」我強忍淚勢，準備轉身離開：「放心啦，我好...專業嘅...我一定會繼續盡力考好個試......」
Miss So講得咁清楚，我都冇謂要佢難做。
「Sorry…...」
臨別之前，佢只係好內疚噉道歉，怕講得太多會刺激到我。
當我自己完全消失喺佢視線範圍，終於控制唔住所有情緒、突然淚如泉湧。我本來都唔想喺條街度喊，但係我發現自己越去壓抑佢，反而喊得越激動。
呢刻我冇再感受到肚痛，而係覺得個心好空洞。