【愛情】 我同女仔傾偈就會肚痛: 最終章

之後Miss So send message嚟關心我，或者係考試之前個別同我打氣，我都只係循例噉覆返佢就算。

坦白講，同Miss So表白失敗又冇話好影響我考試。喺睇題目嘅時候，有時諗起佢幫我補英文嘅一啲回憶，的確會令我差啲忍唔住喺試場喊。不過我同時諗起佢點樣畀心機去幫我溫書、鼓勵我接觸多啲英文，佢除咗係我一個暗戀對象，亦係我一個好重要嘅老師。

為咗唔好辜負佢，我強忍住淚水，盡力去考晒淨低落嚟嘅考試。

表完白之後，我忽然覺得自己好似如釋重負。除咗Dse之外，基本上我已經冇乜煩惱，雖然我每日都會諗住Miss So，諗緊佢會唔會同返鄭Sir一齊，但係我可以做嘅嘢已經做晒，事情最尾發展成點都唔到我控制。

喺考完Dse嗰段時間，我聽咗Claire姐講走去學羊毛氈嘅興趣班。我覺得既然每日會諗起Miss So，噉就不如索性整返整羊毛氈公仔，當係正式紀念我同佢之間呢段感情。



我記得Miss So除咗鍾意毛毛，第二鍾意嘅係巴斯光年，於是就決定整隻巴斯光年俾畀自己。

Claire姐有講過，如果我繼續抱住呢種心態，之後應該有排都放唔低Miss So。

某程度嚟講，呢樣正正係我想要嘅嘢。

我並唔係諗住精神虐待自己，而係覺得就算我哋失敗收場，Miss So對我嚟講依然係個美好回憶，我唔想刻意去掉低或者淡忘對方。

呢段旅程，係對我青春嘅最好見證。



「你真係唔再搵佢嗱？」

「唔、唔啦，好尷尬喎。」

「又係你自己話就算一齊唔到，可以做佢朋友已經好好。」

「噉...噉冇諗過之後見返個感覺真係咁奇怪呀嘛。」

喺我眼前呢一個文青打扮、眉清目秀嘅女仔其實係Claire姐。



因為我Dse意外考得唔錯，好好彩噉比我入到中大嘅宗教研究，令我哋之間由網友提升到去同學關係，佢亦因為噉終於肯同我約出嚟見面。

我嗰班朋友方面，阿烽本身都有晒計劃，所以順利去咗台灣升讀大學。而嘉豪同木村各自揀咗啲Asso同HKDI嘅高級文憑，都係本住搵嘢讀住先嘅心態見步行步。

「其實都幾可惜啫，好難得可以同個老師咁Friend。」

「少、少少啦。」

其實又真係幾可惜，尤其喺Grad din嗰日，我本來怕尷尬冇直接去搵Miss So單獨影相，諗住等多啲人搵佢嗰陣，先乘機去影返張留念。點知好多老師因為第日仲要返工，所以冇留到好夜就走咗。

偏偏Miss So喺臨走之前，竟然出咗去宴會廳外面同其他學生影相，結果我掛住喺入面同阿烽佢哋影相，完全唔知佢已經準備要走。

雖然我食飯嗰陣，佢都有行埋嚟我張檯度，同成檯嘅男仔一齊影咗張相，但係我哋始終冇個機會好嚟好去，感覺最後就只有嗰晚傷心嘅回憶。

講起Grad din，唯一嘅好消息係嘉豪竟然同阿Wing表白成功。



阿Wing究竟然係點解接受佢，我哋作為局外人始終唔太清楚。唯一可以睇得出嘅，就係咩為之「一物治一物」，佢哋一齊咗之後嘉豪就被逼戒口，唔可以再喺阿Wing面前話其他女人係臭雞。

佢哋相處嗰陣依然會互相鬥氣......或者宜家應該叫打情罵情，總之整體上阿Wing係比較強勢，睇嘉豪平時嘴角含春嗰樣，應該以後都會俾對方食住。

作為朋友見到佢成功追求幸福，我點都會衷心祝福佢哋。

Claire姐撥一撥佢嘅深啡色長髮，見我忽然唔出聲，決定轉個話題：「係呢...噉其實你宜家同我講嘢係咪都會肚痛？」

「冇以前咁痛嘅。」

自從讀咗大學幾個月，我嘅社交圈子半推半就噉擴大。無論係Ocamp、住Hall、Groupmate，我被逼要多啲同異性交流，長期間唔時就痛吓之下，慢慢減低咗我啲肚痛嘅嚴重性。

突然識多咗咁多朋友，我忽然明白Miss So嗰陣點解會話我第時識多咗女仔，就會發覺人哋更加吸引。上到大學之後，同中學嘅生活果然係截然不同，感覺好似去咗一個花花世界，你會探索好多未知嘅嘢，亦會見識到好多唔同背景嘅人。



可惜嘅係呢班人入面，依然冇人可以畀到Miss So嗰種感覺我。

「哈哈...好似幾好玩噉。」

「黐線......有、有咩好玩。」

「以後撞到你特登搵你傾幾句，等你可以即刻肚痛。」

「你噉樣我會直接無視你。」

或者Claire姐已經係我上咗大學之後，最熟絡嘅異性朋友。不過我始終冇將對Miss So嘅感情，投射落同樣大過我嘅Claire姐身上，可能係因為我哋本身維持咗好幾年網友關係，而佢又喺Miss So方面幫咗我好多。

佢性質上比較似係我唯一一個樹窿，可以傾訴同有關Miss So嘅心事。

大學忙碌又多采多姿嘅生活，令時光過得特別飛快。嚟到三月中，我第一年嘅大學生活已經過咗大半，我開始習慣大學嘅步調，亦已經Chur完個Midterm可以抖吓。



眨吓眼，距離我向Miss So表白差唔多接近一年。

我記得當初放完榜、開學嗰陣，Miss So都有Send message嚟關心我。禮貌上我當然有覆返佢，只係我哋冇再傾一啲私人嘢或者無聊嘢，所以已經無聯絡半年。

望住和聲can外面嘅青山綠水，我開始諗起中學嗰片嫩綠草地，同埋有關Miss So嘅種種回憶。

「叮——」

電話突然傳嚟日曆嘅通知，標示住今日係Miss So生日。

其實唔使日曆提醒，我都記得今日係佢生日。我本身諗住喺Facebook講聲生日快樂就算，不過我既然咁啱有啲掛住學校，不如就索性返去行吓。

我知道唔係個個都會對自己間中學有歸屬感，而我算係幾幸運，可以喺度識到好多好老師同朋友，令我有過一段美好嘅中學時光，自然會幾記掛住呢個校園。



當然某程度上亦因為Miss So嘅存在，令呢個校園、我嘅回憶別具意義。

我返到學校嗰陣接近五點，唔少學生已經離開咗學校，令我唔使承受太多好奇嘅目光。沿住學校漫無目的噉行，好多細碎片段開始喺我腦海入面浮現。

例如經過禮堂，我會諗起每年嘅音樂表演，尤其中五嗰年見到Miss So眼濕濕嘅樣。又例如經過中一嘅B班班房，會諗起同佢第一次見面、以及第一年嘅相處回憶。

我記得Miss So講過，當年頭幾個禮拜佢係連我叫咩名都唔記得。

因為我啱啱上中學仲係好乖好靜，所以冇乜特別喺佢眼中留低印象。係後尾我哋開始熟絡，加上我間唔時會喺Facebook搵吓佢，先叫做開始佔一席位。

去到中二嘅班房，我就係喺度同佢相處得越嚟越多，一齊練過班際跳繩、一齊喺午飯時間唱歌，又第一次見到佢因為我哋班而喊。經過呢一年，我慢慢對Miss So產生好感。

嚟到學校後面呢塊草地，自然又係一個感受好深嘅地方。

喺最後一年，呢度成為咗我為佢博殺嘅戰場。望住條門柱仲有一撻深啡色嘅血跡，可以話係印證咗我嘅決心，同埋啲校工有幾懶。

返嚟走咗一轉，我先發現學校每一個角落，好似充斥住有關Miss So嘅特別回憶。嚴格嚟講，應該係佢豐富咗我中學生活嘅點滴，甚至因為有佢，我先會同阿烽佢哋有過一段青春熱血嘅奪冠經歷。

講起上嚟，其實我仲差佢一句多謝。多謝佢嘅教導，多謝佢帶畀我咁多回憶。

「先生，請問你係嚟做咩㗎？」

一個男人突然行去我前面，用啲疑惑嘅眼光掃視我。我對佢完全冇印象，應該係今年新入職啲老師嚟。

「呃，我係舊生嚟，諗住返嚟周圍睇吓。」

「哦...咁你有冇訪客證喺手？」

「吓，冇、冇喎。」

「咁你要跟我去校務處做返個登記先喇，因為你又冇約定一位老師，噉安全起見都要同你做返啲程序。」

唉，所以我同阿烽佢哋一直都冇返嚟行吓，就係因為怕咗呢啲手續嘢。雖然我明白自己已經唔係呢間學校嘅學生，但係唔可以再喺度自出自入，霎時間令我有啲難以適應。

而且我本身仲好哋哋緬懷緊，噉樣俾佢突然掃興打斷，直頭有種想即刻離開嘅慾望。

「好呀，麻煩晒你。」當然我都會同佢合作，費事搞到自己好似心虛走人。

「你應該係今年新嘅老師？你教咩科㗎？」

「係呀，我係訓......」

「咦男班...秦子柱？」

我抬頭望一望前面，呢個熟悉嘅身影，令我忽然又想留耐啲喺度。

「咦Miss So你識佢㗎？」

「係呀，佢係我上年啲學生嚟。」

「哦，噉既然有老師認得你，我就唔阻住你哋喇。」

嗰位阿Sir做嘢似乎通情達理，冇再執意要帶我去登記就離開咗，淨低我同Miss So兩個企喺原地尷尬對望。

「陪我行吓......？」Miss So率先開口建議。

「好呀。」

就係噉，我哋開始平排喺草地散步，享受夕陽同大自然帶嚟嘅愜意。

「生、生日快樂。」

「多謝，我仲以為你唔記得添。」

「唔會啦......以前每年都有同你講。」

「噉生日禮物呢？」

Miss So突然停低腳步，攤大隻手向我。

「呃...臨時臨急冇準備喎。」

「唉，淡啦，以前明明起碼有張生日卡。」佢收返埋對手，好誇張噉嘆咗口氣。

「Sorry囉，之前要Chur midterm唔得閒呀嘛。」其實我本身都冇預過今日返嚟，自然唔會準備禮物。

「嘻嘻，講吓笑啫。」

Miss So瞬間又恢復笑容，腳步輕快噉向前行。

望住佢個背影，我忽然發覺自己竟然冇肚痛。或者係因為我本身已經表過白，連最難開口嘅說話都講過，宜家同佢呢啲正常對話應該難我唔到。

一路諗住佢話要生日禮物，我腦海入面突然有個諗法，決定喺背囊拎樣嘢出嚟送畀佢。

「嗱，生日禮物呀。」我急步追上去，塞入去佢隻手度。

「吓。」

Miss So低頭睇清楚份禮物，發現係嗰隻陪咗我半年嘅巴斯光年。

今次呢隻羊毛氈公仔，我特登加咗個鎖匙扣畀佢，等佢可以一直扣喺我個背囊入面。

「你又話冇準備？」

「你想要禮物呀嘛，呢隻我係本身之前整畀自己。」

「好委屈噉喎，畀返你嘞。」

「唔使啦，反正你都鍾意巴斯光年。」

Miss So拎起隻巴斯光年，擺喺雙眼前面仔細觀賞，嘴角不自覺勾起笑容：「好喇，噉借嚟畀我欣賞吓先。」

於是，我哋又繼續漫步草地，傾吓以前中學啲回憶、呢半年各自發生嘅事。我哋巧合噉避重就輕，冇提到我表白嗰啲嘢，不過我始終忍唔住好奇心，關心吓佢嘅感情狀況。

聽Miss So講返，原來佢嗰陣有參考到我啲意見，決定同鄭Sir定個半年期限去觀察佢。結果鄭Sir等咗兩個月就冇心再等落去，仲同Miss Lau兩個先後辭職。我唔知佢哋後尾仲有冇一齊，至少可以慶幸嘅係Miss So冇再黐返埋去。

而啱啱嗰位阿Sir話自己屬於訓導組，應該就係負責頂替鄭Sir啲職務。

會勾起佢啲傷心事嘅鄭Sir同Miss Lau已經唔喺度，對Miss So嚟講，呢個學期就好似一個新開始噉，呢刻我都希望佢可以重新出發，將來搵到一個適合嘅人。

我哋行行吓草地，又去咗行學校其他地方，最尾停留咗喺教員室前面傾偈。

曾幾何時，我每個禮拜都會有兩三日嚟搵佢，如果唔使去實驗室補英文，我哋就會企喺呢個位置傾吓閒偈。

日落時份，呢個位可以望住燒紅半邊天嘅火球，慢慢墜落喺墨綠山丘之後。作為今日短暫之旅嘅最後一幕，確實幾有氣氛。

「你知唔知呢，其實我喺新加坡嗰陣已經想同你表白。」

「吓？你指沙灘嗰晚？」

「咦你又Feel到喎。」

「都唔係嘅，係你宜家講返起我就覺得係嗰晚。」

「嗰陣我仲緊張到嘔咗落海邊，只係你咁啱望咗第二邊發現唔到，哈哈。」

「哇你衰呀你，咁冇公德心。」

隨住我哋傾得越耐，慢慢就好似熱咗身噉，開始對有關表白嘅回憶毫不忌諱。或者係因為已經過咗一段時間，所以當咗做啲趣事回顧。

「噉你升咗上大學，出Pool未呀？」講講吓，就輪到Miss So八掛我啲感情狀況。

我突然醒起Miss So以前講過嘅一句說話，決定拎嚟回應返佢：「未啦，感情嘅嘢唔係好似閂水喉噉呀嘛。」

Miss So呆咗一呆，有啲猶豫噉問我：「你......你仲鍾意緊我？」

呢個時候，如果我答已經放低咗佢，話唔定就可以自此做返朋友。

不過我覺得一年前自己選擇咗坦白心意，無理由一年後反而變返自欺欺人。

「係呀，我仲鍾意你。」

我指一指Miss So上手隻巴斯光年，引用佢句口號：「To Infinity and Beyond。」

講完呢句，我開始有啲尷尬後悔。因為Miss So聽完之後完全冇反應，只係低頭沉默噉望住隻巴斯光年。

喺尷尬同斜陽直接照射嘅溫度夾攻之下，我瞬間面紅冒汗，甚至有股衝動，想直接喺二樓跳落地面離開現場。

可能係我始終唔擅長同異性傾偈，宜家呢個情況，我唯有講埋我最後想講嘅嘢嚟轉移話題。

「蘇煦瑜，多謝你。」

今次聽到呢句，佢終於有返反應，抬高頭望住我。

「雖然我哋最尾一齊唔到，但係我都好慶幸中學生涯可以識到你......多謝你帶畀我嘅回憶，我會永遠記住你。」

我由衷而笑噉望住Miss So，可以坦白自己心聲，確實係會有種豁然開朗嘅感覺，就好似你困咗喺個密室好耐，終於可以重見光明、呼吸新鮮空氣一樣。

似乎我講嗰啲嘢太過感動，令佢不自覺凝淚於眶。

「好啦，我差唔多走喇，第日再返嚟探你。」我輕輕拍一拍佢，準備道別。

Miss So又再低頭望一望隻巴斯光年，今次可以見到佢有啲用力握緊隻公仔。

「秦子柱...你記唔記得我成日教你乜嘢......？」

Miss So忍住淚水，嫣然一笑：
















「Never Give Up呀。」