投胎後竟然成為翻譯魔法師（魔法　冒險）: 5

今日除咗係安娜的生日，同時亦都係佢母親的死忌。雖然紅白兩事一齊搞好似唔係咁好，但顯然呢度冇呢種傳統上的顧慮。
我哋三人走向農舍後面的小山丘，山頭上有一個小山墳，正是安娜母親的的墓地。大叔手中捧着鮮花，安娜拿着今日生日會上的少許食物，我則帶着「兩梳蕉」…即係咩都冇帶…

大鑊…我真係唔知佢地會慶祝生日後去拜山…點算呢…咦？

正當我苦惱嘅時間，我見到遠處路邊有啲嘢，應該啱用…

我地行左大概15分鐘，終於到達安娜母親的的墓地。
「老婆，我哋黎探你啦…」維達大叔對著安娜母親的的墓碑自言自語:「前幾日我已經黎過，已經除咗雜草，過黎放低野就可以…咦？」
但叔放低手上嘅鮮花，突然見到我手上多咗啲嘢，便咪遠雙眼看。





「呢一種花叫百合花，係我鄉下拜山嘅時候，都有好多人送百合，據說代表靈魂和永恆的生命純度。」我解釋:「頭先見到，所以就立即去採左幾支最靚嘅。始終…兩手空空…始終都唔好意思…」

「有心。」大叔將花花一同放在墓碑前面，又拿出毛巾清潔暮碑:
「老婆，今年哩個女18歲啦，轉眼間已經咁大個女啦…你還好嗎？」維達大叔開始低聲細語:「由安娜出世開始，你就離開左我地，估唔到我哩個麻甩佬, 都可以一手養大安娜, 都算係做得唔錯啦…」維達大叔開始對住墓碑自言自語⋯或者緬懷離世之人，我哋總係有好多好多嘅說話都想講比佢哋聽，彷彿佢哋仍然在世一樣，彷彿佢哋仍然喺我哋身邊⋯⋯
唔知原來嘅世界⋯⋯有冇人會為我而哭⋯⋯對住我嘅神主牌說話⋯

「係呀！我哋呢排農場有啲特別野發生，有一個陌生嘅少年突然間出現咗，雖然佢失咗憶，但係佢經常都會分享恢復記憶後，過往佢鄉下嘅故事。佢鄉下好特別，係一個叫做香港嘅地方，如果你喺度就好啦，你學識咁高，你一定可以同佢傾到計。宜家得我一個粗魯人，都唔知應該點樣應對外省人⋯⋯」維達大叔前面這句子聽落去都幾正常，但係突然間後面話我鄉下喺香港開始，佢把聲好似變咗，有啲口音嘅感覺，但我仲聽得明。

安娜見到我眉頭一皺，就同我解釋：「我老竇啱啱講嘅精靈語，係我媽媽以前教佢嘅，你聽唔明都好正常⋯⋯」




其實我聽得明…但係飯廳好似安全啲，最起碼會有意無意，可以聽到一啲可能有人想隱瞞嘅事。

「咁你識唔識講精靈語？」我好奇問。

「識少少⋯始終我係半精靈，有精靈血統嘅我學習精靈語言嘅速度就係會比較快。但係始終我嘅學習對象係老豆，一個精靈語都係半桶水嘅人，又點會學到足⋯⋯」

「咁其實有冇人可以了解晒咁多種種族嘅語言？」我又好奇咁問

「真係有，但都真心少，要了解每一個種族嘅溝通方式同埋語言，其實係需要大量嘅時間，而多數要學識晒咁多種語言，都需要過百年嘅時間，所以一般都唔會係人類或者半精靈等等嘅種族做到呢個壯舉⋯⋯」安娜同我分析。





咁睇來呢個真係我嘅天賦，亦都可能係我投胎嘅時候附送俾我嘅技能，日後話唔定真係會好有用。

「安娜…安娜…」係邊個？
「吊飾…安娜…吊飾…」係四周嘅寧靜，有一把女聲在低聲細語。
「帶上…吊飾…精靈…森林…指引…」太細聲啦，我根本無辦法聽清楚，我只可以聽到幾個關鍵字⋯⋯

究竟係夜晚真係唔好亂咁去荒山野嶺，定係心理作用⋯我轉身望向大叔同安娜，但佢哋個樣又十分自然，好似只係得我一個聽到聲音咁⋯卻令我更加心寒。算啦，我都係唔好諗咁多⋯⋯

當我哋拜完山，掃完墓，就正式返到去農莊。當我梳洗完之後，返到去我嘅寢室，便拿出今日係書店裏面得到嘅魔法書，並且開始閱讀。
原本以為魔法書應該會係用字嚴謹，超級書面語，甚至幻想過會有文言文出現⋯（呢個世界當然唔會有文言文啦⋯⋯）
但令我意外嘅係，呢本書不但沒有過多嘅書面語，甚至有好多口語嘅句子，令到我睇嘅時候唔會覺得特別沉悶，反而有一種好似作者同我傾緊計嘅感覺。與其話佢係一本教科書，倒不如話呢本書只係有一個魔法師分享自己心得嘅一本記錄冊。

《魔法入門秘錄》

如果你係因為想學魔法所以睇呢本書，我好抱歉，亦都要鄭重同你講一句⋯ =15.600000381469727px呢個世界冇魔法㗎！！！

咳咳⋯⋯唔好意思，容許我解釋清楚。呢個世界的確冇魔法，所謂嘅魔法都只不過係能量嘅轉換，只不過有啲人有能力可以操控到能量嘅轉換，或者可以運用身邊唔同嘅能量並將佢實體化，便被人稱為魔法師。

由世界嘅創始，宇宙嘅起源，其實最先只係得兩種力量，我哋嘅世界會理解為火同冰。一切嘅事物都係有兩種力量互相交流而成。所以換句說話，所有嘅魔法都係源於火魔法同冰魔法所產生而成。（雖然好多人都認為火魔法係咁多種魔法裏面最差嗰種）

正如我所講，魔法只不過係能量嘅轉換，只要你可以感受到身體裏面嘅能量，以及外在嘅能量，利用你嘅創意力，嘗試將各種嘅能量幻想變成實體化，你就會自然明白到如何使用當中嘅力量。咁當然你第一步要學識嘅係感受能量嘅流動，亦都即係普遍魔法學院會教大家嘅魔法入門課第一節：打坐

打坐嘅目的其實係想大家可以將所有嘅感官集合成一，將所有嘅專注力注視返身體裏面嘅魔法流動，並感受外界各種嘅能量，當你感受到魔法嘅流動，便可以嘗試跟住佢一齊郁動，並嘗試將魔法嘅力量慢慢引導去身體各個位置，在用大腦加以幻想，將體內嘅魔法流動轉換成各種嘅魔法。

帶返個頭盔，我呢本書所教嘅全部都並非正式嘅學習魔法嘅途徑。正常在各國魔法學院都會有一系列嘅課堂教程，去教育你每一個特定嘅魔法，佢哋甚至會將魔法定義做各種招式，例如係火球術、光箭等等⋯⋯

=15.600000381469727px我呸！咁樣仲算係學習魔法咩！？ 
魔法本身根本就沒有特定嘅形象同招式，所謂嘅魔法招式其實只不過係前人幻想到，並將魔法實體化嘅例子。但只要你創意力夠，而且所思考嘅行動係實際嘅，基本上你都可以自創魔法。所以呢本書其實係教你點樣去用我嘅方法，去自創魔法。

不過，有啲嘢好殘酷嘅，想學魔法嘅人有好多，偏偏學到魔法嘅人卻好少，有啲嘢都係講天份嘅⋯⋯如果你天生魔力根本不足，就絕對冇可能學到魔法，因為當你控制唔到魔法嘅流動，好容易會走火入魔。所以第一樣要做嘅事，就係要測試左自己嘅魔力夠唔夠。但係正常檢測魔力嘅實驗實在太過繁複，原本係冇可能簡單做到。不過你唔好忘記，作者我並非一盞省油的燈。時間關係，你要嘅測驗已經準備好。（請翻到書背，將其中一隻手放上書背的魔法陣，心中默念「啟動」兩字即可）






我立即翻到書本，發現書本的確有又一個魔法陣，而且同書面嘅魔法陣並非同一個，我半信半疑將手放上去，好奇着究竟測試會否成功⋯⋯
我望向書背，發現魔法陣下方有細小嘅文字寫着：

不同程度的魔力會令到魔法陣發出不同的光芒：
白色：放棄吧⋯⋯
藍色：勉強可以做個學徒⋯⋯
綠色：普通
紅色：有料到
紫色：天才
金色：國家需要你！

估唔到連說明難都可以寫到咁有趣⋯⋯
我望向魔法陣，心中說： 啟動！魔法陣頓時發出光芒！





我見到魔法陣從書本背部穿過我嘅手掌，凌空浮起並且旋轉，魔法陣光芒變幻不定，由起初的白光一瞬間變咗紅光，慢慢變成紫色，最後從光芒嘅中心點慢慢散發出金色嘅光芒！！
咩我真係夠咁多嘅魔法力量？今次仲唔威過龍咁威！？

成當我開心自滿之際，金色嘅光芒突然往內收縮，突然間變咗一團黑球！？黑球突然間不斷膨脹，彷彿好似想撐爆房間，嚇到我立即縮手，黑球瞬間消失⋯⋯
整個房間再次恢復平靜，只係剩下呆滯的我，完全唔知發生咩事⋯⋯