投胎後竟然成為翻譯魔法師（魔法　冒險）: 6

「件事就係咁，我都唔知發生咩事⋯我只不過係跟着本書嘅指示去做⋯」我手中捧住一杯橘子茶，同埃爾登伯伯敘述返尋晚發生嘅事。「係咪我做錯左？」

「呵呵呵⋯彼得小弟，你冇做錯，你所做嘅程序都啱，會出現呢個結果並非你嘅錯。我可以解答你嘅疑難，不過你要老實答我個問題⋯」佢咪起雙眼，望向我：「你應該唔係屬於呢個世界⋯你話係咪？」

吓！？點解..點解佢會知㗎？

「唔使驚訝，主要係因為你嘅測試結果透露左你係來自另一個世界⋯⋯」埃爾登伯伯笑着說：「其實我都好奇，點解你會睇得明呢本書，正常來講你唔應該睇得明。」
「你嘅意思係⋯⋯」我疑惑地望一望本書。
「因為呢本書係用其實係用地侏語編寫而成。地侏語，是一種應用矮人文字母系統的語言，雖然佢同矮人族嘅語言系統有少許相似，但係所學習嘅難度卻大大提升，因其技術性的論文集對自然世界的知識分類而聞名。」埃爾登伯伯拍一拍本書：「正常人類要睇得明矮人族嘅語言本身已經有難度，更何況地侏語。」

​「原來係咁⋯⋯」我點一點頭，繼續追問：「咁既然你知道我唔係呢個世界嘅人，咁代表着你應該見識都好廣，所以先會有得出呢個結論，如果唔係點會貿貿然相信有人來自第二個世界。」

埃爾登伯伯沒有出聲，只係從書海中拿出一本書，然後遞給我：「打開第三章。」

我望向書面，見唔到作者名，只見到有點退色嘅文字，寫着：精靈之森-愛麗絲神殿出版。究竟呢個世界嘅神殿除咗拜神之外，仲會做啲乜嘢，竟然會出版書籍⋯⋯
話說，唔係咁岩得咁橋⋯⋯竟然又係愛麗絲嘅門徒所寫嘅書⋯⋯
打開書本，翻到去第三章，開始閱讀當中內容。
內容高達數萬字，等我簡略解釋：

內容大致係講當世界混亂嘅時候，創始之神將會為亞奇洛大陸安排人選並解決世界難題，神選之人多數會透過兩種形式出現：第一，從亞奇洛大陸上挑選新嘅人選，並安排佢哋嘅命運，從而透過神選之人嘅出現改變世界，俗稱「往生者」。第二，從第二個世界挑選合適人選，並給予他新嘅力量，並且為他安排大部份嘅命運，從而改變世界，俗稱「轉生者」。

基本上任何人如果成為神選之人，只要做事一切隨風，自然就會慢慢有指引同方向引導佢去做佢嘅使命。一般神選之人都會在一些情況下遇見挑選他的神明，並且在現實世界上，只要透過到達指定嘅神廟，都會得到新嘅指引和力量。
（下省過萬字⋯⋯）

我抬頭望向埃爾登伯伯，他笑着點點頭，問我：「你依家明白啦？」
「真係有人會相信呢本書嘅內容？呢啲故事係我過原本世界大把人可以寫到⋯⋯」我將書本歸還。
「或者啦～不過你啱啱睇嘅書，其實係由精靈森林裏邊，精靈祭司親手所寫嘅書，可信性都幾大，而且可以話係奇珍異寶，如果俾人見到，拍賣都可以過萬金幣⋯⋯」埃爾登伯伯隨手將本書掉到書海中⋯⋯

等陣先⋯⋯過萬金幣！？！？雖然我唔係好了解呢度嘅經濟系統，但以我所知，基本上你有100個金幣已經可以買到一間屋⋯⋯究竟過萬蚊係一個點樣嘅天文數字？佢居然仲可以咁隨手將本書亂咁掉⋯⋯真係唔知佢諗咩...

「咁話說當初你見到嘅神明係邊個⋯⋯」埃爾登伯伯幫我加茶：「想當年老夫去愛麗絲神廟，懇求祭司數十日先可以借到呢本書，不過一直都未還⋯⋯」

「如果你想還書，我估我可以幫到你⋯」「唔？」「當初見證我轉生嘅⋯正正就係森之女神愛麗絲⋯」

「呵呵呵⋯⋯ 創始之神啊！你話多巧合呀！一切都一定係緣份吧！」埃爾登伯伯哈哈大笑，然後拍一拍我膊頭：「唔會有錯，你必須要去神廟一趟，你就自然會了解到之後要做啲咩。咁還書嘅事就交俾你？」

「好啦⋯⋯就當係答謝你低價買咗支咁好嘅木笛俾我。」我苦笑着說。
「咦！？你知道咗啦？一定係維達同你講，呵呵⋯⋯我見安娜都18歲啦，老夫到唔到佢嘅生日會，最起碼要禮到吧？」埃爾登伯伯微微一笑：「佢喜歡嗎？」

我將尋日生日會嘅內容同埃爾登伯伯描述一次。
「哇！原來你原本個世界咁得意，老夫有機會都想去見識吓。」
「有機會嘅話，我同你講吓以前我鄉下嘅故事。」
「咁好？咁就有勞彼得小兄弟啦。」

話說，見埃爾登伯伯學識淵博，琴日喺拜山嘅時候遇到嘅靈異現象，應該都可以請教下佢。

「你竟然聽到『亡者之話』？咁睇來你真係唔簡單⋯⋯」埃爾登伯伯掃一掃自己的鬍子：「靈魂其實都只不過係能量，離世後，能量自然會消逝，不過如果意志力夠強，則會有部份嘅靈魂留咗喺現世之中，如果擁有大量魔力，並且可以懂得運用以及跟其他能量互動，自然就可以見到或者聽到死去嘅人所留低嘅能量以及言語。你尋日所遇到嘅就係呢個情況。」

「居然仲有咁嘅操作⋯⋯」我靜靜咁點點頭：「我明白了，今日真係打攪你啦⋯⋯」
「千祈唔好咁講，有年青人肯同我傾偈，我不知幾開心，呵呵呵⋯⋯」

就係咁，我先同埃爾登伯伯道別，然後返去農場。告別嘅時候，埃爾登伯伯提醒我，我嘅魔力之所以變成黑球嘅原因，係因為我來自第二個世界，身體嘅能量並非呢個世界可以理解到嘅魔力，所以自然產生黑色。而黑色球可以不斷膨脹，證明咗我嘅魔力都不小，所以建議我按照書中嘅方法先感受魔力嘅流動，並嘗試將佢實踐出嚟。
就係咁我決定返去要好好咁練習⋯
-------------

「首先盤膝而坐，呼吸節奏保持一樣⋯呼⋯然後合十雙眼，感受身體⋯⋯魔力嘅流動⋯⋯」按照書本嘅說話，開始學習魔法。
當我合十雙眼，慢慢呼吸，嘗試感受下佢所講嘅魔法流動⋯⋯
咩都感受唔到⋯⋯

係咪玩我㗎！？唔通又係嗰啲骨格精奇，送我一本秘笈⋯⋯完全唔明白⋯⋯

「要先清空個心，幻想成個身體嘅中心點有一股力量，將所有嘅感覺集中喺身體中心嘅力量，幻想呢種力量慢慢散播全身。」

我唯有再次嘗試，我深呼吸，今次我更加集中，幻想身體心口位置一股力量⋯⋯唔知道係因為自我催眠定點，我突然間感受到全新嘅所有力量好似真係集中左係心口位置，彷彿所有血液嘅流動，甚至呼吸都停止左咁。然後我在專心感受着呢個力量，慢慢發覺呢個力量慢慢擴散，化成一條友一條嘅光線連接着身體每一個部位，然後開始形成咗一個循環系統。

莫非呢一種就係魔法？我將開眼，心口嗰股力量立即消失⋯⋯於是我重新集中，慢慢習慣咗呢種感覺，當我再張開眼嘅時候，都會若隱若現感受到魔力係我身體裏面流動嘅感覺。於是我繼續睇魔法書：

「睇吓先⋯當我掌握左魔法嘅流動，就可以嘗試將力量集中係一點，並幻想呢股力量轉化成你想要嘅力量。如果你想製造火焰，先幻想將力量集中喺你嘅手指上，幻想凝聚力量然後慢慢變熱，力量慢慢轉換成熱能同光能，最後呢股力量將會實體化變成火焰⋯⋯」我照住書本嘅意思去試。

我伸出食指，全神貫注將所有嘅力量集中喺手指上，然後幻想魔力慢慢變熱和發光，係呢個時候，我見到我嘅手指開始產生一個光芒，光芒閃爍着，最後慢慢產生左一絲火焰！！！我成功咗！ 我真係成功咗？！

我更加專注以及輸入更多嘅能量到手指上嘅火焰，手指上火已變得越嚟越旺。然後我慢慢將魔力回收，我就見到手指上嘅火焰慢慢熄滅。
我總算學識咗點樣使用魔法，我突然間有個諗法。
既然魔法只需創意力，以及幻想魔法嘅成形，換言之只要我諗到各種嘅魔法形象，我就可以用到任何嘅魔法⋯⋯嘿！

作為睇漫畫嘅宅男，既然有啲咁嘅魔法，係時候要滿足自己嘅中二病…

我估亂郁到我嘅手指，扮結手印：「豪火球之術！」
一股魔力從我口中噴出，並透過手指上的火焰作為點燃器，一個火球從我口中噴出！！
掂啦！今次用唔俾我做到火影！？

「你⋯你做咗啲咩啊？！」
我玩得太過入神，竟然冇留意度，當我變出火球嘅時候，安娜剛好打開門睇到我嘅魔法⋯⋯
仲要俾佢見到我喺佢間屋度放火⋯⋯
今次真係賴嘢⋯⋯