［純愛短篇番外］以朋友之名嘅愛情，我地各自嘅單相思: 02. 唇邊的誘惑

望住坐喺自己眼前嘅張子萊，李穎容知道自己好中意佢，因為心臟一直都會因為佢而加快跳動

中學最後一年，佢知道自己中意張子萊

上到大學，因為喺同一間大學讀同一科，而令關係更加親近，心裏覺得有啲不安，但亦有啲安心；有考慮過要表白，但一諗到可能會影響到佢地嘅關係，李穎容又決定將一切收番喺心底

出到嚟社會，兩人終於要分道揚鑣，各自工作，但冇斷過嘅聯繫令佢覺得其實咁樣落去都唔錯⋯

一直以嚟都有無數次可以表白嘅機會，但係張子萊都冇講出心聲，李穎容每一次想講嘅時候，到最後都會因為怕而默默吞番一切





⋯

「張子萊⋯」因為飲醉而變得迷迷糊糊嘅李穎容緩緩開口

「做咩？」張子萊孭住李穎容，前臂上挽住李穎容嘅手袋

李穎容嘅氣息喺張子萊嘅耳邊，張子萊嘅呼吸亦變得淺而快；李穎容好似隻小貓一樣乖乖伏喺張子萊嘅背上

李穎容望住張子萊嘅眼神有啲迷離，李穎容緩緩眨一下眼，緩緩地收窄咗雙臂間嘅範圍





「張子萊⋯你好討厭⋯」李穎容耷低頭，細細聲地講道

平時大大咧咧嘅李穎容喺飲醉之後就好似變咗一個人一樣，講嘢嘅聲線都變得柔和起嚟

「嗯。」張子萊點點頭，佢都已經習慣咗醉酒後嘅李穎容嘅瘋言瘋語

「你好討厭⋯仲好蠢⋯」因為酒精的刺激令李穎容嘅膽量上升，嗰啲一直以嚟講嗰出口嘅說話又上到喉嚨，「難怪冇人要你⋯」

「唔係冇人要我，係我唔揀佢地。」張子萊平靜地開口講道





「所以話點解⋯點解唔揀⋯？」李穎容似醉沒醉，下巴靠喺張子萊嘅膊頭上

「唔中意咪唔揀。」張子萊直言道，佢稍微回頭望咗李穎容一眼，「同唔到中意嘅人一齊，我寧願一直單身。」

張子萊一直都等緊李穎容，默默中意佢、默默陪伴佢，或者喺外人嘅眼中佢兩個已經好似情侶一樣，但只有佢地自己知道，佢地之間一啲關係都冇，只有朋友嘅名份

「張子萊，你就真係⋯一直都冇遇到中意嘅人咩⋯？」李穎容迷迷糊糊咁問道

張子萊靜咗落嚟，李穎容耷低頭靠住張子萊瞓著咗

「有呀⋯只係佢好似完全唔知⋯」張子萊細聲地講道

張子萊稍微望一望李穎容，見到李穎容恰著咗嘅時候，張子萊微微一笑

「如果我勇敢啲一早就講出口，可能今日都會比較唔一樣⋯」張子萊自嘲一般笑道





⋯

張子萊終於孭住李穎容番到屋企，張子萊將李穎容放到床上，幫佢將腳上嘅高踭鞋除落嚟，自己坐喺床邊稍作休息

張子萊拎起李穎容嘅高踭鞋起身，打算走嘅同時順手幫佢將高踭鞋放番出去

「張子萊⋯！」李穎容踢開被，一下子坐起身從旁攬住張子萊，「唔好走⋯」

「我番屋企啦要。」張子萊捉住李穎容嘅手，將佢嘅手拎開

「今日係我生日⋯」李穎容跪坐喺床上，將額頭靠喺張子萊嘅膊頭上，「唔準走⋯要補償番比我啦⋯！」

「你生日過咗啦⋯」張子萊無奈一笑





李穎容跪喺床上坐好湊近張子萊，眼見李穎容愈湊愈近，鼻尖都快要掂到自己嘅鼻尖，唇都快要貼上嚟時，張子萊一下子伸手，將手蓋住李穎容嘅嘴

「得啦，我唔走啦⋯乖啦，瞓啦。」張子萊柔聲道，然後將李穎容壓到床上，掀起被又將李穎容包住，「瞓啦，我喺度。」

「唔⋯熱⋯」李穎容邊講邊解開自己嘅頸喉鈕，張子萊頓時撇開臉

李穎容解咗兩粒鈕後便瞓著咗，張子萊感覺到李穎容冇再郁嚟郁去之後先回頭瞄咗一眼

「呼⋯」張子萊將被拉上去，拉上到李穎容嘅頸上蓋住

邪念，作為男人嘅張子萊又點可能冇諗過？但係每一次張子萊都忍過嚟，抑壓住自己

佢知道李穎容啱啱湊近想錫佢，但佢卻伸手將佢嘅嘴掩住，唔係張子萊唔想錫李穎容，而係張子萊知道，一旦嘗試咗，佢就冇辦法再抑壓自己，佢會想要更多⋯

「你可唔可以對我有啲防備⋯？」張子萊坐喺李穎容嘅床邊對熟睡嘅李穎容講道，「我係男人呀李穎容⋯」





李穎容已經唔係第一次喺張子萊面前飲到醉熏熏，張子萊亦唔係第一次將咁樣嘅李穎容送番屋企

面對李穎容對佢嘅信任，張子萊都唔知自己要高興定係唔高興先啱⋯喺佢面前嘅李穎容總係毫無防備

每一次張子萊都抑壓住自己，佢知道唔可以咁樣乘人之危，特別係一個醉酒唔知自己做緊咩嘅人，縱使係李穎容主動想要獻吻，佢都唔會比李穎容錫到佢

面對李穎容對佢嘅「誘惑」，佢冇一次係唔心動，但亦冇一次會過界⋯




IG Link: https://www.instagram.com/nd_cotttoncandy/?hl=zh-tw