［純愛短篇番外］以朋友之名嘅愛情，我地各自嘅單相思: 03. 「只是朋友」

翌日，星期六

「我走啦。」張子萊拎齊嘢，孭番好個袋，「成晚都冇沖涼好污糟。」

「多謝你又送我番嚟～」李穎容微微一笑講道

「嗯，又唔係第一次。但唔該你唔好飲咁醉，一個女仔住，好心你就小心啲啦。」張子萊將琴晚拆鬆咗嘅領呔重新繫一次

「我幫你綁啦～」李穎容行到去張子萊嘅面前，捉起咗佢嘅領呔，「笨手笨腳咁。」





「你有冇聽到我講咩？」張子萊移開了視線

「我知啦～你喺度我好放心啦～」李穎容笑了笑講道，但好快又慢慢地笑容收起，「你都唔會做啲咩，我⋯信得過你。」

張子萊留意着李穎容嘅表情變化，但冇出聲，喺李穎容信心嘅背後，係張子萊無數次嘅抑壓同忍耐；張子萊偷偷地瞄咗李穎容一眼，李穎容正幫佢繫着領呔

「好似夫妻一樣⋯」「好似夫妻一樣⋯」

張子萊同李穎容嘅內心同時講道，李穎容輕輕抿唇，領呔已經綁好，但李穎容冇鬆手





李穎容抬起頭望向張子萊，張子萊望咗李穎容一眼，然後迴避咗李穎容嘅視線

「仲捉住我做咩⋯」張子萊耷低頭望住自己嘅呔，「我要番屋企啦李小姐。」

「你點解咩都唔做⋯」李穎容喺心中問出佢一直想問但又唔敢問嘅問題，「明明就算你做咗我都唔會怪你⋯只限於你⋯」

李穎容冇勇氣開口去問出呢個問題，將領呔結推上去嘅手忽然間用力推

「咳咳⋯！」張子萊比一下子索實嘅領呔搞到氣都透唔順，「李穎容⋯！李穎容⋯！要死啦⋯！」





「呀？」李穎容回神過嚟，眼見自己將領呔推得太緊時即刻就鬆手，「Sorry呀！」

「咳⋯！你想謀殺我呀⋯！」張子萊咳咗兩聲，將領呔拉鬆少許，「差啲要死喺你手啦！」

「係呀！想殺咗你呀！」李穎容一拳打喺張子萊嘅胸口上，「只係殺人未遂咋！」

「我番屋企啦！怕咗你。」張子萊拉一拉件衫，企喺門口著鞋

「下次見啦～再約呀！」李穎容講道

「好呀～再約啦～」張子萊踏出李穎容嘅家門

李穎容閂上大門，佢都不禁開始懷疑點解張子萊可以咩都冇對自己做過，好似連少少歪念都冇一樣，佢都唔知道到底係張子萊冇需求定係自己冇魅力

「如果佢係有需求但咩都唔做，咁佢嘅定力都太強啦掛⋯」李穎容自言自語地講道，「定係我太冇魅力⋯？」





張子萊行番屋企，宜家搬咗屋嘅李穎容所住嘅地方同張子萊嘅屋企比起中學時更近，張子萊拉起自己嘅外套聞咗一下，身上都係李穎容屋企嘅香薰味

「成陣味⋯」張子萊無奈地細聲講道，「成身都好痛好攰⋯」

琴晚張子萊坐喺地上，伏喺李穎容嘅床邊瞓咗成晚，頸同腰都好痛好攰，真係咩都冇做過

張子萊諗起琴晚伏喺李穎容床邊嘅時候，李穎容一個翻身就面向住張子萊瞓；張子萊嘅手輕輕掃過李穎容嘅臉頰，力道都唔敢大，只係輕輕一掃

望住李穎容對自己毫無防備，佢都唔知可以講咩，雖然佢真係唔會出手，但係李穎容都過分信任佢

「如果我真係做咗啲咩嘅話咁點算⋯」伏喺床邊嘅張子萊對熟睡嘅李穎容問道，「我地真係會連朋友都冇得做⋯」

李穎容明明知道自己就喺佢隔離，一個男人喺自己隔離，但係卻仍然安心入睡





「李穎容，到底蠢嘅係邊個⋯？」張子萊柔聲問道，「咁多年都feel唔到，都太遲鈍啦掛⋯」

張子萊琴晚最終都係伏喺床邊瞓咗，今朝早什至比李穎容更早醒過嚟

⋯

星期一，係一個普通嘅上班日

「Cyrus你咁早食完飯番嚟嘅今日？」一個女同事拎住水杯行入茶水間對張子萊講道

「唔係呀，同平時都一樣。」酙完水嘅張子萊行到一旁坐低休息一陣，「都係差唔多時間咋嘛～」

「係呢係呢～」女同事Chole拎住一包即溶咖啡粉行到張子萊對面坐低，「上星期五難怪你咁趕住走啦～原來你約咗女朋友呀～」

「女朋友？」張子萊輕皺起眉頭，有啲疑惑，但知道Chole講緊嘅係李穎容





「星期五嗰晚，我見到開完OT之後見到你孭住個女仔喎，咁close仲唔係女朋友？」Chole一臉好奇地問道

「唔係女朋友，只係朋友。」張子萊否認道

「朋友？close到可以咁樣！？」Chole一臉驚訝

「冇話唔可以，我地係⋯識咗好耐嘅朋友⋯」張子萊心裏都窒咗一下，佢當然希望佢同李穎容唔止係朋友

「今晚我地部門一齊食飯，你去唔去呀？」Chole問道




IG Link: https://www.instagram.com/nd_cotttoncandy/?hl=zh-tw