［純愛短篇番外］以朋友之名嘅愛情，我地各自嘅單相思: 11. 實不相暪

「多謝你嘛～呢幾日都陪我～」李穎容邊將薯仔切粒邊講道

「大家都識咗咁耐啦～」張子萊聽到李穎容咁講，突然間覺得有啲唔自在，「你唔會喺啲嘢度落毒㗎可？」

張子萊頓時轉話題，對李穎容開玩笑講道，只係為咗避免自己繼續唔自在

「唔會囉！」李穎容無奈地反咗個白眼

張子萊拎住盒檸檬茶企喺李穎容嘅身旁默默地望住佢，張子萊忽然一笑，李穎容抬頭望向佢





「笑咩呀突然⋯？」李穎容望咗張子萊一眼之後又繼續切菜

「琴晚我番到屋企，我媽突然間問我放工之後去咗邊⋯」張子萊望住李穎容拎咗個大碗出嚟，將切好嘅雞肉都放入碗中，「我問佢做咩咁問，我媽拎住我件西裝外套，話有好大陣味。」

「咩味？我屋企嗰個香薰？」李穎容不禁笑咗出嚟，「咁你答咗啲咩？」

「我話佢知嚟咗你屋企⋯」張子萊移開視線講道，「我媽即刻好興奮咁問，係唔係一齊咗啦？」

「阿姨每次聽到你提起我都要問一次。」李穎容笑道，「睇嚟阿姨好擔心你嘅戀愛。」





張子萊笑咗一笑，其實琴晚張媽媽唔止問咗呢啲，但張子萊冇講比李穎容知嘅打算

⋯

琴晚

「我話你幾時搵番個女朋友？你單身咗幾耐呀？」張媽媽邊幫張子萊摺好外套邊問道

「唔知呀，盡快啦⋯」張子萊頹坐喺梳化上





「仔呀，阿媽都要急死啦，你仲唔拍拖⋯！」張媽媽坐低喺張子萊隔離，「你睇下人地穎容都單身，你地可以咁樣一直做朋友㗎咩？穎容都幾好呀！」

「唉⋯真係唔想講嗰句都講埋比你知⋯」張子萊嘆咗一口氣然後坐起身望住張媽媽，「如果佢係唔好，我都唔會中意佢啦⋯」

張媽媽一臉訝異咁望住張子萊，張子萊又嘆咗一口氣

「我真係冇厄你，我中意咗穎容好多年㗎啦⋯」張子萊對張媽媽坦白地講道，「你唔好問我點解唔表白⋯」

「但陣間比人追走咗點算？」張媽媽輕皺起眉頭，「雖然話呢啲嘢逼唔嚟啫⋯」

「總之我有分寸㗎啦⋯27歲前會表白㗎啦，你唔洗擔心⋯」張子萊講道

⋯

「佢都擔心咗好耐⋯」張子萊無奈地微咗一笑





「所以話你搵個人拍拖嘛～」李穎容無意就講咗一句

「突然間同邊個拍拖？同你？定同自己？」張子萊試探般問道，「講到咁容易⋯而且我都有啲想結婚啦⋯」

李穎容怔了怔，原來張子萊已經想結婚，但自己卻從來都冇諗過結婚呢樣嘢

「咁突然嘅？」李穎容用笑容嚟遮掩自己嘅心事

「都唔突然啦，之前都有講過想結婚。」張子萊微微聳肩

李穎容靜咗落嚟，佢都唔知道可以講咩好，婚姻，對李穎容嚟講仍然好遙遠一樣，佢冇諗過要同一個點嘅人結婚，亦冇諗過結咗婚之後嘅生活會變成點

李穎容一直想將搭喺膊頭上嘅頭髮撥番去後面，但宜家對手污糟，佢唔想用手掂頭髮；張子萊留意到後，默默地行出廚房，然到去李穎容嘅睡房，喺佢嘅枱上拎咗個髮圈





張子萊行番去廚房企喺李穎容嘅身後，幫佢梳起馬尾紮好

「唔該⋯」李穎容帶着少許腼腆地講道

「好耐都冇見過你紮馬尾。」張子萊行番去李穎容身旁

望住紮起馬尾嘅李穎容，張子萊嘅腦海中浮現出中學時嘅畫面，當初仍然喺青春年華嘅佢地，如今都已經經歷社會嘅洗禮

張子萊莫名其妙地覺得氣氛有啲尷尬，於是行番出廳坐低

李穎容企喺廚房，默默地紅了臉頰，佢知道自己中意張子萊中意到不得了，但係，佢冇勇氣開口

李穎容勇敢又樂觀，但係唯獨對住張子萊卻連開口表白嘅勇氣都冇，正因為中意到不得了，所以先唔想失去

李穎容唔知道張子萊同佢有同樣嘅想法；張子萊亦唔知道原來李穎容都係咁諗





但嚟到呢一刻，決定咗27歲前表白嘅張子萊，考慮緊點樣話比李穎容知佢嘅心意；知道張子萊有想結婚嘅心嘅李穎容，諗緊要點樣證明比佢睇自己係一個可以結婚嘅人選

⋯

夜晚食飯

李穎容同張子萊對住坐，李穎容等待緊張子萊對於佢煮嘅飯餸嘅評價

「點呀？」李穎容緊張地問道，「好唔好食呀？」

「好食呀～」張子萊讚賞道，「原來你煮嘢咁好食⋯！」

「嘻⋯當然啦！」李穎容笑了笑，自豪地回答道，「既然好食，你要清晒㗎！」








IG Link: https://www.instagram.com/nd_cotttoncandy/?hl=zh-tw