［純愛短篇番外］以朋友之名嘅愛情，我地各自嘅單相思: 12. 按奈不住的心

張子萊笑一笑然後夾餸食，李穎容心裏有種感覺，咁樣坐埋一齊食飯，兩個人，就好似兩夫妻一齊生活一樣，簡單嘅飯餸都已經可以令人感覺到幸福

兩個人一齊，只要係互相愛慕互相珍惜，再簡單嘅日子都會變得幸福同有意義

李穎容嘅嘴角不禁上揚，自己同張子萊嘅關係，三言兩語間都講唔清，比上不足、比下有餘嘅關係先係令佢苦惱嘅地方

「如果有咩契機可以捅破嗰層紙就好⋯」李穎容悄悄地抬眼望咗張子萊一眼

「嘩～你真係清晒⋯！」李穎容望住枱上空空嘅碟





「你話要清晒㗎嘛～」張子萊笑了笑，拎起水杯飲咗啖水，「好食就自然會食晒㗎啦～」

「好啦～」李穎容企起身將碗碟拎入廚房，「我去洗嘢先～」

「我幫你洗。」張子萊跟喺李穎容嘅身後行入廚房

「哦，咁我唔客氣㗎啦～我喺隔離抹碗碟啦！」李穎容拎住一塊抹碗布企喺張子萊身旁

「你幾時有同我客氣過？」張子萊無奈一笑，拎起百潔布洗碗





「嗰個大叔今晚會唔會又嚟㩒鐘⋯」李穎容忽然間問道，「如果佢喺你走咗之後嚟㩒鐘咁我要點⋯」

「打比我叫我落嚟囉⋯」張子萊講道，「我地住得咁近。」

「不如今晚你喺度瞓，咁我咪唔洗怕。」李穎容理直氣壯地問張子萊

「你搞笑⋯？」張子萊沒好氣地瞄咗李穎容一眼

「我講真㗎！咁陣間佢半夜三更㩒我鐘點算？」李穎容講道，張子萊靜咗落嚟，因為聽起嚟陣好似真係好啱咁





「咁如果我今晚喺度瞓佢唔㩒鐘，佢聽晚先㩒鐘咁點？」張子萊反問道

「唔⋯咁呀⋯」李穎容自己都唔知要點

「我唔通晚晚都喺度瞓？要瞓到幾時呀？」張子萊閂上水喉，用抹手布抹乾手

「都okay喎～我唔介意呀～」李穎容笑咗一笑講道，「同你一齊住嘅話，我可以接受啦～」

聽到李穎容咁講，張子萊都唔知要比咩反應佢先係

「你對一個男人講啲咁嘅嘢真係好咩？」張子萊無奈地望住李穎容問道

「你咋嘛，我冇咩所謂。」李穎容直接講出佢嘅心聲，「所以，你今晚要唔要喺度陪我？」

⋯





「我點解真係會留低陪佢⋯」沖完涼出嚟嘅張子萊喺心中不解地問自己

李穎容一番懇求後，張子萊都係番屋企拎咗可以替換嘅衫褲過嚟

「算啦⋯陣間嗰個變態又嚟嘅話，得李穎容一個人都唔知點算⋯」張子萊行到梳化坐低

「張子萊你要瞓廳呀？」李穎容喺睡房行出嚟，手上拎住張薄被

「唔係呢？你瞓廳？」張子萊嘅頸上搭住毛巾，「定你期望我坐喺你床邊瞓？」

「安心啲嘛⋯」李穎容微微耷低頭細聲地講道

「你屋企又唔係好大，梳化隔離都已經係你嘅房門口，你一出嚟都可以見到我。」張子萊講道





「嗯，都係⋯」李穎容嘅心裏莫名其妙地有啲緊張，畢竟第一次，張子萊喺佢屋企過夜

「張子萊，你想嘅話可以同我一齊瞓。」李穎容半開玩笑地講道，「雖然我張床逼逼地，不過安全感多啲嘛～」

「你又講啲咩⋯係唔係今晚我喺度開心得濟，開始發神經？」張子萊無奈地將搭喺頸上嘅毛巾拉落嚟

「開心呀～平時得我一個喺屋企好悶⋯難得今晚有人陪我～」李穎容企喺放門口

「好，一齊瞓囉，既然你想。」張子萊企起身行到去李穎容面前，「不過如果今晚發生啲咩事嘅話⋯」

張子萊冇將說話講完，只係微微耷低頭望住李穎容，李穎容不禁屏住呼吸

明明知道咩都唔會發生，但李穎容都係有啲緊張；明明知道張子萊咩都唔會做，但係都係不禁屏住呼吸、心跳加速

「好、好呀！一齊瞓呀！」李穎容唔知哪來嘅勇氣，果敢地講道





張子萊不禁一怔，李穎容一副無畏無懼嘅表情望住張子萊，張子萊卻不禁退縮

「痴線⋯我講笑咋！」張子萊伸手輕輕地拍咗李穎容嘅額頭一下

「我都係講笑咋！我先唔想同你一齊瞓！」李穎容笑道，然後轉身走到床邊拎起一個枕頭

李穎容將床上其中一個枕頭放到梳化比張子萊瞓，李穎容望向門口

「佢今晚冇㩒鐘。」李穎容望住時鐘，「都11點幾啦⋯」

「佢半夜㩒都唔緊要，我喺度。」張子萊灘低喺梳化

「呵～欠⋯」李穎容打咗個喊露，「咁，晚安啦⋯」





「晚安。」張子萊點點頭，李穎容將屋內嘅燈都閂上後便入房瞓覺

李穎容瞓喺床上左轉右轉，都唔知轉咗幾耐，但點轉都好就係瞓唔著

李穎容輕輕力拉開虛掩着嘅門，輕手輕腳地行出睡房，喺睡房門嘅旁邊就係梳化

張子萊平瞓喺梳化上，左手搭喺肚上，右手曲起放喺頭下枕住瞓

「張子萊⋯」李穎容蹲低喺梳化旁邊，悄悄地伸手摸咗張子萊嘅頭髮一下，「你喺度真係好⋯」

李穎容雙膝着地，㩒住梳化邊悄悄地湊近張子萊，想悄悄地偷親一口




IG Link: https://www.instagram.com/nd_cotttoncandy/?hl=zh-tw