［純愛短篇番外］以朋友之名嘅愛情，我地各自嘅單相思: 15. 說了奇怪的話一樣

「唔係我可以點？」張子萊將領呔除落嚟，「放你一個喺度都太危險，嗰個大叔又喺附近⋯」

「你聽日喺呢度直接番工？」李穎容問道

「唔係呢？」張子萊無奈地問道，「得啦，你唔洗擔心。」

張子萊又好似嗰一日一樣喺廳瞓，李穎容虛掩着房門

翌日，當張子萊嘅鬧鐘響起嚟，佢起身嘅時候，發現佢嘅西裝用衣架整齊地掛咗喺一旁嘅架上，裇衫同長褲都被燙得畢直；李穎容早就換好衫化緊妝





「早晨。」李穎容喺廁所行出嚟，手上拎住化妝品，「你用啦廁所～」

「你幫我燙過衫呀？」張子萊換上裇衫同長褲後打開廁所門

「哦係呀，只係見你件衫有啲皺，所以幫你燙咗一燙。」李穎容拎住胭脂掃喺兩邊臉頰上各掃咗一下

「唔該⋯」張子萊莫名其妙地覺得有啲唔好意思，但心裏有啲激動

張子萊梳洗完後行出去拎去領呔，平日佢都習慣重綁一次





「要唔要我幫你⋯？」李穎容試探般地朝張子萊伸手問道

「哦⋯」張子萊鬼使神差地將領呔遞到李穎容嘅手上

李穎容將領呔圍喺張子萊嘅頸上，幫佢打好領呔，反好衣領

「我都打得幾好睇嘛～」李穎容避免尷尬而笑了笑

「嗯，的確好睇過我自己打嘅呔～」張子萊笑了笑，轉身拎起西裝外套





兩人一同出門口，一打開鐵閘，對面單位嘅公公婆婆都開門出嚟去樓下食早餐散下步

李穎容對公公婆婆微微一笑點點頭，張子萊同李穎容行喺公公婆婆嘅前方，後方傳嚟閂上門同鐵閘嘅聲音

「原來個妹妹結咗婚啦～」婆婆細聲地對公公講道

其實喺走廊就算細聲講嘢都會有啲回音，李穎容嘅心臟緊縮咗一下

「可能唔係佢老公呢～」公公望一望李穎容同張子萊嘅背影又開口講道

張子萊就好似咩都聽唔到一樣自然地行，張子萊對於呢啲好似「抽水」一樣嘅事早就習慣咗，都冇咩大反應

「可能兩個後生仔同居試婚呢，呢個年頭都唔出奇。」公公又講道

「會唔會奉子成婚？」婆婆講道





「我個肚平到咁邊似有咗⋯」李穎容下意識伸手摸摸自己平坦嘅小腹

「你理佢呀～」公公無奈地講道

張子萊同李穎容急急腳行入升降機，李穎容先鬆一口

李穎容有啲唔自在咁抬頭望向張子萊，張子萊感覺到李穎容嘅視線便轉頭望向佢，兩人嘅視線對上，李穎容尷尬地笑了笑，佢忽然間唔知道要用咩表情望住張子萊一樣有啲尷尬同扭擰

「噗⋯人地話你奉子成婚～」張子萊講嘅同時不禁笑咗出嚟

「我個肚平到咁，哪來嘅子？」李穎容無奈地反白眼，「仲有呀！人地講緊我地呀，又唔係淨係我！你呀！負責任呀！」

「痴線啦你！我負咩責任呀？」張子萊望住李穎容，一臉無語，「我同你又冇做過嗰啲嘢，如果你係有咗嘅話，都唔係我嘅，咁我負咩責任呀？」





張子萊啱啱講完最後一個字就即刻意識到自己好似衝口而出講錯嘢一樣，但講咗嘅嘢已經收唔番

「即係如果係你嘅話，你會負責？」李穎容喺心裏笑了一笑，但表面上卻擺出疑惑嘅表情

「假、假設性問題！」張子萊尷尬地撇開臉，然後又降低咗聲量講道，「再講，如果係我嘅話，唔通唔負責任走咗去咩⋯？」

李穎容聽到張子萊咁講之後，不禁莞爾，總覺得自己冇中意錯人；張子萊眼睛嘅餘光留意到李穎容臉上淡淡嘅笑容，自己都不自覺地揚起嘴角

⋯

張子萊喺公司經過女同事身邊後，身邊嘅女同事都會下意識望佢一眼，張子萊自己都察覺到呢樣奇怪嘅事

「我好奇怪咩⋯？」張子萊去完廁所，喺洗手盆前洗手後望住鏡中嘅自己打量一番

Alex喺廁格行出嚟，企喺張子萊身旁嘅洗手盆前洗手





「Alex，我今日好奇怪咩？」張子萊問道，「今日唔知做咩，啲女同事經過我隔離之後都望一望我⋯我好奇怪？」

「你真係唔知點解咩？」Alex望咗張子萊一眼後意味深長地笑了笑

「點解？」張子萊望住整理緊頭髮嘅Alex疑惑地問道

「你今日嘅裇衫燙到直一直，褲都起骨，你平時係咁㗎咩？」Alex笑一笑，指一指張子萊嘅裇衫

「吓？咁就要望我㗎啦咩⋯」張子萊望一望自己嘅裇衫

「重點係你今日個身好香，咁大陣味你聞唔到咩？有陣茉莉花味，你成個人都有呢陣味呀！」Alex笑道，「大家都講緊你係唔係識咗女朋友，同女朋友同居之類啦！」

張子萊諗起李穎容屋企放着嘅香薰，琴晚西裝除咗之後就掛咗喺香薰隔離，所以吸咗香薰嘅味道，張子萊冇解釋啲咩，只係無奈地笑一笑就算








IG Link: https://www.instagram.com/nd_cotttoncandy/?hl=zh-tw