［純愛短篇番外］以朋友之名嘅愛情，我地各自嘅單相思: 16. 情敵的挑釁

張子萊行番埋位，坐喺佢隔離嘅Eva望一望佢，坐喺佢隔離當然會聞到張子萊身上嘅茉莉花味，張子萊將身上嘅外套除落嚟搭喺椅背上，然後拎起手機望咗一眼，不禁一笑

「Cyrus！」Gordon叫咗張子萊一聲，張子萊企起身行去搵Gordon

Eva望向張子萊嘅枱面，佢嘅手機放喺枱上冇拎走亦冇鎖上，仍然停留喺WhatsApp嘅頁面，Eva喺張子萊行開咗之後，Eva攝手攝腳地起身行到去張子萊嘅座位，望向張子萊嘅手機

李穎容：今晚記得1930喺food court等

「Food court呀⋯」Eva行番埋位，悄悄地mark咗喺手機





夜晚放工嘅時候，張子萊先走，去到約好嘅地方先等李穎容；Eva喺張子萊離開座位嘅時候先係微微一笑同佢講拜拜，然後又望一望手錶計時間

Eva喺19:15嘅時候先離開公司，佢行到去food court，見到李穎容坐喺座位，但張子萊唔喺度；Eva買咗個飯，然後捧住餐盤四處行，因為剛好係放工時間，所以好難搵位，對Eva嚟講的確係一個好機會嚟

「嗨～你仲認唔認得我呀？」Eva拎住餐盤行到去李穎容坐緊嘅位置，李穎容聽到有人朝佢搭話便抬頭望，一望發現原來係Eva，「唔好意思呀，附近都冇位啦⋯介唔介意我⋯」

「哦，可以呀～」李穎容愣了一下後點點頭，「坐呀～」

「你自己一個呀？唔買嘢食嘅？」Eva冇即刻打開飯盒食飯，反而先問李穎容





「等緊張子萊，佢未放工呀？」李穎容笑咗一笑

「唔係呀～佢仲早過我走。」Eva微微一笑講道，「可能佢嚟緊。」

Eva微微深呼吸，佢聞到李穎容身上淡淡嘅茉莉花香，同張子萊身上嘅茉莉花味係一樣⋯Eva默默地望咗李穎容一眼

「喂喂！」張子萊行到李穎容嘅身後，一下子伸手就拍落李穎容嘅頭上，喺下一個瞬間佢見到坐喺李穎容對面嘅Eva，「你喺度嘅？」

「你咁遲嘅？」李穎容望向張子萊，張子萊將個袋放低喺李穎容隔離嘅座位上





「我買咗啲嘢先再過嚟。」張子萊喺袋中拎出銀包，「你都係照舊㗎啦，我直接去買啦。」

「嗯嗯。」李穎容點點頭，望住張子萊行去買嘢食

「你用緊茉莉花味嘅香水呀？好好聞。」Eva趁張子萊行開咗去買飯便問道

「唔係香水嚟，係我屋企用緊嘅香薰啦～」李穎容下意識微微耷低頭望一望自己嘅裇衫，微微一笑回答道

「你屋企嘅香薰⋯？」Eva故意擺出愕然嘅表情，李穎容一臉疑惑地望住Eva，Eva頓時微微一笑，「因為Cyrus身上都係呢陣味～今日大家仲講笑話佢係唔係識咗女朋友，同女朋友同居之類～」

「哦⋯」李穎容笑咗一笑，望向等緊嘢食嘅張子萊後又望向Eva，「可能因為琴晚佢套西裝掛咗喺香薰隔離，所以先咁濃。」

Eva愕一愕然，琴晚⋯？掛咗喺香薰隔離⋯？眼前呢個人同張子萊到底係咩關係⋯？

「琴晚⋯？」Eva努力地令自己睇起嚟冷靜啲，「你地一齊住⋯？」





「唔係呀～」李穎容見到Eva嘅反應後不禁一笑，然後又講道，「只係最近有啲事，所以佢嚟陪我。」

女人嘅直覺，早就話咗比李穎容知呢個Eva一定對張子萊有啲咩，而李穎容當然要先下手為強，先借意宣示主權；Eva輕皺起眉頭，佢嘅直覺話佢知，呢兩個人嘅關係唔簡單，Eva知道張子萊中意李穎容，但只要李穎容唔係中意張子萊，咁佢就仲有機會

「你地係朋友？單純地⋯」Eva開門見山地問道

「嗯。」李穎容猶疑地嗯咗一聲

「既然係咁，我都唔怕開門見山同你講啦～」Eva望一望等緊嘢食嘅張子萊，然後又望向李穎容，「我中意Cyrus，你既然同佢只係朋友，咁唔知我可唔可以厚面皮咁，請你幫我一個忙？」

李穎容聽到Eva講嘅嘢，心裏特別在意，因為眼前呢個女仔，所有條件都比自己好好多，人又靚又有本事，再加上早排張子萊兩頭唔到岸嘅回答，令李穎容心裏有少許擔心

「如果你係想我幫你喺佢面前講好說話令佢中意你嘅話，我諗我幫唔到你。」李穎容估到Eva嘅意圖，喺佢開口前先拒絕幫忙，「張子萊唔係嗰種會聽人講兩句就會改變想法嘅人，就算好似你咁靚都好，都一樣。」





「你都覺得我靚？」Eva微微一笑問道，「Cyrus都有咁樣講過～」

「佢對女仔，就係咁。」李穎容亦微微一笑回應，兩個女仔之間有種淡淡嘅火藥味滲出嚟

「有時靚，可能都係一種優勢～我呀，係個勇於嘗試嘅人嚟，我會用盡所有方法去得到我想要嘅嘢。」Eva拎起放喺餐盤一角嘅杯，飲咗一啖茶，「既然你地只係朋友，咁就太好啦～」




IG Link: https://www.instagram.com/nd_cotttoncandy/?hl=zh-tw