當問題少年遇上問題少女: 3.初次踏入隔離的女校

放學後，九華嘅羽毛球隊係禮堂集合，由對眼眉好似紫菜咁粗嘅彭sir宣佈事項
 
「好，各位同學，我地已經決定左派邊兩位去同真光組隊參賽啦。因為你地成班冇人肯同人夾，所以我搵左球隊B組球員去。第一位，袁文浩，第二位，常子傑」
 
當眾人聽到我個名之後，大家都好驚訝，因為我已經一年左右冇參賽
 
「傑仔參賽?」 「佢已經走返出黎?」
 
彭SIR望一望大家「傑仔佢只係落名者，佢最多會幫手練波，至於出唔出場，我都唔知」
 


估唔到，我一年冇參賽，就已經落左去B隊果到
 
我地學校嘅校隊，係分為A同B兩組
 
A組，係公開組，或者係代表學校出戰學界嘅組別
 
而B組，就係一D實力次一等嘅隊員所組成，佢地責任只係負責友誼賽、或者負責球隊行政。除非可以係校內賽打低A組成員，否則，B組只可以企係對方後邊，所以今次同女校組隊，大家都冇咩興趣
 
第二日放學，彭sir帶住我同文浩兩個人，踏入左真光女書院
 


一間我地經常用望遠鏡裝佢地上堂嘅女校，而且有不少師兄會搵返呢間女校同學做女朋友
 
如今，我地踏入左呢間學校
 
當我隻腳一踩真光範圍果一刻，就已經覺得有好多雙眼望實我地
 
果種感覺…好唔自在
 
正當彭sir同對家教練傾緊計果時，有個小妹妹走過黎碌大雙眼望住我地
 


個小妹妹不停咁上下打量我地兩個，於是，文浩就開聲同佢打招呼
 
「呀…小妹妹呀?」出於禮貌，佢稱呼對方小妹妹，不過，佢中伏了
 
果個「小妹妹」用非常高嘅聲線係到同我地講野
 
「咩小妹妹呀!!!我升F.5架啦!!我邊忽似小妹妹呀!!!」
 
文浩仲係要挑戰眼前呢個「小妹妹」
 
「F.5?唔似，俾盡F.2」的確，呢個小妹妹似F.2多
 
然後「小妹妹」拎起塊羽毛球拍，想一下拍落文浩個頭到，佢好快下意識咁一手捉實塊拍
 
「小妹妹」好用力咁想掹返塊拍，但係一個女仔，又點夠D男仔大力?


 
「喂!!放手啦!!!喂呀!!!死人頭!!!識唔識讓下女仔架」
 
「下!!妳頭先唔係好惡架咩?」
 
「放手啦!!」正當文浩想放手果時，我叫停左佢
 
「同學，妳唔好同佢鬥力先啦，一陣佢突然放手妳就跌低架啦」我好心咁提佢
 
果然，文浩立即放手，而「小妹妹」成功拎返塊拍之餘亦向後跌
 
為左保護「小妹妹」，我立即一個箭步上前，捉實佢隻手，緊緊拉實佢
 
「小妹妹」面紅紅咁同我講左聲唔該之後，就返左去真光妹軍團果邊
 


「賤格!!!」然後，我地兩個換黎一大群真光妹嘅指責
 
睇黎，佢地係有心玩我地兩個