當問題少年遇上問題少女: 39.勇闖女仔房

「唔…唔得架，我….我唔做你妹妹架…唔可以」
 
「點解呀?」
 
「總…總之唔可以啦，係咪連郡主說話都唔聽呀?」
 
「妳今日咁怪嘅?」
 
「你睇下個天丫，好多星星呀」
 




我抬頭望一望個天，係比市區多好多星星
 
「你有冇返過哈爾濱睇星星?」
 
「我當然有啦，果陣仲要係冬天」
 
「凍唔凍呀?」
 
「零下18度呀，妳話凍唔凍?」
 




真係俾呢位郡主激死
 
「我屋企冇你果到咁凍，零下4度」
 
「妳掛住關外?」
 
梓晴望住我「邊到仲有我容身之所?我地滿洲人同漢人一樣，重男輕女」
 
「妳打算點呀?」
 




「咩打算點?」
 
「中學畢業之後囉」
 
「我想申請獎學金讀大學，你呢?」
 
「郡主妳去邊我去邊囉」
 
梓晴面紅紅望住我
 
「真係?」
 
「嗯，我讀唔讀大學都冇所謂，只要我過得開心就可以」
 
「你同我一齊果陣好開心?」




 
「同妳同Polly相處果陣，都好開心」
 
「Polly呀…..」
 
「做咩呀?」
 
「佢好似怪怪地咁，佢又吸返藥」
 
「吸藥?」
 
「佢小學氣管好差，有時打打下波要吸藥」
 
我諗返起上次佢同我講嘅野
 




「上次…佢問我可唔可以留低，幫妳手帶領羽毛球隊」
 
「我帶?」
 
「係呀，唔知佢做咩事」
 
梓晴靜靜地望住個天
 
「如果你想知…你可以去問佢丫，佢一定會答你」
 
「點解妳咁講呀?」
 
「Polly對你有意思呢…..」梓晴邊揈住著人字拖嘅雙腳邊講
 
Polly呢個千金小姐對我有意思?




 
「妳會唔會….誤會左呀」唔知點解，我好怕梓晴會唔開心
 
梓晴檸埋一邊講「我見過你地兩個撓手行街」
 
「但…但係我同佢真係冇拍拖喎」
 
「呃人」
 
我走到佢面前
 
「我冇呃妳呢」
 
梓晴再檸過另一邊，嘟長個咀以示不滿
 




「我又點敢呃妳呢個郡主呢」
 
「咁點解佢可以撓住你嘅?」
 
「呀….呢層」
 
咁我又係衰嘅，自己享受俾Polly撓手嘅時間
 
「哼!你一定係想抽人水」
 
「唔係呢…」
 
今次水洗都唔清
 
「坐返上黎」
 
「喳」
 
當我坐上去梓晴身邊後，佢就雙手撓實我左手，個頭挨住我膊頭
 
「借黎用一用先」
 
「喳」
 
然後梓晴就冇出過聲，直到佢返房瞓
 
不過我同佢返到房時，就發現好多人係我房門口等緊我返黎
 
「嘩，搞咩呀?成班企係到」
 
Michelle就代表成班女仔問我一件事，可唔可以做
 
「妳講啦，我盡可能幫下妳地啦」
 
大家一齊望住Michelle
 
「Chloe想同你交換房瞓….有冇問題?」
 
就咁咋?
 
「Chloe咪過黎囉，我最多當聽唔到啦」
 
「但係人地怕尷尬喎」
 
文浩呢個有異性冇人性嘅人渣，為左同阿靜二人世界而犧牲我
 
「咁妳地叫Chloe過去啦，唉，我今晚瞓大廳啦」
 
「唔洗瞓大廳，你去Chloe之前間房瞓咪得囉」
 
叫我入女仔房到瞓!!!?俾我學校知道會殺頭架喎!!!
 
「喂喂喂，俾學校知道…會殺頭架喎，而且教練佢又係到」
 
「教練默許架啦，唔好出事就得」
 
此時教練行過，佢見成班女仔係我房前都估到咩事
 
「唔好出事呀」講完佢就返左房
 
「入黎啦!!!」Michelle一手扯左我入房