當問題少年遇上問題少女: 41.食早餐啦喂

我自己去刷完牙洗完面之後就返入房，然後班大小姐先慢慢去梳洗
 
梳洗就進入主菜啦!!!佢地唔知係專登定係唔記得左我係房中
 
佢地就咁係到換衫
 
「喂喂喂!!!!!!妳地就咁除呀!?」
 
佢地好似好習慣咁
 




「係呀，你擰轉面啦，我地除架啦」
 
「呀….」
 
「定係你想睇我地換衫呀?」
 
避免尷尬，我決定擰轉身面壁
 
五分鐘後，佢地終於都換好
 




我地就一齊行去食早餐
 
「其實你頭先出房咪得囉」Polly係我身邊講
 
「呀…」
 
「定係你想睇我地換衫呀?」
 
Polly望住我嘅眼神有D奸
 




「呀….呢層….」
 
其實都有d想嘅，試諗下，一班青春少女係你面前換衫，有邊個唔想睇?
 
「你曳啦你，咸濕仔」Polly輕輕力扭我耳仔
 
「咁其實呢…就…」
 
「你咁想睇，咪好似文浩咁，追我地D同學囉」
 
「唔係呢….」
 
此時，梓晴亦伸出佢嘅右手，扭我另一隻耳仔
 
「死變態佬」




 
兩圍檯一齊食早餐，真係好嘈
 
「喂喂，傑少，幫我裝通粉丫」
 
「喂喂，傑少，幫我夾炒麵丫」
 
「喂喂，傑少，幫我斟野飲丫」
 
我不停咁服侍呢班小妹妹，而梓晴同Polly就係到傾計，之後又望住我笑
 
到我坐低果時，梓晴已經幫我準備好一碟炒麵
 
「唔該哂妳」
 




「唔洗客氣」
 
講完佢就將大量芽菜放上我碟麵到
 
「喂喂喂」
 
「我唔鍾意食芽菜呀」
 
「唉….呵呵(女人)」
 
「你都係呵呵生架咋，難道你額娘係哈哈(男人)」
 
「嘩!妳地兩個做咩咁親暱呀?」
 
「只係佢將佢唔鍾意食嘅野俾我食」




 
終於可以食早餐啦
 
然後我見到梓晴遞辣醬俾Polly，而Polly又遞甜醬俾梓晴，佢地兩個都將甜醬辣醬撈埋一齊食
 
「好唔好食架?」
 
「你試下咪知囉」
 
佢地一齊夾麵餵我食
 
「嘩….傑少好犀利喎」
 
原來…甜撈辣，係有少少酸味
 




早餐過後，就係我主持嘅節目
 
成班女仔分為兩組，Polly同梓晴係同一組
 
冇咁靚嘅係一組
 
「ok!!而家我面前，有兩個唔同顏色嘅波，一陣大家一條直線坐好。記住，紅波，係大家嘅右邊，只可以用左手拎。而藍波就係左手邊，只可以用右手拎。一陣妳地每條隊最後果個會去文浩到睇下拎咩色，之後妳地唔可以出聲，要通知最前果位隊員搶波去到我面前。大左邊膊頭就係拎右邊個波。仲有!!!麻煩妳地坐好，好多人走哂光啦。準備….開始!!!」
 
其實呢個環節係考驗下佢地嘅臨陣應變方法
 
兩隊都好聰明
 
Polly佢地隊美女隊好快就搶到個波去我面前
 
熱身者，熱身者
 
「好!!我地增加難度。而家，妳地雙手唔可以掂到隊員身，妳地有一分鐘傾下點做。」
 
一分鐘後…「準備…開始!!」
 
梓晴一見到文浩指示要拎咩色波，就好快拍左兩下手，坐頭位嘅Chloe一聽到就彈出去搶波
 
另一方面，隔離組用頭掂對方身體……
 
「拿，Polly呢組好好，識用拍手呢下去指示隊友。仲要唔洗一個個傳，就已經令第一位隊員知道指示。至於另一組嘛……我都唔知妳地點諗出黎，真係天馬行空，用頭撞前邊果個，俾個Like妳地!!再加On99獎一個」
 
完左個遊戲後，我地就去練波