地下鐵的約會: 月台之上 特別篇
「請勿靠近車門…」
「你有無問個quiz㗎？」我問
「有啊，你放心啦」玥婷說
「我就唔信妳喇，成日講大話，尤其係對我」我揶揄
這是我們在一起的第二年了。
我們的關係意外地長久，沒有因距離而疏遠，反倒是玥婷沒有吸引到很多異性。
「妳幸福肥得太離譜所以無仔鍾意」我經常這樣說
我對自己還是有一點信心的）
「今日放學不如一齊走啦～」玥婷拖著我的手撒嬌
「唔得啊～今日放學要做SBA，聽日陪妳啦」
「吓…好啦」她很失落
幸福的感覺並不是因為物資而產生，是倆人互相影響而帶來的。
此刻我很幸福，因為我愛的人也愛我。
「我走喇，今晚傾電話啦」我不捨地看向玥婷
「嗯，今日你都要加油啊！」
「妳都係啊」我捏一捏她的臉頰，會心微笑
「等陣！」
玥婷哄上前，以迅雷不及掩耳的速度吻了我一下。
春心蕩漾，小鹿亂撞，點解我女朋友咁正！
對上學的絕望一下子就拋諸腦後了。
「屌你又要操卷」Ben大聲地抱怨著
「唔緊要啦，操卷啫」
「你傻撚左啊？平時你仲呻得勁過我㗎喎」
「愛情的滋潤。」我回答
「唉，上次你介紹嗰個都唔係好主動」Ben說，我介紹的正是玥婷的閨蜜Jenny
「大佬啊，你溝女溝到好似作文咁，咁硬」
「你估我想㗎咩？我真係唔識吖嘛」
「其實我都唔識㗎…係佢教返我轉頭」
經歷一天疲憊的校園生活，五點多終於踏出校園。
「喂～」突然有人叫住我
我認得出這把聲音，卻不敢相信。
「燈燈燈凳！我黎接你放學喇」在我面前的玥婷燦爛地笑著
「又會咁突然嘅…」我一時反應不了，老毛病又來了
「你唔想我黎接妳咩…？」慶幸我有一個冷靜又不會大發脾氣的女朋友
「我點會啊…玥婷係我女朋友！世一靚女！」我肆無忌憚地在學校門前抱起她，大叫著
「屌你啦，行啦返屋企喇」玥婷笑著掙扎
儘管有些途人看到我們就會駐足觀看，也許我們成為了他們眼光中越軌的中學小情侶，更可能被老師發現，但面前的她和我仍能在亂世之中保留一顆純真愛人的心。
這無疑更重要。
我們一同經歷了在自修室度過的白色聖誕；
我們一同經歷了一邊做Past Paper一邊等除夕倒數；
我們一同經歷了如高山峻嶺的DSE；
最重要的是她與我一起，關關難過關關過。
放榜那天，是我們在一起的第1180天。
「恭喜你啊陳同學」老師說
我看了一看成績表，我笑了。
我衝出校門，向南昌站方向瘋狂奔去。
身邊的景物飛快略過，我的心就更加緊張。
三年的努力究竟玥婷能否苦盡甘來，還是我害了她？
心有靈犀地，玥婷也向著我學校奔去。
我們在天橋遇上了。
「出左成績未啊」我焦急地問她
玥婷不發一言。
「考得唔好唔緊要㗎，我地一齊面對」她默默把成績表遞給我
「中英5*，數學5，Geog 5** LS 5，中史5*，Econ 5」
「哇…妳好叻啊」我一擁玥婷入懷，感動地流下幸福的淚水
「唔使攬咁緊㗎…透唔到氣，你呢？」玥婷問
「妳自己睇啦～」我遞給她我的成績表
「你都幾好喎～中英5*，數學5，Geog 5**，其他5*」她端詳一下我的成績表
「都係托妳嘅福啦」
「喂浩然哥咁快跑出去做乜啊，都未影相」Ben上氣不接下氣跑出來說
「哦～搵女，老師叫你入去影相啊」
「哦，我帶埋佢得唔得先～」
「邊個理你，禮堂咁撚多人」Ben沒好氣地說
「我。」突然有把聲音傳出
「Jenny？！」玥婷驚訝地說
「吓？」Ben似乎明白了當中的關係
「你就係Ben？」
「係啊…」Ben顯得不知所措
「我同浩然就走先喇」我被玥婷拉著走遠
「喂都未影相…哦～」我倆相視一笑，明白了箇中的含意
「咁依家點先？」
「不如我地攞住張成績表影張相啦」
「呢度？」我問
「有咩問題啊？」
「定係去靚啲嘅地方影啊？」我建議
「唔使啦，幅相有你就最靚」玥婷拉著我的手，舉起手機
愛情令人盲目，愛情更令人成長。
追求浪漫還是細水長流，相信玥婷和我都有了共識。
當然，浪漫仍是不可缺乏的。
大學一年級我和玥婷都選擇修讀教育文憑，至於Ben和Jenny…，成為了一對冤家情侶，一個願打一個願捱。
每次見到他們Ben總是說
「呢個女仔痴線㗎！」
而Jenny就會說
「我痴線你都馴服到啦」
一唱一和，也許這是另一種的愛情？
新一年繁重的大學生活，就像以前那樣，
久違亦如初見，親切又新鮮。大量的assignment和project，令我好不容易才能抽空和玥婷郊遊去。
「哇，站得高看得遠原來係真㗎！」玥婷對著崇山峻嶺大叫
「梗係，唔係你估我帶你咁辛苦行上黎為乜？」
「知你勁喇。我聽人講喺山頂講嘢會有人答㗎，不如試吓啦」玥婷建議說
真幼稚，那明明是回音好嗎？
「好啊，妳先啦」我摸摸她的頭說
「我，最鍾意李浩然個死仆街！」
「我，最鍾意陳玥婷個死八婆！」
我倆相視而笑。
「都話有人回覆㗎啦」我耍耍頭說
「我一早就估到啦」玥婷不忿氣地說
「我估到先」
「我估到先」
「我估到先」
「戇鳩…」玥婷傻笑
「妳戇鳩啲」我說
「啱啊，就係戇鳩先會同你一齊」
「戇戇鳩鳩咁就4年喇，40年都可能」我說著說著，腦海迴唱著那首歌
「最好係咁啦，一齊戇鳩落去」玥婷凝望著我說
「好」我堅定地點頭
這次，小情侶進化成大情侶，面對未來他們不再恐懼，因為有另一個他願意和自己戇鳩下去。
//每天幾分鐘 共你心聲已互通
旅程何美麗 如在愛情小說中//
真·全文完