《我老婆唔係我女朋友》【那些年／日常／校園】 第一至三章: 【第一章】 K歌奇緣（３）
無驚無險又放學，馬飛第一時間走過來夾住我，好像驚死我會即閃。「一齊去㗎吓，唔好放飛機呀。我特登叫咗其他人陪你一齊去㗎。」
「咁邊個去呀？」信個仆街一成，耶穌都會顯靈。
「嗱，阿May啦，墳哥同佢條女Cindy，仲有蘇菲，佢幫手叫緊人陪你喎。」馬飛聲情並茂，企圖𠱁我落疊。
「喂，你昆我呀，先唔好講話搵人陪我，阿May嘅A1班放6點喎，宜家先至4點咋喎。」我擺明車馬唔信條友。
「唏，此言差矣，阿May轉頭就潛出來啦，走堂唔係男生嘅專利喎。」馬飛胸有成竹。
我怔了一怔，呢班友為唱K真係可以去得好盡，有點無奈下作出最後掙扎。「你頭先話蘇菲搵緊人嘛，6送1，計埋你自己都夠6個人，唔使我戥腳啦。」
他一面搖頭一面說：「哈哈，此言差矣，此言差矣（又是呢句口頭蟬）。加州紅呢個promo係6+1人，必須要有7人同行先有一個免費的，咁大棚人真好難搵齊呀。」似乎有感而發。
這時候蘇菲過來跟馬飛「咬耳仔」，我依稀聽到類似「有乜嘢人去」的說話。
蘇菲（Sopie）和阿仙（Cindy）都是典型美少女型的女生，高䠷、長腿、薄施脂粉，她們跟墳哥（Ivan）都是A2班的同學，衣著入時的型男索女一向只跟肥矮毒是點頭之交，無乜兩句。果然不出所料，馬飛直接答蘇菲：「嗱，佢啦，佢啦，阿May。」最後指著我。「佢就戥腳嘅，搵多個人陪吓佢唔唱齋聽歌啦。」