分手後，遇上你: 女孩一生，總會愛錯幾個人

「我送你番去得唔得？」費時比佢話，所以問問安全啲，Jessica望都冇望我就話ok。我地就咁樣一直行一直行，可能佢見我咁耐都唔出聲，最後都忍唔住問我「你唔會就咁打算一直陪我行番去，唔出聲丫哇？」，我聽完之後，將我組織好既問題問佢，「其實你覺唔覺得，我好麻煩，而且又仆街？」，問完我都好奇佢會點答。
「點解你問？發生左咩事？」Jessica見我咁怪，所以問下我。「冇，我岩岩係到諗，明明我已經決定左同你分開，但又因為你同異性有接觸，因而插手你既事，所以我先會咁問你。」講完呢番說話，我同佢都靜左陣，之後佢唉左聲，然後反問我「你覺得女人既一生係點？」我諗左陣，之後慢慢咁講比佢聽。
「女人既一生，味懂事之前，會一直受到父母或身邊既人既照顧，懂事開始，因為受到外界既影響，會慢慢同異性有接觸，慢慢就會開始有感覺，之後就走埋一齊，初初開始，會好想呢段感情係天長地久，唔會分手，但分左手之後，又會係到幻想下一個會點，重重覆覆，重重覆覆咁，直到遇到真正既Mr .right，但當開始拍拖由熱戀期，變為平淡期，女人又會開始諗，係唔係呢個男人已經唔再愛我，點解佢好似變左咁。其實，大家都冇變，只係更接近更真實既對方，如果可以捱得到呢段時間，先夠資格講結婚。女人一生，總會愛上幾個仆街，但最終，都會愛上佢既Mr.right。」
講完呢番說話，岩岩好都到左Jessica屋企樓下，我見時間都唔早，所以我講完再見，就番左屋企温書。而Jessica只係企向屋企樓下，望住我慢慢咁走遠。