分手後，遇上你: 點諗有咩用？

「咁你以家點諗？係唔係仲覺得自己保護唔到我？」Jessica聽完我講之後，反問番我轉頭，「呢個問題已經唔重要，保護唔到你，我可以令自己變強，但如果比唔到幸福你，又點能愛你。」我講完之後，自己都唉左聲。「今次又點解咁諗丫？你又搞乜鬼，成日亂諗野，以前一齊果時又唔見你會咁？」對住以家我，Jessica只能感到無奈。
「因為以前一齊，我只需要去諗，每一日應該點哄你，應該點做你先會開心，如果果日比唔到開心你，我番到屋企真係會自我反省。」以家既我，愈講愈灰，簡直灰到一個點，「咁你覺得，我應該擁有點樣幸福？」Jessica講完呢句，就冇再出聲，我係身上摸左一摸，發覺冇煙，結果我只係去左廚房飲左杯水，就番左出去坐係Jessica身邊繼續講，「我覺得你應該擁有一個可以事事將你放係第一位既男人，因為咁既男人，先配得上咁寶貴既你，你係一個應該比人小心保護既公主，所以你應該揾一個可以保護到你既人，如果果個人連保護到你咁小事都做唔到，又點會保護到你，又點會比到幸福你。」講完之後，我只係望住Jessica，就冇再講咩野，到我走之前，Jessica只係講左一句野，「幸福唔係睇人既能力，係睇果個人既心。」