我叫張元中，我個妹叫張元英（失敗作，爛左尾，貼上黎做record）: 11
11.
「呃...你...唉...！」
我一時之間都唔知講乜好：「你...我一陣果堂係miss to上，一係.我問清楚miss to先..你放學再黎揾我丫...」
唉暫時拖住個四眼妹先...
「...哦...咁...我放學再黎揾你丫」
個四眼妹講完呢句之後，馬上跑返落樓梯
「中仔你傻撚左呀？有女送上門都唔要？」田鼠響個四眼妹走左之後即刻講
「屌，咁都要知發生咩事先得架大佬！」
我答：「條女...拎住我上次份作文...」
「即係『長大後最不想遺忘的東西』果篇？」大師兄問
「係呀...個師妹頭先講咩miss to叫佢寫我喎...都唔知噏乜鳩！」
我直頭懷疑佢係咪拎白卡，介乜紹我姐！痴撚線！
好彩之後係miss to堂，可以好好問佢
「miss to今日晏晝食左咩呀？」
「miss to今日又靚左喎！」
一如以往，miss to一入黎就引黎各男同學既問候
「咪口花花啦，敬左禮先，今日有啲好重要既野講呀」
miss to今日異常興奮咁，唔知做乜
「good morning！」
「good morning miss to...」
一坐返低，大家既開始七嘴八舌
「miss to,你頭先話好重要既野究竟係乜呀？」
「問得好...係關於之前你地交既作文既」
miss to講得輕鬆：「我將你地之前寫既果篇『長大後最不想遺忘的東西』比左我教既4a班睇啦，你地兩班啱啱好男女一樣人數，一人睇一篇」
「吓，miss to你講緊咩呀？」
「係囉係囉！」
「咳咳...」
miss to扮咳兩聲，講得興緻勃勃：「我發覺呢，你地無論男仔定女仔都好啦，實在太少同異性交流啦，所以今次！我miss to為大家整左呢個計劃！」
「乜計劃呀...」
「你地同4a班用今次交換作文既形式互相認識對方，響三個禮拜後再為對方寫一篇人物傳記...」
miss to突然擺哂pose,右手舉前方
「紅線計劃，正式啟動！！！！」
「...吓？！」
眾人口中均打個問號，包括我
「響呢幾日呢，應該就會有人黎揾你地架啦，又或者你地揾人都得既！」
miss to高舉手中填哂名既紙：「嗱，我就mark低哂4a班啲同學仔既抽籤結果架啦，一陣你地逐個出黎拎返對方份作文啦～」
「miss to,乜咁麻煩架！」
「唔參加得唔得呀miss to?」
講真，一聽就知
頭先個四眼師妹，就係抽中左我！！！
真係唔明，點解miss to要搞埋呢啲野
「喂，原來頭先個四眼妹同你係...」田鼠晃然大悟
「睇怕都係」我忍唔住嘆左一口氣
「咩呀咩呀？咩四眼妹呀？」乜都唔看既阿玉追問
田鼠即刻幫我答
「頭先呀，有個四眼師妹上黎揾中仔，話咩miss to叫佢下篇作文寫中仔喎...」
「miss to咁無聊架，如果我係都唔做咁點先！」阿琨特登問
「嘿，你估我冇預到你地有呢個反應咩」
聽到阿琨挑機，miss to當然唔會忍氣吞聲
「邊個唔做既話，今個學年中文直接fail」
「...下......」
響呢間學校入面可以咁亂黎，玩到咁痴線既，我諗真係得miss to
「大家無異議啦嘛！咁...就講一講呢個紅線計劃係咩黎先啦」
miss to再講：「4a班已經抽左架啦，依家你地黎緊要做既，就係同抽到既對象相處返幾個禮拜先，然後呢...再寫返篇人物傳記！」
「ok丫嘛大家？咁我依家就根據返佢地既抽選結果，派返佢地既作品，佢地作品既題目係『我期望的人生』，聽到名既自己出黎拎啦！」
「唉...咁麻煩架」田鼠攤響枱上講
阿玉安慰道
「話唔定，今次可以比你識到靚女師妹呢！」
「我淨係想要你個妹咋...」田鼠對住我講
「你諗下好啦，我個妹依家當左你係痴漢，應該一世都唔會同你做朋友架啦」我冷笑道
「衰仔，幫下口啦！」
田鼠再轉問 「係喎，阿玉你唔擔心咩？」
「我又唔擔心喎...我對啲師弟都冇興趣...」阿玉輕輕一笑
「田鼠應該係講緊大師兄呀」我補充一句
「...下」
「如果大師兄中既係豬西都好啲，如果係靚女就死得啦！」
田鼠好似仲肉緊過阿玉咁：「不過有野樣你可以放心，大師呢五年都係a0,可以肯定佢既審美觀一定唔係低既」
阿玉聽完之後只係擰轉頭趴響枱上
「關，關...關我咩事喎？」
「張元中！」
miss to大聲既一句將我換醒
「仲理我，出去啦」阿玉一野拍我個頭反擊
「得啦」
我走到miss to面前
「呵呵，你都算抽中好籤喎」
miss to拎起份作文，交到我手上：「要同光仔好好相處呀，中仔」
果個四眼妹，原來叫光仔
我拎起作文一睇
《我期望的人生》 ─ 阮真光