我嘅工作就係揀我鍾意嘅女仔拍拖: 再次相遇

係Cherine...，我冇睇錯。我心跳因為佢而加速咗唔少，而成場speed dating 對我嚟講好似更加有意義。之前聽James講佢好似岩岩分手，玩speed dating 都合理嘅。
「咁你呢，你係咪都係咁嫁？」對面嘅女人問我。
「喔...係呀，都差唔多..」我成個腦都係Cherine，根本冇聽佢講嘢。但最神奇嘅係，佢依然繼續不停講嘢，完全冇因為我hea覆而停落嚟。

「叮～」當我地大部分人都食咗前菜，主持就㩒咗鐘轉人。只有男仔要郁，而女仔就咁坐原位就得。最搞笑嘅係，我地要拎埋啲刀叉過隔離...，都唔知邊條契弟諗呢個咁笨柒嘅環節。

換咗位嘅我同呀欣坐，佢望住我笑一笑：
「點呀，有冇識到人。我見你岩岩嗰個都幾好吖～」
「冇呀，唔係特別岩傾。你呢？」
「我嗰個好多嘢講...但我想講嘢嘅時候佢又唔比我講」佢望一望而家係隔離枱嗰個男仔，然後細細聲同我講。


「真係好多奇怪人...」我話。
「唔係嘅，都幾得意」佢講完就有嘢食上。
「係幾搞笑嘅」我講完就食咗啖嘢。
「你估下Kathy或者James有冇機會吖嗱？」佢望一望隔咗好多張枱嘅Kathy。
「好難講嫁喎...緣份呢啲嘢」
「咁又係..」佢嘟起咗個嘴，個樣幾可愛。
我本身想同佢講如果啲人麻麻地我地就走，但Cherine係度，我又點會放過咁好嘅機會。

我留意到佢同緊一個毒撚傾計，條毒撚間唔中會摸下佢隻手，但Cherine冇縮。屌...點解唔縮呀？！我睇到有少少嬲，好似望住自己女朋友比人摸嗰種感覺。呀欣好快留意到我唔對路：
「睇中人呀？」呀欣問我。


「喔..冇呀」我話。
「佢幾靚女呀～如果我係男人可能都會揀佢！」佢assume咗我對Cherine有興趣。
「真係會有機會咩..？」我望住Cherine嘅側面講。
「唔試下又點知喎..！你咪當識個朋友先」
「都係嘅..」我計劃緊我一陣應該點做，因為上次佢拎咗我件衫之後我都仲未Whatsapp佢。

「叮～」一聲將我靈魂拉返嚟枱度。因為諗得太入神，我甚至都冇望過呀欣。佢都好似知我諗嘢而冇打擾我，不過佢一向都好細心。
「你加油啦～」我笑一笑同佢講。
「好～」佢還我一個甜笑。



下一張枱嘅女仔我會將佢納入「不可食用」嘅組別...，為咗廢時咁衰咁冇禮貌，我都嘗試同佢傾下計。佢叫Betty，唔係肥婆而係皮膚就算化咗妝都睇到係幾差，加上眼好細，五官有少少奇怪。但係睇得出佢好努力keep身形，算係Sporty feel。點知傾傾下我地好快就好投入。我地咩都講下，由運動講到去政治、股票...。神奇嘅係，我冇諗過可以同佢傾到咁耐。好老實講，如果佢唔係嗰種我一定要同佢相處嘅人，我真係唔會主動同佢傾計。

有時反而我地放低唒所有心機同目的，唔再以貌取人嘅時候，可能會有特別嘅得著。我地有時候就係因為人地外表上嘅缺點，而失去咗同唔同人交流嘅機會。曾經嘅我見到外貌真係好唔討好嘅女仔，我都會盡可能避免有交流嘅機會。而今次，我反而好想繼續同Betty傾計。我不得不承認，我地係話題上係幾夾，同埋同佢傾計真係幾舒服同有趣。
「叮～」鐘聲又一次轉嚟。諷刺嘅係，Betty係我第一個留contact比佢嘅女仔。可能係因為我都想識咗佢呢個朋友，當然我唔係聖人，講愛情我認我都係會睇樣先...。唔洗好靚，但至少我覺得順眼。
「有興趣我地再講～」我話。
「好呀～隨時！一陣share嗰網比你，真 心 正！」佢話。
「哈哈，好～」

同Betty傾嘅時間過得好快，我好似唔記得咗下兩個就到Cherine...。下一個女仔係一個短頭髮嘅OL，佢嗰種短唔係冬菇頭亦都唔係可愛嗰種短，而係男仔頭嘅短。我自己對呢啲女仔都冇咩興趣，同時佢都好似冇乜嘢講。咁我就索性諗下一陣應該點算好...，我間唔中用眼尾望一望Cherine，佢都好似未見到我咁。

又過咗幾分鐘，終於叮...。我吞一吞口水，終於..要嚟啦。我撥一撥頭髮，深呼吸咗下，而後起身行過去。
「咦..！係你呀？」Cherine好驚訝咁望住我笑。佢今日著咗一套連身裙，冇咩特別嘅剪裁，簡簡單單但著係佢身上面真係好有魅力。佢頭髮有精心咁set過，淡妝，加埋一對淺白金色嘅圓形細耳環....。一句講唒就係好正，搞到我緊張咗好多。
「哦....係呀..你.....又係度嘅？」我有少少口窒咁講。

佢真係好靚，好吸引。係呢一刻嘅我，完完全全被佢迷住咗。我心入面已經暗暗下定決心一定要溝佢，就算衰咗，我都唔會有遺憾。



這世界全部的漂亮
不過你的可愛模樣