我嘅工作就係揀我鍾意嘅女仔拍拖: 別做朋友

我地一直維持住掂住手嘅狀態，而我feel到佢都冇抗拒過我隻手掂住佢，咁我緊係唔會縮返隻手。我嘅心思完全都唔係套戲到，而家成個人都係focus緊係自己隻手度。我嘗試輕輕咁測試佢嘅底線。首先，我將我嘅手指公好溫柔咁上下掃，大概好似平時人地摸頭咁嘅動作。我feel到Cherine個頭輕輕擰咗過嚟，但我唔敢望住佢，只係扮睇唔到，繼續望住銀幕。然後，佢縮開咗佢隻手..。
「好痕呀...！」佢控個頭埋嚟細細聲同我講。
「...！Sorry！」我話。
「唔緊要～」佢話。...屌，我而家勁尷尬..，我唔知佢係唔想我進一步定係真係痕。如果佢真係覺得痕，咁點解唔拖返我...。可能我太急，又或者我啱啱可以拖佢都只係因為套戲令我有咁嘅機會，又係我自己諗太多。

然後成套戲我都冇再認真去睇，只係不停係度loop緊點解我要咁進取，不停後悔自己做過嘅事。
「呀文？」
「嗯？」
「行啦..！套戲完咗啦..！」佢話。我望一望周圍，啲人已經走得七七八八，我究竟係有幾唔留心...
「諗咩諗得咁入神呀...」佢問。


「哦冇...我攰姐。行啦」我起身。
「哦..好啦」佢講完然後沿着樓梯行出戲院，我跟係佢後面。望住佢嘅背影，我睇唔透佢...我想知佢心入面點諗我地兩個嘅關係。如果上帝要賜予人類一個超能力，係我而家呢個狀態，我會毫不猶豫咁揀「讀心術」。問題係讀心術只會令我早啲知道答案，而答案可能係否。我嘅大腦不斷係度諗緊呢啲不切實際嘅嘢，而Cherine沿路都有同我講嘢，但我都冇咩心機去覆佢。
「啱啱係咪話食意大利嘢呀？」Cherine問。
「...」
「喂...，喂！」佢係我面前擺一擺手。
「哦...！嗯？做咩呀？」我話。
「..冇嘢」佢好cool咁講完就擰轉身向前行。我係原地停咗幾秒，跟住快步上去追。
「做咩啦...？」我問。
「冇嘢」佢邊行邊望住前面講嘢。我知道佢一定有嘢，但問題係我唔知點解佢嬲我，我唯有跟住佢行。佢入咗尖沙咀一個商場，然後入咗好多唔同嘅鋪睇。由化妝品開始，睇袋，睇衫，睇護膚品...。我地一齊行咗差唔多成個鐘，但係兩個人一句都冇講過。唉...唔通我今次就要收皮..？但我唔甘心，我甚至乎唔知佢嬲緊啲咩，我唔想死得不明不白。呢種感覺好似我同我啲ex都經歷過，只不過我而家同佢連好朋友都未必稱得上...，頂盡....係隻有摸過女神手仔嘅兵。屌！我好嬲自己，點解咁蠢㗎..。係我諗緊嘅時候，Cherine 擰轉頭向商場出面行。



「我返去啦」佢突然間話。
「下...？」
「我話，我返去」佢再重複多一次。
「你唔食飯呀..？」我好怯，我唔想就咁比人判死刑。
「冇心情」佢講完就繼續行。
「Cherine...！」
「做咩呀？頭先唔係好cool嫁咩」佢話。....明明係你cool...，我cool？
「我..邊有...」我好無奈。
「冇？我係咁同你講嘢你又唔理我，我問你係咪食意大利嘢你又唔應。係戲院又係咁，我叫咗你幾聲你先應」我地企咗係商場門口，好似普通情侶鬧交咁。
「我....」！！！原來係嬲緊呢樣..！


「我唔係有心...」我話。我只可以咁講。
「咁你講呀，點解神不守舍咁」佢叉起雙手係心口。雖然佢而家嬲緊，但我不得不講嘅係，佢嬲嘅樣....好撚Cute...。屌..！而家唔係諗呢啲嘅時候，點答佢好呀。
「我真係有啲攰...，可能琴晚訓得唔好。Sorry呀，我真係唔係有心」我道歉。
「....，真係好攰..？」佢開始冇咁嬲。
「嗯...有少少」我繼續講。
「咁，你洗唔洗返屋企唞下呀」佢有少少擔心嘅語氣。
「唔洗啦，出咗嚟出面唞下氣，好咗啲啦」我話。
「咁好啦」
「咁..，你食埋飯先？」
「食啦食啦，怕咗你..」佢話。呼...，至少安全咗拆咗呢個炸彈。

我車咗佢去中環，我book咗間意大利餐廳。聽朋友介紹呢度嘅意粉係香港算係數一數二，食完唔會失望。會book一間咁貴嘅餐廳仲有另一個原因，就係我本身想趁住浪漫嘅氣氛，睇下有冇機會表白。

「有人話，同一個女仔出街三次唔表白就會比人當成朋友」



呢句雖然係戲入面嘅對白，但我一直都覺得好合理。不過而家面對面望住佢，我怕我冇咁嘅勇氣。加上今日拖佢手嘅反應，我諗諗下好似都係將個計劃順延落去會好啲...。
「不如我地食呢個呀？」Cherine 望住我，隻手指住menu上面。
「好呀！我都可以，睇下你鍾意食咩。不過呢度啲意粉好出名，我地可以叫一個」我話。
「好呀！我再睇下先」佢繼續拎住個menu睇。而我，又再進入十五十六嘅內心戲.....。如果表白衰咗，我怕我以後都見唔到佢。

「但係你接唔接受到同佢做朋友先？」內心嘅我問自己。
接唔接受.....唔得...！如果要我望住佢同另一條仔一齊，我寧願唔做朋友。
「咁咪去囉，你都咁講」
咁如果衰咗....
「又唔見你諗如果得咗會點」
係喎...可能得呢。
「場波都未踢就打定輸數，點贏？」
真！但係我淆底...
「咁收皮啦，繼續返屋企打飛機啦。收工，唔洗諗」
你條仆街...用激將法。咁如果....，喂，死咗去邊呀。


「唉得啦，唔表白，唔好再煩我」
.....屌你呀，咁撚串...。表啦表啦，屌！驚西咩。而當我決定咗之後，我就逼自己係今日內表白。

我地食完飯去咗中環碼頭嗰邊行下，行到天橋尾，係往尖沙咀嘅天星小輪入口，有三兩個人係度busking緊。
「聽下咯」佢話。
「好呀，還掂都未咁晏」我話。觀眾好自然咁圍咗一個半圓形，而我哋兩個亦開始行入人群，成為半圓形嘅一份子。
「叮叮叮叮」電子琴嘅聲響起。
「哇...呢首好聽」我話。
「你又知係咩歌？」佢問。
「聽前奏就知阿～」
「咁犀利...！」
「你應該都聽過，可能一陣你就知」我笑一笑咁講，音樂繼續響起。

習慣聽你分享生活細節
害怕破壞完美的平衡點



「保持著距離一顆心的遙遠
我的寂寞你就聽不見」我跟住主唱一齊細聲唱。

我走回從前你往未來飛
遇見對的人錯過交叉點
明明你就已經站在我面前
我卻不斷揮手說再見

「以後別做朋友～」我唱。
「哦...！呢首我識」佢話。
「哈哈，我都估到一到Chorus你就識」我話。
「係呀哈哈。不過估唔到你唱歌都幾好聽喎～」佢話。
「唔係啦....，麻麻地炸...」我尷尬咁話。
「唔係呀...。我幾鍾意...」佢話。


「多謝...」我話。佢讚完我就唔敢再唱，可能因為怕羞。
「你繼續唱阿」佢話。
「唔啦....，聽佢唱」
「下～但我想聽你唱多啲喎」佢望住我講。
「下.....嗯...」我即刻變到勁緊張。自己跟節奏唱同你鍾意嘅人專心聽你唱完全係兩回事，後者甚至乎緊張過全民造星參賽者總決賽嘅表演。但佢咁講到，我都要頂硬上。

「劃一個安全的天空界線
誰都不准為我們掉眼淚
放棄好好愛一個人的機會
要看著你幸福到永遠」我唱。啲人成日話，開心嘅時候聽旋律，傷心嘅時候聽歌詞。我既唔開心，又唔傷心，百感交集嘅我聽到嘅係意境。係一段警告我嘅歌詞，我唔表白就會做朋友，就會看著你幸福到永遠...。所以我決定，今晚，點都要做個了結。

以後別做朋友 朋友不能牽手
想愛你的衝動 我只能笑著帶過
最好的朋友 有些夢 不能說出口
就不用承擔 會失去你的心痛