第二日,我差唔多三點幾四點先起身。我平時習慣瞓覺嘅時候會熄數據,我起身一開返數據就收到好多唔同人嘅訊息。我碌咗幾下,見到Rainbow send咗好幾個錄音嚟,每個都好長。上面仲有幾個朝早send出嚟嘅訊息,不過比佢delete咗。我冇㩒入去聽住,因為我見到公司group入面有人tag咗我。
「@呀文,今晚你個場仲差兩個,不過夜少少應該有多兩個客會嚟。我一陣再話你知」 - Tom 11:37
「@呀文,最後confirm咗多一個,嗰個唔洗搞佢,熟客嚟,到時會話比你知。我會搵多個新人跟你,佢會同你meet up咗先。你地今晚六點半去咗個場先,到時你帶一帶住佢」 - Tom 02:10
「得,我帶佢」我拎起手機覆咗句。我地已經好耐冇收過新人入嚟,一來呢個職業唔係啲咩好風光嘅嘢,二來要入行嘅話一定要有人推薦。仲有一個潛規矩係如果要辭職嘅話多數都要帶一個新人入嚟,雖然有啲人都無視呢條規矩,但大部分人都係好嚟好去。

我覆完公司之後就㩒返入去Rainbow啲錄音度,我將手機嘅聲較到最大,然後播咗佢出嚟聽佢把性感嘅聲。
「呀文,我知好多嘢你都決定咗。不過我想你知道,我望住你咁真係會好心痛你。我一直都以為自己好了解你,但偏偏係有啲時候,我真係唔明點解你要咁執著...,都過咗咁耐啦。我知我咁講唔係幾好,但佢真係唔值得你再唒時間。唉,不過有樣嘢我仲係咁了解你,就係你一定聽完呢個錄音之後都唔會改變主意」
我聽完之後個心暖一暖,至少我知道佢會一直係我身邊陪住我。而佢都講得啱,因為我決定咗嘅嘢,好難有人可以改變到。
「拳館嗰度你得閒就去啦,我知你呢份工有時可以好唔得閒,唔洗因為要陪我就勉強去啦。同埋….」佢錄咗一段都幾長嘅錄音,內容大概都係一啲關心我嘅嘢。
唔識Rainbow嘅人會覺得佢成日西口西面,但佢對交心嘅朋友真係好好。識到佢算係我返呢份工嘅最大收穫,係佢陪我渡過好多人生嘅低潮。



我食咗個飯,執一執個樣就出咗門。直接揸咗架車去荃灣,然後上今晚個場。我一上到去同門口嘅侍應打咗聲招呼就入去,入面坐咗兩個人,一男一女,兩個都好後生。
「咦?你地兩個都係今日返?」我問佢地。
「嗯..」女話
「係呀」男話。
「哦~我以為得一個,我問問先」然後我打咗比呀Tom,佢話有個男人放咗飛機,所以搵多咗個人頂。
「你地邊個係第一次返?」我問。
「我…我第一次」個女仔話。
「好,咁你過一過嚟先」我帶住個女仔去咗餐廳入面嘅員工休息室度坐。



「你叫咩名?」我問。
「叫我Mayble就得啦」佢話。佢梳咗個斜陰,長頭直髮到心口,高大概一六三到。不過佢個樣同把聲都係偏細個,後生可愛嗰種。呢啲女仔一陣落到場應該都冇咩大問題,除非佢性格上有咩缺陷。
「好,Mayble,我叫呀文。今日會輕輕講下係度做有咩地方要注意,同埋有咩唔可以做」我話。
「好」佢好專心咁聽我講嘢。
「首先,我地公司……」我開始同佢講唒啲注意事項,然後就一齊行返出去。我望一望鐘,已經七點,啲客都差唔多到。
「好啦,差唔多啦,你地要準備啦」我話。
過咗一陣,啲人開始慢慢入嚟。我坐咗係其中一個沙發上面㩒手機,順便觀察緊今晚嘅客。我留意到一個紮髻嘅女仔,佢個樣好甜,身形偏瘦,雖然波唔大但整體都唔錯。重點係佢好白,係白到好唔似香港人嗰種。我行咗過去同今日返工嘅另一個男仔傾,同佢講我已經mark咗人。好彩大家揀嘅都唔同,唔洗有咩衝突。

過咗一陣,終於正式開始。我慢慢咁行過去「被安排」嘅位置坐低,而對面就係好白嗰個女仔。
「嗨~你好呀,我叫呀文」我用一個好溫柔嘅語氣再加笑容去講。


「我叫Kylie」佢話。直覺話比我聽佢係嗰種唔係拍好多次拖,但好多人追嘅女仔。
「你係咪mix嫁?我見你好特別」我笑一笑咁問。
「你又知嘅..!我係呀,我爸爸係日本人,媽咪係香港人」佢有啲驚訝我咁問。
「哈哈,咁你咪識日文囉?」我問。
「識呀~我係屋企會講日文同廣東話」
「哦~我都想學日文..之前有學過但返工太忙就冇繼續學..」我話。
「噢~你做邊一行嫁?」佢問。
「我做金融嫁,你呢?」我緊係唔係做金融…,因為我而家嘅工作…

係全職嘅speed dating媒
已有 0 人追稿