我嘅工作就係揀我鍾意嘅女仔拍拖: 勸說
錫下錫下我地又做咗一次…。雖然連覺都未瞓醒就要做運動係有啲攰，但對住佢嘅魔鬼身材，幾眼瞓都好有性慾。做完之後我地又抱住瞓咗一陣，起身嘅時候已經差唔多十一點半，執一執嘢就要checkout。
「你一陣去邊呀？」我問Rainbow。
「冇呀，冇地方去。我本身係諗住休息下，周圍行下hea下就算」佢話，然後拎起咗我送比佢嗰支香水，對住自己條頸噴咗兩下。
「I see，哇呢隻味好襯你～」我就估到啱佢。
「哈哈，你送嘅點都襯嫁，你咁好taste 。係啦，咁你呢？一陣去邊呀？」佢問。
「咁識講嘢嘅～冇呀我都冇plan，一放長假就唔知做咩好」
「你有得放長假已經好好啦！我聽日又要返」佢反手扣緊個bra扣。
「我幫你啦。唉，行行有本難念的經啦…」我幫佢扣。
「你諗住繼續做咩？」佢拎起件衫準備著。
「唔知呀..，但我要轉工都唔知做咩好啦。而家唔上唔落，我又唔想轉返啲低人工嘅工做」我都著緊我條褲。
「唔好做啦…」佢望住我講。
「…」
「文」
「嗯..？」
「聽我講」佢話。
「嗯..」
「好冇？」佢問。
「..」
「我知唔係錢嘅問題…，但係無謂再辛苦自己..」佢話。我知佢想講咩，但要我放棄我真係做唔到。
「…行啦，夠鐘checkout 啦」我話。
「唉….，行啦」佢拎起個手袋。
Checkout完我地係附近食咗一間幾好食嘅米線，然後兩個個無所事事嘅人就係尖沙咀周圍行下咁。我地分咗手之後每次見面都有個默契，就係我地出街唔會拖手。可能係因為我唔想佢撞到熟人又要解釋，同埋我都唔想搞到人地以為佢有男朋友。我係真心想佢搵個錫自己嘅人，但心入面都有諗過如果佢有男朋友，我地嘅關係都會變。不過呢啲嘢隨緣啦，世界上冇咁多好事發生，想要啲一嘢就要放棄一啲嘢。係我諗緊嘢嘅時候，Rainbow 捉咗我入一間運動用品鋪。
「陪我去一個地方好冇？」佢問。
「可以呀，去邊？」
「你一陣咪知～」佢講完就拎起一件運動衫。
「懶神秘咁～」我話。
「你著L應該啱」佢將一件全黑嘅運動衫放咗係我心口度碼。
「唔洗回禮比我喎..」
「拎住」佢完全冇理我，我拎咗件衫佢就買埋條運動褲。然後行去女裝都買咗一套全黑嘅運動衫褲。
「搞咩呀～」我好好奇佢想做咩。
「得啦就到啦」佢話。我揸住袋衫跟住佢係尖沙咀嘅大街小巷之間穿梭，行多咗大概五分鐘，我地行到一棟舊樓嘅樓下。佢行咗入去，我跟住佢入咗𨋢…。
「叮～」𨋢到咗二樓，一打開門…..入面全部都係一個個沙包…。可能因為係中午時間，入面得零星幾個人打緊。拳館入面仲有個擂台，而擂台入面有兩個人對打緊。
「你想打拳..？」我望住對打緊嘅兩個人講。我真係冇估到佢帶我去打拳…。
「你話陪我吖嘛～」佢奸一奸笑，然後行入拳館。
「係…..」我好無奈咁講，然後死死氣行咗入去。我唔抗拒打拳，因為我平時都鍾意做運動。問題係喺我完全冇準備嘅情況下，我唔係好想做咁劇烈嘅運動…。唉..，唔掛得要買運動衫。
「好耐冇見喎！帶埋男朋友嚟呀？」一個幾後生嘅教練問Rainbow。
「忙呀嘛～」Rainbow冇解釋，只係除咗對鞋係門口。
「你好..」我同教練點一點頭
「你好你好～你想試堂先定直接報？」教練問我。
「我..」
「佢報12堂呀～你除鞋先啦」Rainbow幫我搶答，然後笑笑口咁望住我。佢就係一個咁主動嘅女仔，主動到幫你決定埋。當然，有啲男仔會好反感。而我呢啲大部分嘢都冇咩所謂嘅人，就唔會反感。
「下..？哦..」我呢一刻好似比街頭啲健身sales夾上去簽約嘅感覺…，甚至乎有少少懷疑Rainbow有傭分。不過我知佢唔會，應該純粹想我陪佢。
「你第一次上？」教練問我。
「係呀」我話。就係咁，我同Rainbow換咗套衫，然後一齊打拳。
兩個禮拜好快就過，除咗無啦啦多咗每期星三次嘅打拳，其他時間都係自己hea下、打下機、睇下書咁渡過。今日係假期嘅最後一日，我聽日收到order要去荃灣嘅一個場去做嘢。臨瞓前，我係床上面碌緊手機，突然間Rainbow打嚟。
「喂？」我話。
「呀文..」佢好似有啲唔開心。
「做咩啦…？」
「你聽日係咪又要返」
「…」我唔忍心答佢。
「唔好去啦..，乖啦，聽我講」佢話。
「得啦我冇嘢喎～咪好似平時咁繼續落去」
「點解一定要做呢個姐…，你做其他嘢都得架..」
「….。你知道原因架..」我話。
「你當為咗我，唔好去啦。最多你想做咩我都陪你，我仲可以介紹工比你返，你就唔好去啦。我唔想睇住你咁樣，點解仲要勉強..」
「多謝你呀Rainbow，我知你好錫我。但係有啲嘢，我想搞清楚先…，我未係時候要走。我知道如果我而家轉工，我一定後悔一世。我好明白自己做緊啲咩，我都希望可以理解…，因為我信你係最了解我嘅人」我怕佢再講落去我心軟。
「….我就估到會係咁」佢有啲失望咁講。
「乖啦，放心喎，我應承你我仲會去陪你打拳」
「…嗯。咁..你早啲瞓啦」佢話。
「好～早唞啦」我話。
「早唞..」
有啲嘢，我一定要盡快搞清楚，已經唒咗好多時間。我知道我咁做可能好蠢，但我控制唔到我自己，因為..
我真係好想同佢一齊
我未夠重傷 這雙腿會走
想找你驗過我心死沒有